Mga Ginikanan—Lab-uta ang Tagipusuon sang Inyo Anak Kutob sa Pagkalapsag

“Padakua [ang inyo kabataan] sa disiplina kag sa pagtudlo ni Jehova sa hunahuna.”​—⁠EFESO 6:⁠4.

 1. Ano ang natabo labi na sa tion sang mabudlay nga tion sa kabuhi ni Jesus?

SI Jesucristo kag ang iya mga disipulo nagapakadto sa Jerusalem. Wala madugay antes sini, sa duha ka magkatuhay nga okasyon, ginsilingan ni Jesus ang iya mga disipulo nga magaantos sia sing madamo nga pag-antos kag patyon sa sadto nga siudad. (Marcos 8:31; 9:31) Sa tion sining mabudlay gid nga tion para kay Jesus, ang rekord sang Biblia nagasiling: “Gindala sang mga tawo ang ila man mga lapsag agod nga tandugon niya sila.”​—⁠Lucas 18:⁠15.

 2. (a) Ngaa ayhan gintabog sang mga disipulo ang mga tawo? (b) Ano ang reaksion ni Jesus sa natabo?

² Ano ang reaksion sa sini? Ti, gin-akigan sang mga disipulo ang mga tawo kag gintabog sila, wala sing duhaduha sa pagpati nga nagahimo sila sing pabor kay Jesus paagi sa pag-amlig sa iya gikan sa dikinahanglanon nga mga tublag kag kahuol. Apang naakig si Jesus sa iya mga disipulo, kag nagsiling: “ ‘Tuguti ninyo ang kabataan sa pagkari sa akon; kag dili sila pagdumilian’ . . . Kag ginkugos niya ang kabataan kag ginpakamaayo sila.” (Marcos 10:​13-16) Huo, walay sapayan sang tanan nga ginahunahuna kag ginabatyag ni Jesus, naghinguyang si Jesus sing tion para sa mga lapsag.

Ano ang Leksion Para sa mga Ginikanan?

 3. Ano nga leksion ang dapat maton-an sang mga ginikanan gikan sa sining hitabo?

³ Ang leksion sa sini para sa mga ginikanan amo: Walay sapayan sang iban pa ninyo nga mga obligasyon ukon mga problema nga ginaatubang ninyo, ang paghinguyang sing tion upod sa inyo kabataan dapat unahon. Ang tion nga ginahinguyang kaupod nila magatugot sa inyo sa pagtanom sang espirituwal nga mga prinsipio nga magaamlig sa inyo kabataan kag magabutang sa ila sa husto nga dalanon. (Deuteronomio 6:​4-9; Hulubaton 4:​23-27) Sanday Eunice kag Loida, ang iloy kag ang lola ni Timoteo, naghinguyang sing tion sa pagtudlo sa iya nga nagtandog sang iya gamay nga tagipusuon kag nagdihon sang iya kabuhi agod magdaku sia nga mangin isa ka mahugod nga alagad sang Dios.​—⁠2 Timoteo 1:5; 3:⁠15.

 4. Daw ano ka hamili ang kabataan, kag paano dapat ipakita sang mga ginikanan nga ginaapresyar nila sila?

⁴ Indi dapat patumbayaan sang Cristianong mga ginikanan ang kabataan nga ginhatag sa ila ni Jehova nga Dios. Huo, ang kabataan hamili nga dulot gikan kay Jehova. (Salmo 127:⁠3) Gani maghinguyang sing tion upod sa ila​—⁠lab-uta ang ila tagipusuon​—⁠subong sang halimbawa nga ginpakita sang iloy kag lola ni Timoteo. Indi lamang dapat kamo maghinguyang sing tion sa pagpakighambal sa inyo kabataan nahanungod sa ila paggawi kag sa pagdisiplina sa ila kundi dapat man kamo magkaon upod sa ila, magbasa upod sa ila, maghampang upod sa ila, magbulig sa ila sa paghanda sang ila hiligdaan kon gab-i. Ini tanan nga tion nga ginahinguyang upod sa inyo kabataan importante.

