Pagtigayon sing Kalipay sa Pulong ni Jehova

“Malipayon ang tawo . . .[nga] ang iya kalipay yara sa kasugoan ni Jehova.”—SALMO 1:1, 2.

 1. Sin-o ang gintangdo sa pagtudlo sa iban sang “mga butang nga napahayag” ni Jehova?

SANGLIT ang “mga butang nga napahayag” importante katama para sa aton kaluwasan, si Jehova masunson nga nagtangdo sa mga responsable nga mangin mga manunudlo sang napahayag nga kamatuoran. (Deuteronomio 29:29) Sa Israel, ang mga saserdote kag mga Levinhon amo ang naghimo sini. (Levitico 10:8-11; 2 Cronica 35:3) Ang Israelinhon nga mga ginikanan nagtudlo man sa ila mga kabataan. (Deuteronomio 11:19; Hulubaton 6:20) Sang nahaunang siglo C.E., ang gintangdo nga mga gulang nag-alagad subong mga manunudlo sa kongregasyon sang hinaplas nga mga Cristiano, kag ang Cristianong mga ginikanan ginlaygayan nga tudloan ang ila mga kabataan. (Efeso 6:4: 1 Timoteo 3:2; 2 Timoteo 2:2) Dugang pa, ang tagsa ka indibiduwal nga Cristiano may katungdanan sa pagpahibalo sang napahayag nga mga butang ni Jehova sa mga tawo nga yara sa guwa sang Cristianong kongregasyon.—Binuhatan 1:8.

 2. Bastante na bala ang magsalig sa iban sa pagtudlo sa aton sang pulong ni Jehova? Ipaathag.

² Apang bastante na bala nga magsalig sa iban sa pagtudlo sa aton sang Pulong sang Dios? Indi. Ang kada isa sa aton may personal nga salabton nga ton-an ang “mga butang nga napahayag” ni Jehova. Sa amo, ang salmista nagsulat sa masigka Israelinhon: “Malipayon ang tawo . . . [nga] ang iya kalipay yara sa kasugoan ni Jehova, kag ginabasa niya sing mahinay sa adlaw kag gab-i ang iya kasugoan.” (Salmo 1:1, 2) Ginpalig-on man ni apostol Pedro ang mga masigka sumilimba, nga nagsulat: “Handuma ang gatas nga espirituhanon nga walay simbog, agod nga bangod sini magtubo kamo sa kaluwasan.”—1 Pedro 2:2.

 3. Ang kinaugali nga huyog sang madamo tuhoy sa pagtuon nagakinahanglan sing ano?

³ Paano mo ginatamod ang pagtuon sa Biblia? Kon nagatambong ka sing tayuyon sa Cristianong mga miting, walay duhaduha nga nabatian mo ang madamong matahom nga paghambalanay nga napasad sa Biblia. Kag kon ikaw ‘ginpadaku sa kamatuoran,’ subong sang ginasiling sang iban, walay duhaduha nga gintudloan ka sang imo mga ginikanan sang madamong “mga butang nga napahayag” ni Jehova. Apang luwas sina, nagatuon ka bala sing personal sang Biblia? Ang salmista maathag nga nalipay sa sina nga sahi sang pagtuon, apang sing personal ayhan wala ka sini mahaposi. Kon amo, wala ka nagaisahanon. Ang katunayan nga si Pedro nainspirar sa pagpalig-on sa mga masigka tumuluo nga ‘handumon . . . ang pulong’ nagapanugda nga ang personal nga pagtuon indi mahapos para sa madamo. Apang maton-an naton nga mawili sa sini. Paano?

