Dalayawon nga Paghiusa sa Tion sang Memoryal

1, 2. Ano nga okasyon sa 2018 ang dalayawon gid bangod sang paghiusa, kag ngaa? (Tan-awa ang piktyur sa umpisa sini nga artikulo.)

SA Marso 31, 2018, samtang nagatunod ang adlaw, magatipon ang katawhan sang Dios kag madamo nga interesado para saulugon ang Panihapon sang Ginuo. Samtang nagatiyog ang aton planeta nga Duta, minilyon ang magatipon para dumdumon ang Memoryal sang kamatayon sang Cristo. Kada tuig, ini nga okasyon amo ang pinakadalayawon nga paghiusa sang katawhan sa kalibutan!

² Pat-od nga nalipay gid si Jehova kag si Jesus nga makita nga kada pagligad sang oras, minilyon sa bilog nga kalibutan ang nagatambong sa sining pinasahi nga okasyon. Ang Biblia nagtagna nga isa ka ‘daku nga kadam-an, nga wala sing tawo nga makaisip, nga halin sa tanan nga pungsod kag tribo kag katawhan kag hambal’ ang magasinggit: “Ang kaluwasan utang namon sa amon Dios, nga nagapungko sa trono, kag sa Kordero.” (Bug. 7:9, 10) Paagi sa pagsaulog sang Memoryal kada tuig, ginapadunggan si Jehova kag si Jesus!

 3. Ano nga mga pamangkot ang sabton sa sini nga artikulo?

³ May pila ka pamangkot nga sabton sa sini nga artikulo. (1) Paano ang kada isa sa aton makahanda para sa Memoryal kag makabenepisyo sa pagtambong sa sini? (2) Paano nagabulig ang Memoryal sa paghiusa sang katawhan sang Dios? (3) Paano kita makabulig sa aton paghiusa? (4) Maabot bala ang tion nga indi na pagsaulugon ang Memoryal? Kon huo, san-o?

 4. Ngaa importante gid nga tambungan naton ang Memoryal?

⁴ Pamalandungi ang importansia sang pagtambong sa Memoryal. Dumduma nga ang mga miting sang kongregasyon bahin sang aton pagsimba. Pat-od gid nga ginatalupangod ni Jehova kag ni Jesus ang mga nagapanikasog para makatambong sa sining pinakaimportante nga miting kada tuig. Gusto naton nga makita nila nga ara gid kita sa Memoryal luwas lang kon indi gid kita makatambong bangod sang aton sitwasyon. Kon ginapakita naton sa buhat nga importante sa aton ang mga miting, ginahatagan naton si Jehova sing dugang nga rason para indi niya pagpanason ang aton ngalan sa iya “libro nga nagaunod sang mga ngalan nga [iya] ginadumdom.” Ginatawag man ini nga “libro sang kabuhi,” nga may mga ngalan sang may paglaum nga mabuhi sing wala sing katapusan.—Mal. 3:16; Bug. 20:15.

 5. Mga pila ka adlaw antes sang Memoryal, paano naton ‘mausisa kon bala malig-on ang aton pagtuo’?

⁵ Mga pila ka adlaw antes sang Memoryal, magpain kita sang tion para magpangamuyo kag usisaon sing maayo ang aton kaangtanan kay Jehova. (Basaha ang 2 Corinto 13:5.) Paano naton himuon ini? Paagi sa ‘pag-usisa kon bala malig-on ang aton pagtuo.’ Pamangkuton naton ang aton kaugalingon: ‘Nagapati gid bala ako nga bahin ako sang organisasyon nga ginpili ni Jehova para himuon ang iya kabubut-on? Ginahimo ko gid bala ang akon bug-os nga masarangan para ibantala kag itudlo ang maayong balita sang Ginharian? Makita bala sa akon mga ginahimo nga nagapati gid ako nga katapusan na ini nga mga adlaw kag malapit na tapuson ang paggahom ni Satanas? Nagasalig bala ako gihapon kay Jehova kag kay Jesus pareho sang pagsalig ko sa ila sang nagdedikar ako kay Jehova nga Dios?’ (Mat. 24:14; 2 Tim. 3:1; Heb. 3:14) Ang pagpamalandong sa mga sabat sa sini nga mga pamangkot makabulig sa aton nga pamatud-an ang aton pagtuo.

 6. (a) Ano lang ang paagi para matigayon naton ang kabuhi nga wala sing katapusan? (b) Paano ginahandaan sang isa ka gulang ang Memoryal kada tuig, kag paano mo ini mailog?

