Ang Kombension nga Nagpauswag sang Aton Pagsalig kay Jehova

NAHIBALUAN sang aton langitnon nga Amay, si Jehova nga Dios, kon ano gid ang kinahanglan naton. Kag ginabutang niya ini sa hunahuna sang iya dedikado nga mga alagad nga nagadumala sang iya hilikuton sa duta sa paghatag sina nga kinahanglanon. Amo gid sini ang masiling sa “Pagsalig kay Jehova” nga Distrito nga mga Kombension, nga ginhiwat sa palibot sang duta kutob sang Hunyo 1987 padayon. Ginpabakud gid sini ang mga Cristiano batok sa mga pangalag-ag, duhaduha, kag dipagsalig nga lapnag gid katama sa kalibutan.

Ang tema nga “Pagsalig kay Jehova” malantipon nga ginbinagbinag sa programa. Ginpatalupangod ini sa mga pinamulong nga makusog kag prangka, nga gintandaan sing pagkaprangka kag pagkatalangkod. Ini tanan nagpabakud sa pagsalig sang tagpalamati kay Jehova. Sarang sila makapauli nga natudok sing dimapanas ang tema sa ila mga tagipusuon kag mga hunahuna, determinado nga paagi sa ila mga buhat kag sa ila mga hambal mapahibalo nila sa tanan nga nagasalig sila sing bug-os kay Jehova.

“Salig Kamo kay Jehova”

Ina nga mga pulong nga makita sa Isaias 26:4 nagapabutyag sang tema para sa una nga adlaw. Sing labi ka nagakaigo, ang programa ginbuksan paagi sa pamulongpulong nga “Ilingig ang Inyo Igdulungog sa mga Pulong sang Dios.” Ginpakita sang humalambal nga ining ekspresyon, nga mabasa sing madamong beses sa Pulong sang Dios, nagakahulugan sing paghatag sing bug-os nga igtalupangod upod ang hunahuna kag tagipusuon sa ginasiling, sa tuyo nga iaplikar kon ano ang nabatian. Nagakahulugan ina sing pagpugong sa kaugalingon kag pagkonsentrar sa kon ano ang ginasiling, nga wala nagatugot sa hunahuna nga maglagaw. Paagi lamang sa paglingig sang aton igdulungog nga ang aton pagsalig kay Jehova mapabakud sang aton nabatian kag nian mapahulag kita sa pagpanghikot sa kon ano ang ginsiling. Kag indi bala nga dapat mangin amo sini ang aton panimuot kon mabatian naton ang Pulong sang Dios nga ginapaathag, subong sa aton mga miting sa kongregasyon?

Ang tsirman sang kombension naghatag sang masunod nga tema, “Ang mga Nagasalig kay Jehova Malipayon nga Mangin Yari Diri.” Ginpakita niya nga kon daku ang aton pagsalig kay Jehova, daku man ang aton kalipay. Ang pagsalig kay Jehova nagakahulugan sing pagsandig sing bug-os kag masinaligon sa iya. Kon madamo ang aton ihibalo kay Jehova kag daku ang aton paghigugma sa iya, mangin makusog pa ang aton pagsalig sa iya. Ang tema sang kombension indi lamang isa ka slogan. Ginapakita naton ang aton pagsalig kay Jehova sa madamo nga paagi, ang isa amo ang pagpakita sing patugsiling sa iban. Sa kalipay sang tanan, sa konklusion sang iya komento, ginpresentar sang tsirman ang una nga re­lease—ang maduagon kag praktikal nga instrumento sa pagpanaksi. Amo ini ang tract nga Kon Ngaa Imo Masaligan ang Biblia.

Sa tapos mahinun-anunan ang tumalagsahon nga halimbawa ni David sang gin-atubang ang higante nga si Goliat, ang masunod nga humalambal nagpamulongpulong sa “Kon Paano ang Iban Nagsalig kay Jehova” sa moderno nga tion. Halimbawa, yara ang isa ka sis­ter nga ginpahog sang iya ditumuluo nga bana, nga nagataya sing pusil, nga patyon sia kon padayon sia nga magtambong sa mga miting. Ginpakita sang iban ang ila pagsalig kay Jehova sang ginsilingan sila nga ang ila kabuhi nasandig sa pagbaton sing pagpatayhon sing dugo. Ginpakita sang mga pamatan-on ang pamatuod sang ila pagsalig kay Jehova paagi sa pagbatu sa mga pag-ipit nga mag-entra sa mga sports ukon maghingamo sing mas mataas nga edukasyon pagkatapos sang hayskul.

