Ang Pagsalig kay Jehova Nagadul-ong sa Dedikasyon kag Bawtismo

“Salig kay Jehova kag himoa ang maayo; puyo sa duta, kag makig-angot sa katutom.”—SALMO 37:3.

 1. Anong pamatuod sang mga maalam sa kalibutan ang nagapakita nga kabuangan ang magsalig sa tawhanon nga mga lider?

KAY sin-o kita magasalig? Sa tawhanon bala nga mga lider? Ang ila rekord nagapakita nga kabuangan ang magsalig sa dihimpit nga mga tawo. Ti, ina nga katunayan ginakilala bisan sang mga maalam sa kalibutan! Busa, ang Vision nga magasin sa negosyo sa Europa nagsiling anay nga ang “pinakamalain sa karon nga kahimtangan amo nga wala sing isa ang nakahibalo sang dalan paguwa.” Kag ang istoryador sa ekonomiya nga si Rob­ert Heil­broner nagsiling: “May iban pa nga butang nga nagatublag sa aton. Amo ini ang pagsuspetsa nga wala sing isa ang gintangdoan, nga wala sing isa ang nasangkapan sa paglubad sa mga problema nga nagasalakay sa aton.”

 2. Ano ang masiling nahanungod sa mga benepisyo sang modernong siensia?

² Huo, ang mga tawo nakahimo sing daku nga pag-uswag sa lainlain nga latagon sang siensia. Apang tanan bala ini mapuslanon? Indi, indi ini mapuslanon. Subong sang ginsiling sang awtor nga si Lewis Mum­ford: “Ang ideya nga ang mekanikal kag sientipiko nga pag-uswag nagagarantiya sing kaanggid nga tawhanon nga mga kapuslanan . . . indi halos mapangapinan karon.” Ang punto nga ginapatuhuyan amo ang acid rain, nga nagadagta sa mga linaw kag mga suba kag nagabulig sa paglaglag sa mga kahoy sing minilyon. Dugang pa, ang makaluluoy nga kahimtangan sang kalibutan—ang pagdugang sang krimen, kasingki, kag terorismo, sang pagkagiyan sa druga kag alkohol, kag sang balatian nga ginaliton paagi sa sekso, kag ang dipat-od nga kahimtangan sa pangabuhi—ang tanan nagapamatuod nga wala sing pulos ang pagbutang sang aton pagsalig sa tawhanon nga mga lider.

 3. Ano nga laygay ang ginahatag sang Pulong sang Dios sa kon diin kita magasalig?

³ Ang Pulong sang Dios labi ka nagakaigo nga nagalaygay sa aton: “Dili kamo magsalig sa mga dungganon, ukon sa anak sang tawo, nga sa iya wala sing kaluwasan. Kon magguwa ang iya espiritu, nagabalik sia sa iya duta; sa amo nga adlaw nagakawala ang iya mga hunahuna.” (Salmo 146:3, 4) Kon indi sa mga tawo, nian kay sin-o kita makasalig? Makasalig kita sa Manunuga sang langit kag duta, subong sang aton mabasa: “Bulahan ang tawo nga nagasalig kay Jehova, nga ang iya pagsalig amo si Jehova.”—Jeremias 17:7.

Ngaa Magsalig kay Jehova?

 4. Ano ang panguna nga mga kinaiya ni Jehova, kag paano ini nagahatag sa aton sing maayong rason sa pagsalig naton sa iya?

⁴ Makasalig kita kay Jehova bangod sa maayong mga rason. Una sa tanan, makasalig kita sa iya bangod sang iya pangunang mga kinaiya—gugma, kaalam, katarungan, kag gahom—kag iban pa nga matahom nga kinaiya. Ang iya Pulong nagapasalig sa aton nga labing gamhanan sia, ang isa sa mga titulo niya amo ang “Dios nga Labing Gamhanan.” (Genesis 28:3) Daw ano kaayo nga sadsaran sang pagsalig! Wala sing isa ang madinalag-on nga makabato kay Jehova, kag wala sing isa ang makabali sang iya mga katuyuan. Isa man sia nga Nakahibalo sang Tanan nga Butang. Indi lamang nga nahibaluan niya ang katapusan kutob sa ginsuguran, ang palaabuton subong isa ka bukas nga tolon-an sa iya, kundi yara man sa iya ang tanan nga ihibalo kag kaalam, subong sang makita sa iya makatilingala nga mga buhat sa pagpanuga. Wala gid sia magsayop sa iya mga pagpakig-angot. (Isaias 46:10; Roma 11:33-35) Kapin pa sa sina, si Jehova himpit nga masaligan, isa ka Dios sang pagkamatarong kag katutom. Imposible para sa iya ang magbutig. (Deuteronomio 32:4; Tito 1:2; Hebreo 6:18) Labaw sa tanan, bangod kay ang dimakagud nga gugma amo ang iya nagapangibabaw nga kinaiya, nagakaigo ang magsiling: “Ang Dios gugma.”—1 Juan 4:8, 16.

