Binagbinaga Kon Ano Kamo nga Sahi sang Tawo

 1, 2. ‘Ano dapat kita nga sahi sang mga tawo’ para kahamut-an sang Dios?

NATURAL lang nga mabalaka kita kon ano ang ginahunahuna sang iban sa aton. Pero subong mga Cristiano, dapat mas mabalaka kita kon ano ang pagtamod ni Jehova sa aton. Kay man, sia ang pinakagamhanan nga Persona sa uniberso, kag sia ang “tuburan sang kabuhi.”—Sal. 36:9.

² Para ipadaku kon “ano [kita] nga sahi sang mga tawo” sa pagtamod ni Jehova, ginpalig-on kita ni apostol Pedro nga magpakita sing “balaan nga paggawi kag . . . mga buhat sang diosnon nga debosyon.” (Basaha ang 2 Pedro 3:11.) Para kahamut-an kita sang Dios, ang aton “paggawi” dapat balaan, buot silingon, matinlo sa moral, mental, kag espirituwal. Dugang pa, dapat kita maghimo sang “mga buhat sang diosnon nga debosyon” upod ang tudok nga pagtahod sa Dios kag mainunungon nga kaangtanan sa iya. Gani, para kahamut-an kita sang Dios, indi lang ang aton paggawi ang nadalahig, kundi ang aton man nasulod nga pagkatawo. Bangod si Jehova ang “nagausisa sang tagsa ka tagipusoon,” nahibaluan niya kon bala ang aton paggawi balaan kag kon bala sia lamang ang aton ginasimba.—1 Cron. 29:17, HPV.

 3. Parte sa aton kaangtanan sa Dios, ano nga mga pamangkot ang dapat naton binagbinagon?

³ Indi gusto ni Satanas nga Yawa nga mahamuot sa aton ang Dios. Ginahimo niya ang tanan para maguba ang aton kaangtanan kay Jehova. Ginagamit ni Satanas ang kabutigan kag pagdaya para sulayon kita kag ipahilayo sa Dios nga aton ginasimba. (Juan 8:44; 2 Cor. 11:13-15) Gani, maalamon nga pamangkuton naton ang aton kaugalingon: ‘Paano ginadaya ni Satanas ang mga tawo? Ano ang himuon ko para maamligan ang akon kaangtanan kay Jehova?’

 4. Para gub-on ang aton kaangtanan sa Dios, ano ang ginapuntariya ni Satanas, kag ngaa?

⁴ “Ang kada isa ginatilawan kon ginaganyat sia kag ginahaylo sang iya kaugalingon nga kailigbon,” sulat ni disipulo Santiago. “Nian ang kailigbon, kon nakapanamkon na, nagabun-ag sang sala; ang sala naman, kon nahimo na, nagaresulta sa kamatayon.” (Sant. 1:14, 15) Para gub-on ang aton kaangtanan sa Dios, ginapuntariya ni Satanas ang ginahalinan sang aton mga handum—ang aton tagipusuon.

 5, 6. (a) Paano kita ginapuntariya ni Satanas? (b) Ano nga mga pagsulay ang ginagamit ni Satanas para higkuan ang mga handum sang aton tagipusuon, kag ngaa eksperto sia sa paggamit sini?

⁵ Paano ginapuntariya ni Satanas ang aton tagipusuon? “Ang bug-os nga kalibutan yara sa gahom sang isa nga malauton,” siling sang Biblia. (1 Juan 5:19) Nalakip sa mga ginagamit ni Satanas amo “ang mga butang sa kalibutan.” (Basaha ang 1 Juan 2:15, 16.) Sobra na linibo ka tuig nga ginagamit sang Yawa ang mga butang sa palibot naton. Bangod nagapuyo kita sa sini nga kalibutan, dapat kita magbantay sa iya malalangon nga mga taktika.—Juan 17:15.

⁶ Nagagamit si Satanas sang mga pamaagi para higkuan ang mga handum sang aton tagipusuon. Ginsambit ni apostol Juan ang tatlo ka pagsulay nga ginagamit ni Satanas: (1) “ang kailigbon sang unod,” (2) “ang kailigbon sang mga mata,” kag (3) “ang pagpadayawdayaw sang palangabuhian sang isa.” Gingamit ini ni Satanas para sulayon si Jesus sa kahanayakan. Bangod madugay na niya ini nga mga siod, eksperto na gid si Satanas sa paggamit sini, kag ginabulubag-o niya ang iya pamaagi suno sa mga handum sang isa ka tawo. Antes naton binagbinagon kon ano ang dapat naton himuon para amligan ang aton kaugalingon, hibaluon naton kon paano nagmadinalag-on kay Eva ang pila ka pagsulay nga gingamit sang Yawa, pero napaslawan sa Anak sang Dios.