 5. Maghatag sing halimbawa sang isa ka amay nga nagpakita sing apresasyon sa iya mga salabton bilang ginikanan.

⁵ Nakilala sang isa ka kilala nga Hapones nga negosyante nga nangin isa sang mga Saksi ni Jehova ining kamatuoran. Sa ubos sang ulong-dinalan nga, “Nagapanguna nga Ehekutibo sang JNR Naghalin Agod Makaupod ang Pamilya,” ang Mainichi Daily News sang Pebrero 10, 1986 nagreport: “Ginpili sang nagapanguna nga ehekutibo sang Japanese National Railways (JNR) ang magresayn sang sa mabulag sa iya pamilya . . . Ti Tamura nagsiling, ‘Ang hilikuton sang direktor heneral sarang mahimo sang bisan sin-o. Apang ako lamang ang amay sang akon kabataan.’ ” Ginatamod bala ninyo sing serioso ang inyo mga salabton subong mga ginikanan?

Kon Ngaa Kinahanglan ang Pinasahi nga Panikasog Karon

 6. Ngaa mabudlay gid karon saguron ang kabataan sing nagakaigo?

⁶ Mahimo nga karon pa lang sa maragtas sang tawo nangin mabudlay gid ang pagpadaku sa kabataan suno sa dalanon nga ginatudlo sang Pulong sang Dios, “sa disiplina kag sa pagtudlo ni Jehova sa hunahuna.” (Efeso 6:⁠4) Ang rason sa sini amo nga nagakabuhi kita “sa katapusan nga mga adlaw,” kag si Satanas kag ang iya mga demonyo nagatuga sing daku nga kailo bangod akig sila, nahibaluan nila nga malip-ot na lamang nga tion ang nabilin. (2 Timoteo 3:​1-5; Bugna 12:​7-12) Sa amo, ang mga panikasog sang mga ginikanan sa pagpadaku sa ila kabataan sa diosnon nga paagi ginabalabagan sang simbuliko nga “hangin” nga ginagahuman ni Satanas. Ina nga “hangin,” ukon espiritu sang pagkakagod kag pagkadimatinumanon, subong ka lapnag sang literal nga hangin nga aton ginaginhawa.​—⁠Efeso 2:⁠2.

 7, 8. (a) Ano ang mahimo madala sang telebisyon sa puluy-an, apang ano ang ginahimo sang madamo nga ginikanan? (b) Ngaa ang paggamit sa telebisyon subong manuglibang isa ka makapasubo nga pagpatumbaya sa salabton sang mga ginikanan?

⁷ Ang telebisyon, labi na, nagapasulod sa puluy-an sining “espiritu sang kalibutan,” ining makahililo nga “hangin.” (1 Corinto 2:12) Ang nagaguwa sa telebisyon masami nga mabaskog nga naimpluwensiahan sang gamhanan nga imoral kag homoseksuwal nga bahin sang latagon sang kalingawan. (Roma 1:​24-32) Ang inyo kabataan labi na nga madali maimpluwensiahan sang didiosnon nga panghunahuna kag mahigko nga moral nga ginapresentar, subong sang literal nga polusyon sa hangin. Apang ano ang ginahimo sang madamo nga mga ginikanan?