 5. Ano nga rekord ang ginaunod sang Pulong sang Dios, nga nagapamatuod sa iya pagkamasaligan?

⁵ Ang mga pagpakig-angot ni Jehova sa katawhan dugang nga nagapamatuod sa iya pagkamasaligan nga Dios nga labing gamhanan, maalam, makatarunganon, kag gugma. Ginpasalig ni Moises sa mga Israelinhon nga si Jehova nagahupot sang katipan kag nagahigugma sing malulo sa mga nagahigugma sa iya kag nagatuman sang iya mga kasuguan. (Deuteronomio 7:9) Sing mas temprano, gin-amligan ni Jehova ang mahinadlukon sa Dios nga si Noe kag ang iya panimalay sa daku nga Anaw. Ginluwas sang Dios ang matarong nga si Lot kag ang iya duha ka anak nga babayi gikan sa kalayuhon nga kalaglagan sang Sodoma kag Gomora. Sang ulihi, ginpaguwa sang Dios ang mga Israelinhon gikan sa Egipto kag ginhatag sa ila ang duta sang Canaan bilang pagtuman sa iya saad kay Abraham. (Genesis 7:23; 17:8; 19:15-26) Kag indi bala nga ginluwas ni Jehova ang tatlo ka Hebreohanon nga gintagbong sa mainit nga hurno, subong man si Daniel gikan sa bubon sang mga leon?—Daniel 3:27; 6:23.

 6. Ano ang aton modernong-adlaw nga pamatuod nga ang pagsalig kay Jehova indi sayop?

⁶ Nga si Jehova amo ang isa nga masaligan naton ginpamatud-an man sang mga eksperiensia sang iya modernong-adlaw nga mga Saksi. Halimbawa, si Adolf Hitler nagpabugal nga dulaon niya ang “hubon” sang mga Saksi ni Jehova sa Alemanya. Apang sa baylo si Hitler kag ang iya Nazi nga partido ang gindula, kag sa karon ina nga hubon sang mga Saksi nagmuad sing madamo ka pilo tubtob sa kapin sa 119,000. Dugang pa, literal nga ginatos ka mga sugilanon sang mga Saksi ni Jehova nga ginbalhag sa Ang Lalantawan kag sa kaupod sini nga magasin nga Magmata! ang nagapamatuod sa kamatuoran nga si Jehova amo gid ang Dios nga masaligan naton.

Kon Ngaa ang Iban Wala Nagasalig kay Jehova

 7. Ngaa nakasiling ang isa ka tawo nga isa sia ka “Tumalan-aw ni Jehova”?

⁷ Apang, diutay lamang karon ang nagasalig kay Jehova! Bisan ang madamo nga nakatuon sang iya mga kinaiya kag mga hinimoan wala magsalig sa iya. Ang isa ka artikulo nga nagguwa sa balasahon nga U.S. Catholic (Enero 1979) nagasiling tuhoy sa isa sina nga tawo: “Sang ginpakiana sang manugpamangkot ang tawo sang iya relihion, nagsabat sia, ‘Sa banta ko isa ako ka Tumalan-aw ni Jehova.’ Sang ginpangabay sang buot niya silingon nagpaathag sia, ‘Daku ang akon pagpati sa ginatuohan sang mga Saksi ni Jehova—apang indi ko luyag nga madalahig.’” Ang magasin nagkomento: “Ang isa ka dedikado nga Saksi ni Jehova wala sing mapilian kundi ang madalahig sing daku.”