⁶ Basaha kag pamalandungi ang mga artikulo parte sa importansia sang Memoryal. (Basaha ang Juan 3:16; 17:3.) Matigayon lang naton ang kabuhi nga wala sing katapusan kon ‘kilalahon’ naton si Jehova kag ‘magtuo’ kita sa iya bugtong nga Anak, si Jesus. Para mahandaan ang Memoryal, mahimo ka magpili sang mga tulun-an nga makabulig sa imo nga magsuod pa gid kay Jehova kag kay Jesus. Binagbinaga ang ginahimo sang isa ka madugay na nga gulang. Sa sulod sang madamo nga tinuig, nakakolekta sia sing mga artikulo sa Lalantawan nga nagabinagbinag sang Memoryal kag sang gugma ni Jehova kag ni Jesus sa aton. Mga pila ka semana antes sang Memoryal, ginabasa niya liwat ini nga mga artikulo kag ginapamalandungan niya ang importansia sini nga okasyon. Kon kaisa, ginadugangan niya sing isa ukon duha ka artikulo ang iya koleksion. Paagi sa pagbasa liwat sini nga mga artikulo, kag pagbasa kag pagpamalandong sa mga teksto nga nakaiskedyul sa tion sang Memoryal, natalupangdan sini nga gulang nga may matun-an sia nga bag-o kada tuig. Labaw sa tanan, nabatyagan niya nga ang iya gugma kay Jehova kag kay Jesus nagabakod. Kon himuon mo man ini, magabakod man ang imo gugma kay Jehova kag kay Jesus. Madugangan man ang imo apresasyon sa ila, gani makabenepisyo ka pa gid sa Memoryal.

 7. (a) Ano ang ginpangamuyo ni Jesus sang gab-i nga ginhiwat ang una nga Panihapon sang Ginuo? (b) Ano ang pamatuod nga ginsabat ni Jehova ang pangamuyo ni Jesus?

⁷ Sang gab-i nga ginhiwat ang una nga Panihapon sang Ginuo, nangamuyo si Jesus sa paghiusa sang iya mga sumulunod pareho sang paghiusa niya kag sang iya Amay. (Basaha ang Juan 17:20, 21.) Ginsabat gid ni Jehova ang pangamuyo sang iya pinalangga nga Anak, kag minilyon subong ang nagapati nga ginpadala ni Jehova ang iya Anak. Ginapamatud-an sang pagtililipon sang katawhan sang Dios ang paghiusa sang mga Saksi ni Jehova, kag makita gid ini sa tion sang Memoryal. Ang mga katawhan sa madamo nga pungsod kag sarisari sing kolor nagatingob sa mga tilipunan sa bilog nga kalibutan. Sa pila ka lugar, ang pagtililipon sang mga sarisari sing rasa para magsimba daw indi mapatihan ukon ginapakalain. Pero nalipay gid si Jehova kag si Jesus sa sini nga paghiusa!

 8. Ano ang mensahe ni Jehova kay Ezequiel parte sa paghiusa?

⁸ Bilang mga katawhan ni Jehova, wala kita natingala sa aton paghiusa. Ang matuod, gintagna ini ni Jehova. Binagbinaga ang mensahe niya kay manalagna Ezequiel parte sa pagtingob sang duha ka lipak, ang lipak “para kay Juda” kag ang lipak “para kay Jose.” (Basaha ang Ezequiel 37:15-17.) Ang “Mga Pamangkot Gikan sa mga Bumalasa” sa Hulyo 2016 nga Ang Lalantawan nagpaathag: “Ginhatagan ni Jehova si Ezequiel sing mensahe nga nagahatag sang paglaum nga mahiusa ang pungsod sang Israel sa tapos nga makabalik sila sa Ginsaad nga Duta. Gintagna man sa sini nga mensahe ang paghiusa sang katawhan sang Dios sa katapusan nga mga adlaw.”