⁸ Ginagamit nila ang telebisyon subong manuglibang sa ila bata. “Indi anay karon, palangga. Masako pa ako. Magtan-aw ka na lang sang telebisyon,” amo ang ginasiling nila sa ila kabataan. Ang isa ka kilala nga manugpalayag sa telebisyon nagsiling nga amo ini “ang masami ginahambal nga mga pulong sa madamo nga panimalay sa Amerika.” Apang ang pagpalakat sa kabataan agod magtan-aw sang bisan ano nga ginapaguwa sang telebisyon daw subong sang pagpabaya sa ila. (Hulubaton 29:15) Isa ini ka makapasubo nga pagpatumbaya sang mga ginikanan sa ila salabton. Subong sang ginhambal sining manugpalayag nahanungod sa pagpadaku sa kabataan: “Ining hilikuton sang mga ginikanan nagakinahanglan sing daku nga tion kag isa ka daku nga salabton kag indi mahimo nga itulin sa iban, indi gid sa telebisyon.”

 9. Gikan sa ano nga polusyon labi na dapat amligan ang kabataan?

⁹ Apang, bangod sang pag-ipit sang tion nga aton ginakabuhian, mahimo nga mahuyog kamo, subong anay sang mga disipulo, nga talikdan ang kabataan agod nga maatipan ninyo ang ginahunahuna nga kapin ka importante nga hilikuton. Apang ano ang kapin ka importante pa sa inyo kabataan? Ang iya espirituwal nga kabuhi yara sa katalagman! Mahimo madumduman ninyo nga sang matabo ang nuklear nga aksidente sa Chernobyl sa Unyon Sobyet sang 1986, ang kabataan ginkuha gikan sa rehiyon agod amligan sila gikan sa polusyon. Sing kaanggid man, agod maamligan ninyo ang espirituwal nga kapagros sang inyo kabataan, dapat ninyo sila amligan gikan sa makahililo nga “hangin” sang kalibutan, nga masami ginabuga sang telebisyon.​—⁠Hulubaton 13:⁠20.

10. Anong iban pa nga ginahalinan sang makahililo nga “hangin” ang makatalagam sa kabataan, kag anong halimbawa sa Biblia ang nagailustrar sini?

¹⁰ Apang, may iban pa nga mga ginahalinan sang makahililo nga “hangin,” nga makalaglag sang moral nga mga prinsipio kag makapatig-a sa panghunahuna sang mga pamatan-on. Ang dinagakaigo nga pagpakig-upod sa kabataan sa palibot kag sa eskwelahan mahimo man nga makagabot sang mga kamatuoran sang Biblia nga gintanom sa lamharon nga mga tagipusuon. (1 Corinto 15:33) Ang leksion sarang maton-an gikan sa anak nga babayi ni Jacob nga si Dina, nga ‘nagaguwa sa pagtan-aw sa mga babayi sang duta’ kag, subong resulta, ginlugos sia sang isa sang pamatan-on nga mga lalaki. (Genesis 34:​1, 2) Dapat tudluan sing maayo kag hanason ang kabataan agod malikawan nila ang moral nga mga tugalbong sang kalibutan nga labi pa nga naglain karon.

Ngaa Hanason Kutob sa Pagkalapsag?

11. (a) San-o dapat umpisahan sang mga ginikanan ang paghanas? (b) Anong maayong mga resulta ang mapaabot?

¹¹ Apang san-o dapat sugdan sang mga ginikanan ang paghanas? Ang Biblia nagasiling nga si Timoteo ginhanas “kutob sa pagkalapsag.” (2 Timoteo 3:15) Sing makawiwili, ang breʹphos, ang Griegong tinaga diri, masami nga ginagamit sa isa ka wala pa matawo nga bata, subong sang sa Lucas 1:​41, 44. Didto ang lapsag nga si Juan ginsiling nga nagkibo sa sulod sang tiyan sang iya iloy. Apang ang breʹphos ginagamit man sa bag-o matawo nga mga Israelinhon nga ang kabuhi nila yara sa katalagman sa Egipto sang tion nga matawo si Moises. (Binuhatan 7:​19, 20) Sa bahin ni Timoteo, ang tinaga maathag nga nagapatuhoy sa isa lamang ka lapsag, ukon bata, kag indi sa isa ka lanubo nga bata. Si Timoteo nakabaton sing instruksion gikan sa balaan nga mga sinulatan kutob sa malab-ot sang iya memorya, kutob sang tion nga sia isa pa lamang ka bata. Kag maayo gid ang mga resulta! (Filipos 2:​19-22) Apang, makabenepisyo gid bala ang bag-o matawo nga mga bata gikan sa maaga nga pagtudlo?

