Magtuon sa Pulong sang Dios

Sin-o ang Dios?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

 1. Sin-o ang Dios?

Ang matuod nga Dios amo ang Manunuga sang tanan nga butang. Ginatawag sia sang Biblia nga “Hari nga dayon,” nga buot silingon, wala sia sing ginsuguran kag wala sia sing katapusan. (Bugna 15:3) Tungod ang Dios amo ang Ginhalinan sang kabuhi, dapat sia lang ang aton simbahon.—Basaha ang Bugna 4:11.

 2. Ano ang personalidad sang Dios?

Wala sing nakakita sa Dios bangod Espiritu sia. Gani, labaw sia sa tanan nga tinuga diri sa duta. (Juan 1:18; 4:24) Ang personalidad sang Dios makita sa mga butang nga iya ginhimo. Halimbawa, kon tun-an naton ang desinyo kag klase sang mga prutas kag bulak, makita naton ang gugma kag kaalam sang Dios. Ang kasangkaron sang uniberso nagapamatuod sang iya gahom.—Basaha ang Roma 1:20.

Madamo pa kita sing matun-an sa Biblia parte sa personalidad sang Dios. Halimbawa, ginasugid sini sa aton kon ano ang gusto kag indi gusto sang Dios, ang iya pagtratar sa mga tawo, kag ang iya reaksion sa sarisari nga sitwasyon.—Basaha ang Salmo 103:7-10.

 3. May ngalan bala ang Dios?

Nagsiling si Jesus: “Amay namon nga yara sa langit, pakabalaanon ang imo ngalan.” (Mateo 6:9) Bisan pa madamo sing titulo ang Dios, isa lang ang iya ngalan. Lainlain ang pagmitlang sini sa kada lenguahe. Sa Hiligaynon, ginamitlang ini nga “Jehova” kag kon kaisa “Yahweh.”—Basaha ang Salmo 83:18.

Sa madamo nga bersion sang Biblia, ang ngalan sang Dios gin-islan sing mga titulo nga Ginuo ukon Dios. Pero sang ginsulat ang Biblia, ginsambit sing mga 7,000 ka beses ang ngalan sang Dios. Ginpakilala ini ni Jesus sang ginpaathag niya ang Pulong sang Dios sa mga tawo. Ginbuligan niya ang mga tawo nga makilala ang Dios.—Basaha ang Juan 17:26.

 4. Nagaulikid bala si Jehova sa aton?

Ginapakita ni Jehova nga importante kita sa iya paagi sa pagpamati sa aton mga pangamuyo. (Salmo 65:2) Pero, paano masiling nga nagaulikid ang Dios kon grabe ang aton pag-antos? Siling sang iban, ginapaantos kita sang Dios para matilawan kita. Indi ina matuod. Ang Biblia nagasiling: “Malayo sa Dios nga maghimo sia sing pagkamalaut.”—Job 34:10; basaha ang Santiago 1:13.

Ginhatagan kita sang Dios sing kahilwayan sa pagpili. Ginagamit bala ini naton para alagaron sia? (Josue 24:15) May pag-antos bangod ginpili sang madamo nga himuan sing malain ang iban. Nasakitan gid si Jehova magtan-aw sa sining inhustisya.—Basaha ang Genesis 6:5, 6.

Sa indi madugay, gamiton ni Jehova si Jesus para dulaon ang pag-antos kag ang mga nagahimo sini. Antes sini, may maayo nga rason si Jehova nga tugutan anay ang pag-antos. Ipaathag sang masunod nga gua sini nga artikulo kon ngaa ginatugutan sang Dios ang pag-antos.—Basaha ang Isaias 11:4.

 5. Ano ang gusto sang Dios nga himuon naton?

Gintuga kita ni Jehova nga may ikasarang nga kilalahon kag higugmaon sia. Gusto niya nga tun-an naton ang kamatuoran parte sa iya. (1 Timoteo 2:4) Kon tun-an naton ang Biblia, makilala naton ang Dios bilang isa ka Abyan.—Basaha ang Hulubaton 2:4, 5.

Si Jehova ang naghatag sa aton sing kabuhi, gani dapat higugmaon naton sia labaw sa tanan. Mapakita naton ini paagi sa pagpangamuyo kag pagtuman sa iya. (Hulubaton 15:8) Gusto man ni Jehova nga higugmaon naton ang iban.—Basaha ang Marcos 12:29-31; 1 Juan 5:3.

Para sa dugang nga impormasyon, basaha ang kapitulo 1 sini nga libro Ano gid ang Ginatudlo sang Biblia?, nga ginhimo sang mga Saksi ni Jehova.

[Retrato sa pahina 17]

May maayo bala nga rason kon ngaa gintugutan anay ang pag-antos?