Tatapa Ninyo ang Panong sang Dios sing Kinabubut-on

“Tatapa ninyo ang panong sang Dios sa tunga ninyo, indi sa pilit, kundi sa kinabubut-on.”​—⁠1 PEDRO 5:⁠2.

 1. Ngaa dapat naton paabuton sa Cristianong mga gulang nga ‘tatapon ang panong sang Dios sing kinabubut-on’?

SI Jehova nagatatap sang iya katawhan sing kinabubut-on. (Salmo 23:​1-4) Ang “maayong manugbantay,” nga si Jesucristo, kinabubut-on nga naghatag sang iya himpit tawhanon nga kabuhi para sa katulad-karnero nga katawhan. (Juan 10:​11-15) Gani, si apostol Pedro naglaygay sa Cristianong mga gulang nga ‘tatapon ang panong sang Dios sing kinabubut-on.’​—⁠1 Pedro 5:⁠2.

 2. Anong mga pamangkot ang nagakabagay binagbinagon nahanungod sa mga hilikuton sa pagbantay sang Cristianong mga gulang?

² Ang pagkakinabubut-on isa ka tanda sang mga alagad sang Dios. (Salmo 110:⁠3) Apang kapin pa sa pagkakinabubut-on sang isa ka Cristiano ang ginakinahanglan agod matangdo subong manugtatap, ukon kabulig nga manugbantay. Sin-o ang kalipikado nga mangin mga manugbantay? Ano ang ginalakip sa ila pagbantay? Paano ini ginahimo sing labing maayo?

Pagdumala sa Panimalay

 3. Ngaa masiling nga ang paagi sang pagtatap sang Cristianong lalaki sa iya panimalay may labot sa kon bala kalipikado sia nga mangin manugbantay sa kongregasyon?

³ Antes ang isa matangdo sa “palangakuan sang manugtatap,” dapat niya malab-ot ang Makasulatanhon nga mga kinahanglanon. (1 Timoteo 3:​1-7; Tito 1:​5-9) Una, si apostol Pablo nagsiling nga ang isa ka manugtatap “kinahanglan magdumala sing maayo sang iya kaugalingon nga panimalay, nga nagatatap sang iya mga anak nga magpasakop upod ang bug-os nga pagkamatinahuron.” May maayong rason para sa sini, kay si Pablo nagsiling: “Kay kon ang tawo indi makahibalo magdumala sang iya kaugalingon nga panimalay, paano bala ang pag-atipan niya sang kongregasyon sang Dios?” (1 Timoteo 3:​4, 5) Sang nagtangdo sing mga gulang sa mga kongregasyon sa pulo sang Creta, si Tito ginsugo sa pagpangita sa “mga tawo nga disalawayon, nga bana sang isa ka asawa, nga may kabataan nga nagatuo nga wala ginasumbong nga mapinatuyangon ukon balingag.” (Tito 1:⁠6) Huo, dapat binagbinagon ang paagi sa pagtatap sang isa ka Cristianong tawo sa iya panimalay sa pagpat-od kon bala kalipikado sia sa pagkuha sing mabug-at pa nga salabton sang pagbantay sa kongregasyon.

 4. Dugang sa regular nga pagtuon sa Biblia kag pangamuyo, paano mapakita sang Cristianong mga ginikanan ang gugma para sa ila panimalay?

⁴ Ang mga lalaki nga nagadumala sing maayo sang ila kaugalingon nga panimalay wala lamang nagapangamuyo kag nagatuon sang Biblia upod sa ila mga pamilya sing regular. Handa sila pirme sa pagbulig sa ila mga hinigugma. Para sa mga ginikanan, nagasugod ini sa adlaw nga nabun-ag ang bata. Ang Cristiano nga mga ginikanan nakahibalo nga kon ginasunod nila sing labi ang diosnon nga paggawi, ang ila kabataan mas maaga nga maanad sa ila iskedyul sang Cristianong mga hilikuton sa adlaw-adlaw nga pagkabuhi. Kon daw ano kaayo nagadumala ang Cristianong amay sa sining mga kahimtangan nagapabanaag sang iya mga kalipikasyon subong gulang.​—⁠Efeso 5:​15, 16; Filipos 3:⁠16.