 8. Anong sadsaran nga karakteristiko ang nagahimo sa isa ka tawo nga maluyag sa pagpadalahig sa pag-alagad kay Jehova?

⁸ Ngaa indi luyag sang iban nga madalahig? Bangod wala sila sing matarong nga kahimtangan sa tagipusuon. Ang isa dapat nga “makatarunganon nga gintangdoan sa kabuhi nga walay katapusan.” (Binuhatan 13:48) Subong sang ginsiling ni Jesus sa iya parabola tuhoy sa manugsab-ug, ang mga nagapamunga nagabaton sang pulong sang kamatuoran sa ‘tagipusuon nga maminatud-on kag maayo.’ (Lucas 8:15) Huo, ang kamatuoran wala nagaganyat sa mga dihanuot. Ang una nga kinahanglan amo ang bunayag nga tagipusuon. Ang kamatuoran sang Pulong sang Dios wala man nagaganyat sa mga bugalon. Kinahanglan ang mapainubuson nga panimuot. (Santiago 4:6) Dugang pa, ang kamatuoran wala nagaganyat sa mga makinaugalingon kag nagapakamatarong sa kaugalingon. Apang nagaganyat ini sa mga nabalaka sa ila espirituwal nga kinahanglanon, nga ginagutom kag ginauhaw sa pagkamatarong, kag nagapanghayhay kag nagabakho sa tanan nga kalangil-aran nga nakita nila nga nagakatabo sa kalibutan karon.—Mateo 5:3, 6; Ezequiel 9:4.

Ang Pagsalig kay Jehova Nagadul-ong sa Dedikasyon

 9, 10. (a) Ano ang kinahanglanon sa wala pa ang isa makasalig kay Jehova, kag paano yadtong may matarong nga kahimtangan sa tagipusuon makahulag? (b) Kay sin-o nagatuo ina nga mga tawo?

⁹ Sa wala pa magsalig ang isa ka tawo kay Jehova, dapat anay sia makabati nahanungod sa Iya. Apang “paano bala ang pagpanawag nila sa iya nga wala nila matuohi? Kag paano bala ang pagtuo nila sa iya nga wala nila mabatii? Kag paano bala ang pagkabati nila kon walay manugwali?” (Roma 10:14) Samtang nagabantala ang mga alagad ni Jehova, yadtong may matarong nga kahimtangan sa tagipusuon nagahulag, subong sang ginhimo sang madamo sa dumaan nga Tesalonica. Nahanungod sa ila, si Pablo nagsulat: “Sang pagbaton ninyo sang pulong sang Dios, nga inyo nabatian sa amon, ginbaton ninyo indi subong sang pulong sang mga tawo, kundi nga sa pagkamatuod amo gid ini, ang pulong sang Dios, nga nagapanghikot man sa inyo nga mga nagatuo.”—1 Tesalonica 2:13.

¹⁰ Nagatuon nahanungod kay Jehova, inang mga maayo sing tagipusuon nagatuo sa iya. Importante ini, kay “sa walay pagtuo indi mahimo ang pagpahamuot sa iya, kay ang nagapalapit sa Dios kinahanglan magtuo nga amo sia kag nga sia manugbalus sa mga nagapangita sa iya.” (Hebreo 11:6) Kinahanglan man ang pagtuo sa Anak sang Dios. “Walay kaluwasan sa bisan kay sin-o nga iban, kay walay iban nga ngalan sa idalom sang langit nga ginhatag sa mga tawo nga paagi sa iya kinahanglan kita maluwas”—huo, wala sing ngalan luwas kay Jesucristo.—Binuhatan 4:12.

11. Ang pagsalig kay Jehova magahimo sa isa ka tawo sa pagsunod sa anong laygay nga ginhatag ni apostol Pedro?

¹¹ Ang pagsalig sa Pulong sang Dios, kay Jehova, kag sa iya Anak nga si Jesucristo magapahulag sa isa ka tawo sa pagpamati sa laygay ni apostol Pedro sa mga Judiyo sang iya kaadlawan: “Busa, hinulsol kamo kag magliso agod mapanas ang inyo mga sala, kag mag-abot ang mga panag-on sang pagpaumpaw gikan sa atubangan ni Jehova.” (Binuhatan 3:19) Paagi sa pagkuha sing ihibalo tuhoy kay Jehova kag sa Iya mga kinahanglanon, maton-an sang indibiduwal nga ang kabubut-on sang Dios amo ang para sa iya nga mangin sumulunod ni Jesucristo. Subong sang ginsiling ni Pedro: “Kay sa sini mga gintawag kamo, kay si Cristo man nag-antos tungod sa inyo, nga nagabilin sa inyo sing sulundan agod nga pagsundon ninyo ang iya mga tikang.” (1 Pedro 2:21) Gin-athag ni Jesus kon ano ang nadalahig sang magsiling sia: “Kon sin-ong tawo ang buot magsunod sa akon, magdumili sia sang iya kaugalingon kag magpas-an sang iya usok sang pag-antos kag magsunod sa akon.” (Mateo 16:24) Nagakahulugan ina sang pagdedikar sa kaugalingon kay Jehova nga Dios sa paghimo sang iya kabubut-on kag sa pagsunod sa mga tikang ni Jesucristo.

