Tan-awa ang mga Pagpakamaayo sang Paghiusa sa Ginharian!

“Ang tanan nga makakita sa ila magakilala sa ila, nga sila amo ang kaliwat nga ginpakamaayo ni Jehova.”—ISAIAS 61:9.

1. Anong modernong aman ni Jehova ang nagapakita sang iya kaalwan sa kadam-an nga wala pa makakilala sa iya? (b) Paano nakilal-an ang iya kaugalingon ginapakamaayo nga katawhan?

KUTOB sang 1914 ang langitnon nga Hari ginpalingkod kag ginhatagan sing gahom nga maggahom. Kag gin-aman ang dutan-on nga organisasyon sa idalom sang “mga prinsipe” nga nagagahom tungod sa katarungan mismo. (Isaias 32:1, 2) Sa sini tanan, si Jehova napamatod-an nga maalwan sa tanan nga ginagutom kag ginauhaw sa pagkamatarong. Kag ang mga gutom kag mga ginauhaw nagadugok sa katawhan nga ginapakamaayo ni Jehova. Apang paano nila sila makilala? Bantog bala sila sing sosyal, sing politikal ukon pinansial? Indi, wala sa sining mga rason nga makilal-an sila. Bangod ini kay ila ginapabanaag ang ila maalwan nga Dios paagi sa ila kahanda nga ipaambit sa iban ang mga pagpakamaayo nga ila na nabaton.

2. Nahisuno sa Isaias 32:8, ano nga kinaiya ang makit-an sa tunga sang mga alagad ni Jehova sa duta karon, kag bangod ina sa pagpamati nila sa anong laygay sang ila lider?

² Gintudloan sang maalawan nga Dios ang iya mga alagad nga magmaalwan man. Nahanungod sa isa ka tawo nga maalwan sing balatyagon ang Isaias 32:8 nagasiling: “Apang ang mga maalwan nagapahito sing maalwan nga mga butang; kag sia magapadayon sa mga butang nga maalwan.” Subong nga ginpahigad ni Jesus ang iya kaugalingon nga kabubut-on kag gindingotan ang iya kaugalingon sang madamung butang agod matuman ang iya hatag-Dios nga sugo nga ibantala ang mahimayaon nga maayong balita sang Ginharian sa iban, ang iya man mga sumulunod handa nga himuon man ina. Ginapamatian nila ang laygay ni Jesus: “Hatag kamo, kag kamo hatagan. Sukub nga maayo, dinasok, naligoligo nga nagaawas, ihatag nila sa imo sabak. Kay sa talaksan nga ginataksan ninyo takson kamo liwat.” (Lucas 6:38) Si Jehova kag si Cristo Jesus amo ang makasarang kag magabalus sina nga kaalwan sang ila mga alagad paagi sa paghatag sa ila sing kaayawan, kalinong sa hunahuna kag kalipay sa bunga sang ila matutom nga pag-alagad nga nagadalahig sa intereses sang Ginharian.

3. Paano ipaanggid ang panimuot sang matutom nga mga alagad ni Jehova sa iya sadtong sa Cristiandad kag sa iya mga sumalakdag?

³ Ang maalwan, mapisan nga panimuot sang mahinatagon nga manugbantala sang maayong balita kabaliskaran sa iya sang iban. Ang manalagna sang Dios nagahambal nahanungod sa kapahamakan para sa mga babayi nga dimahalungon nga ‘mahigugmaon sa kasulhay; sa dimatutom nga Jerusalem. (Isaias 32:9-14) Ang ila panimuot mahimu magapahanumdum sa aton tuhoy sa iban nga nagaangkon nga mga alagad sang Dios kag ni Cristo, apang indi mapisan ukon makugi sa pag-alagad kay Jehova. Sa pagkamatuod, ayhan hunahunaon naton yadtong yara sa Cristiandad kag yadtong wala gid nabalaka nahanungod sa ginagutom kag ginauhaw nga kadam-an. Ang ila kasaku sa sekular nga mga bagay, nga wala nagahunahuna nga magmasaku sa hilikuton nga ginsugo ni Jehova para sa sini mismo nga tion sang maragtas, magapahamak sa ila, subong nga ang kapahamakan ginabuylog sa kapaslawan sa pag-ani.

4. Ano nga palaabuton ang nagahulat sa tanan nga nagapakig-angot sing padayon sing dibunayag sang Pulong sang Dios?

⁴ Kasubo kag kalaglagan lamang ang yara sa unahan sang Cristiandad kag sang iya mga sumalakdag kag mga manugsuporta. Ang espirituwal nga gutom kag ang resulta nga pagdiutay sing populasyon amo ang resulta sang iya pagkadimaalwan kag pagkadimabungahon sa pag-alagad kay Jehova. Sanglit ining tanan nga butig nga Cristiano wala magtanum kag magbunyag sing maayo, nga wala nagagamit sang Pulong sang Dios sing bunayag, indi obligado si Jehova nga ‘patubuon ini.’—Ipaanggid ang 1 Corinto 3:6-9.