 5. Paano mapadaku sang isa ka Cristianong amay ang iya mga anak “sa disiplina kag panghunahuna ni Jehova”?

⁵ Sa pagdumala sa iya panimalay, ang maayong Cristianong amay nagatuman sang laygay ni Pablo: “Dili ninyo pagpaakiga ang inyo mga anak, kundi sagura sila sa disiplina kag panghunahuna ni Jehova.” (Efeso 6:⁠4) Ang regular nga pagtuon sang Biblia upod sa pamilya, sa iloy kag kabataan, nagahatag sing maayong mga kahigayunan para sa mahigugmaon nga panudlo. Busa ang kabataan nagabaton sing “disiplina,” ukon nagatadlong nga panudlo. Ang “panghunahuna” nga ginabinagbinag nagabulig sa tagsa ka bata sa paghibalo sang pagtamod ni Jehova sa mga bagay. (Deuteronomio 4:9; 6:​6, 7; Hulubaton 3:11; 22:⁠6) Sa masulhay nga atmospera sining espirituwal nga pag-updanay, ang matinatapon nga amay nagapamati sing maayo samtang nagahambal ang iya mga anak. Ginagamit ang malulo kag nagatuytoy nga mga pamangkot agod bunayag nga mapautwas nila ang ila mga kabalaka kag mga panimuot. Ang amay wala nagahunahuna nga nahibaluan niya ang tanan nga ginahunahuna sang ila mga anak. Sa pagkamatuod, “ang nagasabat sa wala pa sia makabati, kabuangan ini kag kahuluy-an sa iya,” siling sang Hulubaton 18:13. Sa karon, nasapwan sang kalabanan nga mga ginikanan nga ang mga kahimtangan nga nasumalang sang ila mga anak tuhay gid katama sa naagihan nila mismo sang bata pa sila. Gani, ang amay magapanikasog sa paghibalo sang palibot kag mga detalye sang isa ka problema antes maghambal kon paano ini dapat lubaron.​—⁠Ipaanggid ang Santiago 1:⁠19.

 6. Ngaa dapat konsultahon sang Cristianong amay ang Pulong sang Dios kon nagabulig sa iya pamilya?

⁶ Ano ang himuon sa tapos mahibaluan ang mga problema, mga kabalaka, kag mga panimuot sang imo mga anak? Ang amay nga nagadumala sing maayo nagadangop sa Kasulatan, nga “mapuslanon sa pagpanudlo, sa pagsabdong, sa pagsaway, sa paghanas sa pagkamatarong.” Ginatudluan niya ang iya mga anak kon paano iaplikar ang ginbugna nga mga panuytoy sang Biblia. Sa sining paagi, yadtong mga bata pa sa edad “mahimpit, nasangkapan para sa tagsa ka maayong buhat.”​—⁠2 Timoteo 3:​16, 17; Salmo 78:​1-4.

 7. Anong halimbawa ang dapat ipakita sang Cristianong mga amay may kaangtanan sa pangamuyo?

⁷ Ang diosnon nga mga pamatan-on nagaatubang sing mabudlay nga mga kahimtangan may kaangtanan sa kalibutanon nga mga kabutho. Gani paano mapakanay sang Cristianong mga amay ang kahadlok sang ila mga anak? Ang isa ka paagi amo ang regular nga pagpangamuyo upod sa ila kag para sa ila. Kon ining mga pamatan-on nagaatubang sing mabudlay nga mga kahimtangan, mahimo nila ilugon ang pagsalig sang ila mga ginikanan sa Dios. Ang isa ka 13-anyos nga babayi, nga gin-interbyu antes sia ginbawtismuhan bilang simbulo sang iya dedikasyon sa Dios, nagsugid nga ginayaguta sia kag ginayaoyao anay sang iya mga kabutho. Sang ginpangapinan niya ang iya pasad-sa-Biblia nga pagtuluuhan sa pagkabalaan sang dugo, gindumog sia kag ginduplaan sang iban nga mga bata nga babayi. (Binuhatan 15:​28, 29) Nagbalos bala sia? Wala. “Padayon ako nga nangamuyo kay Jehova nga buligan niya ako nga magpabilin nga kalma,” paathag niya. “Gindumdom ko man ang gintudlo sa akon sang akon mga ginikanan sa amon pangpamilya nga pagtuon nahanungod sa kinahanglanon nga pirme magpugong sang kaugalingon sa kalautan.”​—⁠2 Timoteo 2:⁠24.