 7. Paano gingamit ni Satanas “ang kailigbon sang unod” sa pagsulay kay Eva?

⁷ Ang tanan nga tawo nagakinahanglan sing pagkaon para mabuhi. Gindesinyo sang Manunuga ang duta nga magpatubas sing bugana nga pagkaon. Mahimo gamiton ni Satanas ang aton handum sa pagkaon para upangan kita sa paghimo sa kabubut-on sang Dios. Binagbinaga kon paano niya ina ginhimo kay Eva. (Basaha ang Genesis 3:1-6.) Ginsilingan ni Satanas si Eva nga mahimo sia makakaon sang bunga sang “kahoy sang pagkilala sang maayo kag malaut” kag indi mapatay. Nagsiling pa sia nga sa adlaw nga magkaon si Eva, mangin kaangay sia sang Dios. (Gen. 2:9) Ginpakita sang Yawa nga indi kinahanglan ni Eva nga mangin matinumanon sa Dios para mabuhi. Isa gid ini ka kabutigan! Sang ginsulay si Eva, may duha sia ka pililian: Mahimo niya isikway ang ginsiling sang Yawa, ukon mahimo niya tugutan nga magtubo ang iya handum nga magkaon sang bunga. Puede kuntani nga kaunon na lang niya ang bunga sang iban nga kahoy sa hardin, pero nagdesisyon sia nga hunahunaon ang ginsiling ni Satanas parte sa kahoy sa tunga sang hardin, kag ‘nagkuha sia sang bunga sini kag nagkaon.’ Gani ginpatubo sa iya ni Satanas ang paghandum sa butang nga gindumilian sang iya Manunuga.

 8. Paano gintinguhaan ni Satanas nga sulayon si Jesus paagi sa “kailigbon sang unod,” kag ngaa wala ini nagmadinalag-on?

⁸ Amo man sini nga paagi ang gingamit ni Satanas sang ginsulay niya si Jesus sa kahanayakan. Pagkatapos magpuasa si Jesus sing 40 ka adlaw kag 40 ka gab-i, gingamit ni Satanas sa pagsulay kay Jesus ang handum sini nga magkaon. “Kon ikaw anak sang Dios,” siling ni Satanas, “sugua ining bato nga mangin tinapay.” (Luc. 4:1-3) May pililian si Jesus: Mahimo sia magdesisyon kon bala gamiton niya ukon indi ang iya gahom para busgon ang iya handum nga magkaon. Nahibaluan ni Jesus nga indi niya dapat gamiton ang iya gahom para sa makagod nga mga handum. Bisan pa gutom sia, prioridad gihapon niya nga huptan ang iya kaangtanan kay Jehova. “Nasulat na,” sabat ni Jesus, “‘Ang tawo mabuhi, indi sa tinapay lamang, kundi sa tagsa ka pulong nga nagagua sa baba ni Jehova.’”—Mat. 4:4.

 9. Ano ang ginapahangop sang “kailigbon sang mga mata,” kag paano ini gingamit ni Satanas para sulayon si Eva?

⁹ Ginsambit man ni Juan “ang kailigbon sang mga mata” nga isa ka pagsulay. Ginapahangop sini nga mahimo maghandum ang tawo sang isa ka butang paagi sa pagtulok lang sini. Sa bahin ni Eva, gingamit ni Satanas ini nga kailigbon sa pagsulay sa iya paagi sa pagsiling: “Magamuklat ang [imo] mga mata.” Samtang padayon ini nga ginatulok ni Eva, nangin labi pa gid ka makagalanyat sa iya ang gindumilian nga bunga. Nakita ni Eva nga ang bunga “makagalanyat sa mga mata.”

