Mga Leksion Gikan sa Kasulatan: Nahum 1:​1⁠–​3:​19

Ang Kaluwasan Matigayon Kon ang Dios Magatimalus

“KAY sa diutay pa nga tion, kag ang malauton wala na.” (Salmo 37:10) Sa kon paano ining mga pulong matuman makusog nga ginpakita sa mga tolon-an sang Biblia nga ginsulat nanday Nahum kag Habacuc. Ining maisog nga mga lalaki nakatapos sa pagsulat sang ila mga tagna sa ginharian sang Juda sadtong talipuspusan nga bahin sang ikapito nga siglo B.⁠C.⁠E.

Una, binagbinaga ang tagna sang Dios nga ginpahayag ni Nahum. Anong mga leksion ang ginaunod sini?

Pagtimalus sang Dios Pat-od

Si Jehova nagakinahanglan sing eksklusibo nga debosyon. (Exodo 20:5) Sa pahibalo batok sa kapital sang Asiria, ang Ninive, ginapakita ni Nahum nga ang pagtimalus sang Dios himuon sa mga kaaway nga wala nagahatag sa Iya sina nga debosyon. Ti, sa atubangan niya ang mga bukid nagakurog, ang kabakoloran nagakatunaw, kag ang duta ginbayaw! Sin-o bala ang makatindog sa atubangan sang iya kaalipungot?​—⁠1:​1-6.

Makasalig kita kay Jehova subong dalangpan. Huo, ginaamligan sang Dios yadtong nagadangop sa iya. Paagi sa paglaglag sa iya mga kaaway, ang kasisit-an indi magautwas sa ikaduha nga tion. May maayong balita sang paghidait para sa Juda, kay ang matuod nga pagsimba indi pag-upangan.​—⁠1:​7⁠–​2:⁠2.

Ang dimatarong nga mga tawo indi magamadinalag-on. Makita ini gikan sa kon ano ang natabo sa Ninive. Ang iya mapintas nga pagtratar sa mga bihag naghimo sa iya nga “siudad sang pagpatulo sing dugo.” Kaangay sang hukmongan sang mga leon, ining nakutahan sing maayo nga siudad daw malig-on sa likod sang iya madamol nga mga pader. Apang paagi sa sugo sang Dios, himuon sa Ninive ang ginhimo niya sa dumaan nga No-amon, ukon Thebes, sa Suba Nilo. Bangod sang iya mga sala, ang kapital sang Asiria laglagon. Natuman ini nga tagna sang ang nagtingob nga puwersa sang Babilonianhon nga hari nga si Nabopolassar kag Cyaxares nga Mediahanon nagbihag sang Ninive sang 632 B.⁠C.⁠E.​—⁠2:​3⁠–​3:⁠19.

Mga Leksion Gikan sa Kasulatan: Habacuc 1-1–3:19

SI Habacuc nakatuon nga si Jehova sa Iya gintangdo nga tion magahulag batok sa mapintas nga mga manugpigus. Apang ‘ang matarong padayon nga magakabuhi paagi sa iya katutom.’ (2:4) Apang, anong dugang nga mga leksion ang maton-an naton gikan sa sini nga tagna?

Kaluwasan Para sa mga Nagtuo

Si Jehova nagapamati sa mga pangabay sang iya mga alagad. Si Habacuc nagpamangkot: “Tubtob pa bala san-o, O Jehova, ang pagtu-aw ko, kag indi ka magpamati?” Huo, wala sing katarungan, kag ginapalibutan sang malaut ang matarong. Apang ang Dios nagapamati, kag subong iya nagasilot nga tiglawas, “ginabangon [niya] ang mga Caldeanhon.” Apang, paano niya gamiton ang kaangay sang inaway nga kusog? Ang manalagna nagahulat sa sabat sang Dios, nagapaabot sing pagsabdong.​—⁠1:​1⁠–​2:⁠1.

Ang matarong kag matutom lamang ang padayon nga magakabuhi. Ginpasalig ni Jehova si Habacuc sini. Bisan pa nga daw napalantang, sa gintangdo nga tion sang Dios ang matagnaon nga palan-awon “sa pagkamatuod magaabot ini.” Ang matinaastaason nga kaaway nga nagapang-ati sa mga pungsod indi makatapos sang iya tulumuron. Sa pagkamatuod, ang mga Caldeanhon pagasilutan.​—⁠2:​2-5.

Kailo sa mga Malaut!

Likawi ang dimatarong nga daug, kasingki, kag idolatriya. Ngaa? Bangod pat-od gid ang kailo sa isa nga nagapamuad sang indi iya, nagahimo sing malaut nga daug, nagatukod sang siudad paagi sa pagpatulo sing dugo, pilit nga nagapainum sa iban sa tagayan sang makahuluya nga kapierdehan, kag nagasalig sa walay kabuhi nga mga diosdios. Dulaon sang Dios ang ila mga binuhatan. Mahibaluan sang tanan sa duta ang himaya ni Jehova, nga sa atubangan niya ang tanan magatindog sing hipus.​—⁠2:​6-20.