 4. Ano nga ilustrasyon ang nagapakita nga ang personal nga pagtuon mahimo nga mangin makagalanyat?

⁴ Bueno, kamusta kon ginsilingan ikaw sa pagkutkut sing madalom nga buho sa duta? Kon wala ka nahuyog sing kinaugali sa paghimo sing lakas kag pisikal nga pagpangabudlay, indi mo gid paghandumon ina nga hilikuton. Apang ayhan ginsilingan ikaw nga may bahandi nga nalubong sa duta. Ti, ang hilikuton nga pagkutkut daw indi gid man mabudlay! Ayhan makakulunyag pa ini, samtang ginahulat mo nga makutkutan ang nalubong nga bahandi. Sing kaanggid, kon ikaw palatuon sa kinaugali, ang pagtuon mangin makawiwili kag makakulunyag kon may yara ikaw husto nga panimuot. Kag may yara mga paagi sa pagpalambo sina nga panimuot.

Palamboa ang Husto nga Panimuot

5, 6. Ilaragway ang pila sang dimapaanggiran nga pagpakamaayo nga matigayon naton paagi sa napahayag nga Pulong ni Jehova.

⁵ Una, pirme naton dumdumon ang bahandi nga matigayon naton sa Biblia. Si apostol Pablo nagsiling: “O pagkadalom sang kamanggaran kag kaalam kag ihibalo sang Dios!” (Roma 11:33) Ang mga katuyoan ni Jehova, nga amat-amat nga ginpahayag sa sulod sang linibo ka tuig, makahalawhaw, nagabukas para sa aton sing paglaum nga makatilingala kag pat-od. Ang laygay sa pagkabuhi nga ginparekord ni Jehova sa Biblia pirme nga magadala sing kadalag-an kon ginaaplikar. (2 Timoteo 3:16) Indi katingalahan nga ang salmista nag-amba: “Ang pagbukas sang imo mga pulong nagahatag sing kapawa, nagahatag ini sing paghangop sa mga indi eksperiensiado!”—Salmo 119:130.

⁶ Dugang pa, ang Biblia nagaunod sang mga panghunahuna sang Dios, kag paagi sa pagpasulod sining mga panghunahuna, magasuod kita sa iya. (Santiago 4:8) Subong man, gintangdoan kita sa pagtudlo sa iban nga mangin mga disipulo ni Jesus. (Mateo 28:19, 20) Sanglit ang Biblia amo ang aton panguna nga kagamitan sa sining hilikuton, dapat naton ini ton-an agod magamit sing maayo. (Efeso 6:17; 2 Timoteo 2:15) Sa katapusan, ang pagpuno sang aton hunahuna sang napasad sa Biblia nga mga panghunahuna nagaamlig sa aton, nagabulig sa aton nga maglakat sa aton integridad kag maglikaw sa nagapaluya sa pagtuo nga mga pangduhaduha kag sayop nga mga ideya.—Hulubaton 4:5, 6; 20:7; Filipos 4:8.

7, 8. Nahanungod sa “mga butang nga napahayag,” ngaa ginapakamaayo kita karon sing labi sang sa mga alagad sang Dios sang nagligad nga panahon?

⁷ Binagbinaga man nga karon aton ‘mahangpan kaupod sang tanan nga balaan kon ano ang kasangkaron kag kalabaon kag kataason kag kadalumon’ sang kamatuoran sa paagi nga indi nahimo sang una sang mga alagad sang Dios. (Efeso 3:14-18) Apang dumduma, ginbayaan ni Abraham ang iya siudad nga natawhan kag nagpuyo sa mga kayangkayang bisan pa nga indi niya makita sa iya bug-os nga pagkabuhi ang mga katumanan sang mga saad sang Dios. (Hebreo 11:8-10) Kag si Daniel nangabay nga mahangpan ang mga palanan-awon nga nasaksihan niya apang ginsilingan sia: “Ang mga pulong natakpan kag napat-inan tubtob sa tion sang katapusan.” (Daniel 12:8, 9) Karon, ang Binhi nga madugay na ginhulat ni Abraham yari na. Karon, nagakabuhi sa “tion sang katapusan” nga ang kahulugan sang kalabanan nga nakita ni Daniel gindugang sa aton paghangop sa “mga butang nga napahayag.”