Ang Dedikasyon Indi Lamang Isa ka Pangako

12. Paano masunson nga ginagamit ang tinaga nga “pangako” sa Cristiandad?

¹² Sa Cristiandad ang tinaga nga “pangako” sulitsulit nga ginagamit kon tuhoy sa pagkamangin isa ka Cristiano. Busa ginasugiran kita nga ang mga Evan­ge­lical sang Estados Unidos “nagapadaku sa personal nga pangako kay Jesus.” Ang Romano Katoliko nga klerigo nagahambal tuhoy sa “Katolikong relihioso nga pangako.” Sang nagapangapin sa iya pagkanadalahig sa politika, ang isa ka Katoliko nga pari nagsiling anay: “Ang pag-entra sa politika kasugpon sang akon pangako (sa pagkapari).” Kag ang kompanya sa negosyo nagapasayod sing “Ang Amon Pangako sa Amon mga Bumalakal.” Sa pagkamatuod, nian, ang isa sarang makatigayon sing madamo nga pangako sa isa ka tion: mga pangako sa negosyo, mga pangako sa katilingban, mga pangako sa politika, kag mga pangako sa relihion.

13. Ano ang nadalahig sa dedikasyon kay Jehova?

¹³ Apang, ang dedikasyon kay Jehova nga Dios indi isa lamang ka pangako. Ang pangako isa lamang ka “kasugtanan ukon saad sa paghimo sing pila ka butang sa ulihi.” Apang ang pagdedikar nagakahulugan sing ‘paghugod sa kaugalingon sa eksklusibo nga pag-alagad kag pagsimba sa isa nga balaan ukon sagrado nga paggamit.’ Ang kalabanan nga tawo kontento na sa paghimo sing pangako sa baylo sang sa dedikasyon. Wala sing duhaduha nga amo ini ang kabangdanan sang kamatuoran nga ang ila relihion kaangay lamang sang back­ground nga musika. Matahom ini pamatian apang wala nagapasilabot sa bisan ano nga butang nga luyag gid himuon sang tawo.

14. Ngaa ang pangako lamang indi kalahamut-an kay Jehova nga Dios?

¹⁴ Ang dedikasyon sa Dios nagahimo sa paghimo sa iya kabubut-on nga amo ang pinakaimportante nga butang sa kabuhi. Nagakinahanglan ini nga tumanon sang isa ang una kag labing daku nga sugo, nga ginsitar ni Jesus sang magsiling sia: “Higugmaa si Jehova nga imo Dios sa bug-os mong tagipusuon kag sa bug-os mong kalag kag sa bug-os mong hunahuna kag sa bug-os mong kusog.” Ginpadaku ni Jesus ang eksklusibo nga kinaugali sang pag-alagad sa Dios sang magsiling sia: “Wala sing tawo nga makaalagad sa duha ka agalon; kay magadumot sia sa isa kag magahigugma sa isa, ukon magadampig sia sa iya kag magatamay sa isa. Indi kamo makaalagad sa Dios kag sa Manggad.” (Marcos 12:30; Mateo 6:24) Sing maathag, nian, ang pangako lamang indi kalahamut-an kay Jehova.

Ngaa Ginatum-oy sa Tubig?

