Pamangkot sang Amon Bumalasa
Yara Bala sa Imo Tagipusuon ang Ginharian sang Dios?
Madamo ang nagapati nga huo ang sabat sa sini nga pamangkot. Halimbawa, ang The Catholic Encyclopedia nagsiling: “Ang ginharian sang Dios nagakahulugan . . . ang Dios nagagahom sa aton tagipusuon.” Masami nga ginatudlo sang klero ini nga ideya. Ginatudlo gid bala sang Biblia nga ang Ginharian sang Dios yara sa tagipusuon sang tawo?
Ang iban nagahunahuna nga si Jesus mismo ang una nga nagtudlo sang ideya nga ang Ginharian sang Dios yara sa tagipusuon sang tawo. Nagsiling matuod si Jesus: “Yari karon! ang ginharian sang Dios yara sa tunga ninyo.” (Lucas 17:21) Ang iban nga badbad nagsiling: “Ang Ginharian sang Dios yara sa sulod ninyo.” Sibu bala ini nga pagbadbad sa ginsiling ni Jesus? Buot gid bala niya ipahangop nga ang Ginharian sang Dios yara sa sulod sang tagipusuon sang tawo?
Una, binagbinaga kon ano ang tagipusuon sang tawo. Sa Biblia, ang malaragwayon nga tagipusuon nagakahulugan sang nasulod nga pagkatawo, nga amo ang ginahalinan sang mga panghunahuna, panimuot kag balatyagon sang isa ka tawo. Mahimo matahom pamatian ang isa ka halangdon nga ideya nga ang Ginharian sang Dios yara sa tagipusuon sang tawo bangod ginapabag-o sini ang tawo, apang may basihan bala ini?
Ang Biblia nagasugid sa aton: “Ang tagiposoon malimbongon labaw sa tanan nga butang, kag lakas gid kadunut.” (Jeremias 17:9) Si Jesus mismo nagsiling: “Gikan sa sulod, gikan sa tagipusuon sang mga tawo, nagagua ang makahalalit nga mga pangatarungan: pagpakighilawas, pagpangawat, pagpatay, panghilahi, paghamkon, malaut nga buhat.” (Marcos 7:20-22) Binagbinaga ini: Indi bala nga ang halos tanan nga pag-antos nga makita naton karon sa kalibutan resulta sang makasasala nga tagipusuon sang tawo? Kon amo, paano ini makapatubas sing himpit nga Ginharian sang Dios? Sa pagkamatuod, imposible nga ang tagipusuon sang tawo makapatubas sing Ginharian sang Dios subong nga ang gamhon indi makapatubas sing mga igos.—Mateo 7:16.
Ikaduha, binagbinaga kon sin-o ang mga nagapamati sadto kay Jesus sang ginsiling niya ang mga pinamulong nga ginrekord sa Lucas 17:21. Ang una nga bersikulo nagasiling: “Sang ginpamangkot sia sang mga Fariseo kon san-o magaabot ang ginharian sang Dios, nagsabat sia sa ila.” (Lucas 17:20) Ang mga Fariseo kaaway ni Jesus. Si Jesus nagsiling nga ang salimpapaw nga mga Fariseo indi makasulod sa Ginharian sang Dios. (Mateo 23:13) Kon ang mga Fariseo indi makasulod sa Ginharian sang Dios, paano masiling nga yara ini sa ila tagipusuon? Imposible gid! Ano nian, ang buot silingon ni Jesus?
Madamo nga manugbadbad sang Biblia ang mahalungon nga nagbadbad sang pinamulong ni Jesus nga gingamit ang kaanggid nga mga tinaga nga masapwan sa New World Translation. Ang pila nagsiling “yara na sa tunga ninyo.” Paano nga ang Ginharian sang Dios yara sa tunga sang mga tawo sadto nga tion, lakip ang mga Fariseo? Ang matuod, si Jesus amo ang gintangdo ni Jehova nga Dios nga mangin Hari sang Ginharian. Subong ang Gintangdo nga Hari, yara gid man si Jesus sa tunga sadto nga mga tawo. Nagpanudlo sia tuhoy sa Ginharian sang Dios kag naghimo pa gani sia sing mga milagro, amo nga nahatagan niya sila sing ideya kon ano ang himuon sang Ginharian. Busa, matuod gid nga ang Ginharian yara sa tunga nila.
Maathag nga wala ginasakdag sang Kasulatan ang ideya nga ang Ginharian sang Dios yara sa tagipusuon sang tawo. Sa baylo, isa gid ini ka gobierno nga magapaluntad sing daku gid nga mga pagbag-o sa duta, subong sang gintagna sang mga manalagna.—Isaias 9:6, 7; Daniel 2:44.