⁸ Si apostol Pedro nagsulat: “Nahanungod sa among kaluwasan ang mga manalagna nagpangita kag nag-usisa nga nagtagna sang dibagay nga kaluoy nga magaabot sa inyo. Sa ila ginbugna nga indi sa ila, kundi sa inyo, ginhikot nila ini nga mga butang . . . Sa amo nga mga butang nga ang mga anghel nagahandum sa pagtan-aw.” (1 Pedro 1:10, 12) Sanglit ginhatagan na karon ni Jehova sing kapawa ang madamong mga butang nga maluyag anay hibaluon sang dumaan nga mga manalagna, pabaloran gid naton ini nga kamatuoran kag indi pagpasapayanan.

9, 10. Ano nga mga halimbawa ang nagapaapresyar sa aton sang kahilwayan sang kalabanan sa aton nga ton-an sing personal ang Biblia?

⁹ Agod matigayon ang husto nga panimuot, dapat naton apresyahon kon daw ano ka daku nga pagpakig-away ang ginahimo sang iban agod maton-an ang Biblia. Sang kaadlawan ni William Tyndale, isa ka krimen para kay bisan sin-o nga Ingles nga magbaligya, magbakal, ukon magbasa sang binadbad sang Griegong Kasulatan sa iya kaugalingon nga pamulong. Si John Foxe, ika-16 ka siglo nga Puritanong manugbantala, nagreport kon ano ang natabo sang ang bag-o nakombertir nga Protestante nag-ismagol sing mga Biblia pasulod sa Espanya. Nakilal-an sia kag ginsunog sa usok, kag ang 800 ka tawo nga nagbakal sing Biblia gindakop. Duha ka pulo ang gintuhog kag gin-ihaw. Ang iban ginbilanggo sa bug-os nga kabuhi, ginbakol sing dayag, ukon ginbitay. Diutay lamang ang ginbuy-an.

¹⁰ Sa moderno man nga tion, kon kaisa ang mga Saksi ni Jehova nagatuon sang Biblia sa atubang sang daku nga katalagman. Sang yara sila sa mga kampo konsentrasyon ukon mga bilanggoan, ginrisgo nila ang silot kag kamatayon agod makatigayon sing Biblia. Ang isa ka misyonero, nga ginlupot sa bilanggoan nga nagaisahanon lamang bangod sang iya pagtuo, nagsulat sang tanan nga kasulatan nga madumduman niya kag nagtan-aw sa mga kolumna nahanungod sa “relihion” sa mga pamantalaan para sa iban nga mga bersikulo sa Biblia nga makita. Sing tinuig, amo lamang ina ang iya paagi sa Biblia. Huo, sang gindumilian ang Biblia, ang mga Cristiano nagpanikasog sing daku nga mabasa ina. Indi bala kita mangin makugi, nga sa kalabanan nga hitabo, ang aton lamang himuon amo ang magkab-ot kag magkuha sini gikan sa talagoan sing libro?

11. Ang sulitsulit bala nga paghinun-anon sa pila ka impormasyon magahimo sa aton nga mas kubos nga mabalaka sa pagtuon sa Biblia?

¹¹ Ang iban nagasiling nga masabat nila ang mga pamangkot sa Lalantawan nga magasin sing tuman kahapos bangod ang iban nga materyal ginasulit. Gani sa banta nila indi na kinahanglan nga magtuon pa sila sing personal. Ginapakanubo nila ang balor sang pagrepaso. Ginahigugma sang salmista ang mga pahanumdum ni Jehova, kag dapat nga amo man kita. (Salmo 119:119) Dumduma, ang kalibutan padayon nga nagapabaha sing amo gihapon ka imoral, materyalistiko nga propaganda. Gani dapat naton lig-unon ang aton hunahuna batok sini paagi sa sulitsulit nga mga pahanumdum sa Biblia.

Mangabudlay sa Paglandas sa mga Palaligban

12. Maghatag sang pila ka praktikal nga panugda sa paglandas sang palaligban nahanungod sa pagpangita sing tion sa pagtuon sang Biblia.

