Mga Anghel—Ginaapektuhan Bala Nila ang Imo Kabuhi?

NAGALUNTAD gid bala ang mga anghel? Ukon produkto lamang bala sila sang imahinasyon? Kon nagaluntad sila, sarang bala nila maapektuhan ang imo kabuhi?

May isa lamang ka masaligan nga tuburan para sa sabat sa sina nga mga pamangkot. Amo ina ang inspirado nga Rekord nga ginhatag sang Dios sa katawhan—ang iya Pulong, ang Balaan nga Biblia. Tuhoy sini si apostol Pablo nagsulat: “Ang bug-os nga Kasulatan inspirado sang Dios kag mapuslanon . . . sa pagtadlong sang mga butang.”—2 Timoteo 3:16.

Kon amo, makasalig kita nga ang Biblia magahatag sa aton sing tadlong nga mga sabat tuhoy sa pagluntad sang mga anghel kag kon bala ginaapektuhan nila kita. Sa pagkamatuod ang Manunuga sang uniberso makasugid sa aton kon bala ang mga anghel isa sang iya mga tinuga.

Matuod Bala ang mga Anghel?

Ang Biblia maathag nga nagasiling: “Ginhimo niya [Dios] ang mga anghel nga mga espiritu.” (Hebreo 1:7) Gani ang Manunuga may espiritu nga mga tinuga sa langitnon nga duog. Indi naton sila makita, kag gamhanan sila.—Salmo 104:4; 2 Pedro 2:11.

Tuyo bala sang Dios nga ang mga anghel mangin indi personal lamang kag indi maathag nga entidad? Kon amo sina, ngaa ginalaragway sang Biblia ang mga anghel subong nga may mga balatyagon? Halimbawa, ginasugiran kita sini nga sang ginpasad ang sadsaran sang duta, ang mga anghel “malipayon nga nagsinggit, kag ang tanan nga mga anak sang Dios [ang mga anghel] naghinugyaw sa kalipay.”—Job 38:4-7.

Maathag nga, kaangay sang intelihente dutan-on nga mga tinuga sang Dios, ang intelihente nga espiritu nga mga tinuga, ang mga anghel, may ila kaugalingon nga personalidad. Bisan pa nga ang Biblia nagasambit sang duha lamang ka anghel (sanday Miguel kag Gabriel), ang kamatuoran nga ang mga anghel may mga ngalan nagadugang sa ila pagkaindibiduwal. (Lucas 1:11, 19, 26; Judas 9) Makusog nga ginatagudili sang Biblia ang pagsimba sa mga anghel, kag nagalakip ina sang pagpangamuyo sa ila. Sa baylo nga magpangamuyo kita sa mga anghel, si apostol Pablo nagalaygay sa aton: “Sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay.”—Filipos 4:6; Bugna 19:10; 22:8, 9.

Apang ginprograma bala ang mga anghel nga wala sing ikasarang sa personal nga pagpili sa ulot sang matarong kag sayop kaangay sang wala sing painoino nga mga robot? Indi, ang mga anghel may kahilwayan sa pagdesisyon, kasubong sang tawo. Halimbawa, sang ginlapas sang iban nga anghel ang mga sugo sang Dios sang panahon ni Noe, ginsikway sila sang Dios, kag ginpaguwa sila gikan sa langitnon nga luwang sang Dios. Ang ila dimatinumanon nga buhat isa ka maathag nga pagpakita sing angheliko nga pagkaindibiduwal.—Genesis 6:1, 2; 2 Pedro 2:4; Mateo 25:41.

Busa, ang Biblia nagahatag sa aton sing mabuligon nga impormasyon nahanungod sa ginhalinan, pagluntad, kag kinaugali sang mga anghel. Ang paglampas sa ginasiling sang Pulong sang Dios nahanungod sa ila nagapahunahuna sa indibiduwal sing wala sing pulos nahanungod sa mga pamangkot nga wala ginasabat sang Biblia. Nagadul-ong pa gani ini sa paghatag sing dinagakabagay nga igtalupangod ukon pagsimba sa mga anghel. (Colosas 2:18) Ang Biblia nagapahanumdom sa aton nga “siguraduhon ang mas importante nga mga butang” kag indi ‘maglampas sa kon ano na ang ginpahayag subong maayong balita.’—Filipos 1:10; Galacia 1:8.

