Ang Imo Palaabuton—Ang Mas Maayo nga Paagi sa Paghibalo Sini

SANG 1962 ang Indian nga mga astrologo nagtagna nga matabo ang isa ka bug-os kalibutan nga kalamidad “bangod sang tumalagsahon nga paglapitay sang walo ka planeta sa sign sang Cap­ri­corn.” Apang, wala ini magmatuod. Sining karon lang, sa katapusan sang 1980, ang kalabanan Pranses nga mga astrologo nagpabutyag sing opinyon nga ang presidente sadto sang Pransya nga si Gis­card ­d’Estaing, pilion liwat para sa ikaduha nga termino. Apang ang iya kontra nga si Fran­çois Mit­terrand, amo ang nagdaug sa eleksion. Ang mga kapaslawan kaangay sini nagapahanumdom sa aton nga ang astrolohiya indi isa ka pat-od nga paagi sa paghibalo sang palaabuton.

May yara bala, kon amo, lain nga paagi? Halimbawa, makabulig ayhan sa imo ang mga panikasog sang mga sientipiko nga itagna ang palaabuton? Bueno, amo ini ang gintagna sang ­McGraw Hill In­sti­tute (Estados Unidos) sang 1970 kon ano ang matabo sa 1980: “Mga droga nga magalutos sa kanser, may tawo nga mga salakyan sa espasyo padulong sa Mars kag Venus, permanente nga base sa bulan, de-koryente nga mga awto, mangin lapnag ang mga kompyuter sa balay, ang posibilidad nga mapili ang sekso sang imo bata, kag tatlo sing dimension nga telebisyon kag sine.”

Sadto sang 1970, ang mga sientipiko sini nga in­sti­tute nagsiling: “Ini nga metodo [sang pagtagna] nagatuyo sa pagtigayon sing isa ka masaligan nga pagpanagna paagi sa nagaugyunay nga mga opinyon sang isa ka grupo sang mga eksperto.” Apang nagsala ang mga tagna sining mga eksperto sa sini nga mga latagon kag sa iban pa subong sang politika kag ekonomiya.

Isa ka Pat-od nga Tuburan sing Impormasyon

Kon indi mahibaloan sing pat-od sang mga astrologo kag mga sientipiko ang matabo, nagakahulugan bala ini nga imposible ang pagtigayon sing masaligan nga impormasyon nahanungod sa palaabuton? Antes mag-ampo, dapat naton usisaon kon ano ang ginasiling sang Biblia tuhoy sini. Dumduma nga si Jehova nga Awtor sang Biblia, ginlaragway subong “ang Isa nga nagapahayag sang katapusan kutob sa ginsuguran, kag kutob sa dumaan nga mga tion sang mga butang nga wala pa mahimo.”—Isaias 46:10.

Ang Pulong sang Dios may madamo nga tagna. Paano ini sila nagakatuhay sa mga tagna sang mga astrologo? Ang masunod amo ang sabat sang isa ka libro nga natig-uluhan The Great Ideas: “Apang kon tuhoy sa abanse nga ihibalo sang mamalatyon nga mga tawo ang hambalan, daw tumalagsahon gid ang Hebreong mga manalagna. Indi kaangay sang pagano nga mga manugpakot ukon mga manalagna, . . . wala sila nagagamit sing mga taliambong ukon mga kasangkapan sa pagsulod sa balaan nga mga sekreto. . . . Sa masami ang ila matagnaon nga mga hambal, indi kaangay sadtong mga orakulo, daw maathag gid. Sa dimagkubos ang katuyuan daw amo ang pagpahayag, indi ang pagtago, sang plano sang Dios sa mga butang bangod nagahandum Sia nga makita sing abanse sang mga tawo ang iya kabubut-on.”

