Ano ang Matuod Parte sa mga Anghel?

Gusto ni Jehova nga mahibaluan naton ang parte sa iya pamilya sa langit. Nalakip sa sini ang mga anghel, nga ginatawag mga “anak sang Dios.” (Job 38:7) Ano ang ginasiling sang Biblia parte sa mga anghel? May mahimo bala sila sa mga tawo? Ang tanan bala nga anghel bahin sang pamilya sang Dios?

1. Sin-o ang mga anghel?

Ginhimo ni Jehova ang mga anghel antes pa niya ginhimo ang duta. Pareho sa iya, mga espiritu man sila nga indi makita nga nagaistar sa langit. (Hebreo 1:14) May minilyon ka anghel, kag pinasahi gid ang kada isa sa ila. (Bugna 5:11) ‘Nagapamati sila kag nagatuman sa tingog ni Jehova.’ (Salmo 103:20) Sang una, ginagamit ni Jehova kon kaisa ang mga anghel para ipalab-ot ang iya mensahe, kag para buligan kag luwason ang iya katawhan. Subong, ginabuligan man sang mga anghel ang mga Cristiano nga makita ang mga tawo nga gusto magtuon parte sa Dios.

2. Sin-o si Satanas kag ang iya mga demonyo?

Ang iban nga anghel nagrebelde kay Jehova. Ang una nga anghel nga nagrebelde amo “ang isa nga ginatawag Yawa kag Satanas, nga nagapatalang sa bug-os napuy-an nga duta.” (Bugna 12:9) Gusto ni Satanas nga sia ang maggahom, gani ginsulay niya si Adan kag si Eva, kag sang ulihi gin-impluwensiahan man niya ang iban nga anghel nga magrebelde upod sa iya. Ang nagrebelde nga mga anghel ginatawag nga mga demonyo. Ginpalayas sila ni Jehova sa langit kag gintagbong sa duta, kag laglagon sila sa ulihi.—Basaha ang Bugna 12:9, 12.

3. Paano kita ginapatalang ni Satanas kag sang mga demonyo?

Ginapatalang ni Satanas kag sang mga demonyo ang madamo nga tawo paagi sa demonismo ukon espiritismo. Malain gid ini kay nagapakig-angot ang isa sa mga espiritu. Halimbawa, ang iban nagapamangkot sa mga manugpakot kag manughimalad kag nagapabulong sa mga espiritista kag albularyo. Napatalang man ang mga tawo kay abi nila maistorya nila ang mga patay. Pero si Jehova nagpaandam sa aton: “Indi kamo magdangop sa mga espiritista, kag indi kamo magpamangkot sa mga manugpakot sing mga hitabo.” (Levitico 19:31) Ginpaandaman niya kita para maproteksionan kita kay Satanas kag sa mga demonyo. Mga kaaway sila sang Dios, kag gusto nila nga halitan kita.

USISAA PA GID

4. Ang mga anghel nagabulig sa mga tawo nga makatuon parte kay Jehova

Indi ang mga anghel sang Dios ang nagabantala sa mga tawo. Pero mahimo nila buligan ang mga sumilimba sang Dios nga makita ang mga tawo nga gusto magtuon parte sa iya. Basaha ang Bugna 14:6, 7, dayon binagbinaga ini nga mga pamangkot:

• Ngaa kinahanglan naton ang bulig sang mga anghel sa pagbantala?

• Nalipay ka bala kay ang mga anghel nagabulig sa imo nga makita ang mga tawo nga gusto makabati sang mensahe sa Biblia? Ngaa?

5. Sikwaya ang espiritismo

Kaaway ni Jehova si Satanas kag ang mga demonyo. Gani mga kaaway man naton sila. Basaha ang Lucas 9:38-42, dayon binagbinaga ini nga pamangkot:

• Ano ang ginahimo sang mga demonyo sa mga tawo?

Indi naton gusto nga maimpluwensiahan kita sang mga demonyo. Basaha ang Deuteronomio 18:10-12, dayon binagbinaga ini nga mga pamangkot:

• Paano kita maimpluwensiahan sang mga demonyo kag paano sila makapakig-angot sa aton? Ano nga klase sang espiritismo ang ginahimo sa inyo lugar?

• Insakto bala si Jehova nga dapat naton likawan ang espiritismo? Ngaa?

Tan-awa ang VIDEO, dayon binagbinaga ang masunod nga mga pamangkot.

VIDEO: “Pamatuki ang Yawa” (5:02)

• Makahalit bala ang anting-anting nga ginsuksok sang bata ni Palesa? Ngaa?

• Ano ang dapat himuon ni Palesa para indi sia mahalitan sang mga demonyo?

Ginasikway sang matuod nga mga Cristiano ang mga demonyo. Basaha ang Binuhatan 19:19 kag 1 Corinto 10:21, dayon binagbinaga ini nga pamangkot:

• Ngaa importante nga dapat mo sunugon ukon ihaboy ang bisan ano nga butang nga ara sa imo nga may labot sa espiritismo?

6. Madaug mo si Satanas kag ang iya mga demonyo

Ang mga demonyo ginapangunahan ni Satanas. Pero ang matutom nga mga anghel ginapangunahan sang arkanghel nga si Miguel, nga isa pa ka ngalan ni Jesus. Daw ano ka gamhanan si Miguel? Basaha ang Bugna 12:7-9, dayon binagbinaga ini nga mga pamangkot:

• Sin-o ang mas gamhanan? Si Miguel kag ang iya mga anghel ukon si Satanas kag ang iya mga demonyo?

• Sa banta mo, dapat bala mahadlok ang mga sumulunod ni Jesus kay Satanas kag sa iya mga demonyo?

Madaug mo si Satanas kag ang iya mga demonyo. Basaha ang Santiago 4:7, dayon binagbinaga ini nga pamangkot:

• Paano mo maproteksionan ang imo kaugalingon kay Satanas kag sa mga demonyo?

SUMARYO

Ang matutom nga mga anghel nagabulig sa aton. Si Satanas kag ang iya mga demonyo mga kaaway ni Jehova, kag ginagamit nila ang espiritismo para patalangon ang mga tawo.

Rebyu

• Paano ginabuligan sang mga anghel ni Jehova ang mga tawo para makatuon sila parte sa iya?

• Sin-o si Satanas kag ang iya mga demonyo?

• Ngaa dapat mo isikway ang espiritismo?

DUGANG NGA IMPORMASYON

Basaha ang ebidensia nga si Jesus ang arkanghel nga si Miguel.

“Sin-o si Miguel nga Arkanghel?” (Artikulo sa website)

Binagbinaga ang ebidensia nga ang Yawa indi lamang simbulo sang kalainan nga ara sa sulod naton.

“Matuod Gid Bala ang Yawa?” (Artikulo sa website)

Basaha kon ano ang ginhimo sang isa ka babayi para mahilway sia sa impluwensia sang demonyo.

“Nakasapo Sia sing Katuyuan sa Kabuhi” (Ang Lalantawan, Hulyo 1, 1993)

Hibalua kon paano ginagamit ni Satanas ang espiritismo para patalangon ang mga tawo.

“The Truth About Magic, Sorcery, and Witchcraft” (The Road to Everlasting Life, bahin 5)