¹² Ang isa ka tawo nga may husto nga panimuot tuhoy sa pagtuon sang Biblia masami nga makakita sing paagi sa pagtuon, apang mahimo nga indi ini mahapos. May mga palaligban nga dapat landason. Halimbawa, paano kita makakita sing tion sa pagtuon sing personal sa masako nga pagkabuhi karon? Ang nahauna nga tikang sa paglubad sini nga palaligban amo ang pagkilala nga ang pagtuon sang Biblia kinahanglan, kaangay sang pag-alagad sa latagon kag pagtambong sa mga miting. (1 Timoteo 4:15) Nian usisaon naton ang aton matag-adlaw nga hilikuton agod makapangita sing lugar para sa sini. Ang iban nagatuon samtang nagalakbay sa mga salakyan. Ang iban nagapamati sing narekord nga mga pagbasa sang Biblia samtang nagamaneho ukon samtang nagapangabudlay sa balay. Ang iban nagatuon sa tion sang inugpanyaga sa obra. Ang iban nagabugtaw sing temprano sa aga kag nagatuon sing makadali antes sugdan ang hilikuton sa sina nga adlaw ukon nagahinguyang sang tion sa gab-i sa pagtuon samtang ang mga kabataan nagakatulog na. Sing masami dapat naton baklon ang tion gikan sa iban nga mga hilikuton—ayhan bisan gikan sa mga tion sa pagrelaks—para makatuon. (Colosas 4:5) Apang nasapwan sang ulihi sang madamo nga indi na nila kinahanglan ang pila ka pagpahuwayhuway bangod ang pagtuon mismo nagaparelaks sa ila.

13.Paano kita mabuligan sa pagkonsentrar sa ginaton-an naton?

¹³ Nasapwan sang iban nga ang pagkonsentrar isa ka palaligban. Mabudlay para sa ila nga indi hunahunaon ang ila matag-adlaw nga mga palaligban kag magkonsentrar sa pagtuon sang Biblia. Ang pangamuyo makabulig sa paglandas sini. Sa wala pa magsugod sa pagtuon, ngaa indi pasalamatan si Jehova bangod sang mga butang nga napahayag na niya kag mangabay sing bulig nga makakonsentrar sa sini kag makahantop sa balor sini? (Filipos 4:6; 2 Timoteo 2:7) Ina nga pangamuyo nahisuno gid sa kabubut-on ni Jehova para sa aton. (1 Juan 5:14) Ang pagdisiplina man sa kaugalingon kinahanglan gid labi na sa primero. (1 Corinto 9:25) Gin-usisa sang mga taga-Berea ang Pulong sang Dios adlaw-adlaw. (Binuhatan 17:10, 11) Maayo sila nga halimbawa. Ang tayuyon nga pagtuon mangin makawiwili sa ulihi, kag ayhan kalangkagan mo ini nga wala na ginapilit ang imo kaugalingon sa paghimo sini.

14. Ngaa ang malinong nga palibot maayo kon nagatuon sing personal?

¹⁴ Ang nagakaigo nga palibot nagabulig man sa pagkonsentrar. Si Isaac nagkadto sa latagon sang luyag niya magpamalandong—nga malayo sa kasako kag kagahod sa mga kayangkayang. (Genesis 24:63) Matuod, indi ang tanan sa aton makakita sing duog nga makatuon nga wala sing tublag subong sang wayang, apang sing masami mabuhinan naton ang mga tublag sa palibot naton. Ang pagtuon sa atubangan sang nagaandar nga telebisyon ukon magahod nga stereo mangin indi mapatubason—ukon makawiwili—sang sa pagtuon sa lugar nga mas malinong. Indi naton pirme malikawan ang mga tublag, apang ang kalabanan sa aton makakita sing daw malinong nga lugar para makatuon.

