Cristianong mga Gulang—‘Masigkamanugpangabudlay Para sa Aton Kalipay’

 1. Ngaa nagkasadya si Pablo sa mga Cristiano sa Corinto?

SANG 55 C.E., si apostol Pablo yara sa pantalan nga siudad sang Troas, pero ginahunahuna niya gihapon ang mga taga-Corinto. Antes sini, nasakitan gid sia sang nahibaluan niya nga may pagsinuay sa tunga sang mga kauturan. Gani kaangay sang Amay nga nagaulikid sa ila, ginpadalhan niya sila sing sulat para tadlungon. (1 Cor. 1:11; 4:15) Ginpadala man niya ang iya masigkamanugpangabudlay nga si Tito kag ginhambalan nga magreport sa iya sa Troas. Si Pablo naghulat kay Tito sa Troas, nga nagapaabot kon ano ang reaksion sang mga taga-Corinto sa iya sulat. Pero nasubuan sia kay wala nag-abot si Tito. Ano ang himuon ni Pablo? Naglayag sia pakadto sa Macedonia, kag nalipay sia kay nagkitaay sila didto ni Tito. Ginsugid sa iya ni Tito nga ang mga kauturan sa Corinto nagsunod sa iya sulat kag gusto nila sia makita. Sang nabatian ini ni Pablo, “nagkasadya [sia] sing labi pa.”—2 Cor. 2:12, 13; 7:5-9.

 2. (a) Ano ang ginsulat ni Pablo sa mga taga-Corinto parte sa pagtuo kag kalipay? (b) Ano nga mga pamangkot ang aton binagbinagon?

² Wala madugay pagkatapos sadto, ginhimo ni Pablo ang iya ikaduha nga sulat sa mga taga-Corinto. Ginsilingan niya sila: “Indi nga mga agalon kami sang inyo pagtuo, kundi mga masigkamanugpangabudlay kami para sa inyo kalipay, kay nagatindog kamo bangod sa inyo pagtuo.” (2 Cor. 1:24) Ano ang buot silingon sini ni Pablo? Kag paano ini nga mga pinamulong makaapektar sa Cristianong mga gulang subong?

 3. (a) Ano ang buot silingon ni Pablo sang nagsulat sia: “Nagatindog kamo bangod sa inyo pagtuo”? (b) Paano ginasunod sang mga gulang subong ang halimbawa ni Pablo?

³ Ginsambit ni Pablo ang duha ka importante nga aspekto sang aton pagsimba—ang pagtuo kag kalipay. Talupangda nga parte sa pagtuo, nagsulat sia: “Indi nga mga agalon kami sang inyo pagtuo, . . . kay nagatindog kamo bangod sa inyo pagtuo.” Sa sini nga pinamulong, ginpakita ni Pablo nga ang mga kauturan sa Corinto nagatindog sing malig-on, indi bangod sa iya ukon kay bisan sin-o, kundi bangod sa ila pagtuo sa Dios. Gani, nakita ni Pablo nga indi dapat pagkontrolon ang pagtuo sang iya mga kauturan, kag wala sia sing handum nga himuon ini. Nagasalig sia nga matutom sila nga mga Cristiano nga gusto himuon ang husto. (2 Cor. 2:3) Sa karon, ginasunod sang mga gulang ang halimbawa ni Pablo paagi sa pagsalig sa pagtuo sang ila mga kauturan kag sa ila motibo sa pag-alagad sa Dios. (2 Tes. 3:4) Sa baylo nga maghimo sing estrikto nga mga pagsulundan sa kongregasyon, nagasalig ang mga gulang sa mga prinsipio sa Kasulatan kag sa panuytoy sang organisasyon ni Jehova. Ang mga gulang subong indi mga agalon sa pagtuo sang ila mga kauturan.—1 Ped. 5:2, 3.

 4. (a) Ano ang buot silingon ni Pablo sang nagsulat sia: “Mga masigkamanugpangabudlay kami para sa inyo kalipay”? (b) Paano ginailog sang mga gulang subong ang panimuot ni Pablo?

