Indi Pagkalimti ang Importante nga Hulusayon

1, 2. (a) Ano ang importante nga hulusayon para sa tanan nga katawhan? (b) Ngaa dapat naton hatagan sing importansia ini nga hulusayon?

PARA sa madamo subong, ang kuarta amo ang importante. Nagapanikasog gid sila para magmanggaranon ukon para indi madula ang ila mga ginapanag-iyahan. Ang pamilya, kapagros, ukon kadalag-an amo naman ang ginakabig sang iban nga importante.

² Pero, ang importante gid nga hulusayon para sa aton tanan amo ang pagbindikar sa pagkasoberano ni Jehova. Dapat kita maghalong kay mahimo naton ini malimtan. Paano ina matabo? Mahimo nga mangin masako kita sa adlaw-adlaw nga mga hilikuton kag malipatan na naton ang importansia sang pagbindikar sa pagkasoberano sang Dios. Ukon mahimo nga ang mga pagtilaw amo ang mas kabalak-an naton imbes nga ang importante nga hulusayon. Pero, kon hatagan naton sing importansia ang pagbindikar sa pagkasoberano ni Jehova, mas mahapos atubangon ang mga kabudlayan adlaw-adlaw, kag magasuod pa gid kita kay Jehova.

 3. Ano ang ginkuestyon ni Satanas parte sa paggahom sang Dios?

³ Ginkuestyon ni Satanas nga Yawa ang kinamatarong sang pagkasoberano ni Jehova. Gusto niya papatihon ang mga tawo nga indi maayo nga Manuggahom ang Dios kag ginadingutan ni Jehova ang iya mga tinuga. Suno sa Yawa, mas mangin malipayon ang mga tawo kon sila ang maggahom sa ila kaugalingon. (Gen. 3:1-5) Gusto man paguaon ni Satanas nga wala sing tawo nga matutom gid sa Dios, kay sikwayon kuno sang mga tawo ang paggahom ni Jehova kon ara sila sa kabudlayan. (Job 2:4, 5) Bangod sang pagkuestyon sang Yawa, gintugutan ni Jehova nga makita sang katawhan nga indi gid maayo ang resulta kon sikwayon nila ang paggahom sang Dios.

 4. Ngaa dapat masabat ang hulusayon parte sa pagkasoberano?

⁴ Nahibaluan ni Jehova nga indi matuod ang mga panumbungon sang Yawa. Ti, ngaa ginhatagan sang Dios si Satanas sing tion nga pamatud-an ang iya panumbungon? Ang sabat nagadalahig sa tanan nga tawo kag anghel. (Basaha ang Salmo 83:18.) Ginsikway sang una nga mag-asawa ang paggahom ni Jehova, kag amo man sini ang ginhimo sang madamo sugod sadto. Bangod sini, ang iban mahimo maghunahuna nga husto ang Yawa. Samtang indi maathag sa mga tawo ukon sa mga anghel ang sabat sa sini nga panumbungon, indi madula ang ginamo sang mga pungsod, rasa, tribo, pamilya, kag indibiduwal. Pero kon mabindikar na ang pagkasoberano ni Jehova, ang tanan magapasakop sa iya matarong nga paggahom sing dayon. Magaresulta ini sa paghidait sa bug-os nga uniberso.—Efe. 1:9, 10.

 5. Paano kita nadalahig sa hulusayon parte sa pagkasoberano ni Jehova?

⁵ Mabindikar ang pagkasoberano ni Jehova, pero ang paggahom ni Satanas kag sang mga tawo mapaslawan kag madula. Mangin madinalag-on ang paggahom sang Dios paagi sa iya Mesianikong Ginharian, kag mapamatud-an nga may mga matutom nga nagasakdag sa paggahom sang Dios. (Isa. 45:23, 24) Gusto mo bala malakip sa mga matutom nga nagasakdag sa pagkasoberano ni Jehova? Siempre gusto mo gid! Para mangin matutom kita, indi naton dapat pagkalimtan ang importante nga hulusayon kag pamalandungan naton ang importansia sini.

6. Daw ano ka importante ang pagbindikar sa pagkasoberano ni Jehova?

⁶ Suno sa nasambit na, ang pagbindikar sa pagkasoberano ni Jehova isa ka importante nga hulusayon para sa katawhan. Mas importante ini sangsa aton personal nga kalipay. Buot bala silingon nga indi importante ang aton kaluwasan ukon wala nagaulikid si Jehova sa aton? Indi amo sina ang buot silingon. Ngaa?