12. (a) San-o ang mga lapsag nagasugod sa paghangop sing mga impresyon kag impormasyon? (b) San-o kag paano umpisahan sang mga ginikanan ang paghatag sing espirituwal nga instruksion sa ila kabataan?

¹² “Ang isa sang labing makakulunyag nga mga natukiban sa bug-os nga latagon sang sikolohiya amo ang amon bag-o nga paghangop sa dakung ikasarang sang lapsag sa pagtuon,” report ni Dr. Edward Zigler, isa ka propesor sang Yale University, sang 1984. Sa kamatuoran, ang magasin nga Health nagasiling: “Ang mga bata nga yara pa sa sulod sang tiyan mahimo na makakita, makabati, makapanabor​—⁠kag ‘makabatyag’ sing mga emosyon, suno sa ginapahangop sang bag-o nga pagpanalawsaw.” Sing maathag, dapat umpisahan sang mga ginikanan sing maaga ang pagtudlo sa ila kabataan. (Deuteronomio 31:12) Makaumpisa sila paagi sa pagpakita sa ila kabataan sing mga laragway gikan sa mga libro kag sugilanon sila. “Ang importante nga mga tuig,” siling ni Masaru Ibuka, awtor sang libro nga Kindergarten Is Too Late, “amo ang mga tuig kutob sa pagkatawo tubtob sa tatlo ka tuig.” Amo sini bangod ang lanubo nga hunahuna labi na nga madali madihon, mahapos magpasulod sing impormasyon, subong ginapamatud-an sang madali nga pagtuon sang isa ka lapsag sing bag-o nga hambal. Ang isa ka propesor tuhoy sa pagtudlo sa kabataan sa New York University nagsiling pa gani nga “dapat umpisahan sang mga ginikanan ang pagtudlo sa mga bata sa pagbasa sa tion nga ipauli nila sila sa puluy-an gikan sa ospital”!

13. Ano ang nagailustrar sang ikasarang sang mga lapsag sa pagtuon?

¹³ Ang isa ka iloy nga taga-Canada nagsulat tuhoy sa ikasarang sang iya bata sa pagtuon: “Isa ka adlaw ginbasa ko ang sugilanon gikan sa Ang Akon Libro sang mga Sugilanon sa Biblia sa akon apat ka tuig kag tunga nga anak nga lalaki, nga si Shaun. Sang magdulog ako sa isa ka punto, nakibot ako sang ginpadayon niya ang sugilanon, tinaga sa tinaga, subong sang makita sa libro nga Sugilanon sa Biblia. . . . Gintilawan ko ang isa kag ang isa pa gid, kag nasaulo niya ang tanan. . . . Nasaulo gid niya, sing tinaga sa tinaga, ang nahauna nga 33 ka sugilanon, lakip ang mabudlay nga mga ngalan sang mga lugar kag sang mga tawo.”*

14. (a) Sin-o ang wala nagakakibot sa ginahimo sang mga lapsag? (b) Ano dapat ang mangin tulumuron sang Cristianong mga ginikanan? (c) Para sa ano dapat ihanda ang kabataan, kag ngaa?

