Ang Tion nga ang Pagdampigdampig Wala Na!

SUNO sa report, ang sientipiko nga si Al­bert Ein­stein nagsiling anay nga sa sining masubo nga kalibutan, mas mabudlay landason ang pagdampigdampig sangsa pagtunga sang isa ka atomo. Sing kaanggid, si Ed­ward R. Mur­row, isa ka dyurnalista nga nangin bantog sang Inaway Kalibutanon II kag sang ulihi nangin direktor sang U.⁠S. In­for­ma­tion Agen­cy, nagsiling nga “wala sing isa nga makadula sang mga pagdampigdampig​—⁠makilal-an lamang nila ini.”

Matuod bala ining mga pinamulong? Imposible bala ang pagdula sa diskriminasyon kag rasismo. Ano ang ginabatyag sang Dios tuhoy sa pagdampigdampig?

Ang Dios Wala sing Ginapasulabi

Ang Biblia nagahambal batok sa pagpasulabi. (Hulubaton 24:​23; 28:21) Nagasiling ini nga “ang kaalam nga gikan sa hitaas sa nahauna putli, ugaling mahidaiton, makatarunganon, masinulundon, puno sing kaluoy kag maayong mga bunga, wala sing ginadampigan, indi salimpapaw.” (Santiago 3:17) Ina nga sahi sang kaalam ginpadaku sa mga hukom sa dumaan nga Israel. “Dili ka maghimo sing dimatarong sa paghukom,” sugo sa ila. “Dili ka magpasulabi sang imol, ukon magpadungog sang gamhanan.”​—⁠Levitico 19:⁠15.

Ang malig-on nga tindog sang Biblia batok sa pagpasulabi kag pagdampigdampig ginpadaku ni Jesucristo kag sang iya mga apostoles nga sanday Pedro kag Pablo. Si Jesus wala sing ginpasulabi sa sadtong “mga ginlapyo kag nag-alaplaag subong sang karnero nga wala sang manugbantay.” (Mateo 9:36) Sia nagtudlo: “Dili kamo maghukom suno sa dagway, kundi maghukom sing matarong nga paghukom.”​—⁠Juan 7:⁠24.

Ginapasalig kita nanday Pedro kag Pablo nga si Jehova nga Dios mismo wala sing ginapasulabi. Si Pedro nagsiling: “Matuod gid ginahantop ko nga ang Dios walay ginapasulabi, apang sa tagsa ka pungsod ang tawo nga nagakahadlok sa iya kag nagahimo sing katarungan kalahamut-an sa iya.” (Binuhatan 10:​34, 35) Si apostol Pablo nagasiling sa aton: “Ang Dios wala sing ginapasulabi.”​—⁠Roma 2:⁠11.

Ang Impluwensia sang Biblia

Ang Biblia may gahom sa pagbag-o sing mga personalidad sadtong ginatuytuyan sini. Ang Hebreo 4:​12 nagasiling: “Ang pulong sang Dios buhi kag gamhanan.” Paagi sa bulig ni Jehova sarang mabag-o sang madampigon nga tawo ang iya panghunahuna kag mangin walay pinasulabi sa iya mga pagpakig-angot sa iban.

Binagbinaga, halimbawa, ang kaso ni Saul sang Tarso. Suno sa rekord sang Biblia, masingki niya anay nga ginpamatukan ang Cristianong kongregasyon bangod ginsunod niya ang estrikto relihiosong mga tradisyon. (Binuhatan 8:​1-3) Nakumbinsi sia sing lubos sang Judiyong tradisyon nga ang tanan nga Cristiano mga apostata kag kaaway sang matuod nga pagsimba. Ang iya pagkamadinampigon nagdul-ong sa iya nga sakdagon ang pagpamatay sa mga Cristiano. Ang Biblia nagasiling nga sia “nagasilabo sa pagpahog kag pagpamatay batok sa mga gintutun-an sang Ginuo.” (Binuhatan 9:1) Samtang ginahimo yadto, naghunahuna sia nga nagahimo sia sang sagrado nga pag-alagad sa Dios.​—⁠Ipaanggid ang Juan 16:⁠2.

Apang, nadula ni Saul sang Tarsus ang iya tuman nga pagkamadinampigon. Nangin isa pa gani sia ka Cristiano mismo! Sang ulihi, subong si Pablo, nga apostol ni Jesucristo, sia nagsulat: “Isa ako anay ka mapasipalahon kag manughingabot kag manugtampalas. Apang, nakaagom ako sing kaluoy, kay ginhimo ko yadto nga wala sing ihibalo kag kulang sing pagtuo.”​—⁠1 Timoteo 1:⁠13.