15. Ano nga halimbawa ang ginhatag ni Jesus tuhoy sa paghimo sing dayag nga ekspresyon sang pagtuo sa Dios?

¹⁵ Ngaa simbuluhan ang dedikasyon sa Dios paagi sa pagpabawtismo? Kon luyag sang isa ka tawo nga mangin Saksi ni Jehova, wala sia sing mapilian. Amo man kon luyag niya makilal-an subong isa ka Cristiano, isa ka sumulunod ni Jesucristo. Ang “Matutom nga Saksi” ni Jehova, nga si Jesus, nagpahamtang sing sulundan para sa sini, kay ginbawtismuhan sia sa Suba Jordan. Bangod kay si Juan nagbawtismo sa mahinulsulon nga mga makasasala, indi niya mahangpan kon ngaa luyag ni Jesus magpabawtismo, apang ginsilingan sia ni Jesus: “Pabayai ini karon, kay amo ini ang nagakaigo sa aton sa pagtuman sang bug-os nga pagkamatarong.” (Bugna 1:5; Mateo 3:13-17) Busa ginhimo sang Anak sang Dios ang dayag nga ekspresyon sang iya pagtuo paagi sa pagpresentar sa iya kaugalingon kay Jehova, nagahatag sing halimbawa para sa tanan nga maluyag sa paghimo sa kabubut-on sang Dios.

16. Ano nga sugo ang ginhatag ni Jesus sa iya mga sumulunod nahanungod sa bawtismo, kag ano ang nagapakita nga gintuman sang iya mga disipulo ina nga sugo?

¹⁶ Kapin pa sa sina, dili madugay sa wala pa magbalik sa iya Amay sa mga langit, ginsugo ni Jesus ang iya mga sumulunod: “Busa lakat kamo kag himuon nga mga disipulo ang tanan nga kapungsoran, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo.” (Mateo 28:19, 20) Ang rekord sa tolon-an sang Mga Binuhatan nagapakita nga ang mga disipulo ni Jesus makugi nga nagtuman sina nga sugo.—Binuhatan 2:40, 41; 8:12; 9:17, 18; 19:5.

17. Ngaa ang pagwisik lamang indi nagakaigo nga bawtismo?

¹⁷ Paano sila ginbawtismuhan? Paagi lamang bala sa pagwisik sa ila sing tubig, subong amo ang kustombre sang kalabanan nga iglesia sang Cristiandad? Indi! Si Jesus ‘nagtakas sa tubig’ sa tapos mabawtismuhan. Nagapakita ini sing maathag nga gintum-oy sia sa tubig. (Marcos 1:9, 10) Sa katunayan, wala na sing iban pa ang mangin isa ka bawtismo, kay ang Griegong tinaga nga ginbadbad nga “bawtismo” nagakahulugan sing “pagtum-oy, pagsalop.”—Binuhatan 8:36-39.

18. Ngaa ang pagtum-oy isa ka nagakaigo nga simbulo sang dedikasyon sang isa sa Dios?

¹⁸ Ina nga bawtismo amo ang labing nagakaigo nga simbulo sang dedikasyon. Ang pagtum-oy sa tubig nagalaragway sa pagkapatay sang isa sa iya daan nga pagginawi. Ang pagbutwa sa iya gikan sa tubig nagalaragway sa pagbangon sa iya sa bag-ong pagkabuhi. Subong nga ang seremonya sa kasal nagabulig sa pagpatudok sa pagkanakasal sa nobya kag nobyo, ang pagtum-oy sa tubig mahimo man nga makahatag sing mapinadayunon nga impresyon sa kandidato sa bawtismo. Wala sing pangduhaduha nahanungod sini: Paagi sa buhat nga pagbawtismo, ang dedikasyon sang isa kay Jehova dimapanas nga natanum sa hunahuna kag memorya sang isa subong ang pinakaimportante nga hitabo sa iya kabuhi. Nagatanda ini sang daku nga pagbalhin gikan sa pag-alagad sa kaugalingon pakadto sa pag-alagad kay Jehova nga Dios.

19. Ano ang dugang nga rason sa pagpabawtismo?

¹⁹ Indi naton pagpasapayanan ang kamatuoran nga ang bawtismo sa tubig amo ang una nga kinahanglanon agod matigayon ang maayo nga konsiensia kay Jehova. Gin-athag ini sa 1 Pedro 3:21, nga nagasiling: “Ang bawtismo nga kaangay sini karon nagaluwas sa inyo, (indi subong nga pagkuha sang higko gikan sa lawas kundi subong nga pakiluoy sa Dios tungod sa matinlo nga konsiensia,) paagi sa pagkabanhaw ni Jesucristo.”

Pagpabawtismo sa Anong Edad?