 7, 8. Ngaa mabindikar ang pagkasoberano sang Dios kon tumanon niya ang iya mga promisa?

⁷ Ginahigugma gid kag ginapabaloran ni Jehova ang katawhan. Ginhatag pa gani niya ang iya Anak para may paglaum kita nga mabuhi sing wala sing katapusan. (Juan 3:16; 1 Juan 4:9) Kon indi pagtumanon ni Jehova ang iya mga promisa, mangin husto ang Yawa sa pagtawag sa Dios nga butigon, may ginadingot sia sa iya mga tinuga, kag indi maayo ang iya paggahom. Mangin husto man ang pagyaguta sang mga nagapamatok, nga nagsiling: “Diin na ining ginsaad nga presensia niya? Ang amon mga ginikanan nagtulog na sa kamatayon, apang amo man gihapon ang kahimtangan sang tanan nga butang halin sang gintuga ang kalibutan.” (2 Ped. 3:3, 4) Gani, siguraduhon ni Jehova nga ang pagbindikar sa iya pagkasoberano magaresulta sa kaluwasan sang matinumanon nga katawhan! (Basaha ang Isaias 55:10, 11.) Dugang pa, ang pagkasoberano ni Jehova nabase sa gugma. Gani makasigurado kita nga pirme niya higugmaon kag pabaloran ang iya matutom nga mga alagad.—Ex. 34:6.

⁸ Kon hatagan naton sing importansia ang pagkasoberano ni Jehova, wala ini nagapahangop nga indi importante ang aton kaluwasan ukon indi kita importante sa iya. Ginasigurado lang naton nga husto ang aton pagtamod sa importansia sang iya pagkasoberano kag sang aton kaluwasan. Buligan kita sini nga indi malimtan ining importante nga hulusayon kag masakdag sing matutom ang matarong nga paggahom ni Jehova.

9. Ano ang panumbungon ni Satanas parte kay Job? (Tan-awa ang piktyur sa umpisa sini nga artikulo.)

⁹ Ginapaathag sa libro sang Job, nga isa sa pinakauna nga ginsulat nga libro sa Biblia, nga kinahanglan ang husto nga pagtamod. Mabasa naton diri ang panumbungon ni Satanas nga kon paantuson kuno si Job, sikwayon niya ang Dios. Gusto ni Satanas nga ang Dios mismo ang magpaantos kay Job. Wala ini ginhimo ni Jehova, pero gintugutan niya si Satanas nga tilawan si Job, kag nagsiling sia: “Ginatugyan ko sa imo kamot ang tanan nga yara sa iya.” (Basaha ang Job 1:7-12.) Sa malip-ot nga tion, napatay ang mga alagad ni Job, nadula ang iya palangabuhian, kag napatay ang iya napulo ka pinalangga nga anak. Ginhimo ini ni Satanas sa paagi nga daw ang Dios mismo ang naghimo sini kay Job. (Job 1:13-19) Dayon ginpaantos ni Satanas si Job sang balatian nga tuman kasakit kag makasiligni. (Job 2:7) Nadugangan pa gid ang pag-antos ni Job bangod sang makapaluya nga ginsiling sang iya asawa kag sang iya tatlo ka kaupod nga indi gali matuod nga mga abyan.—Job 2:9; 3:11; 16:2.

10. (a) Paano ginpakita ni Job ang iya katutom sa Dios? (b) Ano ang indi husto nga pagtamod ni Job?

¹⁰ Ano ang napamatud-an sang pagtilaw kay Job? Napamatud-an nga sala ang panumbungon ni Satanas. Wala ginsikway ni Job ang Dios. (Job 27:5) Pero, may tion nga indi husto ang pagtamod ni Job. Ginpakamatarong niya ang iya kaugalingon, kag gusto niya nga ipaathag sa iya kon ngaa nagaantos sia. (Job 7:20; 13:24) Mahimo nga nahangpan naton si Job kay grabe ang iya pag-antos. Pero, nakita sang Dios nga kinahanglan tadlungon ang iya pagtamod. Ano ang ginsiling sa iya ni Jehova?