 8. Paano ang gulang nga wala sing anak makadumala sing maayo sa iya panimalay?

⁸ Ang gulang nga wala sing anak makahatag man sing nagakaigo nga espirituwal kag materyal nga mga aman para sa iya panimalay. Nagalakip ini sa iya tiayon kag ayhan sa salaguron nga Cristianong mga paryente nga nagapuyo sa iya balay. (1 Timoteo 5:⁠8) Busa ang pagdumala sing maayo amo ang isa sang mga kinahanglanon nga dapat lab-uton sang tawo nga gintangdo sa pag-abaga sing responsabilidad subong gulang sa kongregasyon. Paano, nian, dapat tamdon sang gintangdo nga mga gulang ang ila pribilehiyo nga mga salabton sa kongregasyon?

Magdumala ‘sing Maukod’

 9. Ano dapat ang panimuot sang Cristianong mga gulang sa ila mga asaynment sa pag-alagad?

⁹ Sadtong unang siglo sang aton Kumon nga Dag-on, si apostol Pablo nag-alagad subong tinugyanan sa panimalay sang Dios, ang Cristianong kongregasyon sa idalom sang pagkaulo ni Cristo. (Efeso 3:​2, 7; 4:15) Gani, ginlaygayan man ni Pablo ang iya mga masigkatumuluo sa Roma: “Sanglit . . . may mga dulot kita nga nagakatuhaytuhay suno sa dibagay nga kaluoy nga ginhatag sa aton, gamiton naton sila, kon sa pagpanagna, suno sa talaksan sang aton pagtuo; ukon kon sa pag-alagad, sa aton pag-alagad; ukon sa iya nga nagapanudlo, sa iya pagpanudlo; ukon sa iya nga nagapanglaygay, sa iya pagpanglaygay; sa iya nga nagahatag, himuon niya ini sa kaalwan; sa iya nga nagadumala, himuon niya ini sa kaukod; sa iya nga nagakaluoy, himuon niya ini nga malipayon.”​—⁠Roma 12:​6-8.

 10. Sa pagtatap sa panong sang Dios, anong halimbawa ang ginpahamtang ni Pablo para sa mga gulang karon?

¹⁰ Si Pablo nagpahanumdom sa mga taga-Tesalonica: “Subong sang amay sa iya mga anak, naglaygay kami sa tagsa sa inyo, kag naglugpay kag nagpanaksi sa inyo, sa tuyo nga padayon kamo nga magalakat sing takus sa Dios nga nagatawag sa inyo sa iya ginharian kag himaya.” (1 Tesalonica 1:1; 2:​11, 12) Ang laygay ginhatag sa malulo kag mahigugmaon nga paagi nga si Pablo nakasulat: “Malulo kami sa tunga ninyo, subong sang iloy nga nagabatiti sang iya mga anak. Gani, sanglit may malum-ok nga pagpalangga sa inyo, nahamuot kami sa pagpaambit sa inyo, indi lamang sang maayong balita sang Dios, kundi man sang amon kaugalingon nga kalag, bangod nga nangin mahal gid kamo sa amon.” (1 Tesalonica 2:​7, 8) Nahisuno sa amaynon nga halimbawa ni Pablo, ang matutom nga mga gulang nagakabalaka sing tudok sa tanan sa kongregasyon.