Ang programa sang Biernes sang aga nagtapos paagi sa pamulongpulong nga “Katawhan nga Nahamulag sa Kalibutan.” Ginapakita naton ang aton pagsalig kay Jehova paagi sa paghupot sa aton pagginawi upod sa tuhay nga sekso nga indi mapasipalahan, paagi sa pagtugot nga tuytuyan sang Cristianong mga prinsipio ang aton kalingawan, kag paagi sa paglikaw sa tanan nga pamayo kag pamustora nga wala nagapakilala sing maathag sa mga sekso. Paagi sa aton pagkanahamulag sa kalibutan, pirme ginahatag ang isa ka makusog nga panaksi, nga nagaresulta pa gani sa pagsulod sang iban sa kamatuoran.

Sang Biernes sang hapon, ang programa ginsugdan sing pamulongpulong nga “Ang Pagpayunir Nagapadasig sang Espirituwal nga Pagtubo.” Kag matuod gid ina! Paagi sa Pulong ni Jehova, sa iya balaan nga espiritu, kag sa iya organisasyon, ginaaman sang Dios ang aton kinahanglanon agod mangin “hamtong,” apang ang pagpayunir nagabutang sa aton sa isa ka posisyon nga makahimo sing labi pa kag maid-id nga magamit ining tanan nga espirituwal nga mga aman. (Efeso 4:13) Paagi sa mga interbyu, ang mga payunir nagsugid sa kon paano ang bug-os tion nga pag-alagad naghimo sa ila nga mapalambo sing labi pa ang bunga sang espiritu sang Dios, nga mapabutyag ang dugang nga gugma sa katawhan, nga mangin labi ka lantip sa pag-alagad, kag magsalig sing labi pa kay Jehova, sa amo ginapalambo ang mas suod nga kaangtanan upod sa iya. Ini tanan nagpadasig sang ila espirituwal nga pagtubo.

Ang masunod amo ang key­note nga pamulongpulong, “Ang Katawhan nga Nagasalig Pirme kay Jehova.” Ginpakita sining makapulukaw nga diskurso nga tuhay kita sa kalibutan bangod nagasalig kita sing bug-os kay Jehova. Pasad sa lainlain nga mga teksto gikan sa tolon-an ni Isaias, ginpakita sang humalambal kon paano naton nakita ining tuman ka makapalig-on nga mga tagna nga natuman sa mga Saksi ni Jehova bangod nagasalig kita sa Dios. Upod ang pagsalig, mapaabot naton ang tion sa malapit nga palaabuton nga ipabutyag ni Jehova ang iya kaakig sa tanan nga mga pungsod kag nian abiabihon ang Paraiso.

Ang mga kombensionista ginpalig-on sa “Pagpalapnag sa Maayong Balita sa Tanan nga Kahigayunan.” Sa tapos mapadaku ang importansia sang paghimo sina, ginpakita sang madamong demonstrasyon kon paano sarang magamit sing epektibo ang bag-ong tract nga Kon Ngaa Imo Masaligan ang Biblia sa pormal kag dipormal nga pagpanaksi. Sa pagkamatuod, luyag naton pirme dalhon ining mga tract, kay ang pagpalapnag sa maayong balita sa tanan nga kahigayunan dapat mangin karakteristiko sang tagsa ka saksi ni Jehova kag isa ka paagi sa pagpakita nga nagasalig kita sa Iya.