Bilang halimbawa sini, madamo nga impormasyon nahanungod kay Jesus ang ginrekord sa Biblia madamo nga siglo sa wala pa ang iya pagkabun-ag. Gintagna nga matawo sia sa banwa sang Betlehem kag sa pamilya ni Jesse, nga amay ni Hari David. (Miqueas 5:2; Isaias 11:1, 10) Ang Kasulatan nagtagna man nga patyon sia sa usok apang wala sing tul-an niya nga mabuong, subong amo ang kinabatasan sa sadto nga sahi sang pagpatay. Nagmatuod ining mga detalye, kag pila lamang ini ka halimbawa sang, suno sa pagbanta sang isa ka eskolar sa Biblia, kapin sa 120 ka tagna nga natuman kay Jesus.—Salmo 22:16, 17; 34:20.

Ang Tagna nga Natuman Karon

Dugang pa, ang Biblia nagaunod sing mga tagna nga nagasentro sa aton adlaw. Binagbinagon naton ang isa sang labing importante sa sini. Ginalaragway sini ang paagisod nga mga hitabo nga magatanda sang tion nga sundan sa gilayon sang dramatiko nga pagpahilabot sang Ginharian sang Dios sa mga hitabo sa duta. Ining mga hitabo nagalakip sing mga kalibutanon nga mga inaway, mga linog, mga epidemya, mga tiggulutom, kag pagbuad sang pagkamalinapason. Wala bala nangibabaw ang pagbaskog sining mga butang sa mga balita sang kalibutan sa aton ika-20 nga siglo?—Mateo 24:3, 7-14; Lucas 21:7, 10, 11; 2 Timoteo 3:1-5.

Ginpaathag ni Jesus nga ang katumanan sining mga tagna magapahibalo sang pag-abot sang iya Ginharian sing subong kapat-od nga ang pagtubo sang mga ugbos sa mga kahoy nagapahibalo sang pag-abot sang tigpamulak. Ginsambit pa gani niya sing espesipiko nga matuman ini sa isa ka kaliwatan lamang. Ang tanan nga bahin sang tanda, lakip ang mga detalye nga ginsambit sa ibabaw, nagakatuman sa atubangan sang aton mga mata kutob sang 1914.a Busa makasalig kita sing bug-os nga ang Ginharian magahikot sa dili madugay.—Lucas 21:29-33.

Ang isa pa ka bahin nga gintagna para sa karon nga tion amo ang “kalisang sang mga pungsod, nga wala makahibalo sang dalan paguwa.” (Lucas 21:25) Ngaa may daku nga pagkawili karon sa astrolohiya kag sa iban nga mga porma sang okulto? Ang Pranses nga pamantalaan nga Le Monde Dimanche nagasabat: “Bangod ginaatubang sang krisis, ang katawhan indi magauntat sa pagpangita sing pasalig. Ang par­a­psy­chol­o­gy nagahatag sing daku nga paumpaw sa diutay nga panikasog, kag sa sining dag-on sang makapulunaw nga sientipiko nga mga katigayunan subong sang nuklear nga mga tukib kag pagtunga sang gene, ang mga tawo nagakasulay sa pagpalagyo padulong sa indi nasonaran kag indi makatarunganon, nga nagatinguha sa pagtukib sang kahulugan sang kabuhi.” Gani indi kita dapat makibot sa lapnag nga interes sa okulto nga mga buhat, subong sang astrolohiya. Isa ini sang mga sintoma sang “kalisang” nga gina­eks­periensiahan sang mga tawo karon bilang katumanan sang tagna ni Jesus.

‘Bayawa ang Inyo mga Ulo’

Ano ang dapat himuon sang mga Cristiano kon makita nila ining tanan nga butang? Mahadlok bala, kaangay sang mga tawo sa palibot nila? Ginhatag ni Jesus ang masunod nga laygay: “Karon kon ining mga butang magsugod sa pagkahanabo, maghangad kamo kag bayawa ang inyo mga ulo, kay ang pagtubos sa inyo nagapalapit.”—Lucas 21:28.