Si Pablo indi lamang ang tawo nga naghimo sing amo kadaku nga pagbag-o sa iya paagi sang paghunahuna. Sa iya sulat kay Tito, isa ka kaupod nga ebanghelisador, ginlaygayan ni Pablo ang mga Cristiano nga “dili maghambal sing malaut nahanungod kay bisan sin-o, nga maglikaw sa pagkamapinuyason, nga magmalulo, kag magpakita sing himpit nga pagtahod ayon sa tanan nga tawo. Kay kita aton sang una mga buangbuang, dimatinumanon, ginpatalang, mga ulipon sa sarisaring mga kailigbon kag mga kinasadya, nga nagkabuhi sa malaut nga kabubut-on kag kahisa, ginadumtan sang mga tawo, kag nagadinumtanay.”​—⁠Tito 3:​2, 3.

Pagrumpag sa mga Balagbag sang Pagdampigdampig

Sa karon, ginatinguhaan sang matuod nga mga Cristiano nga sundon ina nga laygay. Luyag nila likawan ang paghukom sa mga tawo pasad sa hapaw nga mga impresyon. Nagapugong ini sa ila sa ‘paghambal sing masakit’ sa iban. Natigayon nila ang internasyonal nga paghiliutod nga nagalab-ot sa tanan nasyonalistiko, etniko, kag mga dulunan sang rasa sining kalibutan.

Binagbinaga ang eksperiensia ni Hen­ri­que, isa ka maitom sing panit nga taga-Brazil. Subong isa mismo ka biktima sang diskriminasyon, nakapalambo sia sing tudok nga kaugot sa puti nga mga tawo. Sia nagpaathag: “Duha ka puti nga Saksi ang nagkari sa akon balay agod makighambal tuhoy sa ngalan sang Dios. Sang primero indi ko luyag mamati bangod wala ako sing salig sa puti nga mga tawo. Apang sang ulihi nakita ko nga ang ila mensahe nagaunod sing kamatuoran. Gani, ginbaton ko ang isa ka pagtuon sa Biblia. Ang una ko nga ginpamangkot amo, ‘Madamo bala sang itom nga tawo sa inyo simbahan.?’ Nagsabat sila sing, ‘Huo.’ Nian ginpakita nila sa akon ang katapusan nga laragway sa libro nga Ang Akon Libro sang mga Sugilanon sa Biblia,⁠a nga nagapakita sang mga pamatan-on nga may lainlain nga rasa. Nalakip amo ang isa ka itom nga bata nga lalaki, kag nagpalig-on ini sa akon. Sang ulihi nagkadto ako sa Kingdom Hall sang mga Saksi ni Jehova, diin nakita ko ang mga tawo sang lainlain nga rasa nga nagatratar sa isa kag isa nga may pagtahod. Importante gid yadto para sa akon.”

Karon, subong isa sang mga Saksi ni Jehova, nagakalipay si Hen­ri­que nga mangin bahin sang isa ka matuod nga Cristianong paghiliutod. Nahangpan niya nga ang pagdayaw wala ginahatag kay bisan sin-o nga tawo. Sia nagasiling: “Nagapasalamat ako karon kay Jehova kag kay Jesus bangod sang tanan nga ginhimo nila para sa akon. Nagapanghikot ako upod sa minilyon ka matutom nga mga alagad ni Jehova gikan sa tanan nga rasa, duag, kag ginhalinan, nga nahiusa sa isa ka katuyuan.”

Samtang nagadaku, si Dario isa pa ka biktima sang pagdampigdampig. Sa edad nga 16 anyos, nagsugod sia sa pagtuon sing Biblia upod sa mga Saksi ni Jehova. Sia nagsiling: “Sa tunga sang mga Saksi, nasapwan ko nga wala sing pagpaindisanay sang rasa.” Nagdayaw sia sa atmospera sang tunay nga gugma. Natalupangdan niya sing labi nga ang mga indibiduwal gikan sa lainlain nga rasa nagauyat sing responsable nga mga palangakuan sa sulod sang kongregasyon. Sa tagsa ka tion nga mapaidalom sia sa pila ka sahi sang pagdampigdampig ukon diskriminasyon sang mga tawo sa guwa sang kongregasyon, ginadumdom ni Dario nga ginahigugma ni Jehova ang mga tawo sang tanan nga pungsod, tribo, kag hambal.