Gin-apresyar sing daku ang pamulongpulong nga “Mga Ginikanan—Lab-ota ang Tagipusuon sang Imo Bata Kutob sa Pagkalapsag.” Agod ang bata magtubo nga nagasalig kay Jehova, ang paghanas sa iya dapat magsugod sa pagkalapsag kag dapat nga amo ang unahon. Sa sina lamang nga mahimo niya isikway ang tanan nga malain nga impluensia sa telebisyon, sa eskwelahan, kag sa dalan. ‘Ipakita sa imo bata ang luyag mo nga mangin amo sia,’ siling sa mga ginikanan. Huo, ang pagpahamtang sing maayong halimbawa amo ang labing maayong paagi sa paglab-ot sa tagipusuon sang bata. Ang tanan nga bahin sang balaan nga pag-alagad magaabot sing natural kag makalilipay kon ang atmospera sang puluy-an tunay nga espirituwal. Indi naton luyag nga idingot ang tion kag panikasog nga nadalahig. Padayon man nga lab-ota ang tagipusuon sang bata paagi sa maayo nga komunikasyon. Ipakita ang kalig-on sang gugma, kag ihatag ang rason kon nagahatag sing disiplina. Dayawa sia kag padyai kon nagakabagay, apang indi gid paghiphipi ang imo bata.

Nagpaathag sang isa ka serioso nga problema sa tunga sang iban nga pamatan-on nga mga Saksi amo ang pamulongpulong nga “Mga Pamatan-on—Mag-andam Batok sa Doble Kara nga Kabuhi.” Ngaa ang iban nagakabuhi sing doble kara? Bangod luyag nila pahamut-an ang ila mga ginikanan kag kongregasyon apang nahadlok man sila nga yagutaon sang ila kalibutanon nga mga katubotubo. Ukon abi nila nawasi nila ang iban nga kalipayan kon indi sila manigarilyo, magdroga, ukon magbuhat sing ginadumilian nga sekso. Apang indi gid malikawan ang katunayan nga ang tanan nga nagakabuhi sing doble kara nagadala sing pasipala kay Jehova, kasubo sa mga ginikanan, kag kapung-aw sa kaugalingon. Ang bisan sin-o nga nagasab-ug sa unod nagaani sing kaduluntan, samtang ang paghupot sing maayo nga kaangtanan kay Jehova, nga nagasalig sing bug-os sa iya, nagapangapin sa isa gikan sa pagkabuhi sing doble kara.—Galacia 6:8.

Makusog nga nagpadaku sining tanan nga prinsipio amo ang drama nga nagsunod sa gilayon. Ginatig-uluhan Matutom nga Pagpasakop kay Jehova kag sa Iya Organisasyon, nagahatag ini sing butang nga hunahunaon samtang ginalarawan sini kon paano ang isa ka gulang napilitan sa paghalin sa pagka-el­der bangod nabuyagyag ang iya bata nga babayi nga nagakabuhi sing doble kara. Ang drama nakatigayon sing madamo nga ekspresyon sing apresasyon.

“Salig Kamo kay Jehova kag Himua ang Maayo”

Pasad sa Salmo 37:3, amo ini ang tema sang ikaduha nga adlaw sang kombension. Sa tapos mabinagbinag ang matag-adlaw nga teksto, nga nagalakip sang pagpalig-on nga himuon ini adlaw-adlaw, ginpadaku sa programa ang tatlo sing bahin nga symposium nga natig-uluhan “Pagpakita sang Aton Pagsalig kay Jehova.” Ginpakita sang nauna nga humalambal ang kinahanglanon nga himuon ini “Paagi sa Makugi nga Pagtuon sa Pulong sang Dios.” Dapat naton ini himuon agod malikawan ang siod sang pagkakontento sa kaugalingon kag ang ganyat sang materyalismo, seksuwal nga imoralidad, kag apostasya. Ang Sosiedad nag-aman sing bugana nga mga bulig sa pagtuon sa Biblia, subong sang bag-ong Watch Tower Publications Index 1930-1985. Paagi lamang sa paghimulos sing bug-os sa sini nga aman nga matigayon naton ang masinaligon nga kaangtanan sa aton langitnon nga Amay kag mangin epektibo subong iya mga saksi.