⁴ Si Pablo nagsiling man: “Mga masigkamanugpangabudlay kami para sa inyo kalipay.” Ginpatuhuyan niya sini ang iya kaugalingon kag ang iya suod nga mga kaupdanan. Ngaa makasiling kita sina? Sa amo man nga sulat, ginpahanumdom ni Pablo ang mga taga-Corinto parte sa duha sining mga kaupdanan sang sia nagsulat: “Si Cristo Jesus, nga ginbantala sa tunga ninyo paagi sa amon, nga amo, paagi sa akon kag kay Silvano kag kay Timoteo.” (2 Cor. 1:19) Isa pa, kon ginagamit ni Pablo ang termino nga “masigkamanugpangabudlay” sa iya mga sulat, nagapatuhoy ini pirme sa iya suod nga mga kaupdanan, pareho nanday Apolos, Aquila, Prisca, Timoteo, Tito, kag iban pa. (Roma 16:3, 21; 1 Cor. 3:6-9; 2 Cor. 8:23) Gani sang nagsiling sia nga “mga masigkamanugpangabudlay kami para sa inyo kalipay,” ginpasalig ni Pablo ang mga taga-Corinto nga luyag niya kag sang iya mga kaupod nga himuon ang ila bug-os nga masarangan para mapasanyog ang kalipay sa tanan nga miembro sang kongregasyon. Amo man sini ang handum sang mga gulang sa karon. Gusto nila himuon ang ila masarangan para buligan ang ila mga kauturan nga ‘mag-alagad sa GINOO nga may kalipay.’—Sal. 100:2; Fil. 1:25.

 5. Binagbinagon naton ang sabat sa ano nga pamangkot, kag ano dapat ang aton hunahunaon?

⁵ Sining karon lang, ang isa ka grupo sang makugi nga mga kauturan nga nagaistar sa lainlain nga bahin sang kalibutan gin-agda nga magsabat sa sini nga pamangkot, “Ano ang mga ginhambal kag ginhimo sang isa ka gulang nga nagdugang sang imo kalipay?” Binagbinagon naton ang ila mga komento, kag ipaanggid naton ini sa aton mangin sabat kon kita ang pamangkuton. Hunahunaon man naton kon paano kita tanan makabulig para mangin malipayon ang aton kongregasyon.a

6, 7. (a) Ano ang isa ka paagi nga mailog sang mga gulang sanday Jesus, Pablo, kag iban pa nga alagad sang Dios? (b) Ngaa ang pagdumdom sa ngalan sang aton mga kauturan nagadugang sang ila kalipay?

⁶ Madamo sa aton kauturan ang nagsiling nga nagadugang ang ila kalipay kon ang mga gulang nagapakita sing personal nga interes sa ila. Ang isa ka panguna nga paagi nga mahimo ini sang mga gulang amo ang pag-ilog sa halimbawa nanday David, Elihu, kag Jesus. (Basaha ang 2 Samuel 9:6; Job 33:1; Lucas 19:5.) Ang kada isa sining mga alagad ni Jehova nagpakita sing sinsero nga interes sa iban paagi sa pagsambit sang ila ngalan. Nahibaluan man ni Pablo nga importante ang pagdumdom kag paggamit sa ngalan sang iya mga masigkatumuluo. Gintapos niya ang isa sa iya mga sulat paagi sa pagtamyaw sa sobra 25 ka kauturan nga nagasambit sa ila mga ngalan, lakip na si Persis, nga isa ka utod nga babayi nga ginpatuhuyan ni Pablo: “Tamyawa ninyo ang aton hinigugma nga si Persis.”—Roma 16:3-15.

⁷ Ang iban nga gulang nabudlayan sa pagdumdom sa mga ngalan. Pero kon panikasugan nila ini, daw pareho lang nga ginasilingan nila ang ila mga masigkatumuluo, ‘Importante ka sa akon.’ (Ex. 33:17) Madugangan sang mga gulang ang kalipay sang mga kauturan kon tawgon sila sa ila ngalan kon magkomento sa Pagtinuon sa Ang Lalantawan ukon sa iban pa nga miting.—Ipaanggid ang Juan 10:3.

