Malipayon Bisan May Kasablagan

Panugiron ni Paulette Gaspar

Bisan pa nga mga tres kilos ako sang ginpanganak, nahibaluan sang doktor nga may balatian ako. Sang ginpanganak ako, may crack ang akon mga tul-an. Nagaantos ako sang ginatawag nga osteogenesis imperfecta, nga mas kilala nga brittle bone disease. Gin-operahan ako, pero wala naglaum ang mga doktor nga mabuhi pa ako. Nagpaabot sila nga mapatay ako sa sulod sang 24 oras.

NATAWO ako sa Canberra, nga kapital sang Australia, sang Hunyo 14, 1972. Wala ginapaabot sang tanan nga maligaran ako sang isa ka adlaw. Pero, ginpulmonya ako. Bangod nagapati ang mga doktor nga mapatay ako, wala na nila ako ginbulong kag nagdesisyon sila nga pabay-an na lang ako nga mapatay. Pero wala ina matabo, kay nabuhi ako.

Indi ko mahanduraw kon daw ano yadto kabudlay nga tion para sa akon mga ginikanan. Bangod ginapaabot na nila nga mapatay ako, ginhambalan sang mga manugbulong, nga may maayo nga tuyo, ang akon mga ginikanan nga indi ako pagpalanggaon sing sobra. Ang matuod, sa una nga tatlo ka bulan nga pagtener ko sa ospital, wala gintugutan ang akon mga ginikanan bisan sa pagtandog sa akon. Madali lang gid ako mahalitan. Sang kumbinsido na sila nga mabuhi ako, ginpanugda sang mga doktor nga ibutang ako sa balay para sa mga dis-ebol nga kabataan.

Pero nagdesisyon ang akon mga ginikanan nga dal-on ako sa balay. Ang akon iloy nagatuon sing Biblia upod sa mga Saksi ni Jehova. Bangod sa iya natun-an, mas nabatyagan niya ang iya obligasyon nga dapat ako atipanon. Pero kabalo ako nga nabudlayan gid si Nanay kay ang tanan niya nga kusog kag emosyon nasentro na lang sa akon. Pirme ako ginaospital. Nagakabalian ako bisan sa pagpaligo lang. Bisan gani mangatsi lang ako, nagakaligto ang akon tul-an.

Nangasubo Gid Ako

Halin sang gamay, naga-wheelchair ako kag indi ako makalakat. Bisan pa sa sini nga mga kabudlayan, gin-atipan gid ako sang akon mga ginikanan.

Isa pa, gintinguhaan gid ni Nanay nga tudluan ako sang makapaumpaw nga mensahe sa Biblia. Halimbawa, gintudlo niya sa akon nga sa palaabuton, himuon sang Dios nga paraiso ang duta kag ang mga tawo mangin perpekto sa espirituwal, mental kag sa pisikal. (Salmo 37:10, 11; Isaias 33:24) Pero, prangka nga nagsiling si Nanay nga amo na lang gid ini ang paglaum agod makita niya ako nga may maayo nga panglawas.

Sang primero, nag-eskwela ako sa eskwelahan sang mga dis-ebol. Wala ako ginhatagan sang akon mga manunudlo sing tulumuron, kag wala man ako sing tulumuron. Ang matuod, nabudlayan gid ako sa pag-eskwela. Ginaaway ako sang mga bata sa eskwelahan. Sang ulihi, nag-eskwela ako sa eskwelahan sang normal nga mga kabataan. Nabatyagan ko nga ginakapoy ako sa pisikal, emosyonal, kag mental kon nagapakig-upod ako sa iban. Walay sapayan sini, determinado ako nga tapuson ang akon 12 ka tuig nga pag-eskwela.

Ilabi na sang hayskul ako, ginpamensaran ko kon daw ano ka wala sing pulos kag wala sing paglaum ang kabuhi sang akon pareho nga mga estudyante. Ginpamensaran ko man kon ano ang gintudlo sa akon ni Nanay sa Biblia. Nagapati ako nga kamatuoran ang iya gintudlo. Pero sa sina nga tion, ang mga panudlo sang Biblia wala pa magdulot sa akon. Nagdesisyon ako nga mangalipay anay kag magsinadya nga wala na ginapamensar ang palaabuton.

Sang 18 anyos ako, naghalin ako sa amon balay kag nag-istar sa isa ka balay upod sa grupo sang mga dis-ebol. Makalilipay gid ini apang makakululba man. Nanamian gid ako nga mangin hilway, mangin independiente, makig-abyan kag makig-upod sa ila. Madamo sa akon mga abyan ang nagpakasal. Nagahandum man ako nga higugmaon kag makapamana. Pero, bangod sang akon kasablagan, mabudlay gid para sa akon nga makapamana. Nangasubo gid ako bangod sini.

Bisan sa sini, wala ko gid ginbasol ang Dios sa akon kahimtangan. Madamo na ako sing natun-an parte sa Dios kag nahibaluan ko nga indi gid maghimo sing inhustisya ang Dios. (Job 34:10) Gintinguhaan ko nga batunon ang akon kahimtangan. Bisan pa sa sini, nangasubo gid ako.

Amat-amat nga Naumpawan

Maayo na lang kay nahibaluan ni Nanay ang akon sitwasyon kag gintawgan niya ang isa ka gulang sa kongregasyon sang mga Saksi nga malapit sa akon ginaistaran. Gintawgan ako sang gulang kag gin-agda nga magtambong sa Cristianong pagtilipon sang mga Saksi ni Jehova sa Kingdom Hall nga malapit sa akon ginaistaran. Isa pa, gintun-an ako sa Biblia sang isa ka Saksi nga babayi kada semana.

