Pagkapot sang Akon ‘Kamut sa Arado kag Wala Nagabalikid’

SANG nagasakay ako sa eroplano padulong sa akon bag-o nga puluy-an sa Bolivia, ang mga tinaga nga ginsulat sang akon iloy sa akon sa iya katapusan nga sulat nagabalikbalik sa akon hunahuna. “Wala sing tawo nga nagakapot sa arado kag nagabalikid nga takus sa ginharian sang Dios.” (Lucas 9:62, King James Version) Determinado ako nga iaplikar ining mga pulong.

Bisan pa ang pagkamisyonero mangin isa ka bag-o nga eksperiensia, mga lima ka tuig na ako sa bug-os tion nga pag-alagad. Naton-an ko ang kamatuoran gikan sa akon mga ginikanan, nga nagsugod sa pagtuon sang 1923 pa upod sa mga Estudyante sang Biblia, subong amo ang pagtawag sadto sa mga Saksi ni Jehova. Bisan pa kuatro anyos lamang ako sadto, handum ko nga mahangpan ang mga publikasyon sang Watch Tower Society. Apang, sa sulod sang madamo nga tinuig diutay lamang ang nahimo sang akon pamilya nahanungod sa kamatuoran. Kon kaisa ang iban sang amon mga kaingod nga mga Estudyante sang Biblia nagaduaw sa amon. Madumduman ko man nga si Tatay nagaduaw sa mga kaingod agod mamati sa mga lektura sa radyo ni Hukom Rutherford.

Apang, sugod lamang sang 1938 nga ang mga binhi sang kamatuoran nagsugod sa pagpamunga. Ang akon iloy—karon diborsiada kag may lain na nga bana—nagsugod sa pagbaton kag sa pagbasa sang mga publikasyon gikan sa mga Saksi ni Jehova. Nalipay gid ako sa pagtuon nga ang “dakung kadam-an” maluwas kon malaglag ining karon nga sistema sang mga butang kag mabuhi sing dayon sa duta. (Bugna 7:9-14) Ining impormasyon dapat ipaambit sa iban!

Gani sa tapos mabawtismohan sang Hunyo 1939, nagsugod ako sa paghunahuna nga mangin bug-os tion nga ministro, ukon payunir. Sa tapos ako makasaylo sa Colorado, nakilala ko si Helen Nichols kag ang iya iloy—duha ka hinaplas nga utod nga mga babayi nga mga regular payunir. Ang matahom nga mga eksperiensia nga ila anay ginsugid sa akon nagpalig-on sa akon sing dugang pa nga mag-alagad subong payunir. Sa amo, sang Mayo 1940 nabaton ko ang akon una nga asaynment subong payunir sa Salida, California.

Paghanas sa Gilead kag Asaynment sa Luwas

Pagligad sang pila ka tuig nga pagpayunir sa nanuhaytuhay nga bahin sang Colorado kag Indiana, gin-agda ako nga mag-eskwela sa ikatlo nga klase sang Gilead. Isa ini ka eskwelahan nga gin-organisar sang Watchtower Society para sa paghanas sing mga misyonero. Sa sulod sang lima ka dalayawon nga bulan natigayon ko ang mga pagpakamaayo sang Gilead School, apang sa tapos ako makagradwar wala ako sa gilayon makabaton sing asaynment sa luwas. Nagadabdab sadto ang Inaway Kalibutanon II! Gani temporaryo nga ginpadala ako agod magpanghikot upod sa pito pa ka utod nga babayi sa West Haven, Connecticut. Sang 1945 ginpadala ako sa Washington, D.C. Apang, wala magdugay ginhatagan ako sing asaynment sa luwas: La Paz, Bolivia.

Sang wala ko pa mabaton ang akon asaynment, wala ko pa gid mabatian ang Bolivia! Indi katingalahan nga nagapamensar ako samtang nagasakay kami sa eroplano: Ano ang mahimo ko subong isa ka misyonero? Makapadayon ayhan ako? Ang pagdumdom sa laygay sang akon iloy nga ‘ikapot ang akon kamut sa arado kag indi magbalikid’ nagpalig-on sang akon pamat-od nga himuon nga madinalag-on ang akon pagkamisyonero. Subong man, indi ako isahanon sa sining bag-o nga pungsod. Nag-upod sa akon ang akon utod nga babayi kag bayaw nga lalaki nga nakagradwar gikan sa ikap-at nga klase sang Gilead. Sang Hunyo 9, 1946, ang amon eroplano naghugpa sa La Paz.

