Mga Pamangkot Gikan sa mga Bumalasa

◼ Ang katawhan sang Dios dapat ‘mag-atipan sang ila kaugalingon nga panimalay,’ gani paano nga ginpalakat ni Abraham si Agar kag si Ismael sa kamingawan?

Mahigugmaon kag nagakaigo para sa mga alagad sang Dios nga atipanon ang imol nga katapo sang pamilya. Nahanungod sa Cristianong mga ginikanan, si apostol Pablo nagsulat: “Kon ang bisan sin-o wala nagasakdag sang iya mga himata, labi na gid sang iya kaugalingon nga panimalay, napanghiwala niya ang pagtuo kag malain pa sa dimatinuohon.”—1 Timoteo 5:8.

Makapat-od kita nga ang ginhimo ni Abraham wala nagasumpakil sa espiritu sinang diosnon nga laygay, kay ginakabig sia nga halimbawa sang matuod nga pagtuo, subong “abyan ni Jehova.”—Santiago 2:23; Hebreo 11:8-19.

Ang Dios nagsaad sing pagpakamaayo paagi sa binhi, ukon manunubli ni Abraham. Sang tigulang na si Sara kag baw-as sa gihapon, ginlaygayan niya si Abraham nga magpanganak paagi sa iya Egiptohanon nga kabulig nga si Agar. Sang ulihi, sang magmabdos si Agar, nangin dimatinahuron sia kay Sara nga mahimo ini malaragway subong “sayop” ukon malaut nga sala batok sa hinigugma nga asawa ni Abraham. (Exodo 23:1; 2 Samuel 22:49; Salmo 11:5) Ginpahanugutan ni Abraham si Sara nga ibutang si Agar sa iya lugar, nga sa sini si Agar nagpalagyo sa kamingawan, ayhan pabalik sa Egipto. Ang kasaysayan wala nagasiling nga nagdala sia sing balon, kay ayhan nahibaluan niya nga mahimo sia makatigayon sing pagkaon kag tubig sa iban nga kampamento, subong sang gikan sa mga grupo nga Bedouin (nagasulusaylo sing ilistaran).—Genesis 12:1-3, 7; 16:1-6.

Nagpasilabot ang isa ka anghel kag ginsilingan niya si Agar nga magbalik, agod magabuad ang iya kaliwatan, kag agod ang ‘kamot [sang iya anak nga si Ismael] mangin batok sa tagsa ka tawo.’ (Genesis 16:7-12) Pagkatapos sang mga pila ka tuig, napamatud-an si Ismael nga batok sa bata nga si Isaac, ang matuod nga manunubli ni Abraham nga natawo kay Sara. ‘Ginhampangan,’ ukon ginsakit ni Ismael si Isaac. Grabe pa ini sang sa pag-away sang mag-ulutod. Ginalaragway ini sang Pulong sang Dios subong “paghingabot” sa gintagna sang Dios nga binhi ni Abraham. Gani nagakabagay ang mabug-at nga aksion.—Genesis 21:1-9; Galacia 4:29-31.

Ginsilingan ni Jehova si Abraham nga pamatian niya ang luyag sang iya asawa nga dapat himuon, ang ‘pagpalakat kay Agar kag sa iya anak.’ Bisan pa nga wala mahamuot si Abraham sa pagtaliwan ni Agar upod sang iya anak, ginpabalunan sila ni Abraham. Kabaliskaran sa una nga tion nga nagpalagyo si Agar sa kamingawan, sini nga tion naglakat sia nga may balon nga tinapay (ayhan nagapatuhoy sa lainlain nga pagkaon) kag tubig—nga gin-aman ni Abraham. Nagdalangdalang sia “sa kamingawan sang Beer-seba,” kag naubos ang iya balon sa wala pa niya makita ang isa sa mga bubon sa sina nga lugar. Apang ang natabo sa iya indi pagpakalain kay Abraham, kay naghimo sia sing ‘aman para sa iya kaugalingon nga panimalay,’ bisan pa nga nakahimo sila sing sala nga nagakabagay sang pagpahalin sa ila sa panimalay.—Genesis 21:10-21.

[Mapa/Laragway sa pahina 31]

Mount Carmel

Great Sea

Megiddo

Jerusalem

Hebron

Beer-sheba

Dead Sea

Negeb

[Ginkuhaan]

Pasad sa mapa nga gincopyright sang Pictorial Archive (Near Eastern History) Est. and Survey of Israel

[Laragway]

Wadi Zin, ang mamala nga suba nga nalupyakan sa nabagatnan sang Beerseba