15. Ano ang pila ka dipormal nga paagi sa pagtigayon sing ihibalo sa Biblia?

¹⁵ May yara isa pa ka palaligban: Ang iban indi makahibalo kon paano magtuon. Sa sining mga inadlaw labi na, indi mapasapayanan nga ang kabataan nakatuon sa pagtuon sa eskwelahan, kag yadtong madugay na nga wala nagaeskwela wala na sing batasan sa pagtuon. Apang, sa pagkamatuod, ang pagtuon indi subong sina kabudlay. Mangin subong ini kasimple sa pagbasa sa mga artikulo nga nagawili sa imo sa libro nga Aid to Bible Understanding ukon sa pagbasa sa New World Translation Reference Bible. Ang pagpamati sa rekording sa mga cassette tape tuhoy sa Biblia ukon ang paghimo sang personal nga proyekto sa pagpanalawsaw amo ang iban pa nga paagi sa pagtuon. Natilawan mo na bala ang magtan-aw lamang sa nagligad nga mga guwa sang Lalantawan kag Magmata! nga magasin kag magbasa sang artikulo nga nagaganyat sang imo interes? Matuod, indi ini tul-id nga pagtuon, apang magabulig ini nga mapalig-on ang imo kalipay sa Pulong ni Jehova.

16. Ano ang dapat nga katuyoan naton sa pagtuon para sa semanal nga Pagtinuon sa Lalantawan?

¹⁶ Apang kamusta ang dugang pa nga pormal nga pagtuon, subong, halimbawa, kon nagahanda ikaw para sa semanal nga Pagtinuon sa Lalantawan? Sa sina nga pagtuon, dapat nga ang estudyante may ginahunahuna nga tulumuron. Ano nga sahi sang tulumuron? Sa bahin sang paghanda para sa Pagtinuon sa Lalantawan, dapat niya kuhaon ang pinakadaku nga kaayohan gikan sa “pagkaon sa nagakaigo nga tion” nga gin-aman paagi sa “matutom kag mainandamon nga ulipon” kag handumon man nga buligan ang iban paagi sa iya mga komento sa mga miting. (Mateo 24:45) Paano niya ini himuon? Wala sing mga kasugoan, apang yari ang isa ka panugda.

17, 18. (a) Maghatag sang pila ka panugda sa kon paano ang estudyante makahanda para sa semanal nga Pagtinuon sa Lalantawan? (b) Maghatag sang pila pa ka panugda nga nasapwan mo nga mabuligon sa personal nga pagtuon. (Tan-awa ang footnote.)

¹⁷ Una, basaha ang bilog nga artikulo, ayhan sa gilayon sa tapos mo makuha ang imo kopya sang Ang Lalantawan. Inang una nga pagbasa magalawig lamang sing 20 minutos, apang magahatag ini sa imo sang kabilogan nga ideya sa pangunang mga punto kag sa nagakaigo nga kahulugan sang artikulo. Kon magaabot ang tion sa makugi nga pagtuon sa artikulo, maglingkod nga dala ang Biblia kag lapis ukon inugtanda. Nian, basaha ang nahaunang parapo sing maayo, nagatalupangod sang mga argumento kag kon paano ginahuman ang mga ideya. Tan-awa ang tanan nga kasulatan nga ginsitar apang wala ginakutlo sa parapo kag tan-awa kon mahantupan mo kon ngaa ginalista ini didto. Masunod, basaha ang pamangkot sa parapo kag tan-awa kon masabat mo ang pamangkot. Kon nahibaloan mo na ang sabat, kuriti ang pila ka tinaga sa parapo nga magapahanumdum sa imo sang sabat kon magtambong ka sa Pagtinuon sa Lalantawan. Sa marhin, ayhan magasulat ka man sing malip-ot nga nota nahanungod sa kasulatan nga gintan-aw mo, mga punto nga luyag mo panalawsawan sing dugang pa, kag iban pa.