Ginpadaku sang masunod nga humalambal ang kamatuoran nga ang pagsalig kay Jehova ginapakita “Paagi sa Pagbuhat sa mga Butang nga Naton-an.” Huo, luyag naton nga kita mga nagatuman sa Pulong, nga nabalaka pirme sa paghimo sing pag-uswag. Sa anong mga bahin? Ti, sa aton kaangtanan sa iban, sa aton pamayo kag pamustora, sa pagpangita anay sang Ginharian sang Dios, kag sa pagpauswag sing paghidait kag paghiusa sa tunga sang aton mga kauturan! Agod likawan ang sala nga pagkamatinaastaason, maghalong kita nga ginahuptan naton ang aton lugar sa pamilya kag sa kongregasyon. Busa kon ginaaplikar naton ang mga butang nga naton-an, makita sang tanan nga nagasalig kita kay Jehova.

Nagtapos ang symposium paagi sa paghinun-anon sa topiko nga “Pagpakita sang Aton Pagsalig kay Jehova—Paagi sa Pagpanikasog sa Latagon.” Paagi sa paghimo sini, ginapakita naton ang aton gugma sa Dios kag sa aton isigkatawo kag ginaamligan ang aton kaugalingon. Ayhan kontento na kita sa maalabaab kag pakitakita nga pag-alagad, apang si Jehova bala? Indi bala nga ginalaygayan kita sang iya Anak nga magpanikasog? (Lucas 13:24) Ang mga pag-uswag nga padayon naton nga nakita sa mga manugbantala, mga payunir, kag ang promedyo nga oras nga ginahinguyang sa pag-alagad sa latagon dapat magapahulag sa aton nga himuon ang labi pa sing personal. Indi bala amo sina ang dapat? Paagi sa makugi nga pagpangabudlay, nagapahamtang kita sing maayo nga halimbawa, nagapakita sang aton pagsalig kay Jehova, kag nagatigayon sang iya kahamuot.

Ang masunod amo ang pangabay sa aton konsiensia sa pamulongpulong nga “Maghatag sing Labi Pa.” Daw ano ka bugana nga si Jehova nagaaman sa aton sa espirituwal kag materyal! Ginapakita naton ang aton apresasyon paagi sa pag-ilog sa iya paagi sa pagpanaksi kag paagi sa pag-amot sa pinansial sa hilikuton nga pagbantala. Mabuhinan bala naton ang aton magasto nga mga kalipayan agod makahatag sing labi pa?

Ginpakita sang pamulongpulong sa bawtismo, “Ang Imo Dedikasyon kag Bawtismo Nagapakita sing Pagsalig kay Jehova,” kon ngaa nagasalig kita sa Dios kag indi sa mga tawo. Ang bawtismo sa tubig nagakahulugan sing kamatayon sa aton anay daan nga pagginawi kag pagkabanhaw pakadto sa dalan sang kabuhi nga nahisanto sa balaan nga kabubut-on. Pagkatapos sina, magpadayon kita ‘sa pagbuhat sing katarungan, sa paghigugma sa kalulo, kag sa pagpaubos sa paglakat upod sa aton Dios.’ (Miqueas 6:8) Ang iban sang mga nabawtismuhan amo ang 8-anyos nga bata nga babayi nga nagadumala sing duha ka pagtuon sa Biblia upod sa mga kabutho, isa ka lalaki nga 79-anyos, kag isa ka 44-anyos nga quad­riplegic.

Ginsugdan ang programa sang Sabado sang hapon paagi sa pamulongpulong nga “Paghimo sing ‘Kinahanglanon nga mga Butang’ sa Pagpahamuot sa Dios.” Pasad sa Binuhatan 15:28, 29, ginpakita sini ang kinahanglanon nga pahibaluon ang aton mga doktor tuhoy sa aton tindog sa dugo sa wala pa mag-utwas ang medikal nga pagpabulong kag sa paghatag sing mga panugda kon paano ini himuon.

Ang pamulongpulong nga nakatigayon sing madamong maayong komento amo ang “Responsable nga Pagpadaku sa Bata sa Tion Sining Katapusan.” Nagpresentar ini sing timbang nga pagtamod, nga nagapakita nga samtang ang pagpadaku sa bata nagahatag sing madamo nga kalipay, nagadala man ini sing madamong responsabilidad kag masunson nga nagaresulta sa kasubo sa tagipusuon, subong sang kon ang kabataan maglain. Ang mga iloy amo ang labi na nga nagaantos sa espirituwal bangod sang mga lulan sa pagpadaku sa bata.

