Ang Kabuhi kag Ministeryo ni Jesus

Pagsalo Upod sa Fariseo

PAGKATAPOS masabat ni Jesus ang mga kritiko nga nagpamangkot sang ginhalinan sang iya gahom sa pag-ayo sa tawo nga apa, gin-agda sia sang isa ka Fariseo sa pagpanyaga upod sa iya. Antes sila magkaon, ginhimo anay sang mga Fariseo ang ritwal nga pagpanghinaw sang ila mga kamot tubtob sa siko. Ginahimo nila ini sa wala pa kag sa tapos sang pagkaon kag bisan sa ulot sang mga meryenda. Bisan pa nga wala ginalapas sang tradisyon ang nasulat nga sugo sang Dios, lampas ini sa ginakinahanglan sang Dios tuhoy sa seremonyal nga katinlo.

Sang wala paghimua ni Jesus ang tradisyon, natingala ang iya tagbalay. Bisan pa nga mahimo nga ang iya katingala wala ginpautwas sa hambal, namutikan ini ni Jesus kag nagsiling: “Karon kamo nga mga Fariseo, nagatinlo kamo sang naguwa sang tagayan kag sang pinggan, apang ang sa sulod ninyo puno sang paglugos kag kalautan. Kamong mga buangbuang! Indi bala ang naghimo sang naguwa naghimo sang nasulod man?”

Busa ginbuyagyag ni Jesus ang pagkasalimpapaw sang mga Fariseo nga sing ritwal nagapanghinaw sang ila mga kamot apang wala nagapanghinaw sang ila mga tagipusuon gikan sa kalautan. Nagalaygay sia: “Ihatag ninyo nga limos inang mga butang nga yara sa sulod, kag yari karon! ang tanan nga butang matinlo sa inyo.” Ang ila paghatag dapat nga ginapahulag sang mahigugmaon nga tagipusuon, indi sang handum nga pahamut-an ang iban paagi sa ila pagpakunokuno sing pagpakamatarong.

“Kailo kamo mga Fariseo,” padayon ni Jesus, “nagahatag kamo sing ikapulo sang hierbabuena kag sang ruda kag sang tagsa ka gamhon, kag ginbayaan ninyo ang katarungan kag ang gugma sang Dios! Ini sila amo ang dapat ninyo kuntani himuon, kag indi pagbayaan ang iban.” Ang Kasuguan sang Dios sa Israel nagakinahanglan sang pagbayad sa ikapulo, ukon ikanapulo nga bahin, sang patubas sa uma. Ang hierbabuena kag ang ruda magagmay nga mga tanum ukon mga tanumtanum (herbs) nga ginagamit sa pagpasabor sa pagkaon. Ang mga Fariseo maukod nga nagabayad sang ikapulo sining magagmay nga mga tanumtanum, apang gintagudilian sila ni Jesus bangod sang pagpabaya sa mas importante nga kinahanglanon nga magpakita sing gugma, kalulo, kag kaugdang.

Nagatagudili sa ila sing dugang, si Jesus nagasiling: “Kailo kamo mga Fariseo, kay nagahingamo kamo sang pinasulabi nga lingkoran sa mga sinagoga kag sang mga pag-abiabi sa mga balaligyaan! Kailo kamo, kay subong kamo sang mga lulubngan nga indi makita, kag ang mga tawo nagalakat sa ibabaw nila nga wala makahibalo!” Ang ila pagkadimatinlo indi kitaon. Ang relihion sang mga Fariseo may naguwa nga pagpakitakita apang wala sing nasulod nga katakus! Pasad ini sa pagkasalimpapaw.

Nagapamati sa sina nga pagtagudili, ang abogado, nga isa sang mga mangin-alamon sa Kasuguan sang Dios, nagreklamo: “Manunudlo, sa imo pagsiling sini nagapasipala ka sa amon man.”

Ginapapanabat man ni Jesus ining mga eksperto sa Kasuguan, nagasiling: “Kailo kamo mga mangin-alamon sa Kasuguan, kay ginapapas-an ninyo ang mga tawo sing mga lulan nga maiwat dalhon, kag kamo inyo wala nagatandog sang mga lulan sang isa sang inyo mga tudlo! Kailo kamo, kay nagapatindog kamo sang mga lulubngan sang mga manalagna nga ginpamatay sang inyo mga ginikanan!”

Ang mga lulan nga ginasambit ni Jesus amo ang oral nga mga tradisyon, apang ining mga abogado wala nagapanikasog sa pagkuha sa isa ka sugo agod mangin mahapos ini sa katawhan. Ginapakita ni Jesus nga ugyon pa sila sa pagpatay sa mga manalagna, kag nagapaandam sia: “ ‘Ang dugo sang tanan nga manalagna nga gin-ula kutob sang pagtukod sang kalibutan pagasukton sa sining kaliwatan, kutob sa dugo ni Abel tubtob sa dugo ni Zacarias, nga napatay sa gin-utlan sang halaran kag sang santuaryo.’ Huo, nagasiling ako sa inyo, nga sukton ini sa sining kaliwatan.”

Ang kalibutan sang tulubson nga katawhan nagsugod paagi sa pagkabun-ag sang mga anak kay Adan kag Eva; busa, si Abel nagkabuhi kutob sang “pagtukod sang kalibutan.” Pagkatapos sang sayop nga pagpatay kay Zacarias, ginlaglag sang puwersa sang Siria ang Juda. Apang si Jesus nagatagna sang malain pa nga paglaglag sa iya kaugalingon nga kaliwatan bangod sang labi pa nga kalautan sini. Ini nga paglaglag natabo mga 38 ka tuig sang ulihi, sang 70 C.E.

Nagapadayon sa sining pagtagudili, si Jesus nagasiling: “Kailo kamo mga mangin-alamon sa Kasuguan, kay ginkuha ninyo ang yabi sang ihibalo; kamo inyo wala magsulod, kag ang mga nagasulod ginasablagan ninyo!” Ang mga eksperto sa Kasuguan obligado sa pagpaathag sang Pulong sang Dios sa katawhan, nagabukas sang kahulugan sini. Apang wala nila ini paghimua kag ginkuha pa nila sa katawhan ang kahigayunan nga makahangop.

Ang mga Fariseo kag ang mga mangin-alamon naakig sing daku kay Jesus bangod sang pagbuyagyag sa ila. Sang maghalin sia sa balay, nagsugod sila sa pagpamatok sa iya sing matigdas kag ginpaulanan sia sing mga pamangkot. Gintinguhaan nila nga siuron sia sa pagsiling sing pila ka butang nga sa sini mapadakop nila sia. Lucas 11:​37-54; Deuteronomio 14:22; Miqueas 6:8; 2 Cronica 24:​20-25.

◆ Ngaa gintagudilian ni Jesus ang mga Fariseo kag ang mga mangin-alamon sa Kasuguan?

◆ Anong mga lulan ang ginbutang sang mga abogado sa katawhan?

◆ San-o ang “pagtukod sang kalibutan”?