 8. Ano ang isa ka importante nga paagi diin ginsunod ni Pablo ang halimbawa ni Jehova kag ni Jesus?

⁸ Ginpakita man ni Pablo ang iya interes sa iban paagi sa paghatag sa ila sing sinsero nga komendasyon, nga isa pa ka panguna nga paagi para madugangan ang kalipay sang mga kauturan. Gani, sa amo man nga sulat nga ginpabutyag niya ang iya handum nga mangabudlay para sa kalipay sang iya mga kauturan, si Pablo nagsulat: “Daku ang pagpabugal ko nahanungod sa inyo.” (2 Cor. 7:4) Ini nga komendasyon mahimo nga nagpahalipay gid sa mga kauturan sa Corinto. Amo man sini ang ginpabutyag ni Pablo sa iban nga kongregasyon. (Roma 1:8; Fil. 1:3-5; 1 Tes. 1:8) Ang matuod, sa tapos niya ginsambit si Persis sa iya sulat para sa kongregasyon sa Roma, nagsiling sia: “Nagpangabudlay sia sing daku sa Ginuo.” (Roma 16:12) Mahimo nga nagpahalipay gid ini sa sining matutom nga utod! Sa paghatag sing komendasyon sa iban, ginsunod ni Pablo ang halimbawa ni Jehova kag ni Jesus.—Basaha ang Marcos 1:9-11; Juan 1:47; Bug. 2:2, 13, 19.

 9. Ngaa ang paghatag kag pagbaton sing komendasyon makadugang sing kalipay sa kongregasyon?

⁹ Nakita man sang mga gulang sa karon nga importante gid nga ihambal sa mga kauturan nga ginaapresyar sila. (Hulu. 3:27; 15:23) Kon himuon ini sang isa ka gulang, daw pareho lang nga ginasilingan niya ang isa ka utod: ‘Natalupangdan ko ang imo ginhimo. Nagaulikid ako sa imo.’ Luyag gid sang mga kauturan nga mabatian ang pagpalig-on sang mga gulang. Ginsambit sang isa ka sister nga mga 55 anyos ang nabatyagan sang kalabanan: “Sa trabaho, talagsa lang ako makabati sing komendasyon. Ang mga tawo wala nagaulikid sa isa kag isa kag nagapaindis-indis. Gani kon ang isa ka gulang maghatag sing komendasyon sa akon nahimo sa kongregasyon, makapaumpaw gid ini kag makapapagsik! Nabatyagan ko nga palangga ako sang akon Amay sa langit.” Amo man sini ang nabatyagan sang isa ka nagasolo nga amay nga may duha ka bata. Sining karon lang, ginhatagan sia sing sinsero nga komendasyon sang isa ka gulang. Ano ang epekto sini sa aton utod? Nagsiling sia: “Ang ginsiling sang gulang nagpabakod gid sa akon!” Huo, paagi sa paghatag sing sinsero nga komendasyon, ginapalig-on sang isa ka gulang ang mga kauturan kag ginadugangan ang ila kalipay. Nagadugang man ini sang ila kabakod nga magpadayon sa paglakat sa dalan padulong sa kabuhi “kag indi pagpunawon.”—Isa. 40:31.

10, 11. (a) Paano mailog sang mga gulang ang halimbawa ni Nehemias? (b) Ano ang makabulig sa isa ka gulang para mapaambit ang espirituwal nga dulot kon nagaduaw sa mga kauturan?