10. Paano gingamit ni Satanas “ang kailigbon sang mga mata” sa pagsulay kay Jesus, kag ano ang ginhimo ni Jesus?

¹⁰ Kamusta naman sa bahin ni Jesus? “Ginpakita [ni Satanas kay Jesus] sing makadali ang tanan nga ginharian sang napuy-an nga duta; kag ang Yawa nagsiling sa iya: ‘Ihatag ko sa imo ini tanan nga awtoridad kag ang ila himaya.’” (Luc. 4:5, 6) Imposible nga makita gilayon ni Jesus ang tanan nga ginharian, pero paagi sa isa ka palanan-awon, naghunahuna si Satanas nga ang himaya sini nga mga ginharian mahimo magganyat kay Jesus. Direkta nga nagsiling si Satanas: “Kon maghimo ka sang isa ka buhat sang pagsimba sa akon, mangin imo ini tanan.” (Luc. 4:7) Wala gid nagpadala si Jesus kay Satanas. Nagsabat sia gilayon: “Nasulat na, ‘Si Jehova nga imo Dios ang dapat mo simbahon, kag sa iya ka lamang dapat maghimo sang sagrado nga pag-alagad.’”—Luc. 4:8.

11. Paano ginsulay ni Satanas si Eva?

¹¹ Sang ginpatuhuyan ni Juan ang mga butang sa kalibutan, ginsambit niya “ang pagpadayawdayaw sang palangabuhian sang isa.” Siempre, sang si Adan kag si Eva pa lang ang tawo sa duta, indi sila ‘makapadayawdayaw sang ila palangabuhian’ sa iban. Pero nangin bugalon sila. Sang ginsulay ni Satanas si Eva, daw ginpagua niya nga may ginadingot ang Dios kay Eva. Ginsilingan sia sang Yawa nga sa adlaw nga magkaon sia sang “kahoy sang pagkilala sang maayo kag malaut,” ‘manginkaangay sia sang Dios, nga nakakilala sang maayo kag malaut.’ (Gen. 2:17; 3:5) Gani ginpahangop ni Satanas nga mahimo mangin independiente si Eva kay Jehova. Mahimo nga ang bugal amo ang rason nga nagpati sia sa kabutigan. Ginkaon ni Eva ang gindumilian nga bunga bangod nagapati sia nga indi sia mapatay. Nagsala gid sia!

12. Ano ang isa ka paagi nga ginsulay ni Satanas si Jesus, kag ano ang ginhimo ni Jesus?

¹² Indi pareho kay Eva, nangin maayo gid nga halimbawa si Jesus sang pagkamapainubuson! Ginsulay sia ni Satanas sa isa ka paagi, pero wala nagpabugal si Jesus kag ginsikway niya bisan ang paghunahuna lang nga ibutang sa pagtilaw ang Dios. Sa baylo, nagsabat si Jesus sing maathag kag direkta: “Nasiling na, ‘Indi mo pag-ibutang sa pagtilaw si Jehova nga imo Dios.’”—Basaha ang Lucas 4:9-12.

13, 14. Ipaathag kon paano ginagamit ni Satanas ang pila ka pagsulay sa karon.

¹³ Sa karon, nagagamit si Satanas sang mga pagsulay nga pareho man sa gingamit niya kay Eva kag kay Jesus. Para ganyaton ang aton “kailigbon sang unod,” ginagamit sang Yawa ang iya kalibutan para pasanyugon ang imoralidad kag pagpatuyang sa pagkaon kag pag-inom. Paagi sa pornograpiya, ilabi na sa Internet, mahimo niya makuha ang atension sang mga wala nagahalong kag gamiton ang “kailigbon sang mga mata” para sulayon sila. Ginagamit man niya ang materyalismo, gahom, kag kabantugan sa pagsulay sa mga bugalon kag may huyog nga ‘magpadayawdayaw sang ila palangabuhian.’

¹⁴ “Ang mga butang sa kalibutan” daw pareho sa paon sang nagapamunit. Makagalanyat ini, pero naangot ini sa taga. Ginagamit ni Satanas ang mga butang nga ginakabig sang mga tawo nga normal kag kinahanglanon kada adlaw para himuon nila ang supak sa mga kasuguan sang Dios. Pero inang malalangon nga mga pagsulay, gindesinyo para impluwensiahan ang aton mga handum kag dagtaan ang aton tagipusuon. Ginapapati kita sini nga ang pagtigayon sang aton mga kinahanglanon kag kasulhayan mas importante sa paghimo sa kabubut-on sang Dios. Mapadala bala kita sa sini nga mga pagsulay?