Nian ang masunod amo ang pamulongpulong “Mga Gulang—Bantayi ang Inyo Pagsalig.” Ini nga pagsalig amo ang pagbantay sa panong sang Dios—pagpanguna, pagpakaon, kag pag-amlig sa ila, nahisuno sa Isaias 32:1, 2. Isa gid ka daku nga hangkat ang pagtuman sa mga obligasyon sa pamilya samtang nagaatipan sang mga katungdanan sa kongregasyon. Ang pagbantay sang mga gulang sa ila pagsalig nagakahulugan man sing paglikaw sa siod sang materyalismo, sobra nga kalingawan, kag malaw-ay nga kalipayan. Ang isa sang mga gin-interbyu sa distrito nga kombension sa Dort­mund sa Fed­eral Repub­lic of Ger­many amo ang isa ka gulang nga nagbantay sang iya pagsalig sa sulod sang 60 ka tuig.

Ang pamulongpulong nga “Magmatinumanon sa mga Nagapanguna” makatarunganon nga amo ang nagsunod. Ang gugma nagabulig sa aton nga magmasinakupon kag matinumanon sa mga manugtatap sa kongregasyon kag nagapugong sa aton nga mangin dimapailubon bangod indi sila himpit, subong kita man dihimpit. (Hebreo 13:17) Paagi sa pagpakita sing pagtahod sa mga gulang sa dalagku kag magagmay nga mga butang, ginabuligan naton sila nga madala ang ila mga lulan sa baylo nga dugangan ini.

Ang programa sang Sabado ginhinakpan sang tatlo ka bahin nga symposium nga “Ang Pulong sang Dios Buhi,” pasad sa Hebreo 4:12. Ginpakita sang nauna nga humalambal nga buhi ini bangod “May Gahom Ini sa Pagpabag-o.” Karon, kaangay sang panahon sang Biblia, may madamo kita nga halimbawa nga nagapakita kon paano ang pagsalig sa Pulong sang Dios nagpahulag sa mga tawo sa paghimo sing dalagku nga mga pagbag-o sa ila kabuhi kag naghatag sa ila sing kusog sa pagbantala sa walay kahadlok.

Ginpakita sang ikaduha nga bahin sining sym­posium nahanungod sa Pulong sang Dios nga “Matalum Pa Ini sa Bisan Ano nga Espada nga Duha sing Sulab.” Nahimo sini nga magisigisi ang Babilonianhon nga butig nga mga panudlo. Nagbulig man ini sa aton nga ‘malapus ang kalag kag espiritu’ sa bagay nga nagahimo ini sa aton nga makilala ang aton mga buhat kag ang aton matuod nga mga motibo. Paagi sa paggamit sa “espada” sa sining paagi, mangin labi kita ka kalahamut-an kay Jehova nga Dios kag labi nga mahidaiton sa iban kag sa aton kaugalingon.

Ginapakita sang katapusan nga bahin nga ang Pulong sang Dios buhi bangod “Ginapabakud kag Ginapahulag Sini ang Aton Tagipusuon.” Sa Biblia, ang tinaga nga “tagipusuon” ginagamit sing malaragwayon kag nagapatuhoy sa nasulod nga persona nga ginapadayag sa aton mental kag emosyonal nga mga kinaiya. Ang Pulong sang Dios nagapabakud sang aton tagipusuon paagi sa pagpakita sang iya makatilingala nga mga kinaiya sa iya mga pagpakig-angot sa katawhan. Ang dimakagud nga gugma sang Dios nagapahulag sa aton nga ilugon sia. Sa iya katapusan nga mga komento, ginrepaso sang humalambal ang rekord sang Watch Tower Society sa pagbalhag sa mga Biblia kag ginpahalipay ang tumalambong sang ginpahibalo ang pagpaguwa sa isa ka matahom nga deluxe nga de-bulsa nga edisyon sang New World Translation.