 9. Kada tuig sa tion sang Memoryal, paano nagakatuman ang tagna ni Ezequiel?

⁹ Sugod sang 1919, amat-amat nga gin-organisar kag gintingob liwat ni Jehova ang mga hinaplas, nga ginalaragway sang lipak “para kay Juda.” Pagkatapos sini, madamo nga may paglaum nga mabuhi sing dayon sa duta, nga ginalaragway sang lipak “para kay Jose,” ang nag-upod sa hinaplas. Ining duha ka grupo nangin “isa ka panong.” (Juan 10:16; Zac. 8:23) Nagpromisa si Jehova nga tingbon niya ining duha ka lipak kag himuon niya nga isa ka lipak sa iya kamot. (Ezeq. 37:19) Subong, ining duha ka grupo nahiusa nga nagaalagad kay Jehova. May isa sila ka Hari, si Jesucristo, nga gintawag sa tagna ni Ezequiel nga ‘si David nga alagad sang Dios.’ (Ezeq. 37:24, 25) Kada tuig, ang dalayawon nga paghiusa nga ginlaragway sa Ezequiel maathag nga makita samtang nagatingob ang mga hinaplas nga nabilin kag ang “iban nga mga karnero” para saulugon ang Memoryal sang kamatayon sang Cristo! Pero, ano ang mahimo sang kada isa sa aton para mapalig-on ang aton paghiusa?

10. Paano naton mapalig-on ang paghiusa sang katawhan sang Dios?

¹⁰ Ang isa ka paagi para mapalig-on naton ang paghiusa sang katawhan sang Dios amo ang pagpalambo sang pagkamapainubuson. Sang ari si Jesus sa duta, ginlaygayan niya ang iya mga disipulo nga magpaubos. (Mat. 23:12) Kon mapainubuson kita, indi kita maimpluwensiahan sang espiritu sang kalibutan nga pagkamatinaastaason. Ang pagpaubos magabulig sa aton nga magpasakop sa mga nagapanguna, kag ini nga pagkamatinumanon importante sa paghiusa sang kongregasyon. Labaw sa tanan, kon mapainubuson kita, mahamuot sa aton ang Dios, kay “ginapamatukan [niya] ang mga matinaastaason, apang nagahatag sia sang wala tupong nga kaayo sa mga mapainubuson.”—1 Ped. 5:5.

11. Paano ang pagpamalandong sa kahulugan sang tinapay kag alak nga ginagamit sa Memoryal makabulig sa aton paghiusa?

¹¹ Ang ikaduha nga paagi para mapalig-on ang aton paghiusa amo ang pagpamalandong sa kahulugan sang tinapay kag alak nga ginagamit sa Memoryal. Antes sining pinasahi nga okasyon kag sa gab-i mismo sang Memoryal, pamalandungi sing maayo ang importansia sang tinapay nga wala sing lebadura kag sang pula nga alak. (1 Cor. 11:23-25) Ang tinapay nagalaragway sa ginhalad nga perpekto nga lawas ni Jesus, kag ang alak nagalaragway sa iya dugo. Pero, indi lang ang parte sa kahulugan sang tinapay kag alak ang dapat nga nahibaluan naton. Dumduma nga ginapakita sang halad-gawad sang Cristo ang duha ka pinakadaku nga ekspresyon sang gugma, ang gugma ni Jehova paagi sa paghatag sang iya Anak para sa aton, kag ang gugma ni Jesus nga kinabubut-on nga naghatag sang iya kabuhi para sa aton. Kon pamalandungan naton ang ila gugma, mapahulag kita nga higugmaon man sila. Ang gugma sang kada isa sa aton para kay Jehova daw pareho sa higot nga nagatingob sa aton kag nagapabakod sang aton paghiusa.

12. Sa ilustrasyon ni Jesus parte sa hari nga nagsukot sang mga utang sang iya mga ulipon, paano gintudlo ni Jesus nga gusto ni Jehova nga patawaron naton ang iban?

¹² Ang ikatlo nga paagi para mapalig-on ang aton paghiusa amo ang kahanda sa pagpatawad. Kon ginapatawad naton ang mga nakasala sa aton, ginapakita naton nga ginapasalamatan naton ang pagpatawad sa aton mga sala nga nangin posible paagi sa halad-gawad sang Cristo. Binagbinaga ang ilustrasyon ni Jesus nga narekord sa Mateo 18:23-34. Pamangkuta ang imo kaugalingon: ‘Ginaaplikar ko bala ang gintudlo ni Jesus? Mapinasensiahon bala ako kag mahinangpanon sa akon mga kauturan? Handa bala ako magpatawad sa mga nakasala sa akon?’ Matuod, may mga sala nga mas serioso sangsa iban, kag may mga sala nga nabudlayan kita nga mga indi himpit magpatawad. Pero, ini nga ilustrasyon ni Jesus nagatudlo sa aton kon ano ang gusto ni Jehova nga himuon naton. (Basaha ang Mateo 18:35.) Maathag nga gintudlo ni Jesus nga indi kita pagpatawaron ni Jehova kon indi naton pagpatawaron ang aton mga kauturan kon may rason man para himuon ini. Dapat gid naton ini dumdumon! Para indi maguba ang aton paghiusa kag mapalig-on ini, dapat naton patawaron ang iban kay amo ini ang gintudlo ni Jesus.