15. Paano naton mailog si Jesus sa pagsikway sa mga pagsulay ni Satanas?

¹⁵ Bisan pa nagpadala si Eva sa mga pagsulay ni Satanas, nangin madinalag-on si Jesus sa pagsikway sini. Sa tagsa ka pagsulay kay Jesus, nagasabat sia suno sa Kasulatan: “Nasulat na” ukon, “Nasiling na.” Kon maukod naton nga ginatun-an ang Biblia, mangin pamilyar kita sa sini kag madumduman naton ang mga bersikulo nga makabulig sa aton nga makapamensar sing husto kon nagaatubang sang mga pagsulay. (Sal. 1:1, 2) Kon dumdumon naton ang mga halimbawa sa Kasulatan sang mga matutom sa Dios, mabuligan kita nga ilugon sila. (Roma 15:4) Ang aton tudok nga pagtahod kay Jehova, paghigugma sa iya mga ginahigugma kag pagdumot sa iya mga ginadumtan, magaamlig sa aton.—Sal. 97:10.

16, 17. Paano makaapektar ang aton “ikasarang sa pagpangatarungan” sa kon ano kita nga sahi sang tawo?

¹⁶ Ginapalig-on kita ni apostol Pablo nga gamiton ang aton “ikasarang sa pagpangatarungan” para mangin tawo kita nga gindihon sang panghunahuna sang Dios, kag indi sang kalibutan. (Roma 12:1, 2) Ginpadaku ni Pablo nga dapat gid naton kontrolon ang aton ginahunahuna. Nagsiling sia: “Ginapukan namon ang mga pangatarungan kag ang tagsa ka mataas nga butang nga supak sa ihibalo sang Dios; kag ginabihag namon ang tagsa ka panghunahuna agod himuon ini nga matinumanon kay Cristo.” (2 Cor. 10:5) Ang aton panghunahuna may daku gid nga impluwensia kon ano kita nga sahi sang tawo, gani dapat naton ‘padayon nga hunahunaon’ ang makapalig-on nga mga butang.—Fil. 4:8.

¹⁷ Indi kita mangin balaan kon nagahunahuna kita kag nagahandum sang indi nagakaigo. Dapat naton higugmaon si Jehova upod ang “matinlo nga tagipusuon.” (1 Tim. 1:5) Apang ang tagipusuon malimbungon, kag mahimo wala naton narealisar kon daw ano na ka daku ang epekto sa aton sang “mga butang sa kalibutan.” (Jer. 17:9) Gani, dapat ‘padayon naton nga tilawan kon yara kita sa pagtuo, padayon nga pamatud-an kon ano kita’ paagi sa tampad nga pag-usisa sa aton kaugalingon suno sa aton natun-an sa Biblia.—2 Cor. 13:5.

18, 19. Ngaa dapat naton tinguhaan nga mangin sahi sang tawo nga ginakahamut-an ni Jehova?

¹⁸ Ang isa pa ka butang nga makabulig sa aton nga masikway “ang mga butang sa kalibutan” amo ang pagdumdom sang ginsiling ni Juan: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.” (1 Juan 2:17) Ang sistema ni Satanas daw masaligan kag permanente. Pero magaabot ang tion nga malaglag ini. Ang tanan nga ginatanyag sang kalibutan ni Satanas temporaryo lang. Kon dumdumon naton ini, mabuligan kita nga indi magpadala sa mga pagsulay sang Yawa.

¹⁹ Ginapalig-on kita ni apostol Pedro nga dapat kita mangin sahi sang tawo nga ginakahamut-an sang Dios samtang “ginahulat [naton] kag pirme ginadumdom ang presensia sang adlaw ni Jehova, nga paagi sini ang langit nga nagakasunog matunaw kag ang mga elemento matunaw bangod sa sobra nga kainit!” (2 Ped. 3:12) Malapit na gid lang mag-abot ina nga adlaw, kag laglagon ni Jehova ang tanan nga bahin sang kalibutan ni Satanas. Samtang wala pa ina, padayon nga gamiton ni Satanas “ang mga butang sa kalibutan” para sulayon kita, pareho sa ginhimo niya kay Eva kag kay Jesus. Indi kita dapat mangin pareho kay Eva kag paayawan ang aton kaugalingon nga mga handum. Kon himuon naton ina, pareho lang nga si Satanas ang aton dios. Dapat mangin pareho kita kay Jesus kag sikwayon ang mga pagsulay, bisan pa daw ano ini ka makagalanyat. Kabay nga tinguhaan sang kada isa sa aton nga mangin sahi sang tawo nga ginakahamut-an ni Jehova.