“Pagsalig kay Jehova sa Aton Bug-os nga Tagipusuon”

Ining tema sang Domingo, nga ginkuha sa Hulubaton 3:5, ginbinagbinag sang isa ka gulang nga nagbukas sang programa kag naghinun-anon sang matag-adlaw nga teksto. Nian ang nagsunod amo ang nagausisa sa kalag nga pamulongpulong nga “Ginapasapayanan Mo Bala ang Sagrado nga mga Butang?” Ang kalibutan nagabatyag nga wala sing butang nga nautang sa Dios, apang subong mga Saksi ni Jehova, nahibaluan naton nga agod matigayon ang iya kahamuot, dapat naton ilugon ang matutom anay nga mga tawo paagi sa pagpakita sing apresasyon sa sagrado nga mga butang. Ginhambalan sang humalambal ang 13 sini, ang iban sini amo ang ngalan ni Jehova, ang iya Pulong, ang iya balaan nga espiritu, ang iya mga sugo, ang iya kitaon nga organisasyon, ang aton kaangtanan sa Dios, ang aton mga miting, kag ang aton mga pribilehiyo sa pag-alagad. Kon ginaapresyar gid naton ining sagrado nga mga butang, unahon naton sia sa aton kabuhi, magsalig sing bug-os kay Jehova, kag pagapadyaan niya.

Ang masunod amo ang pamulongpulong nga nagakinahanglan sing pagpangabudlay sing lakas nga “Kangil-ari ang Makahuluya nga Dalanon sang Kalibutan.” Bangod sang pagkaprangka sini, nakatigayon ini sing mga komento subong sang, “Amo gid ini ang ginakinahanglan naton!” Bangod lapnag na ang kalautan, ang mga Cristiano dapat magbantay batok sa pagpasapayan sa imoralidad kag kasingki. (2 Timoteo 3:1-5) Busa, indi naton dapat tan-awon ukon pamatian ang mga ginapalayag sa TV ukon radyo, ukon dapat naton ini basahon sa mga peryodiko. Sa pagkamatuod, indi naton luyag nga maghunahuna sini. ‘Ang matuod nga mga Cristiano nga maluyag sa paghupot sa maayong kaangtanan upod kay Jehova indi gid magatigayon sing bisan ano nga butang nga may labot sa pornograpiya,’ indi, bisan sing diutay!

Ang programa sang Domingo sang aga gintakpan sang makabuluyok nga drama sa Biblia nga Ginaluwas ni Jehova Yadtong Nagapanawag sa Iya Ngalan. Nagahinun-anon ini sa madamo nga hitabo sa kabuhi ni Josue. Sing realistiko, ginlarawan sini kon paano gintamod sang pumuluyo sang Jerico ang pagmartsa sang mga lalaki sa inaway sang Israel sa palibot sang siudad sa adlaw-adlaw. Ginpadaku man ang daku nga pagtuo ni Rahab, nga nagresulta sa kaluwasan niya kag sang iya panimalay. Sa paghinakop, ang tanan ginpamangkot: ‘May malig-on bala kamo nga pagtuo kag pagsalig kay Josue kag sa iya maisog nga kaupdanan? Kon amo, makalaum kita sa pagpakigbahin sa katapusan nga kadalag-an ni Jehova sa ibabaw sang iya mga kaaway.’

Ang pamulongpulong publiko sa “Pagsalig kay Jehova” nga Distrito nga Kombension ginatig-uluhan “Sa Aton Makahaladlok nga Tion, Sin-o Gid ang Imo Masaligan?” Gin-athag sini ang kamatuoran nga ang katawhan nagakinahanglan gid sing tuburan sang pagsalig! Sing maathag, ginpakita sini ang kabuangan sang pagsalig sa mga tawo. Gani, ang Pulong sang Dios nagalaygay sa aton nga magsalig kay Jehova kag nagahatag sing makusog nga mga rason para himuon ini. Dapat kita magsalig sa iya bangod sang iya mga kinaiya kag sang iya rekord sa pagluwas sadtong nagsalig sa iya, kag si Hari Ezequias amo ang tumalagsahon nga halimbawa. Sa dili madugay ang kaanggid nga kaluwasan maeksperiensiahan sadtong ang dalanon sang pagginawi nagapakita sing pagsalig kay Jehova.