 11. Paano makapakita sing hanuot nga handum ang gintangdo nga mga gulang?

¹¹ Ang kalum-ok, upod ang hanuot nga handum, amo dapat ang kinaiya sang mahigugmaon nga pagtatap sang aton matutom nga mga Cristianong manugbantay. Ang ila paggawi nagapaalinton sing daku. Si Pedro nagalaygay sa mga gulang nga tatapon ang panong sang Dios “indi sa pilit” ukon “sa dibunayag nga daug.” (1 Pedro 5:⁠2) Sa sining punto, ang eskolar nga si Wil­liam Barclay nagpaandam, nga nagasulat: “May isa ka paagi sa pagbaton sing palangakuan kag pag-alagad nga subong bala mabudlay ini kag dimaayo nga katungdanan, nga subong bala makakalapoy ini, nga subong bala isa ini ka lulan nga dapat sikwayon. Posible nga ang sa isa ka tawo pangabayon sa paghimo sing isa ka butang, kag himuon niya ini, apang sa paagi nga dimainayuhon amo kon ngaa ang bug-os nga buhat mangin walay pulos. . . . Apang [si Pedro] nagsiling nga ang tagsa ka Cristiano dapat maghandum nga may pagkurog sa paghimo sina sa masarangan niya, bisan pa nahibaluan gid niya nga indi sia takus sa paghimo sini.”

Kinabubut-on nga mga Manugbantay

 12. Paano makapadayag sing pagkakinabubut-on ang Cristianong mga gulang?

¹² “Tatapa ninyo ang panong sang Dios sa tunga ninyo . . . sa kinabubut-on,” laygay man ni Pedro. Ang Cristianong manugtatap nga nagatatap sa karnero nagabuhat sini sing kinabubut-on, sa iya kaugalingon nga luyag, sa idalom sang pagtuytoy sang Maayong Manugbantay, nga si Jesucristo. Ang pag-alagad sing “kinabubut-on” nagakahulugan man nga ang Cristianong manugbantay nagapasakop sa awtoridad ni Jehova, ‘ang manugbantay kag manugtatap sang aton mga kalag.’ (1 Pedro 2:25) Ang Cristianong kabulig nga manugbantay kinabubut-on nga nagapakita sing pagtahod sa teokratikong kahimusan. Ginahimo niya ini kon ginatuytuyan niya yadtong nagapangita sing laygay sa Pulong sang Dios, ang Biblia. Bisan pa nga ang eksperiensia magabulig sa isa ka gulang sa pagtukod sing isa ka kamalig sang napasad-sa-Biblia nga laygay, wala ini nagakahulugan nga may Makasulatanhon nga solusyon sia sa gilayon sa tanan nga problema. Bisan pa nahibaluan niya ang sabat sa isa ka pamangkot, ayhan ginapakamaayo niya nga tan-awon, upod sa nagpamangkot, ang Watch Tower Publications Index ukon ang kaanggid nga mga indise. Busa nagatudlo sia sa duha ka paagi: Ginapasundayag niya kon paano makita ang mabuligon nga impormasyon kag mapainubuson nga ginapakita ang pagtahod kay Jehova paagi sa pagpatuhoy sang igtalupangod sa nabalhag na sang organisasyon ni Jehova.

 13. Anong mga tikang ang sarang himuon agod buligan ang mga gulang sa paghatag sing maayo nga laygay?

¹³ Ano ang himuon sang gulang kon ang espesipiko nga problema wala pa mabalhag sa literatura sang Sosiedad? Sa walay duhaduha, magapangayo sia sing kaalam paagi sa pangamuyo kag magapanalawsaw sa pila ka prinsipio sang Biblia may kaangtanan sa problema. Ayhan masapwan man niya nga mapuslanon nga ipanugda sa tawo nga nagapangayo sing bulig nga binagbinagon ang halimbawa ni Jesus. Ang gulang mahimo makapamangkot: “Kon si Jesus, ang Dakung Manunudlo, yara sa imo kahimtangan, ano sa banta mo ang himuon niya?” (1 Corinto 2:16) Ina nga pangatarungan mahimo magabulig sa nagapamangkot sa paghimo sing maalamon nga desisyon. Apang dimaalamon gid para sa isa ka gulang ang maghatag sing personal lamang nga opinyon nga subong bala isa ini ka maayong Makasulatanhon nga laygay! Sa baylo, sarang mahambalan sang mga gulang ang mabudlay nga mga problema sa isa kag isa. Mahimo nila isumiter ang importante nga mga topiko para mahambalan sa miting sang hubon sang mga gulang. (Hulubaton 11:14) Ang resulta nga mga desiyon magabulig sa tanan sa pagpamulong nga may paghilisugot.​—⁠1 Corinto 1:⁠10.