20. Ngaa ang mga lapsag indi kalipikado sa pagpabaw­tismo?

²⁰ Ang pinamulong ni Jesus sa Mateo 28:19, 20 nagapakita nga dapat bawtismuhan yadtong ginhimo nga mga disipulo niya. Busa, nagakahulugan ini nga wala sing lapsag ukon diutay nga bata ang makatuman sang mga tulumanon sang Kasulatan para sa bawtismo. Ang lapsag indi sarang makatuo sa Pulong sang Dios, sa Dios nga Manunuga, kag sa iya Anak nga si Jesucristo. Indi mahangpan sang lapsag nga ang balaan nga espiritu amo ang aktibo nga kusog sang Dios; ukon makahinulsol sia sa nagligad nga mga sala kag makahimo sing solemne nga panumpa sa paghimo sa kabubut-on sang Dios.

21. Nagakaigo bala para sa mga pamatan-on ang magpabawtismo?

²¹ Apang daw subong bala nga ang iban sa tunga sang katawhan ni Jehova nagsobra katama. Madamong Cristianong ginikanan ang nagpahulat sa ila kabataan tubtob maglampas na sila sa pagkatin-edyer antes hambalan ang topiko nahanungod sa bawtismo. Sa liwat kag liwat, mabatian naton ang nahanungod sa mga pamatan-on nga nagahimo sing nagakaigo nga dedikasyon sing kinaugalingon lamang. Halimbawa, ang indi pa tin-edyer nga anak nga lalaki sang isa ka gulang hanuot nga maluyag sa pagpabawtismo. Gani ginpangabay sang amay sa tatlo ka iban pa nga gulang nga hambalan upod sa bata ang mga pamangkot nga gindesinyo sa mga nagahunahuna sa pagpabawtismo.a Ang ila desisyon amo nga, bisan bata pa kaayo, kalipikado sia nga mabawtismuhan subong ordinado nga ministro ni Jehova nga Dios. Ti, nagtambong sining karon lang sa Pio­neer Serv­ice ­School sa Bahamas amo ang napulo ka tuig nga bawtismado nga bata nga babayi, nga anak sang duha ka bug-os tion nga mga ministro!

22. Kon ginatukod sang mga ginikanan ang Cristianong personalidad sa ila kabataan, ano ang mapaabot nila sa ila mga kabataan?

²² Nahanungod sini, daw subong bala nga ang iban nga mga ginikanan nagkulang. Tubtob diin nila ginagamit ang ‘nagabato sa kalayo nga materyalis’ sa pagtukod sing Cristianong mga personalidad sa ila mga anak? (1 Corinto 3:10-15) Una sa tanan, nagakinahanglan ini nga ang putli nga pagsimba kay Jehova mangin amo ang pinakaimportante nga butang sa kabuhi sang mga ginikanan. Dugang pa, ang mga ginikanan dapat magpamati sa matahom nga laygay nga ginhatag sa Deuteronomio 6:6, 7 kag Efeso 6:4. Ang resulta sini mahimo nga amo ang pagpugong sang mga ginikanan sa ila kabataan sa pagpabawtismo sing tuman ka bata, sa baylo sang sa kinahanglanon nga tudluan sila sa ulihi.

23. Kon ang isa ka tawo makalab-ot sa punto sang dedikasyon kag bawtismo, ano pa ang kinahanglanon?

²³ Kon ginpakita sang isa ka tawo ang pagsalig kay Jehova paagi sa dedikasyon kag bawtismo sa tubig, dapat sia magpadayon sa pagpakita sina nga pagsalig. Ang masunod nga artikulo, “Pag-alagad Subong Nagasalig nga mga Masigka Manugpangabudlay ni Jehova,” magabulig sa aton sa pag-apresyar kon ano ang nadalahig.

[Footnote]

Paano Mo Sabton?

◻ Ano nga mga katunayan ang nagapadaku sang kabuangan sang pagbutang sang aton pagsalig sa mga tawo?

◻ Ngaa ang mga kinaiya kag mga pagpakig-angot ni Jehova nagahatag sa aton sing maayong rason sa pagsalig sa iya?

◻ Ngaa ang pagsalig kay Jehova nagakinahanglan sing dedikasyon kag indi lamang pangako?

◻ Paano mapatudok sang mga ginikanan sa ila kabataan ang handum sa pagdedikar sang ila kaugalingon kay Jehova sa bata pa?

[Laragway sa pahina 10]

Mabutang naton ang aton pagsalig kay Jehova subong ang Daku nga Manluluwas