Sa Tunga sang Rebolusyon

Sang adlaw nga pag-abot gid namon, may isa nga nagtinguha sa pag-umpisa sing rebolusyon paagi sa paghulog sing bomba sa Palasyo sang Pangulohan. Wala madayon ang bomba, subong man ang rebolusyon. Apang kubos sa duha ka bulan sang ulihi, nagsugod ang lain naman nga rebolusyon, kag madamo ang napatay kag napilasan. Ang presidente sang pungsod, upod sa pila sang iya mga ministro, ginbitay sa poste sang suga sa daku nga plasa. Amo yadto ang akon introduksion sa Bolivia.

Walay sapayan, sa tapos sadtong makahaladlok nga pagpatulo sing dugo, nakahatag kami sing ‘paglipay sa mga nagakasakit,’ kag madamo sang mapainubuson nga mga taga-Bolivia ang nagbaton sing pagtuon sa Biblia upod sa amon. (Isaias 61:1, 2) Sadtong mga adlaw, pirme namon ginagamit ang narekord nga mga sermon subong paagi sa pagpanaksi sa mga tawo. Nagakahulugan ini nga nagadala kami sing ponograpo kag bag pasaka panaug sa mataas nga mga pukatod sang La Paz sa kataason nga 12,000 pie (3,600 m). Bangod sang akon limitado nga Espanyol, nagdumdom ang iban nga mga tawo nga nagabaligya ako sing ponograpo kag mga plaka!

Madamo ako sing eksperiensia subong isa ka bag-o nga misyonero. Sang isa ka adlaw, samtang nagapamalaybalay ako sa isa ka maayoayo nga mga bahin sang La Paz, isa ka suluguon ang nagguwa sa puerta kag ginpasulod niya ako. Ang tag-iya sang balay namati sa akon presentasyon kag nagsuskriber sa Ang Lalantawan. Ngaa madali sia nga nagbaton? Bag-o lang sia maoperahan, kag samtang sa klinika sia, nabasa niya ang Biblia. Natukiban niya nga ang mga doktrina sang Biblia tuhay sa ginatudlo sang iya iglesia, gani nalangkag sia nga basahon ang literatura nga akon ginbilin sa iya. Apang, sa wala pa ako makabalik sa pagduaw sa iya, ginpangita niya ako, kag sang ulihi nakita niya ako sa isa ka pamusod sang kalye nga nagatanyag sing Lalantawan kag Magmata! nga magasin sa mga nagalalabay. ‘Palihug kadtoi ako!’ pamilit niya. Madasig sia nga nag-uswag sa iya pagtuon sing Biblia kag wala madugay ginbawtismohan. Karon, 30 ka tuig sang ulihi, isa gihapon sia ka matutom nga alagad ni Jehova.

Mahigko nga Monyika

Pagligad sang 11 ka tuig nga pagpanghikot sa La Paz, ginhatagan kami sing asaynment sa bagatnan nga bahin sang Bolivia. Busa, ang akon utod nga babayi kag ang iya bana, ang akon paris nga si Esther Erickson, kag ako nagkadto sa diutay nga banwa sang Tupiza. Natabo ini sang Pebrero 1957. Ang Tupiza malapit sa riles sang tren sa ulot sang Bolivia kag Argentina. Ang mga tawo didto mainabyanon, kag mahapos makakita sing pagtuon sa Biblia didto. Sa kamatuoran, sa wala madugay nakaorganisar kami sing regular nga mga miting, nga ginatambongan sang pila gikan sa Tupiza.

Sang isa ka adlaw, nakakita kami sing mahigko nga monyika sa atubangan sang amon ugsaran. Ano ang buot silingon sini? Ginpaandaman sang pari ang mga tawo batok sa mga Saksi ni Jehova, gani may isa nga nagatinguha sa paghiwit sa amon nga ginatawag hechizo! Apang, wala sing nahimo ang ila hechizo.

Bangod ang Tupiza isa ka diutay nga banwa, wala madugay si Esther kag ako gin-asayn liwat sa Villázon, isa pa ka diutay nga banwa sa dulunan sang Bolivia kag Argentina. Ining rehiyon baog, mahangin, kag mabugnaw! Apang wala kami mangluya, bangod nagasalig kami sa pagbaton sang pagpakamaayo ni Jehova.

Sang si Esther kag ako nagsugod sa pagpanghikot sa banwa, natalupangdan namon nga ang mga tawo may kard sa ila mga bintana nga nagasiling: “Wala Ginabaton ang mga Saksi ni Jehova kag mga Evangelist.” Apang indi kilala sang mga tawo sa Villázon kon sin-o ang mga Saksi ni Jehova! Subong sang natabo sa Tupisa, nagpasilabot ang pari, kag nanghatag sia sing mga kard sa simbahan agod ipamutang sang mga tawo sa ila mga bintana. Walay sapayan sang mga kard sa bintana, mabuot nga nagbaton ang mga tawo, kag nakapahamtang kami sing madamo nga literatura kag nakasugod kami sing madamo nga pagtuon sa Biblia. Sing amat-amat nadula ang mga kard sa mga bintana.