¹⁰ Ano ang isa pa ka importante nga paagi nga mapakita sang mga gulang ang personal nga interes sa mga kauturan kag makadugang sing kalipay sa kongregasyon? Paagi sa paghimo sing inisyatibo nga mabuligan gilayon ang mga nagakinahanglan sing pagpalig-on. (Basaha ang Binuhatan 20:28.) Kon himuon ini sang mga gulang, ginailog nila ang espirituwal nga mga manugbantay sang una. Halimbawa, talupangda kon ano ang ginhimo sang matutom nga manugtatap nga si Nehemias sang nakita niya nga ang pila sa iya Judiyo nga mga kauturan nagluya sa espirituwal. Ginpakita sang rekord nga nagtindog sia gilayon kag ginpalig-on sila. (Neh. 4:14) Sa karon, amo man sini ang gusto himuon sang mga gulang. ‘Nagatindug’ sila, ukon nagahimo sing inisyatibo, para mabuligan ang mga kauturan nga maglig-on ang ila pagtuo. Para mahimo ini, ginaduaw nila ang mga kauturan sa ila balay kon ginatugot sang kahimtangan. Sa sini nga mga pagduaw, luyag nila “mapaambit [sa ila] ang espirituwal nga dulot.” (Roma 1:11) Paano ini mahimo sang mga gulang?

¹¹ Antes sang pagduaw, kinahanglan anay binagbinagon sang gulang ang sitwasyon sang iya duawon. Ano ayhan ang problema sang utod? Ano nga mga punto ang makapabakod sa iya? Ano nga teksto ukon eksperiensia sang isa ka karakter sa Biblia ang maaplikar sa iya kahimtangan? Ang pagbinagbinag anay sini makabulig sa gulang para mangin mapuslanon ang paghambalanay, imbes nga mag-istorya sing mga labaylabay. Sa tion sang pagduaw, ginatugutan sang gulang nga mapabutyag sang utod ang iya balatyagon kag ginapamatian ini sing maayo. (Sant. 1:19) Ang isa ka sister nagsiling: “Makapaumpaw gid kon ang isa ka gulang sinsero nga nagapamati.”—Luc. 8:18.

12. Sin-o sa kongregasyon ang nagakinahanglan sing pagpalig-on, kag ngaa?

¹² Sin-o ang kinahanglan duawon sang mga gulang? Ginlaygayan ni Pablo ang pareho niya nga mga gulang: “Hatagi sang igtalupangod . . . ang bug-os nga panong.” Huo, ang tanan nga miembro sang kongregasyon nagakinahanglan sing pagpalig-on, lakip ang mga manugbantala kag mga payunir nga madugay na nga matutom nga nagatuman sang ila ministeryo. Ngaa kinahanglan nila ang pagpalig-on sang espirituwal nga mga manugbantay? Bangod kon kaisa, ining malig-on sa espirituwal nga mga kauturan nagabatyag man nga daw indi na nila masarangan ang mga problema sa sining malaut nga kalibutan. Para iilustrar kon ngaa bisan ang mabakod nga alagad sang Dios nagakinahanglan kon kaisa sing bulig sang ila kaupdanan, binagbinagon naton ang isa ka hitabo sa kabuhi ni Hari David.

13. (a) San-o ginsalakay ni Isbi-benob si David? (b) Paano ginbuligan ni Abisai si David?

¹³ Wala madugay sa tapos ginhaplas ang pamatan-on nga si David subong hari, nakig-away sia kay Goliat, isa ka higante nga anak sang Refaim. Ginpatay sang maisugon nga si David ang higante. (1 Sam. 17:4, 48-51; 1 Cron. 20:5, 8) Tinuig sang ulihi, samtang nagapakig-away sa mga Filistinhon, nakaatubang liwat si David sang isa pa ka higante—si Isbi-benob, nga anak man sang Refaim. (2 Sam. 21:16) Pero sini nga tion, halos mapatay na sini nga higante si David. Ngaa? Indi bangod nadulaan na si David sing kaisog, kundi bangod ginkapoy sia. Ang rekord nagsiling: “Si David ginlapyo.” Sang natalupangdan ini ni Isbi-benob, “naghunahuna [sia] sa pagpatay kuntani kay David.” Pero antes pa niya masalakay si David, “si Abisai nga anak ni Sarvia nagtabang [kay David], kag naglabo sang Filistinhon kag nagpatay sa iya.” (2 Sam. 21:15-17) Diutayan kuntani mapatay si David! Mahimo nga nagpasalamat gid sia kay ginbantayan sia ni Abisai kag ginbuligan gilayon! Ano nga leksion ang aton matun-an sa sini?