Ang Kalulo Kinahanglanon

 14, 15. Ano ang ginakinahanglan sa mga gulang kon nagapasag-uli sa Cristiano nga ‘nakahimo sing sayop nga tikang antes niya mamulalungan’?

¹⁴ Ang Cristianong gulang dapat magpakita sing kalum-ok kon nagatudlo sa iban, labi na kon nagalaygay sa ila. “Mga kauturan,” laygay ni Pablo, “bisan pa nga ang isa ka tawo makahimo sing sayop nga tikang antes sia makamulalong sini, kamo nga may espirituwal nga mga kalipikasyon magtinguha sa pagpasag-uli sina nga tawo sa espiritu nga malulo.” (Galacia 6:⁠1) Sing makawiwili, ang Griegong tinaga nga ginbadbad diri nga “pagpasag-uli” nagapatuhoy sa isa ka termino sang pag-opera nga ginagamit sa paglaragway sang pag-uli sa tul-an agod malikawan ang tubtob-buhi nga sablag. Ang leksikograpo nga si W. E. Vine nagaangot sini sa pagpasag-uli nga ginahimo sang “espirituwal nga mga tawo, sa isa nga nakasala, nga ginapaangay ini sia sa isa ka nagliw-as nga katapo sang espirituwal nga lawas.” Ang iban pa nga mga badbad amo, “sa pagpasag-uli sa nagakaigo nga posisyon; sa pagtadlong sing nagakaigo.”

¹⁵ Ang pagpasag-uli sang panghunahuna sang isa indi mahapos, kag tuman gid kabudlay tadlungon sing nagakaigo ang panghunahuna sang tawo nga nakasala. Apang ang bulig nga ginahatag sa espiritu nga malulo mahimo nga pagabatunon nga may pasalamat. Gani, ang Cristianong mga gulang dapat mamati sa laygay ni Pablo: “Sul-ob kamo sing tagipusuon sang pagkaawa, pagkalulo, pagkakubos, kag pagkamabinatason.” (Colosas 3:12) Apang ano ang dapat himuon sang mga gulang kon ang indibiduwal nga nagakinahanglan sing pagpasag-uli may malain nga panimuot? Dapat nila ‘himud-usan ang . . . pagkalulo.’​—⁠1 Timoteo 6:⁠11.

Pagbantay Upod ang Pagpangandam

 16, 17. Batok sa anong mga katalagman dapat magbantay ang mga gulang kon nagalaygay sa iban?

¹⁶ May kapin pa sa laygay ni Pablo sa Galacia 6:⁠1. Ginlaygayan niya ang kalipikado sa espirituwal nga mga lalaki: “Magtinguha sa pagpasag-uli [sa iya nga nakasala] sa espiritu nga malulo, mag-andam sa imo kaugalingon, basi kon ikaw man pagsulayon.” May serioso gid nga mga resulta kon ina nga laygay indi pamatian! Bangod sang balita nahanungod sa isa ka Aprikano nga klerigo nga nakasala sing panglahi upod sa duha ka parokyano, ang The Times sang London nagsiling nga ini “isa ka masami nagakatabo nga kahimtangan: ang paglaygay, ayhan amaynon ukon utudnon nga lalaki nga nakasala bangod ginasaligan sia sang iya ginalaygayan.” Nian ginpatuhuyan sang kolumnista sa balita ang ginasiling ni Dr. Peter Rutter nga “ang mahingaliton nga relasyon sa ulot sang pasyente kag sang ila lalaki nga manuglaygay​—⁠doktor, abogado, pari kag amo​—⁠sa aton matinuguton sa sekso nga katilingban, nangin dimabaton, makahalalit kag makahuluya nga epidemia.”

¹⁷ Indi naton dapat hunahunaon nga ang katawhan ni Jehova indi maapektuhan sinang mga pagsulay. Ang isa ka respetado nga gulang nga tinuig na nga nag-alagad sing matutom nakahimo sing imoralidad bangod nagduaw sia sa minyo nga utod nga babayi sang nagaisahanon sia. Bisan nga naghinulsol, nawasi sang utod ang iya tanan nga mga pribilehiyo sa pag-alagad. (1 Corinto 10:12) Paano, nian, ang gintangdo nga mga gulang makaduaw bilang manugbantay sa paagi nga indi sila mahulog sa pagsulay? Ano ang ila himuon agod mahimos ang pribado nga paghambalanay, agod makapangamuyo, kag agod may kahigayunan nga makonsulta ang Pulong sang Dios kag Cristianong mga publikasyon?