Kon Paano ang Paglandas

Luyag naton tanan tratuhon nga may dignidad kag pagtahod. Amo sina kon ngaa ang mangin isa ka biktima sang pagdampigdampig isa ka pagtilaw nga mabudlay landason. Ang Cristianong kongregasyon wala nagaamlig sa aton nga mapadayag sa madampigon nga mga panimuot sining malauton nga kalibutan. Tubtob si Satanas nga Yawa pa ang nagakontrol sang mga hilikuton sang kalibutan, may yara sing inhustisya. (1 Juan 5:19) Ang Bugna 12:​12 nagapaandam sa aton: “Kailo sa duta kag sa dagat, kay ang Yawa nagpanaug sa inyo, nga may dakung kasingkal, nga nakahibalo nga malip-ot na lamang ang iya tion.” Indi lamang pagtuga sing kabudlayan ang iya ginatuyo. Ginpaanggid sia sa isa ka sapat nga manunukob. Si apostol Pedro nagasiling sa aton: “Ang inyo kaaway, ang Yawa, nagaluyong kaangay sang nagangurob nga leon, nga nagapangita sang iya tulukbon.”​—⁠1 Pedro 5:⁠8.

Ginasugiran man kita sang Biblia: “Busa, magpasakop kamo sa Dios; apang sumpunga ang Yawa, kag magapalayo sia sa inyo.” (Santiago 4:7) Ang isa ka maayo nga bulig sa paglandas sang pagdampigdampig amo ang pagpangayo sing pag-amlig sang Dios, subong sang ginhimo ni Hari David: “Sagupa ako, O Dios ko, sa kamot sang malauton, sa kamot sang dimatarong kag mapintas nga tawo.” (Salmo 71:4) Mahimo man gani kita makapangamuyo kaangay sang salmista: “Maluoy ka sa akon, O Dios, kay ang tawo buot maglamon sa akon. Sa bug-os nga adlaw sia nagaaway nga nagapigos sa akon.”​—⁠Salmo 56:⁠1.

Paano sabton sang Dios ang amo nga sahi sang mga pangamuyo? Ang Biblia nagasabat: “Kay magaluwas sia sang nawad-an kon magtuaw sia, sang imol nga wala sing manugtabang. Magakaawa sia sa imol kag sa nawad-an kag luwason niya ang mga kalag sang nawad-an.” (Salmo 72:​12, 13) Daw ano kaayo mahibaluan nga sa nagakaigo nga tion hatagan ni Jehova sing kaumpawan ang tanan nga nangin biktima sang inhustisya!

“Indi Sila Magahimo sing Bisan Anong Kahalitan”

Ang mga panguluhan sining kalibutan mahimo magapadayon sa pagsumpong sa pagdampigdampig paagi sa ila mga kasuguan kag mga programa. Mahimo nga magapadayon sila sa pagpangako sing pagkaalalangay kag katarungan. Apang indi sila magmadinalag-on. (Salmo 146:3) Ang Dios lamang ang sarang kag magadula sang tanan madampigon nga pagtamod. Himuon niya ang katawhan nga isa ka nahiusa nga pamilya. “Ang isa ka dakung kadam-an, nga wala sing isa nga makaisip, gikan sa tanan nga kapungsuran kag tribo kag katawhan kag hambal” makalampuwas sa katapusan sining malauton nga sistema kag makatigayon sing mahidaiton nga kabuhi.​—⁠Bugna 7:​9, 10.

Dulaon ni Jehova ang tanan nga halit nga gintuga sang pagdampigdampig sa rasa kag katilingban. Hunahunaa, walay isa nga pakig-angutan sing dimakatarunganon! “Magalingkod sila, ang tagsa ka tawo sa idalom sang iya ubas kag sa idalom sang iya higuerra, kag wala na sing magapahadlok sa ila.” (Miqueas 4:4) Kag ang Isaias 11:​9 nagasiling: “Indi sila magahimo sing bisan anong kahalitan.”

Kon isa ikaw ka biktima sang pagdampigdampig karon, ining makadalayaw nga paglaum sa palaabuton makapalig-on sang imo kaangtanan kay Jehova. Makabulig ini sa imo nga mabatas ang mga inhustisya sining malauton nga sistema. Samtang ginabatas ninyo ang pagdampigdampig kag nagatulok sa unahan, sunda ang maalamon nga panugda sang Biblia: “Magpakabakod, kag magpakaisog ang inyo tagipusuon, tanan kamo nga nagalaum kay Jehova.”​—⁠Salmo 31:⁠24.

[Footnote]

[Credit Line sang retrato sa pahina 4]

Laragway iya sang U.S. National Archives