Maghulat sing mapailubon kay Jehova para sa kaluwasan. Sa pangamuyo, gindumdom ni Habacuc ang nagligad nga mga pagpasundayag sang gahom sang Dios. Sa tunga sang iban nga mga butang, si Jehova nagmartsa sa duta, nagalinas sa mga pungsod sa kasingkal. Nagguwa man sia tungod sa kaluwasan sang iya katawhan. Nahayanghag, si Habacuc determinado nga “magahulat sing hipus sa adlaw sang kalisdanan.” Walay sapayan sang malain nga mga tion nga dapat atubangon, dayawon niya si Jehova kag magamalipayon sa Dios sang iya kaluwasan.​—⁠3:​1-19.

[Kahon sa pahina 24]

MGA TEKSTO SA BIBLIA GIN-USISA

o 1:​4​—⁠Ang Basan, Carmel, kag Libano mga lugar sang katahom, pertilidad, kag pagkamabungahon. Ang ila pagkalaya nagakahulugan sing trahedya para sa mga nagasalig sa ila. Nagapadaku ini sa kabug-at sang pagbubo sang kasingkal ni Jehova.

o 1:​10​—⁠Ginkabig sang Ninive ang iya kaugalingon nga indi masulod subong sang mga talongon nga gumon, kag nahubog sia sang ambisyon. Apang lamunon sia sing subong kadali sa paglamon sang kalayo sa laya nga ginalaban. Subong man, ang mga kaaway sang modernong-adlaw nga katawhan sang Dios indi makaagwanta sang masingkal nga paghukom ni Jehova.

o 2:​6​—⁠Bangod sang mabunok nga ulan sa tion sang pagsalakay sa Ninive, ang Suba sang Tigris nag-awas. Ginpabaha sini ang isa ka bahin sang siudad kag nagwasdak sa isa ka bahin sang kuta. Busa, madali nga maagaw sang mga manugdaug ang kapital sang Asiria.

o 2:​11-13​—⁠Kaangay sang mga sapat nga mapintas, ginpahog kag gin-ati sang mga Asi­ria­ha­non ang mga pungsod. Daw subong man bala nga ang leon amo ang pungsodnon nga emblema. Madamong istatwa sang mga leon ang nakita sa mga kagulub-an sang Ninive.

o 3:​3, 4​—⁠Kaangay sang makihilawason, ginlimbungan sang Ninive ang mga pungsod paagi sa makapasulhay nga tanyag sang pagpakig-abyan kag mga panaad nga bulig. Apang naeksperiensiahan sadtong mga nasiod ang kasakit sa idalom sang iya mapiguson nga gota, subong sang ginpakita sa kaso sang taga-Judea nga hari nga si Acaz.​—⁠2 Cronica 28:​16, 20, 21.

[Kahon sa pahina 25]

MGA TEKSTO SA BIBLIA GIN-USISA

o 1:​2-4: Ang pagtuo ni Habacuc kay Jehova subong Dios nga wala nagapasapayan sa malaut nagtiklod sa iya sa pagpamangkot kon ngaa nagapangibabaw ang kalautan. Handa sia nga bag-uhon ang iya panghunahuna. (2:1) Kon natingala kita kon ngaa ang pila ka butang ginapasapayanan, ang aton pagsalig sa pagkamatarong ni Jehova magabulig man sa aton nga huptan ang aton katimbang kag hulaton sia.​—⁠Salmo 42:​5, 11.

o 2:​5​—⁠Ang mga Babilonianhon isa ka grupo sang tawo nga naggamit sang iya kasangkapan sa inaway sa pagdaug sa mga pungsod. Kaangay sang Sheol kag kamatayon nga handa pirme para sa dugang nga mga biktima, luyag niya ang dugang nga pagpangdaug sa militar. (Ipaanggid ang Hulubaton 30:​15, 16.) Subong nga daw napaidalom sa lakas nga pag-inom, nahubog sia sa kadalag-an. Apang ang iya mga inaway sang pagpangdaug natapos sang napukan ang Babilonia sang 539 B.⁠C.⁠E.

o 3:​13​—⁠Ang ikasarang sa pagluwas sang Dios masami nga naeksperiensiahan sang iya pinili kag hinaplas nga katawhan, ang pungsod sang Israel. (Salmo 28:​8, 9) Sang ulihi, ginpatubas sini ang Mesias, ang “binhi” sang langitnon nga “babayi” sang Dios. (Genesis 3:15) Luwason man ni Jehova ang nagkalabilin nga katapo sinang “binhi,” ang nagkalabilin sang ginhaplas sang espiritu nga mga disipulo ni Jesus, gikan sa pagsalakay ni Satanas kag sang mga pungsod.​—⁠Bugna 12:⁠17.

[Piktyur sa pahina 24]

Dibuho sang arkeologo nga si A. H. Layard nga nagalaragway sang palasyo sa Asiria

[Credit Line]

Sa maayong kabubut-on sang Trustees of the British Museum, London