 18. (a) Paano ang pag-aplikar sa prinsipio sang pagkaulo magabulig sa mga gulang sa paglikaw sa mga kahimtangan nga makapierde sa maayo nga ngalan? (b) Anong mga kahimusan ang sarang mahimo sa pagduaw sa isa ka utod nga babayi?

¹⁸ Ang isa ka butang nga dapat binagbinagon sang mga gulang amo ang prinsipio sang pagkaulo. (1 Corinto 11:⁠3) Kon ang isa ka pamatan-on nagapangayo sing laygay, panikasugi nga ilakip ang iya mga ginikanan sa paghambalanay kon nagakabagay. Kon ang minyo nga utod nga babayi nagapangabay sing espirituwal nga bulig, mahimos bala ninyo nga yara ang iya bana sa tion sang pagduaw? Ano kon imposible ini ukon kon ang bana ditumuluo nga nagasakit sa iya sa pila ka paagi? Nian maghimo sing mga kahimusan kaanggid sa ginahimo ninyo kon nagaduaw sa diminyo nga utod nga babayi. Maalamon nga duha ka kalipikado sa espirituwal nga utod nga lalaki ang magaduaw sing dungan sa utod nga babayi. Kon indi ini nagakabagay, ayhan, mapili ang nagakaigo nga oras nga masugilanon sia sang duha ka utod nga lalaki sa Kingdom Hall, ayhan sa isa ka hulot nga pribado. Kon ang iban nga mga kauturan nga lalaki kag babayi yara sa tilipunan, bisan pa indi makita kag mabatian ang paghambalanay, malikawan ang bisan anong kabangdanan sang pagkasandad.​—⁠Filipos 1:​9, 10.

 19. Ang pagbantay sa karnero sang Dios sing kinabubut-on nagadala sing anong maayong mga resulta, kag sin-o ang aton ginapasalamatan tungod sang kinabubut-on nga mga manugbantay?

¹⁹ Ang pagtatap sa karnero sang Dios sing kinabubut-on nagadala sing maayong mga resulta​—⁠mabakod sa espirituwal, natuytuyan sing maayo nga panong. Kaangay ni apostol Pablo, ang karon nga mga Cristianong gulang nagakabalaka sing daku sa mga masigkatumuluo. (2 Corinto 11:28) Labi na nga mabug-at ang responsabilidad sang pagbantay sa katawhan sang Dios sa sining makahalanguyos nga panahon. Busa, ginapasalamatan gid naton ang maayong buhat nga ginahimo sang aton mga kauturan nga lalaki nga nagaalagad subong mga gulang. (1 Timoteo 5:17) Tungod sang pagpakamaayo sa aton paagi sa “mga dulot nga mga tawo” nga nagatatap sing kinabubut-on, ginahatag naton ang pagdayaw sa Manughatag sang “tagsa ka maayong dulot kag tagsa ka himpit nga hiyas,” sa aton mahigugmaon nga langitnon nga Manugbantay, nga si Jehova.​—⁠Efeso 4:8; Santiago 1:⁠17.

Paano Mo Sabton?

◻ Paano madumalahan sing maayo sang isa ka lalaki ang iya panimalay?

◻ Anong mga kinaiya ang dapat makita sa pagtatap sang Cristianong mga gulang?

◻ Paano makapakita sing pagpaubos kag kalulo sa paghatag sing laygay ang mga gulang?

◻ Ano ang nagabulig sa paghimo sang espirituwal nga pagpasag-uli nga epektibo?

◻ Paano malikawan sang mga gulang ang mga kahimtangan nga nagapierde sang maayo nga ngalan kon nagabantay sa panong?

[Piktyur sa pahina 18]

Ang Cristianong gulang dapat magdumala sing maayo sa iya panimalay

[Piktyur sa pahina 21]

Ang Cristianong pagbantay dapat himuon nga may kalulo kag paghantop