Si Jehova—Mapintas Ukon Mahigugmaon nga Dios?

“APANG ang Dios sang Biblia isa ka mapintas nga Dios,” siling sang isa ka Hapones nga tawo. Nasapwan sang misyonero nga nagatindog sa iya ganhaan ang isa ka tawo nga pamilyar sa Pulong sang Dios, ang Biblia.

“Kamusta ang paglumos sang Dios sa mga tawo sang Anaw?” padayon niya. “Kag kamusta ang iya pagsunog sa Sodoma kag Gomora, indi na pagsambiton ang pagpapatay niya sa mga Israelinhon sang mga Canaanhon? Paano mo masiling nga ang Dios indi mapintas? Luwas pa, ang Dios sang ‘Bag-o nga Testamento’ tuhay gid. Gintudlo ni Jesus ang tuhoy sa Dios sang paghidait kag gugma.”

Ining paghantup sa Dios sang “Daan nga Testamento” subong mapintas kag mahuyugon sa inaway nagasulod sa panghunahuna sang madamu. Gani, ginatamod sang iban bisan ang Dios sang “Bag-o nga Testamento” subong suspetsado. Paano mapahulag ang bisan sin-o nga alagdon ang Dios nga daw may duha ka personalidad?

“Ang Tanan Niya nga Dalanon Katarungan”

Apang, ang mga tawo, wala gid sa posisyon nga mulayon ang mga buhat sang Dios. Mahantupan bala gilayon sang isa ka bata kon ngaa ginapaantus sia sang iya amay sa kasakit sa bangko sang dentista? Amo man, mahimu nga indi naton nahangpan sing una ang tanan nga buhat sang Dios. “Hibaloa nga si Jehova amo ang Dios,” siling sang salmista. “Sia ang naghimu sa aton, kag indi kita.”—Salmo 100:3.

Busa, indi bala dimaalamon ang padasudaso nga paghinakop nga ang Dios mapintas? “‘Ang akon mga hunahuna indi inyo mga hunahuna, kag ang inyo mga dalanon indi akon mga dalanon,’ siling ni Jehova. ‘Kay subong nga ang mga langit mataas pa sa duta, sa amo ang akon dalanon mataas pa sa inyo mga dalanon, kag ang akon mga painoino sa inyo mga painoino.’” (Isaias 55:8, 9) Dugang pa, ginapasalig kita sang Biblia nga ang “tanan niya nga dalanon katarungan.” Si Jehova nakilal-an subong “Dios sang katutom, diin wala sing inhustisya.” (Deuteronomio 32:4) Busa usisaon naton ang pila ka hitabo diin nakit-an sang Dios nga nagakaigo ang maghukom.

Ang Anaw

“Nakita ni Jehova nga ang pagkamalaut sang tawo daku sa duta kag ang tagsa ka painoino sang mga hunahuna sang iya tagipusuon malaut gayud sing dalayon.” (Genesis 6:5) Amo ina ang wala pa ang Anaw nga kalibutan. Huo, “nakita [ni Jehova nga Dios] ang duta kag, yari karon! dunot ini, kay ang tanan nga unod nagdunot sang ila dalanon sa duta.” (Genesis 6:12) Basi ang iban magapangatarungan nga kuntani ginpabay-an na lang sang Dios ang tawo, nagpabaya sa ila kon ano ang luyag nila. Apang may yara gihapon bunayag, matadlong sing moral nga mga tawo nga nabilin sa duta. Indi bala nga kapintas para sa Dios nga pahanugotan ang malauton nga dulaon ang katapusan nga agi sang moralidad nga nabilin sa duta? Busa ginhimus sang Dios ang tugob-globo nga anaw agod dulaon sa duta ang mga nagalaglag sini.

Ang mapintas nga Dios indi kuntani magaaman sing kaluwasan sang tawo ukon sapat. Apang ginhimu ina ni Jehova. Ang mapintas nga Dios indi gid magapaandam tuhoy sa nagapakari nga kalaglagan. Apang gintangdoan niya si Noe nga mangin “manugbantala sang pagkamatarong” sa indi magkubos sing mga 40 ukon 50 ka tuig! (2 Pedro 2:5) Ang mga tawo sarang makapili sing kaluwasan ukon kamatayon.

Sodoma kag Gomora

Sang ginduaw sang duha ka manugtonda ang Sodoma, ginpakita sang ulihi sang mga pumuluyo ang ila tiku nga kinaugali. Ginlibotan sang mga lalaki sang Sodoma ang balay ni Lot, “tingob ang mga pamatan-on kag tigulang, ang bug-os nga katawhan gikan sa duog. Kag gintawag nila si Lot kag ginsilingan sia: ‘Diin bala ang mga lalaki nga nag-abot sa imo sining gab-i? Pagguwaa sila sa amon, agod nga maghiusa kami sa ila.’” (Genesis 19:4, 5) ‘Paghingamo [ini] sa unod para sa dikinaugali nga paggamit.’—Judas 7; tan-awa man ang Roma 1:26, 27.