“Padayon ‘sa Pagkabuhi sing Mahidaiton’” amo ang tema sang pamulongpulong nga nagsunod sa gilayon. Ang pagkabuhi sing mahidaiton nagakahulugan sing aktibo nga pagpauswag sing paghidait. Nagakahulugan man ini sing pagpakighidait sa tunga naton bangod sang pagtigayon sing matinlo nga konsiensia. Paagi sa pagpadayag sa mga bunga sang espiritu sang Dios, labi na ang gugma kag pagpugong sa kaugalingon, mahimo kita nga magkabuhi sing mahidaiton upod sa aton mga pamilya kag upod sa mga utod nga lalaki kag babayi sa kongregasyon.

Wala sing pangduhaduha nahanungod sa kamatuoran nga ini nga kombension nagsangkap sa aton tanan sa “Pag-atubang sa Palaabuton Upod ang Bug-os nga Pagsalig kay Jehova,” ang tema sang katapusan nga pamulongpulong. Ginsumaryo sini sing maayo ang programa! Ginpadaku sang humalambal nga sa adlaw-adlaw dapat kita magsalig kay Jehova upod ang aton bug-os nga tagipusuon, talupangdon sia sa tanan naton nga dalanon, kag tugutan sia sa pagtuytoy sa aton mga dalanon. (Hulubaton 3:5, 6) Gin-apresyar sing daku sang mga kombensionista nga mabatian ang nahanungod sa 16 ka bag-ong pamulongpulong publiko, cas­sette sa The Watchtower, kag re­print sang isa ka artikulo sa dugo nga nagguwa sa Awake! kag nga matigayon naton agod ihatag sa aton mga doktor. Huo, kag nalipay kita sa paghibalo nahanungod sa pagpaguwa sing isa pa ka drama sa Biblia sa cas­sette, sa pag-imprinta liwat sang mga bound vol­ume sang Watchtower (1960-79), kag sa pagbalhag sa tatlo pa ka tract!

Ang tanan nga nagtambong sa “Pagsalig kay Jehova” nga Distrito nga Kombension napalig-on sing daku sa espirituwal. Handa na sila karon sa pag-atubang sa palaabuton upod ang bug-os nga kompiansa sa ila langitnon nga Amay. Kag ang tanan nagakaigo nga napalig-on sa katapusan nga laygay: “Samtang ginaatubang naton ang palaabuton, kabay nga kita tanan nahiusa nga makapamatuod paagi sa aton dalanon sang pagkabuhi nga ‘nagasalig kita kay Jehova.’”

[Tsart sa pahina 26]

Lainlain nga “Pagsalig kay Jehova” nga Distrito nga Kombension

Tumalambong Nabawtismuhan

Austria 24,686 360

Brazil 442,731 7,626

British Isles 156,417 1,225

Colombia 82,321 1,852

Denmark 23,029 200

Federal Republic of Germany 159,361 1,455

Finland 26,144 284

France 138,683 2,705

Hong Kong 2,661 49

Ireland 4,326 61

Italy 221,227 5,496

Jamaica 18,540 184

Japan 232,904 3,416

Korea 82,296 2,013

Malaysia 1,154 15

Norway 12,703 218

Portugal 55,057 1,074

Puerto Rico 49,953 377

Spain 105,591 2,394

Sweden 30,099 312

Switzerland 19,459 261

Trinidad 10,649 132

United States 1,288,313 13,562

Venezuela 100,777 1,664

Zimbabwe 45,544 580

[Mga Laragway sa pahina 25]

Ang nagapahunahuna nga mga drama nagpadaku sang kinahanglanon nga magsalig kay Jehova

Si F. W. Franz, katapo sang Nagadumala nga Hubon sang mga Saksi ni Jehova, nga nagapamulongpulong sa atentibo nga tumalambong sa kombension

[Laragway sa pahina 26]

Ginpakita sang madamo ang pagsalig kay Jehova paagi sa pagpabawtismo bilang simbulo sang ila dedikasyon sa iya