¹⁴ Ang mga nakahibalo gid sang ikasarang sang mga lapsag sa pagtuon wala nagakakibot sa sinang dalayawon nga mga buhat. “Ang kalibutan mahimo mapuno sang mga higante sa kaalam kaangay ni Einstein, Shakespeare, Beethoven kag Leonardo da Vinci kon tudluan naton ang mga lapsag sa baylo sang kabataan,” siling ni Dr. Glenn Doman, direktor sang The Institutes for the Achievement of Human Potential. Sa pagkamatuod, ang tulumuron sang Cristianong mga ginikanan, indi ang pagpatubas sing mga higante sa kaalam, kundi agod lab-uton ang tagipusuon sang ila mga anak agod nga indi magtalikod ang kabataan sa pag-alagad sa Dios. (Hulubaton 22:⁠6) Ina nga mga panikasog dapat himuon antes mag-eskwela ang bata, agod ihanda sia sa mga pagtilaw nga atubangon niya didto. Ang mga programa para sa mga kindergarten ukon sa sentro sang mga kabataan, halimbawa, nagahimo sing mga sinalusalo para sa kaadlawan kag sa iban pa nga mga piesta opisyal nga mahimo makalilingaw para sa kabataan. Gani dapat mahangpan sang bata kon ngaa ang mga alagad ni Jehova wala nagapakigbahin. Kay kon indi mahimo magadaku sia nga may pagdumot sa relihion sang iya ginikanan.

Kon Paano Malab-ot ang Tagipusuon sang Bata

15, 16. Ano ang magamit sang mga ginikanan sa pagbulig sa ila sa paglab-ot sa tagipusuon sang ila anak, kag paano ining mga aman magamit sing epektibo?

¹⁵ Agod buligan ang mga ginikanan sa paglab-ot sa tagipusuon sang ila anak, ang mga publikasyon subong sang Pagpamati sa Dakung Manunudlu gin-aman sang mga Saksi ni Jehova. Ini nga libro nagahambal nahanungod sa mga sinalusalo kag kon paano “ini mangin makalilingaw gid” sa kapitulo sini nga “Duha ka Tawo nga Nagsaulog sang Adlaw nga Natawhan.” Apang ginapaathag sang kapitulo nga ang duha lamang ka sinalusalo sang kaadlawan nga ginsambit sa Biblia ginsaulog sang mga pagano, nga wala nagasimba kay Jehova, kag sa tagsatagsa sining sinalusalo ‘may ulo nga ginpugot.’ (Marcos 6:​17-29; Genesis 40:​20-22) Paano mo magamit ining impormasyon sa paglab-ot sa tagipusuon sang inyo anak?

¹⁶ Sarang mo magamit ang makagalanyat nga metodo sang libro nga Dakung Manunudlu paagi sa pagsiling: “Nahibaluan naton nga ang tanan nga nasulat sa Biblia may kabangdanan.” Nian mamangkot: “Gani, ano ang masiling mo nga ginasugid sa aton sang Dios nahanungod sa mga sinalusalo sang kaadlawan?” Sa amo mabuligan ang inyo anak sa pagpangatarungan sa sini nga bagay kag makalab-ot sa husto nga mga konklusyon. Luwas sa libro nga Dakung Manunudlu, may iban pa nga literatura nga gin-aman agod magamit sang mga ginikanan, lakip ang Ang Akon Libro sang mga Sugilanon sa Biblia kag ang seryal nga “Ang Kabuhi kag Ministeryo ni Jesus” nga nagaguwa sa tagsa ka guwa sang Ang Lalantawan kutob sang Abril 1985. Ginagamit bala ninyo ining mga artikulo sa pagtudlo sa inyo mga anak kag sa inyo man kaugalingon?