Nakita sang Dios, “nga nagausisa sang tagipusuon,” ang mga siudad nga indi masalbar. Nagakabagay ang paglaglag sa ila. (Roma 8:27) Ti, wala gani sing napulo ka matarong nga tawo nga makita sa Sodoma! (Genesis 18:32) Ang mga pagginawi sang mga taga-Sodoma naghatag sing matuod nga katalagman sa matarong nga si Lot kag sa iya panimalay. Busa, ang pagluwas sang Dios kay Lot kag sa iya mga anak nga dalaga isa ka buhat sang gugma!—Genesis 19:12-26.

Pagpatay sa mga Canaanhon

Ginsaaran ni Jehova si Abraham nga ang iya binhi magapuyo sa ulihi sa Canaan. Apang, talupangda, nga wala sing pagpatay ang natabo sang adlaw ni Abraham. Ngaa wala? “Bangod wala pa mapuno ang kalautan sang mga Amornon [ang dominante nga tribu sang Canaan],” siling ni Jehova. (Genesis 15:16) Mga 430 ka tuig ang nagligad antes ang kalautan sina nga pungsod naglab-ot sa sina nga kadakuon amo kon ngaa si Moises makasiling: “Bangod sang pagkamalaut sining mga pungsod [sang Canaan] nga si Jehova nga imo Dios nagsubol sa ila sa atubangan mo.”—Deuteronomio 9:5.

Ang libro nga Ar­chae­ol­o­gy and the Old Tes­ta­ment nagsiling: “Ang kapintas, kailigbon kag pagsikway sa mga Canaanhon nga mitolohiya . . . mahimu nga nagpahanabo sang pinakamalain nga batasan sang mga debotado sa ila kag nagpahimu sa madamu sang pinakamanubo nga mga buhat sadto nga tion, subong sang balaan nga pagpamiga, paghalad sa bata kag pagsimba sa man-ug . . . ang grabe gid nga pagkahigku sa moral kag relihion.” Apang, ang mga Gibeonanhon kag ang mga pumuluyo sang tatlo iban pa ka siudad ginluwas. (Josue 9:17, 18) Pahanugotan bala ini sang mapintas nga Dios?

Duha sing Personalidad?

Apang, ang iban nagasiling nga ang Dios sang “Daan nga Testamento” nagbalhin sing personalidad sa “Bag-o nga Testamento.” ‘Ang panudlo ni Jesus nasentro sa gugma,’ siling nila.—Mateo 5:39, 44, 45.

Apang, ang kalaglagan sang Jerusalem sang 70 C.E. natabo subong paghukom gikan kay Jehova, subong sang gintagna ni Jesus. (Mateo 23:37, 38; 24:2) Dugang pa, ang dimatarong nga mga indibiduwal subong nanday Ananias, Sapira, kag Herodes ginpatay. Ang Dios wala magbalhin. (Binuhatan 5:1-11; 12:21-23; Malaquias 3:6) Ang mga panudlo ni Jesus tuhoy sa gugma wala magbag-o. Sing temprano pa, ang Mosaikong Kasugoan nagsugo: “Higugmaa ang imo isigkatawo subong sang imo kaugalingon.” (Levitico 19:18) Apang, ang panudlo ni Jesus nahanungod sa masinakripisyuhon sa kaugalingon nga gugma, naglabaw pa sang sa sini nga sugo. (Juan 13:34) Dumduma, man, nga makusog man niya nga ginpakamalaut ang salimpapaw relihioso nga mga lider. Basaha ang bug-os nga Mateo kapitulo 23 sa imo kaugalingon kag tan-awa kon paano sila ginpakamalaut sing makusog ni Jesus.

Busa ang rekord sang Biblia indi pamatuod sang kapintas sang Dios, kundi pamatuod sang iya tudok kag matutom nga gugma para sa katawhan. Busa napahulag kita nga ton-an sing labi pa ang tuhoy kay Jehova kag sa iya mahigugmaon nga mga dalanon. Ang amon masunod nga artikulo magabulig sa imo nga himuon ina.

[Mga Laragway sa pahina 3]

Makatarunganon bala si Jehova sang ginpahanabo niya ang Anaw, ginlaglag ang Sodoma kag Gomora, kag ginpamatay ang mga Canaanhon?