Mga Anghel sa Katuyuan sang Dios

Bisan pa nga madamo ang magaugyon sa ginhalinan kag karakteristiko sang mga anghel, diutay lamang ang nakahibalo sang rason sang pagluntad nila kag kon paano ginaapektuhan sang mga anghel ang aton kabuhi sa karon.

Sa Biblia, ang duha ka tinaga nga gingamit para sa “anghel” amo ang mal·’akhʹ (Hebreo) kag agʹge·los (Griego). Lunsay ini nagakahulugan sing “mensahero.” Nagasugid ini sa aton sang pila ka butang nahanungod sa isa sang mga hilikuton sang mga anghel. Ang mga anghel nagaalagad subong mga mensahero sa ulot sang Dios kag sang tawo.

Halimbawa, isa ka anghel ang ginpadala sa pagpaalinton sang mensahe kay Abraham nahanungod sa iya anak nga si Isaac kag sa pagpakamaayo nga magaabot paagi sa iya, isa ka pagpakamaayo nga sarang naton mabaton. (Genesis 22:11-17) Isa ka anghel ang ginpadala sa pagpakigkomunikar kay Moises. (Binuhatan 7:37, 38) Ginpadala man sang Dios ang isa ka anghel nga dala ang mga instruksion kay manalagna Elias. (2 Hari 1:3) Kag isa ka anghel ang nagpakita kay Jose, nga amay-amay ni Jesus, nga dala ang pinasahi nga mga instruksion nahanungod sa lapsag.—Mateo 2:13.

Ginpadala man ang mga anghel sa pag-amlig sa katawhan sang Dios: “Ang anghel ni Jehova nagpahamtang sing dulugan sa palibot sang mga nagakahadlok sa iya, kag nagaluwas sa ila.” (Salmo 34:7) Pananglitan, isa ka anghel ang nagpaguwa kay apostol Pablo gikan sa bilanggoan. (Binuhatan 12:6-11) Duha ka anghel ang nagbulig kay Lot kag sa iya mga anak nga dalaga nga makalampuwas sa pagkalaglag sang Sodoma kag Gomora paagi sa pag-upod sa ila paguwa sina nga lugar. Apang, ang asawa ni Lot wala magpanghikot nga nahisuno sing bug-os sa mga anghel, gani nalaglag sia upod sadto nga mga siudad.—Genesis 19:1-26.

Ang Biblia nagasambit sang madamo iban pa nga mga hitabo sang pagbulig sang anghel, nga nagatuman sang kon ano ang ginasiling sang Hebreo 1:7 kag 14: “Nahanungod sa mga anghel nagsiling sia: ‘Nga naghimo sang iya mga anghel nga mga espiritu, kag sang iya mga alagad nga mga dabdab sang kalayo.’ Indi bala sila tanan espiritu nga manug-alagad nga ginpadala sa pag-alagad, tungod sa ila nga magaagom sang kaluwasan?”

Isa ka anghel ang naghatag sing daku nga paumpaw kay Jesus. Sang gab-i antes sia mapatay, nahibal-an ni Jesus kon ano ang nagahulat sa iya—nga luiban sia, sakiton, kag mapintas nga patyon. Kinahanglan niya ang kusog agod mabatas ini nga pagtilaw sang iya integridad. Sa sinang ital-ital nga tion, nagpakita sa iya ang isa ka anghel ‘sa pagpabakud sa iya.’ Daw ano kadaku nga pagpakamaayo kay Jesus yadtong angheliko nga paumpaw! Subong resulta, bisan pa naeksperiensiahan niya ina nga kalisang, nga “ang iya balhas nangin kaangay sang dalagkung tinulo sang dugo nga nagatupa sa duta,” nahimo niya ang magbatas sing matutom tubtob kamatayon.—Lucas 22:43, 44.