11, 12. Ano ang gusto ni Jehova nga mahangpan ni Job, kag ano ang reaksion ni Job?

¹¹ Mabasa naton sa Job kapitulo 38 asta 41 ang ginsiling sang Dios kay Job. Wala ginpaathag ni Jehova kay Job kon ngaa nagaantos sia, bangod indi obligado ang Dios nga himuon ini. Sa baylo, gusto buligan ni Jehova si Job nga mahangpan kon daw ano lang sia ka kubos kon ikumparar sa Dios. Ginbuligan man niya si Job nga mahangpan nga may mas importante pa nga mga butang nga dapat hatagan sing atension sangsa iya mga problema. (Basaha ang Job 38:18-21.) Nakabulig ini nga matadlong ang pagtamod ni Job.

¹² Nahibaluan ni Jehova ang grabe nga pag-antos ni Job, pero ngaa ginlaygayan niya sia sing prangka? Matigdas bala ang Dios? Indi. Wala man naghunahuna si Job nga matigdas ang Dios. Bisan pa nag-antos si Job, ginpabaloran niya ang laygay sang Dios. Nagsiling pa gani sia: “Ginabawi ko ang akon ginsiling, nagapungko ako sa yab-ok kag abo agod ipakita ang akon paghinulsol.” Resulta ini sang prangka pero makapalig-on nga laygay ni Jehova. (Job 42:1-6) Antes sini, ginlaygayan man si Job sang bataon nga si Elihu. (Job 32:5-10) Ginbaton ni Job ang pagtadlong sang Dios kag ginbag-o niya ang iya pagtamod. Gani, ginpabutyag ni Jehova sa iban nga nahamuot gid sia sa katutom ni Job sang gintilawan sia.—Job 42:7, 8.

13. Paano nakabenepisyo si Job sa laygay ni Jehova bisan pa wala na ang mga pagtilaw sa iya?

¹³ Wala na ang mga pagtilaw kay Job, pero nagabenepisyo gihapon sia sa laygay ni Jehova. Paano? Kay bisan pa kinahanglan ang tion para mabalik kay Job ang mga nadula sa iya, “ginpakamaayo ni Jehova ang ulihi nga bahin sang kabuhi ni Job sing sobra pa sangsa una.” Sang ulihi, “ginhatagan man sia liwat sing pito ka anak nga lalaki kag tatlo ka anak nga babayi.” (Job 42:12-14) Pat-od gid nga nahidlaw si Job sa iya mga anak nga napatay bangod kay Satanas. Mahimo nga nagakadumduman gihapon niya ang iya mga pag-antos. Bisan pa nahangpan niya sang ulihi kon ngaa nag-antos sia, mahimo nga kon kaisa ginahunahuna niya kon ngaa grabe gid ang iya pag-antos. Kon mahunahuna niya ini, mahimo nga ginapamalandungan niya ang laygay sang Dios sa iya. Nakabulig ini para malugpayan sia kag matadlong ang iya pagtamod.—Sal. 94:19, footnote.

14. Ano ang ginatudlo sa aton sang eksperiensia ni Job?

¹⁴ Ang kasaysayan ni Job makabulig sa aton nga malugpayan kag matigayon ang husto nga pagtamod. Ginpasulat ini ni Jehova “sa pagtudlo sa aton. Nagahatag ini sa aton sing paglaum bangod ining Kasulatan nagabulig sa aton sa pagbatas kag nagapabakod sa aton.” (Roma 15:4) Ano ang ginatudlo sini sa aton? Amo ini: Indi kita dapat mabalaka sing sobra sa aton kaugalingon kay basi malimtan naton ang importante nga hulusayon, nga amo ang pagbindikar sa pagkasoberano ni Jehova. Pareho ni Job, masakdag naton ang pagkasoberano ni Jehova kon mangin matutom kita sa iya bisan pa mabudlay ang kahimtangan.

15. Ano ang resulta kon matutom kita bisan may mga pagtilaw?

¹⁵ Ngaa mapalig-on kita kon pamalandungan naton ang aton katutom? Kon may pagtilaw, indi buot silingon nga wala nahamuot sa aton si Jehova. Sa baylo, kahigayunan naton ini nga masakdag ang iya pagkasoberano. (Hulu. 27:11) Ang aton pagbatas nagaresulta sa “kahimtangan nga nahamut-an sang Dios” kag nagapabakod sang aton paglaum. (Basaha ang Roma 5:3-5.) Ang eksperiensia ni Job nagapakita nga “si Jehova mapinalanggaon gid kag maluluy-on.” (Sant. 5:11) Gani kon sakdagon naton ang iya pagkasoberano, padyaan niya kita. Ang paghibalo sini makabulig sa aton nga ‘makabatas sing bug-os nga may pagpailob kag kalipay.’—Col. 1:11.