¹⁸ Kon natapos mo na ang bilog nga artikulo sa sining paagi, tan-awa ang pamangkot sa kahon nga nagatudlo sa katapusan sang artikulo kag tan-awa kon nahangpan mo ang pangunang mga punto. Kon may mga pamangkot nga indi mo masabat, repasuha liwat ang artikulo agod makita ang sabat. Kon himuon mo ini sa sulod sang pila ka adlaw antes sang semanal nga Pagtinuon sa Lalantawan, masapwan mo nga maayo pasiplatan liwat ang artikulo sa adlaw sang pagtinuon agod mapatudok ini sa imo hunahuna.a

Ang Kinahanglanon nga Magpamalandong

19. Paano ang pagpamalandong makabulig sa pagpalig-on sang gugma sa Pulong ni Jehova?

¹⁹ Dumduma nga ang pagtuon nagalakip sang pagpamalandong. Ang pagtuon nga wala sing pagpamalandong daw kaangay sang pagkaon nga wala natunawan. Busa, hunahunaa kon ano ang imo ginaton-an. Iangot ini sa iban nga mga butang nga nahibaloan mo. Paano ini nagaapektar sang imo kabuhi? Paano mo ini gamiton sa pagbulig sa iban? (Hulubaton 15:28) Ton-i nga hatagan sing igtalupangod ang mga detalye. Ihambal sa iban ang naton-an mo. Ipaambit ang imo bag-ong naton-an. (Hulubaton 27:17) Ini man magalig-on sang imo pagkalipay sa Biblia.

20. Ilaragway ang tudok nga apresasyon ni Hari David sa napahayag nga Pulong ni Jehova.

²⁰ Si Hari David may talalupangdon nga apresasyon sa Pulong ni Jehova. Nagsulat sia: “Ang kasugoan ni Jehova himpit, nga nagapahauli sang kalag. Ang pahanumdum ni Jehova malig-on, nga nagapaalam sa bunayag. Ang mga mando ni Jehova matarong, nga nagapasadya sa tagipusuon; ang sugo ni Jehova putli, nga nagapasanag sang mga mata. Ang kahadlok kay Jehova matinlo, nga nagapadayon sa gihapon. Ang hudisyal nga desisyon ni Jehova matuod; kag matarong sing bug-os. Halandumon sila sing labi pa sa bulawan, huo, sang sa madamo pa nga bulawan nga bus-og; kag matam-is pa man sa dugos kag sa mga nagatulo sa uludlan.”—Salmo 19:7-10.

21. Anong mga pagpakamaayo ang maani naton kon palambuon naton ang matuod nga gugma sa “mga butang nga napahayag” ni Jehova?

²¹ Paagi sa pagsunod sa laygay sang nahaunang salmo, kag pagtuon sing tayuyon sang Biblia, ikaw, man, makapalambo sini nga sahi sang apresasyon sa “mga butang nga napahayag” ni Jehova. Kag ini man, magadul-ong sa imo pag-agom sing mga pagpakamaayo nga ginsaad sa sinang salmo para sa isa nga ang kalipay yara sa Pulong ni Jehova: “Mangin kaangay sia sang kahoy nga natanum sa ubay sang mga kasulgan sang tubig, nga nagapamunga sa iya panag-on kag ang iya dahon man indi malaya, kag ang bisan ano nga ginahimo niya nagamadinalag-on. . . . Kilala ni Jehova ang dalanon sang mga matarong.”—Salmo 1:3, 6.

[Footnote]

Paano Mo Mapaathag?

◻ Ngaa indi bastante ang pagsalig sa iban sa pagtudlo sa aton sang Pulong sang Dios?

◻ Ano nga mga pagpakamaayo ang mabaton naton gikan sa pagtuon sang Biblia?

◻ Paano makita ang tion sa pagtuon sang Biblia?

◻ Ano ang pila ka bulig sa pagkonsentrar kon kita nagatuon?

◻ Ano ang dapat nga mangin tulumuron naton kon nagahanda sa Pagtinuon sa Lalantawan?

[Laragway sa pahina 17]

Ang mga tawo napatay bangod sang pagbasa sang Biblia

[Mga Laragway sa pahina 18]

Dapat kita mangita sing tion sa pagbinagbinag sang Pulong sang Dios bisan diin sa aton masako nga pagkabuhi