Gingamit man sang Dios ang mga anghel sa pagpapas sa mga kaaway sang iya katawhan. Sang ginpahog sang Asiriahanon nga Kagamhanan sa Kalibutan ang dumaan nga mga sumilimba sang Dios, natabo ang masunod: “Sa sinang gab-i nagguwa ang anghel ni Jehova kag naghalit sang dulugan sang mga Asiriahanon sing isa ka gatos kag kawaloan kag lima ka libo. Sang pagbangon sang mga tawo sing aga pa, yari karon, sila tanan mga bangkay na.” (2 Hari 19:35) Makita mo ang makahalawhaw nga gahom sang mga anghel—isa lamang ka anghel ang gingamit sa pagpatay sa 185,000 ka manugpamatok sa Dios kag sa iya katawhan!

Ang mapasipalahon nga si Herodes naka­eks­periensia man sang gahom sang isa ka anghel. Sang magsugod si Herodes sa paghunahuna sang iya kaugalingon kaangay sang dios, “gilayon ginhalitan sia sang anghel ni Jehova, bangod nga wala niya paghimayaa ang Dios; kag gin-uk-uk sia sang mga ulod kag napatay sia.”—Binuhatan 12:21-23.

Ginasugiran kita nga sa ulihi, kon tapuson sang Dios ining bug-os malaut nga sistema sang mga butang, ang mga anghel gamiton liwat subong mga manugpatay. “Magapadala ang Anak sang tawo sang iya mga anghel, kag kuhaon nila sa iya ginharian ang tanan nga butang nga nagapasandad kag ang nagahimo sing kalautan, kag idap-ung sila sa hurno nga may kalayo.”—Mateo 13:41, 42.

Busa, ang mga anghel malayo sa kon ano ang ginahanduraw sang madamo nga tawo. Ang Aleman nga awtor sang relihion nga si Dr. Manfred Barthel nagsiling: “Kon luyag naton handurawon ang mga anghel sang Ginuo subong sang pagtan-aw sa ila sang mga manunulat sang Daan nga Testamento, kalimtan anay naton ang may yupuk nga mga kerubin . . . nga nagapuni sa aton mga panamyaw nga kard.”—What the Bible Really Says.

Paano Ka Naapektuhan sang mga Anghel?

Walay sapayan, ang pamangkot nagapabilin: Ano ang ginahimo sa karon sang mga anghel? Naapektuhan bala nila kita subong? Huo, naapektuhan nila kita!

Dumduma nga sa tagna niya nahanungod sa “konklusion sang sistema sang mga butang” si Jesus nagtagna: “Kon magkari ang Anak sang tawo sa iya himaya [nga nagaagom sang gahom sang Ginharian], kag ang tanan nga anghel kaupod niya, nian magalingkod sia sa iya mahimayaon nga trono. Kag tiponon sa atubangan niya ang tanan nga pungsod, kag painpainon niya sila.”—Mateo 24:3; 25:31, 32.

Paano himuon ining hilikuton sa pagpainpain sa katawhan? Si Jesus nagtagna: “Ining maayong balita sang ginharian ibantala sa bug-os napuy-an nga duta nga panaksi sa tanan nga kapungsoran; kag ugaling magaabot ang katapusan.” (Mateo 24:14) Huo, ginagamit sang Dios ang iya katawhan sa duta sa paghimo sining tugob-globo nga hilikuton sa pagbantala.

Ang Ginharian sang Dios amo ang pangulohan nga magadala sang lamang nga solusyon sa mga problema sang katawhan. Sa karon, ang mensahe nahanungod sa sini ginabantala sa bug-os nga duta sang kapin sa tatlo ka milyon ka Saksi ni Jehova, kag ginasakdag sila sang mga anghel. “Mangin subong sina ang konklusion sang sistema sang mga butang: magaguwa ang mga anghel kag magapain sila sang mga malaut sa mga matarong.”—Mateo 13:49.

Ining ginatuytuyan sang anghel nga hilikuton sa pagbantala sa karon nagabaton sing lainlain nga reaksion sa mga tawo. Ang iban nagasiling nga tuman sila kasako sa pagpamati ukon wala gid nagapamati. Ang iban nagapangalag-ag ukon nagapangduhaduha. Apang, madamong bunayag sing tagipusuon, nga nabalaka nahanungod sa ila palaabuton, ang naghulag sing kinabubut-on. Paano?