16. Ngaa dapat naton dumdumon ang importansia sang pagbindikar sa pagkasoberano ni Jehova?

¹⁶ Matuod nga kon may problema kita, daw malimtan naton ang pagbindikar sa pagkasoberano ni Jehova. Bisan ang gamay nga problema mahimo magtublag sa aton kon pirme naton ini pamensaron. Gani, kon mabudlay ang kahimtangan, maayo gid nga dumdumon naton ang importansia sang pagbindikar sa pagkasoberano sang Dios.

17. Paano ang regular nga pagpakigbahin sa hilikuton nga ginapahimo ni Jehova makabulig sa aton nga indi malimtan ang importante nga hulusayon?

¹⁷ Ang regular nga pagpakigbahin sa hilikuton nga ginapahimo ni Jehova makabulig sa aton nga indi malimtan ang importante nga hulusayon. Ginapakita ini sang halimbawa sang isa ka Saksi nga si Renee. Na-stroke sia kag nagaantos sa grabe nga kasakit kag kanser. Samtang ginabulong sia sa ospital, ginapanaksihan niya ang mga nagaobra didto, ang iban nga pasyente, kag ang mga bisita. Sang nagtener sia sa isa ka ospital sing duha ka semana kag tunga, nakabantala sia sing 80 ka oras. Bisan pa lapit na mapatay si Renee, wala niya malimtan ang pagkasoberano ni Jehova. Nakabulig ini nga maghaganhagan ang iya pamatyag.

18. Paano ginpakita sang eksperiensia sang isa ka utod ang benepisyo sang pagsakdag sa pagkasoberano ni Jehova?

¹⁸ Bisan pa ang mga pagtilaw nga aton ginaatubang amo ang gagmay nga mga problema adlaw-adlaw, indi man naton dapat pagkalimtan ang pagkasoberano ni Jehova. Ang isa ka utod nga si Jennifer naghulat sing tatlo ka adlaw sa erport para makapauli kay sunodsunod nga ginkanselar ang iskedyul sang eroplano. Bangod pamatyag niya wala na sing makabulig sa iya kag kapoy na gid sia, puede kuntani nga magpahimunong na lang sia sa higad. Pero, wala niya ini ginhimo. Sa baylo, nangamuyo sia nga buligan sia nga mapaambit ang maayong balita sa iban nga pareho man sa iya ang kahimtangan. Ano ang resulta? Madamo nga tawo ang napanaksihan niya kag nahatagan sing literatura. Nagsiling sia, “Bisan pa mabudlay ang kahimtangan, nabatyagan ko ang pagpakamaayo ni Jehova kag ginhatagan niya ako sing kusog nga madayaw ang iya ngalan.” Huo, wala niya malimtan ang pagbindikar sa pagkasoberano ni Jehova.

19. Ano ang kinatuhayan sang katawhan ni Jehova sa butig nga relihion?

¹⁹ Ang katawhan lang ni Jehova ang nakahangop sa importansia sang iya pagkasoberano. Amo ini ang kinatuhayan nila sa butig nga relihion. Gani, agod mapamatud-an nga bahin kita sang matuod nga pagsimba, dapat pat-uron sang kada isa sa aton nga ginasakdag naton pirme ang pagkasoberano ni Jehova.

20. Ano ang ginabatyag ni Jehova sa imo mga panikasog nga sakdagon ang iya pagkasoberano?

²⁰ Makasalig ka nga ginapabaloran ni Jehova ang imo mga panikasog nga sakdagon ang iya pagkasoberano paagi sa imo matutom nga pag-alagad kag pagbatas sa mga pagtilaw. (Sal. 18:25) Binagbinagon sang masunod nga artikulo ang dugang nga mga rason kon ngaa dapat mo sakdagon sing bug-os tagipusuon ang pagkasoberano ni Jehova kag kon paano mo ini himuon.