14. (a) Paano naton madaug ang tulad-Goliat nga mga kabudlayan? (b) Paano ang mga gulang makabulig sa iban nga makatigayon liwat sing kusog kag kalipay? Maghatag sing halimbawa.

¹⁴ Subong katawhan ni Jehova sa bilog nga kalibutan, ginatuman naton ang aton ministeryo bisan pa sang mga kabudlayan nga ginabutang ni Satanas kag sang iya mga ahente. Ang pila sa aton nagaatubang sang tulad-Goliat nga mga kabudlayan, pero paagi sa bug-os nga pagsalig kay Jehova, ginaatubang naton ini kag ginadaug. Apang kon kaisa, ang padayon nga pagpakig-away sa mga kabudlayan sini nga kalibutan nagapakapoy kag nagapaluya sa aton. Sa sining maluya nga kahimtangan, madali kita mabiktima kag ‘mapatay’ sang mga kabudlayan kon indi naton ini maatubang sing madinalag-on. Sa sini nga sitwasyon, ang suno sa tion nga pagpalig-on sang isa ka gulang makabulig sa aton nga matigayon liwat ang aton kalipay kag kusog, pareho sang naeksperiensiahan sang madamo. Ang isa ka payunir nga mga 65 anyos nagsiling: “May tion sang una nga indi maayo ang akon pamatyag kag daw ginkapoy ako sa pag-alagad sa latagon. Natalupangdan sang isa ka gulang nga nagapaluya ako gani nagpalapit sia sa akon. Nangin makapalig-on ang amon paghambalanay base sa Biblia. Ginsunod ko ang iya mga suhestyon kag nakabulig ini sa akon.” Nagsiling pa sia: “Mapinalanggaon gid yadto nga gulang kay natalupangdan niya ang akon maluya nga kahimtangan kag ginbuligan niya ako!” Huo, makalilipay gid mahibaluan nga may mga gulang kita nga padayon nga nagabantay sa aton kag, pareho ni Abisai sang una, handa sa ‘pagtabang sa aton.’

15, 16. (a) Ngaa palangga gid si Pablo sang mga kauturan? (b) Ngaa palangga naton ang aton matinatapon nga mga gulang?

¹⁵ Ang isa ka manugbantay nagapangabudlay gid. Kon kaisa, ang mga gulang indi makatulog bangod nagakabalaka sila sa panong sang Dios kag nagapangamuyo tungod sa ila, ukon nagapulaw para buligan ang mga kauturan. (2 Cor. 11:27, 28) Pero kaangay ni Pablo, malipayon gihapon nga ginatuman sing bug-os sang mga gulang ang ila mga responsibilidad. Nagsulat sia sa mga taga-Corinto: “Malipay gid ako nga ihatag ang tanan kag gamiton ako sing bug-os para sa inyo kalag.” (2 Cor. 12:15) Bangod sang iya gugma sa mga kauturan, ginhatag sing bug-os ni Pablo ang iya kaugalingon para palig-unon sila. (Basaha ang 2 Corinto 2:4; Fil. 2:17; 1 Tes. 2:8) Amo nga ginpalangga gid sia sang mga kauturan!—Binu. 20:31-38.

¹⁶ Bilang mga alagad sang Dios subong, palangga man naton ang aton matinatapon nga mga gulang kag ginapasalamatan si Jehova sa pangamuyo sa pag-aman sa ila. Nagadugang ang aton kalipay paagi sa ila personal nga interes sa aton. Napabakod kita sang ila mga pagduaw. Nagapasalamat man kita kay handa sila sa pagbulig sa aton sa tion nga maluya kita bangod sa mga kabudlayan sini nga kalibutan. Huo, ang kaangay sini nga mga gulang matuod gid nga ‘mga masigkamanugpangabudlay para sa aton kalipay.’