Maayong Balita para sa Matutom

5. Ano ang gintagna sa Isaias 32:15, kag upod ang anong makalilipay nga mga hitabo tubtob karon nga tuig 1984?

⁵ Sing makapalig-on para sa nagahulat sing mapailubon kay Jehova samtang matutom nga nagapalapnag sang intereses sang Ginharian nga gintugyan sa ila, yara ang maayong balita. Narekord ini sa Isaias 32:15 sa sining pinamulong: “Tubtob nga ipasagahay sa aton ang espiritu gikan sa hitaas, kag ang kamingawan mangin mabungahon nga latagon, kag ang latagon nga mabungahon kabigon subong sang talon.” Ang balaan nga espiritu sang Dios ginpasagahay na sa iya modernong-adlaw nga mga saksi, subong sadto anay sa nagahulat nga mga apostoles kag mga disipulo sang Pentecostes sang 33 C.E. (Binuhatan 2:1-4; 14-18; Joel 2:28, 29) Subong sang una, kag amo man karon, ang resulta amo nga ang matutom nga mga alagad ni Jehova sa duta nagsaku sang ila kaugalingon sa hilikuton nga paghimu sing dugang nga mga disipulo. Labi pa sang 1919 kag 1922 ginapasagahay ang espiritu ni Jehova sa iya katawhan, kag labi na sang 1922 daku nga pangpahulag ang ginhatag sa hilikuton nga pagbantala sang Ginharian. Ini nga hilikuton nagpadayon kag naglab-ot tubtob karon nga tuig, 1984, walay sapayan sang magamo nga kahimtangan nga nagalibot sa duta. Ang kadamuon sang maalwan nga mga manugbantay sang maayong balita nagdugang kutob sa diutay nga kadamuon nga 7,000 ukon 8,000 sang 1922 tubtob sa dakung kataason nga 2,652,323 karon.

6. Ano ang iban pa makalilipay nga epekto sang pagpasagahay sang balaan nga espiritu sa dutan-on nga organisasyon ni Jehova?

⁶ Ang ‘ginpasagahay nga espiritu’ pat-od nga nagresulta sa pagkamabungahon. Wala na kita nagapakig-ambit sa kamingawan nga kahimtangan sang kalibutan ni Satanas, ni sa espirituwal nga tiggulutom sa pagpamati sa Pulong ni Jehova. (Ezequiel 36:29, 30) Kutob sang Pentecostes sang 33 C.E. padayon, ang Dios nagtanum sang “dalagku nga kahoy”—mabakod, makugi nga mga Cristiano—sa espirituwal nga kahimtangan sang iya katawhan. Inang daku nga “mga kahoy,” nga mabungahon, “ang gintanum ni Jehova,” nagtubo kag nagdamo tubtob nga isa ka matuod nga talon samtang ang makita nga organisasyon sang mga sumilimba ni Jehova nagahatag sa tanan nga mga kinabubut-on sang makapabugnaw nga handong kag espirituwal nga pagkaon gikan sa ila Dios.—Isaias 61:3.

7. Ano ang nagtiklod sa dakung kadam-an sang bunayag-sing-tagipusuon nga magdampig sa makita nga organisasyon ni Jehova?

⁷ Ang bunayag-sing-tagipusuon nga mga tawo nga nagadugok karon sa makita teokratiko nga organisasyon ni Jehova naganyat sa mga katingalahan sang espirituwal nga paraiso. Wala bisan diin sa duta nga nakita nila ang pagkamatarong kag katarungan. Natak-an na sila sa wala sing pagtuo nga mga klerigo, makinaugalingon nga mga politiko kag mahamkunon nga kadalagkuan sa komersio. Ang ila mga mata nabuksan sa isa ka katilingban sang mahinadlukon sa Dios nga mga lalaki kag mga babayi sa tunga sang mga buangbuang kag mga walay prinsipio nga wala gid mapaputi kag mahimu nga daw dungganon tulokon; diin ang didiosnon kag dicristiano nga paggawi ginbadlong kag ang mga nagahimu sang kahigkoan kag kalautan ginadisiplina dayon.