17. Anong praktikal nga mga panugda ang ginatanyag diri sa mga ginikanan?

¹⁷ Upod sa inyo anak, dapat ninyo sulitsuliton ang materyal nga nagakobre sang mga hulusayon kag mga kahimtangan nga atubangon niya sa eskwelahan. Pahibalua ang inyo anak nga lunsay kamo may salabton kay Jehova. (Roma 14:12) Ipadaku ang maayong mga butang nga ginahimo ni Jehova para sa aton, sa amo nagapahulag sa gamay nga tagipusuon sang bata sa paghandum nga pahamut-an si Jehova. (Binuhatan 14:17) Himua ang mga sesyon sa pagtuon nga isa ka makalilipay nga tion. Ang kabataan maluyagon sa mga sugilanon, gani tinguhai gid nga ipaambit ang instruksion sa isa ka buhi nga paagi nga magalab-ot sa tagipusuon sang inyo anak. Madamo nga pamilya ang nakawasi sang dalayawon nga kahigayunan para sa sina nga mga sesyon paagi sa regular nga indi pagkaon sing dungan. Nagakaon bala kamo sing dungan subong isa ka pamilya? Kon indi, matadlong bala ninyo ang kahimtangan?​—⁠Ipaanggid ang Binuhatan 2:​42, 46, 47.

18, 19. (a) Paano dapat iskedyulon sang mga ginikanan ang pagtudlo sa ila mga anak, kag ano ang indi mapasobrahan? (b) Ano nga mga bahin sang isa ka modernong halimbawa sang paghanas sang ginikanan ang nagapadayaw sa imo, kag ano ang ginapatihan mo nga resulta kon gamiton ini sang isa ka ginikanan?

¹⁸ Ang sesyon sa pagtuon dapat ipasibu sa edad sang bata. Gani sa lapsag, nga limitado lamang ang iya paghatag sing igtalupangod, himua ang pila ka malip-ot nga sesyon sa adlaw-adlaw. Nian, sing amat-amat, palawiglawiga kag pasangkara ang kaundan sang inyo ginatudlo. Ang importansia sang regular nga tion sa pagtudlo sa inyo mga anak indi pagpasobra. (Genesis 18:19; Deuteronomio 11:​18-21) Ang isa ka amay, nga karon setentahon na, nagpahamtang sing maayong halimbawa sa pagpadaku sa iya anak nga lalaki, nga karon isa na ka Cristianong gulang. Sang nagligad nga mga tuig ginlaragway niya ang iya programa, sa pagpaathag:

¹⁹ “Sang ang amon anak mga isa ka tuig pa lang ginaestoryahan ko sia sing mga sugilanon sa Biblia antes magtulog, sa isa ka ginpadaku kag maduagon nga paagi agod mahangpan gid niya. Sang magduha ka tuig na sia kag nagasugod na sa paghambal pareho kami nga nagaluhod sa higad sang iya katre kag ginapasulit ko sa iya, sing prase sa prase, ang ‘Pangamuyo sang Ginuo.’ . . . Sang magtatlo ka tuig sia regular nga ginton-an ko ang Biblia upod sa iya . . . Ginagamit ang iya libro, ginasulit niya ang akon ginabasa. Sa amo naton-an niya ang maayo nga pagmitlang sa mga tinaga ka bisan ang mabudlay nga mga tinaga mamitlang niya sing maathag. . . . Agod mabuligan sia sa pagpasalop sang mga kamatuoran sang Biblia sa iya tagipusuon, sang tatlo ka tuig sia ginpasaulo namon sa iya ang simple nga mga teksto sa Biblia. Sang mag-eskwela sia sa kindergarten nga katloan ka teksto ang nahibaluan niya, kag sang nagligad nga Septiembre sang mag-eskwela sia sa nahauna nga grado kapitoan ka kasulatan na ang nasaulo niya. . . . Antes magtulog ang amon anak ginapasulit ko sa iya ang pila sang iya mga kasulatan. Amo man sa pagmata niya kon aga masami nga ginabinalaybay niya ang pila ka teksto sa Biblia subong bahin sang iya mga panamyaw.”

20. Ano ang dapat ilakip sa isa ka programa sa pagtudlo, kag paano malipay ang isa ka bata sa pamalaybalay nga ministeryo?

