Ngaa Mapailubon Gid ang Dios?

TULUKA ang masinulub-on nga nawong sang gutom nga bata. Tuluka ang iya maniwang nga lawas kag ang iya butod nga tiyan. Handurawa ang daku nga pagkinahanglan niya sing pagkaon, kag tuluka ang wala sing unod nga yahong nga iya ginabitbit. Mahimo nga ang iya iloy nagatulok sa iya nga nagapalanghayas ang mata, ang iya nawong larawan sang pagkawalay paglaum. Nian, punggi ang imo kasubo​—⁠huo, punggi ang imo mata sa paghibi.

Ining larawan makita minilyon ka beses sa 6 milyones kuwadrados kilometros sang may tiggulutom nga rehiyon nga ginatawag Sahel. Ini nagasangkad sing mga 4,800 kilometros tabok sa Aprika sa nabagatnan nga bahin sang Sahara Desert, halin sa Senegal sa Baybayon sang Atlantiko tubtob sa Etiope sa Pula nga Dagat. Matuod, ang tiggulutom nagapakulba man sa minilyon sa iban nga kadutaan. Ang World Health Organization nagareport nga 1.1 ka bilyon ka tawo sa bilog nga duta ang serioso nga nagabalatian kag may indi husto nga pagkaon.

Ang matuod, ang gutom, isa lamang ka bahin sang pag-antos sang tawo. Ginahigkuan sang tawo ang duta, kag tanan kita apektado sini. Ang politikal nga sistema nagapahanugot sang inhustisya kag inaway nga nagadala sing kalisdanan kag kamatayon sa madamo. Ngaa ginapahanugutan sang Dios ining mga butang? Nagaulikid bala sia sa aton?

Nagaulikid Gid ang Dios!

Nagaulikid gid sa aton ang aton Manunuga. Madamo ang pamatuod sa sini kag sa iya ikasarang sa pagpahikot sang mga butang para sa aton kaayuhan kag para sa paghilisugot sang tanan niya nga mga tinuga. Halimbawa, tan-awa ang naapid nga laragway sang mga buyog nga nagaduaw sa isa ka bulak sang hamungang kahoy. Ang buyog nagasandig sa bulak agud makakuha sing dugos nga iya kinahanglanon. Kag ang kahoy naman nagasandig sa mga polen nga ginadala sang buyog sa iya lawas gikan sa katulad nga sahi sang kahoy. Sa sini nga paagi ang polinasyon nagakatabo sa bulak agod magpatubas sing bunga. Indi tanan nga hamungang kahoy makatigayon sing polen sa sining paagi, apang sing pat-od ang Dios sa sini nga kaso naghimos sang isa ka tumalagsahon nga pagbinuligay. Kag ang iya kaayo nagaresulta sa isa ka bunga sing kahoy nga aton makaon nga may kalipay kag kaayuhan.

Ang isa ka buyog bahin lamang sang isa tuman ka organisado nga panong sang 30,000 ka mga buyog. Ang iban sa ila nagabantay sang balay-putyukan, samtang ang iban nagatinlo ukon nagahatag sang bentilasyon sa sini. Ang iban naman nagasupot sing mga dugos kag polen, nagapakaon sa mga buto, ukon nagapangita sing iban nga mga makuhaan sang dugos. Ang Dios naghimos sining mga butang nga sa diin makabenepisyo kita kon ining masako nga mga buyog magapatubas sing matam-is kag makapaumpaw nga dugos nga makapahalipay sang aton panabor.

Ang milagro sang pagbuligay sa tunga sang mga buyog kag sang mga tanom kag mismo sa tunga sining mga insekto isa lamang sa madamo nga pamatuod nga ang aton Manunuga himpit nga makasarang sa pagpahanabo sa buhi nga mga butang nga magbuligay sa isa kag isa. Sa amo, “ang Dios indi Dios sang kagumon, kundi sang paghidait.” (1 Corinto 14:33) Ngaa nian, ginpahanugutan niya nga magluntad ang katawhan sa amo nga kagumon, nga nagaresulta sa kalisod sa madamo? Kon ang Dios nagaulikid gid sa aton, ngaa naghulat sia sing tuman ka dugay sa pagtadlong sining kahimtangan? Huo, ngaa mapailubon gid ang Dios?

Ang pulong sang Dios, ang Biblia, nagasabat sining pamangkot. Ining makadalayaw nga libro nagasugid sa aton nga si Jehova nga Dios mapailubon bangod sa isa ka maayo nga rason. Ano ining rason? Kag tubtob san-o ang pagpailob sang Dios?