8. Paano natuman ang Isaias 32:16 sa katawhan ni Jehova karon?

⁸ Ang manalagna nagapadayon sang iya ginhatag sang Dios nga mensahe, nga nagasiling: “Nian ang katarungan magapuyo sa kamingawan, kag ang pakamatarong magapabilin sa latagon nga mabungahon.” (Isaias 32:16) Sa pagkamatuod, ang katarungan kag pagkamatarong nagapuyo sa makita teokratiko nga organisasyon ni Jehova. Huo, ginakilala sang tanan matuod nga mga alagad sang Dios nga tanantanan nga yara sa ila kag ginaagom, lakip ang ila kalahamut-an nga tindog kay Jehova, nagkari sa ila subong dibagay nga kaluoy. Ang ila pagkamatarong amo ang ila Dios.

9. Paano ipaanggid ang hinimuan sang matutom nga mga saksi ni Jehova sa iya sang mga hinimuan kag panimuot sang klero sang Cristiandad?

⁹ Tuhay gid ini katama sa nagapakamatarong sa kaugalingon kag sa nagapakunokuno nga tindog sang mga kilala sa Cristiandad. Pagkamatarong ini nga napamatod-an sang binuhatan—binuhatan nga nagadala sing kadayawan kay Jehova kag nagabenepisyo sa iya matinumanon nga tinuga sang tanan nga rasa kag hambal. Ang isa sining binuhatan amo ang pagbantala sa Hari nga nagagahom na karon suno sa kabubut-on sang Dios. Wala na sing iban pa nga organisasyon sang katawhan ang nagabantala sinang makalilipay nga kamatuoran. Kag ang tagsa ka bunayag-sing-tagipusuon nga nagapamati sang mensahe nalangkag man sa pagpaalinton sa iya mga isigkatawo sang impormasyon nahanungod sa mga pagpakamaayo sang paghiusa sa Ginharian.

Ang Pagpakamaayo sang Paghidait

10. Ano ang padayon nga ginlaragway ni Isaias sa iya tagna sa kapitulo 32, bersikulo 17?

¹⁰ Ining nagalapnag nga tugob-globo nga hilikuton, ining balaan nga pag-alagad, nagaabante sa organisado nga atmospera sang paghidait, kalinong kag kalig-on subong sang padayon nga ginalaragway ni Isaias sa kapitulo 32, bersikulo 17, sa iya tagna, nga nagasiling: “Kag ang binuhatan sang pagkamatarong mangin paghidait; kag ang patubas sang katarungan, kalinong kag kalig-onan sa walay katubtuban.” Amo ining matuod nga pagkamatarong ang ginapangita sang mahinadlukon sa Dios nga katawhan sang tanan nga rasa kag hambal, kag nakita nila karon sa organisasyon sang mga Saksi ni Jehova. Diri may yara paghidait, kay ang tagsatagsa nagakooperar, nga “madamo sing hilimuon sa buluhaton sang Ginuo.”—1 Corinto 15:58.

11. (a) Sin-o ang wala sing lugar sa organisasyon ni Jehova? (b) Paano sila ginatipon, kag ano ang resulta sa matutom nga mga alagad ni Jehova?

¹¹ Sa tunga sang katawhan sang Dios, wala sing lugar para sa mga kutsokutsera kag sa mga indi luyag mangabudlay sa pag-alagad kay Jehova. Sa katunayan, ang saad nga ginpakita sa ilustrasyon ni Jesus sa Mateo 13:24-30, 39, 41 nagakatuman na karon. Ang angheliko nga mga mangangani tunay nga ‘nagakuha sa iya ginharian sang tanan nga butang nga nagapasandad kag sang nagahimu sing kalautan.’ Mahantupan sang mga manalagna kon sin-o ang matuod nga mga alagad ni Jehova kag kon sin-o ang butig. Makasarang sila sa pagpahanabo sang mga sirkunstansia diin ang mga magbubuhat sang kalautan mabuyagyag kag mapaguwa gikan sa paghiliupod sang matuod nga mga Cristiano. Kag ang resulta? Isa ka matinlo nga organisasyon, nga nagpanghikot sa kadayawan ni Jehova kag sa pag-uswag sang iya Ginharian sa idalom ni Jesucristo.

12. (a) Anong makusog nga pasalig ang ginahatag ni Jehova sa iya katawhan subong ginpabutyag sa Isaias 32:18? (b) Anong palaabuton nga mga hitabo ang nagapakita sang ila mga landong sing abanse, kag paano naapektohan ang mga matutom ni Jehova?