²⁰ Inang amat-amat nga programa sa pagtudlo, lakip ang nagakaigo nga halimbawa sang mga ginikanan kag ang pagpadapat sing wala nagabag-o nga disiplina, magaaman sa inyo anak sing umpisa sa kabuhi nga pasalamatan niya sing dayon. (Hulubaton 22:15; 23:​13, 14) Ang isa ka importante nga bahin sang programa amo ang paghanas sa dayag nga pag-alagad kutob sa bata pa. Himua ini nga isa ka makalilipay nga eksperiensia paagi sa paghanda sa inyo anak nga makahatag sing makahulugan nga bahin. Ang amay nga ginsambit kaina nagkomento sing dugang pa tuhoy sa iya anak: “Ang iya ikasarang sa pagbalikwat sing mga kasulatan nagahimo sa iya nga epektibo gid sa pagpamalaybalay nga ministeryo, kay madamo nga tagbalay ang natingala kag indi makapamatok sa mga magasin sa Biblia nga iya ginatanyag. Nakapakigbahin sia sa sining Cristianong pag-alagad kutob sang tatlo ka tuig sia, kag karon [sa edad nga 6] masami nga kapin ka epektibo sia sa pagpahamtang sing literatura sa Biblia sa mga tawo sang sa akon asawa kag sa akon.”​—⁠Awake!, Enero 22, 1965, pahina 3-4.

21. (a) Ano ang labing daku nga dulot ang mabilin sang mga ginikanan sa ila mga anak? (b) Anong laygay ang ginahatag sa mga ginikanan, kag ano ang dapat huptan sang tanan nga ginikanan nga may menor-de-edad nga mga anak?

²¹ Sa pagkamatuod, ang Cristianong mga ginikanan may dalayawon nga panublion, ang ihibalo tuhoy kay Jehova, nga ibilin sa ila kabataan kag upod sa sini amo ang paglaum nga walay katapusan nga kabuhi, paghidait, kag kalipay sa isa ka mahimayaon nga bag-ong kalibutan. (Hulubaton 3:​1-6, 13-18; 13:22) Labaw sa tanan, tukura sa tagipusuon sang inyo mga magamay ang pagsalig sa katunayan sinang dakung palaabuton, upod ang handum nga alagdon si Jehova. Himua ang matuod nga pagsimba nga isa ka natural kag makalilipay nga eksperiensia para sa ila. (1 Timoteo 1:11) Ipasalop ang pagsalig kay Jehova kutob sa pagkalapsag. Kag indi gid, indi gid, pagpatumbayai ang regular nga mga sesyon sa pagtuon upod sa ila! Unaha ini sa tanan nga butang, nga ginausisa pirme kon anong impormasyon ang ginakinahanglan sang inyo mga anak kag kon paano ninyo malab-ot sing labing maayo ang tagipusuon paagi sa sini. Masako ikaw kag ginaipit; pat-uron ina ni Satanas kag sang iya kalibutan. Apang dumduma ang halimbawa ni Jesus! Indi gid magtuman kasako sa paghiwat sing regular nga pagtuon upod sa inyo mga anak!

[Footnote]

Bisan indi pa sia makabasa, naton-an niya yadtong mga sugilanon paagi lamang sa pagpamati sa narekord nga mga cassette sang libro.

Paano Mo Sabton?

□ Anong pamatuod sa Biblia ang nagapakita nga dapat unahon sang mga ginikanan ang mga kinahanglanon sang ila mga anak?

□ Ngaa kinahanglan karon ang pinasahi nga mga panikasog sang mga ginikanan sa pag-amlig sa ila mga anak?

□ Ngaa importante gid nga hanason ang kabataan kutob sa pagkalapsag?

□ Ano ang pila ka praktikal nga mga panugda para sa mga ginikanan sa paglab-ot sa tagipusuon sang ila anak?

□ Ano ang indi gid dapat patumbayaan sang Cristianong mga ginikanan?

[Laragway sa pahina 12]

Ang paghanas sang mga ginikanan dapat umpisahan sing maaga