Sa 208 ka kadutaan, ang mga Saksi ni Jehova nagahiwat sing mga pagtuon sa Biblia sa balay upod sa minilyon ka tawo nga “nabalaka sa ila espirituwal nga kinahanglanon” kag ‘ginagutom sa pagkamatarong.’ (Mateo 5:3, 6) Ginapakita sang madamong eksperiensia nga sing masunson ginatuytuyan sang mga anghel ang mga alagad sang Dios sa pagkadto sa mga bunayag sing tagipusuon nga mga tawo nga dala ang mensahe sang kaluwasan. Ang Bugna 14:6 malaragwayon nga nagalaragway sa “isa ka anghel nga nagalupad sa tunga sang langit” nga may “maayong balita nga dayon nga ibantala sa mga nagapuyo sa duta.” Amo sina ang ginahimo karon mismo! Paano sini maapektuhan ang imo palaabuton?

Mga Anghel sa Imo Palaabuton

Maathag nga ginapakilala sang Biblia ang aton tion subong “ang katapusan nga mga adlaw” sining karon nga sistema. (2 Timoteo 3:1-5) Ginasugiran man kita sang Biblia nga ang mga anghel “nagatindog [karon] sa apat ka pamusod sang duta, nga nagapugong sang apat ka hangin.” (Bugna 7:1) Ano ang kahulugan sining simbulismo?

Bangod yara sa “pamusod” sang duta, ang mga anghel yara sa posisyon sa paghilway sang malaglagon nga “hangin” gikan sa tanan nga direksion. Wala sing lugar sa duta ang makalampuwas, nga magakahulugan sing “halit,” ukon kalaglagan, para sa sining malaut nga sistema kag sa tanan nga mga sumalakdag sini. Busa ang mga anghel sang Dios ginalaragway subong handa sa pagpanghikot kon ginahatag ang sinyales!—Bugna 7:3; 19:11-21.

Apang, ang malaglagon nga “halit” ipadapat lamang sa mga wala nagahulag sa ginasakdag sang anghel nga mensahe nga ginabantala karon sa bug-os nga duta. Indi ini magahalit sa mga nagapangita sa Dios kag sa mga nagapamati sa mensahe sang Ginharian. Pagaamligan sila, subong sang ginasiling sang Pulong sang Dios: “Pangitaa ninyo si Jehova, kamo tanan nga mahagop sang duta . . . Pangitaa ang pagkamatarong, pangitaa ang pagkamapainubuson. Ayhan malipdan kamo sa adlaw sang kaakig ni Jehova.”—Sofonias 2:3.

Ano nian ang madangatan sang “mga mahagop”? Ang Salmo 37:11 nagasiling: “Ang mga mahagop magapanubli sang duta, kag magakalipay sila sa kabuganaan sang paghidait.” Tubtob san-o? “Ang mga matarong magapanubli sang duta, kag magapuyo dira sing dayon.” (Salmo 37:29) Nagakahulugan ina nga ang kabuhi nga walay katapusan mangin posible sa duta nga pagahimuon nga paraiso, subong sang ginpakita ni Jesus.—Lucas 23:43.

Gani, nian, ang pamangkot nga dapat mo sabton amo ini: ‘Mangin ano ang akon palaabuton?’ Ang sabat nagadepende sa kon ano ang imo reaksion sa panuytoy sang anghel. Magapamati ka bala kag magahulag kon itanyag sa imo ang mensahe nga ginasakdag nila? Kon amo, mangin isa ikaw sa magahulat nga may pagsalig sa palaabuton, nga may pat-od nga saad sang Dios: “Ang kalibutan nagataliwan kag ang kailigbon sini, apang ang nagahimo sang kabubut-on sang Dios nagapadayon sa gihapon.”—1 Juan 2:17.

[Laragway sa pahina 7]

Ang mga anghel karon ‘nagapugong sa apat ka hangin.’ Ngaa?