¹² Si Isaias dugang nga nagasiling (32:18): “Kag ang akon katawhan magapabilin sa puluy-an nga makidaiton kag sa mga puluy-an nga malig-on kag sa mga palahuwayan nga malinong.” Si Jehova tunay nga nagahatag sa iya matutom nga mga alagad sa duta sing duog kag hilikuton nga gikan sa sini wala sing isa ang pahanugotan nga magatabog sa ila. Magapabilin sila diri tubtob matapos ni Jehova ang iya katuyoan para sa ila sa sining bahin sang Har-Magedon. (Bugna 16:14, 16) Sa ila bahin, ang Babilonia nga Daku, ang bug-os kalibutan nga emperyo sang butig nga relihion, napukan na. Ang iya impluensia madasig nga nagausmod. Bisan karon, ang mga elemento sang sapat nga mapintas nga ginalaragway sa Bugna kapitulo 17 nagabantay sa iya, nagahanda sa pagkaon sang iya unod kag sa pagsunog sa iya sing bug-os sa kalayo. (Bugna 17:16) Apang ang mga saksi sang Ginharian indi gid matublag sa sinang mga hitabo nga nagakatabo sa tanan nga bahin. Wala sila nagapakig-ambit sa kahadlok kag kabalaka sa kalibutanon nga katawhan. Sanglit ginpakamaayo kita ni Jehova sing abanse nga ihibalo nahanungod sa palaabuton nga mga hitabo, maatubang naton ang palaabuton nga may pagsalig sa resulta sini. “May daku nga paghidait ang mga nagahigugma sang kasugoan [ni Jehova], kag wala sila sing kahigayonan sa pagkasandad.”—Salmo 119:165.

13. Anong importante nga pag-uswag ang ginpahanabo ni Jehova sa iya makita nga organisasyon, kag ano ang epekto sini sa panimuot kag hilikuton sang iya katawhan?

¹³

14. Anong tuhay katama nga palaabuton ang ginaatubang sang (a) mapisan nga katawhan ni Jehova? (b) Cristiandad kag sang tanan niyang mga kahagugma sa politika?

¹⁴

15. Ano nga hilikuton ang hilimuon pa sang katawhan ni Jehova?

¹⁵

16. Ano ang aton pamatuod nga ginapakamaayo karon sing bugana ni Jehova ang iya saksi sang Ginharian sa bug-os nga duta?

¹⁶

17. Ano ang pinasahi nahanungod sa mga Saksi ni Jehova kag sa ila hilikuton sa aton adlaw?

¹⁷ Ang mga Saksi ni Jehova lamang ang nagabuhat sining nagapaambit kabuhi nga hilikuton tungod sa pangulohan nga Ginharian sang Dios. Sila lamang ang nagakasadya sa mga naani nga bisan karon napadayag na. Ang binhi man, nga ginaaman ni Jehova para sa iya kinabubut-on nga mga manugpangabudlay sa latagon ginbinagbinag kag ginpili sing maayo! Ang aton bulig sa pagtuon sa Biblia ginhanda agod pukawon ang tagipusuon sang madamo nga alanyon pa kag pagadalhon pasulod sa mahidaiton nga organisasyon ni Jehova, ang Cristianong kongregasyon, diin sa Mateo 13:30 ginpaanggid sa “tambobo” sang iya Anak.

18. Ngaa mangin determinado kita nga padayunon ang aton pag-alagad sa Ginharian nga may kaayawan kag kalipay?

¹⁸ Sa pagkamatuod, yara na kita sa adlaw ni Jehova, sa adlaw sang katumanan sang iya “hamili kag matahom nga mga saad” sa iya debotado nga katawhan. (2 Pedro 1:4) Ang paghidait kag paghiusa nagabugana sa tunga naton. Ginhatagan kita sing maathag nga paghangop sa mga katuyoan sang aton Dios. May kalinong kita sa hunahuna sa tunga sang hinadlokan kag nabalaka nga populasyon sang kalibutan. Ang palaabuton nga puno sang madamo dalagku nga mga pagpakamaayo nagahulat sa aton. Wala bala kita malipay sing daku nga mangin mga tagbaton sining tanan nga pagpakamaayo sang paghiusa sa Ginharian? Kag indi bala kita determinado nga mag-abante pa gid sa aton hilikuton sa Ginharian sa walay katapusan nga kadayawan ni Jehova?

Ano ang Imo Sabat?

◻ Paano mapaanggid ang panimuto sang mga alagad ni Jehova sa iya sadtong yara sa Cristiandad?

◻ Sa ano nagresulta ang pagpasagahay sang espiritu sang Dios?

◻ Nahisuno sa Isaias 32:17, 18, ano nga mga pagpakamaayo ang ginaagom karon sang katawhan ni Jehova?

◻ Ano ang aton pamatuod nga ginapakamaayo ni Jehova ang iya mga saksi sa Ginharian?

[Piktyur sa pahina 14]

Ang pagkinahanglan nga ‘ibantala ang Hari kag ang Ginharian’ ginpadaku sadtong 1922 nga kombension sang katawhan ni Jehova sa Cedar Point, Ohio

[Piktyur sa pahina 17]

Ginpakamaayo ni Jehova ang iya katawhan sang bug-os kalibutan nga paghidait kag paghiusa