Apang, sa diin kami makahiwat sing mga miting? Ginhimo namon ang isa ka hulot sang amon diutay nga apartment nga Kingdom Hall. Ginbutangan namon sing mga kahoy ang mga karton sang mga libro agod mapungkoan. Wala sing bawtismado nga mga utod nga lalaki didto, gani si Esther kag ako nagatabon sang amon ulo kag nagadumala sang mga miting. Nalipay kami nga sa una nga Memoryal sang kamatayon ni Cristo nga amon ginhiwat didto kapin sa isa ka gatos ang nagtambong! Matuod, ang iban bangod luyag lamang mangusisa nagkari agod magtan-aw kon paano ang mga gringas (taga-luwas nga mga babayi) nagadumala sang ila mga miting. Apang ang iban sadto sa ila nga nagkari agod mangusisa lamang mga Saksi na karon.

Nagbantala man kami sa diutay nga banwa sang La Quiaca, Argentina, nga sa diin nakabukas kami sing pila ka pagtuon sa Biblia upod sa mga interesado. Bangod pirme kami nagatabok sa dulunan, natalupangdan ini sang isa ka polis. Sang isa ka adlaw, sang nagapauli kami gikan sa La Quiaca, ginpangabay kami sang patrolman nga indi paghimuon ang amon hilikuton sing tuman kadayag, bangod ang hilikuton sang mga Saksi ni Jehova ginadumilian sa Argentina. Nagsiling ako sa iya, “Nahibaloan ko nga ang inyo pangulohan nagagarantiya sing kahilwayan sa pagsimba.” Nagsabat sia nga gin-ipit sang mga pari ang mga ministro sa pangulohan, kag ang resulta sini amo ang pagdumili. Apang, sa tapos sadto, nagatalikod na lang sia sa kada tion nga magtabok kami sa dulunan padulong sa Argentina!

Nagbantala kami sa Villázon sa sulod sang mga tinuig. Ang akon paris nagtuon upod sa isa ka lalaki nga ang iya asawa may chicherɩ́a, isa ka balaligyaan sing mga ilimnon gikan sa ginpaaslom nga mais. Naton-an sini nga tawo ang kamatuoran kag nagpabawtismo, sang ulihi nag-alagad subong isa ka gulang tubtob sang mapatay sia. Ang chicherɩ́a? Isa na ini karon ka Kingdom Hall! Sang ginbiyaan namon ang Villázon, may kongregasyon didto sang 20 ka manugbantala. Sa karon may yara mga 60 ka Saksi, kag mga 110 ang nagatambong sa mga miting sa talipuspusan sang semana.

Wala Gid ‘Nagabalikid’

Pagkatapos sang Villázon ang masunod nga asaynment ko amo ang Santa Cruz, isa ka siudad sa sidlangan nga bahin sang Bolivia. Makalilipay tan-awon ang pag-uswag sang hilikuton didto gikan sa isa ka diutay nga kongregasyon sang 20 ka manugbantala tubtob sa siam ka mapagsik nga kongregasyon. Nian, sang 1965, nagbalik ako sa La Paz sa isa sang mga puluy-an sang mga misyonero, nga sa diin nagtener ako diri kutob sadto.

Sang Pebrero 1978 natumbahan ako sing adobe nga pader sang nagapanaug ako sa bus. Nabali ang akon tuo nga batiis amo kon ngaa dapat ako magtuon sa paglakat liwat. Apang nagaalagad na ako liwat karon kag nagahiwat sing mga pagtuon sa Biblia.

Indi, ang bug-os tion nga pag-alagad indi pirme mahapos. May kalipay kag kasubo, mga kasakit kag mga kapaslawan. Ang kalipay sa pagsapo sa tulad-karnero nga mga tawo kag ang pagbulig sa ila sa pag-alagad kay Jehova kapin pa sa bisan anong mga kapaslawan. Karon, pagligad sang halos 44 ka tuig sa bug-os tion nga pag-alagad, determinado gid ako sa ‘pagkapot sa arado’ kag magpakigbahin sa hilikuton nga hilimuon pa.—Gin-asoy ni Betty Jackson.

[Laragway sa pahina 28]

Si Betty Jackson nga nagabantala sing maayong balita sa Bolivia