Samtang ginapahanumdom sa akon ang mga kamatuoran nga gintudlo ni Nanay sang una, nagbag-o ang akon panan-aw sa kabuhi. Nalipay ako sa pagpakig-upod sa pareho ko nga mga Cristiano. Pero natun-an ko nga indi pag-isugid sa iban ang akon balatyagon bangod nahadlok ako nga masakitan. Sa banta ko amo ini ang rason kon ngaa nabudlayan ako nga higugmaon sing tudok ang Dios. Bisan pa sa sini, nahibaluan ko nga husto gid nga idedikar ko ang akon kabuhi sa Dios. Gani sang Disiembre 1991, nagpabawtismo ako bilang simbulo sang akon dedikasyon.

Naghalin ako sa balay nga ginaistaran ko upod sa mga dis-ebol kag nag-istar sa isa ka apartment. May mga benepisyo kag mga problema ako bangod sini. Halimbawa, nasubuan gid ako, kag ginahadlukan nga basi sudlon ako sang mga lalaki. Sang ulihi, nangasubo na naman ako. Bisan pa nga nagayuhum kag daw malipayon ako, indi maayo ang akon kahimtangan. Kinahanglan ko gid ang maayo kag masaligan nga abyan.

Nahibaluan ko nga hatagan ako ni Jehova nga Dios sini nga klase sang abyan. Ginhimos sang mga gulang sa amon kongregasyon nga ipadayon ni Suzie, isa ka utod nga may bana, ang pagtuon sa akon sa Biblia. Sobra pa sa manunudlo si Suzie sa akon. Nangin pinalangga kag suod ko gid sia nga abyan.

Gintudluan ako ni Suzie kon paano isugid sa iban ang akon natun-an—sa pagpamalaybalay kag sa iban pa nga paagi. Karon, mas naapresyar ko ang mga kinaiya sang Dios. Pero, bisan pa nga nabawtismuhan na ako, indi pa gid madalom ang akon gugma sa Dios. Isa ka bes, nagahunahuna ako nga mag-untat sa pag-alagad. Gintu-ad ko ini kay Suzie, kag ginbuligan niya ako nga malandas ini nga problema.

Ginbuligan man ako ni Suzie nga mahangpan nga ang rason kon ngaa indi ako malipayon amo ang pagpakig-upod ko sa mga tawo nga wala sing mabakod nga gugma kay Jehova. Gani, nakig-abyan ako sa mga tawo nga may suod nga kaangtanan sa Dios—ilabi na sa mga may edad na. Subong man, indi maayo ang amon pagtamdanay ni Nanay; gani gintinguhaan ko nga mabalik ang akon maayo nga relasyon sa iya kag sa akon magulang nga lalaki. Nabatyagan ko ang kalipay nga wala ko pa anay naeksperiensiahan. Ang akon mga kauturan sa pagtuo, ang akon pamilya, kag labaw sa tanan si Jehova, nangin tuburan sang akon kalipay kag kabakod.—Salmo 28:7.

Bag-o nga Tulumuron

Pagkatapos nga makatambong ako sa isa ka daku nga pagtilipon sang mga Saksi, sa diin nabatian ko ang isa ka pamulongpulong nga nagabinagbinag sa kalipay nga naeksperiensiahan sang bug-os tion nga ministro, nahunahuna ko, ‘Masarangan ko ina!’ Siempre pa nahibaluan ko nga mabudlay gid ini para sa akon. Pero, pagkatapos nga makapangamuyo kag mabinagbinag ini nga mga butang, ginhatag ko ang akon aplikasyon para sa bug-os tion nga manunudlo sang Biblia, kag sang Abril 1998, nagsugod ako sa pagpayunir.

Paano ako nagawali sa akon kahimtangan? Gusto ko gid nga mangin independiente kag indi ko gusto nga mangin pabug-at sa iban, nga magsakay lang sa ila salakyan kag magsalig sa iban pa nila nga bulig. Gani nanugda si Suzie kag ang iya bana nga si Michael sing isa ka solusyon: Mabakal sing motor! Pero, paano ko ini masakyan? Subong sang makita sa piktyur, gindesinyo ini para gid sa akon. Nagabug-at lamang ako sing 19 kilos kag indi ko na kinahanglan nga magsaylo halin sa wheelchair pakadto sa motor!

Bangod sang akon salakyan, maduaw ko na ang mga tawo kag matun-an sila sa Biblia sa tion nga kombeniente sa ila kag sa akon. Nanamian gid ako magsakay sa akon motor kay mabatyagan ko ang dapya sang hangin!

Nanamian ako makig-istorya sa mga tawo sa kalye, nga ang kalabanan sa ila mabuot kag matinahuron sa akon. Nalipay gid ako sa pagbulig sa iban nga makatuon sa Biblia. Nadumduman ko ang isa ka higayon sang nagawali ako sa mga balay kag upod ko ang mataas nga utod. Gintamyaw niya ang tagbalay, nga natingala nga nagtulok sa akon kag namangkot sa akon upod, “Nagahambal man na sia?” Nagkinadlaw kami tanan. Sang matapos kami sa pagsugilanon, kumbinsido gid sia nga makahambal ako!

Malipayon ako karon kag ginahigugma ko gid si Jehova nga Dios. Nagapasalamat gid ako kay Nanay bangod gintudluan niya ako sing kamatuoran sa Biblia, kag masinaligon ako nga nagapaabot sa tion nga ‘himuon nga bag-o sang Dios ang tanan nga butang,’ lakip ang akon gamay nga lawas.—Bugna 21:4, 5.

[Blurb sa pahina 30]

“Gintinguhaan ko nga batunon ang akon kahimtangan. Bisan pa sa sini, nangasubo gid ako”