Luyag mo bala mahibaluan ang imo palaabuton sa dugang pa nga detalye? Nian maghinguyang sing tion sa pag-usisa sang kadalumon sang Biblia kag ‘tilawi ang inspirado nga mga ekspresyon kon sila iya sang Dios.’ (1 Juan 4:1) Mahimo mo ini sa bulig sang magasin nga Ang Lalantawan, nga regular nga nagabinagbinag sang mga tagna sa Biblia kag nagapaathag sang ila aplikasyon sa aton adlaw. Sa amo, samtang makombinse ikaw nga malapit na ang katapusan sang magamo nga kalibutan karon, ikaw man ‘makabayaw sang imo ulo.’ Mahibaluan mo man kon ano ang dapat himuon agod maagom ang mga pagpakamaayo sang Mesianikong Ginharian, nga sa dili madugay magahilabot sa mga hilikuton sang kalibutan para sa kaayuhan sang tanan matarong nga tawo.

[Footnote]

[Kahon sa pahina 5]

“Kag Mahanabo ang Tanda”

‘Ano ang malain sa pagkadto sa manugpakot ukon sa pagbasa sang imo horo­scope sa pamantalaan? Indi bala ini isa ka wala sing halit nga kalingawan?’

Wala ini ginapakadiutay sang Biblia. Sa kamatuoran, ginapabantay kita sini batok sa mga espiritista kag mga manugpakot. Sa tolon-an sang Deuteronomio, ginahatag ni Jehova ang masunod nga paandam: “Kon may magtindog sa tunga nimo nga isa ka manalagna ukon manugdamgo sing mga damgo . . . maghatag sa imo sing tanda ukon katingalahan, kag mahanabo ang tanda ukon ang katingalahan nga ginpamulong niya sa imo, nga nagasiling, ‘Magsunod kita sa iban nga mga dios,’ . . . dili ka magpamati sa mga pulong sina nga manalagna ukon sina nga manugdamgo sang mga damgo.”—Deuteronomio 13:1-3.

Talupangda nga wala ginaduhaduhaan sang Kasulatan ang kamatuoran nga ang iban nga mga pakot sang mga espiritista kag mga astrologo mahimo magmatuod. Sa baylo, ang Biblia nagapaandam sa aton nga, kon ining mga pakot ginapasad sa mga tanda sa mga langit ukon sa iban nga mga metodo sang pagpamakot, nagahalin sila sa mga demonyo, nagadaya, kag mahimo nga magpatalikod sa mga tawo gikan sa matuod nga Dios.—Tan-awa ang Binuhatan 16:16-18.

Ang pagpamati sa mga astrologo ukon sa iban nga nagapangangkon nga makapakot sang palaabuton isa ka pag-atubang sa peligro nga makatigayon ikaw sing serioso nga mga problema sa espirituwal kag mangin ulipon sang “malaut nga mga espiritu sa langitnon nga mga duog.” (Efeso 6:12) Sa amo, ang pagpamangkot sa sina nga mga indibiduwal ginakabig sang Dios nga isa ka daku nga sala; ang mga nagahimo sina ‘kalangil-aran’ sa iya mga mata kag indi sila makapanubli sang iya Ginharian.—Bugna 22:15.

Busa para sa aton kaayuhan nga ginapabantay kita sang Biblia batok sa astrolohiya kag sa iban pa nga porma sang pagpamakot.

[Kahon sa pahina 6]

SANG BIBLIA NGA ABANSE NGA GINTAGNA:

◆ Si Jesus matawo sa Betlehem.—Miqueas 5:2

◆ Matawo sia sa pamilya ni Jesse, nga amay ni Hari David.—Isaias 11:1, 10

◆ Patyon sia sa usok.—Salmo 22:16, 17

◆ Wala sing tul-an niya nga mabuong.—Salmo 34:20