13. Kon ginapanikasugan naton ang paghidait, paano ini nagabulig sa aton paghiusa?

¹³ Kon ginapatawad naton ang iban, ginapakita naton nga gusto naton ang paghidait. Naglaygay si apostol Pablo nga dapat kita ‘magpakighidait sa isa kag isa, kag magtinguha nga tipigan ang paghiusa nga nabaton naton paagi sa balaan nga espiritu.’ (Efe. 4:3) Sa sining tion sang Memoryal kag sa gab-i mismo sang Memoryal, hunahunaa sing maayo kon paano mo ginatratar ang iban. Pamangkuta ang imo kaugalingon: ‘Makita bala sa akon kabuhi nga wala ako nagahinakit? Kilala bala ako nga nagapanikasog gid para mapalig-on ang paghidait kag paghiusa?’ Serioso ini nga mga pamangkot nga dapat pamalandungan.

14. Paano naton mapakita nga ‘ginabatas naton ang isa kag isa sa gugma’?

¹⁴ Ang ikap-at nga paagi para mapalig-on ang aton paghiusa amo ang pagpakita sang gugma bilang pag-ilog kay Jehova, ang Dios sang gugma. (1 Juan 4:8) Indi gid naton gusto nga makahambal kita parte sa aton mga kauturan sing pareho sini, “Palangga ko sila pero wala ako nanamian sa ila”! Kon amo sini ang aton ginahunahuna, wala naton ginasunod ang laygay ni Pablo nga ‘magbatas sa isa kag isa sa gugma.’ (Efe. 4:2) Talupangda nga indi lang ‘pagbatas sa isa kag isa’ ang ginsiling niya, kundi nagdugang pa sia nga himuon naton ini “sa gugma.” May kinatuhayan ini. Sa aton mga kongregasyon, sarisari nga mga tawo ang ginbuyok ni Jehova. (Juan 6:44) Ginbuyok sila ni Jehova bangod takus sila sang iya gugma. Kon ginahigugma sila ni Jehova, may rason bala kita para indi sila paghigugmaon? Indi naton dapat pagpunggan ang gugma nga ginsugo ni Jehova nga dapat naton ipakita!—1 Juan 4:20, 21.

15. Paano naton nahibaluan nga maabot ang tion nga saulugon naton ang katapusan nga Memoryal?

¹⁵ Maabot ang tion nga saulugon naton ang katapusan nga Memoryal. Paano naton nahibaluan ini? Sa una nga sulat ni Pablo sa mga taga-Corinto, nagsiling sia sa hinaplas nga mga Cristiano nga paagi sa pagdumdom sa kamatayon ni Jesus kada tuig, “padayon [nila] nga ginapahayag ang kamatayon sang Ginuo, tubtob sa iya pag-abot.” (1 Cor. 11:26) Ang tinaga diri nga “pag-abot” amo man ang ginapatuhuyan sang ‘pagkari’ nga ginsambit ni Jesus sa iya tagna parte sa katapusan. Amo ini ang ginsiling ni Jesus parte sa nagahilapit nga dakung kapipit-an: “Makita sa langit ang tanda sang Anak sang tawo, kag ang tanan nga tribo sa duta magapukpok sang ila dughan sa kalisod, kag makita nila ang Anak sang tawo nga nagakari sa mga panganod sang langit nga may gahom kag daku nga himaya. Kag ipadala [ni Jesus] ang iya mga anghel upod ang mabaskog nga tunog sang trumpeta, kag tipunon nila ang iya mga pinili halin sa apat ka direksion, halin sa isa ka punta sang langit tubtob sa pihak.” (Mat. 24:29-31) Ang ‘pagtipon sa mga pinili’ nagapatuhoy sa tion nga ang tanan nga hinaplas nga Cristiano nga ari pa sa duta magabaton na sang ila padya sa langit. Matabo ini pagkatapos magsugod ang dakung kapipit-an pero antes ang inaway sang Armageddon. Sa sini nga inaway, si Jesus kag ang tanan nga 144,000 magadaug batok sa mga hari sang duta. (Bug. 17:12-14) Ang Memoryal nga pagasaulugon naton antes ‘mag-abot’ si Jesus sa pagtipon sang mga hinaplas sa langit amo ang katapusan nga Memoryal.

16. Ngaa determinado ka nga tambungan ang Memoryal sini nga tuig?

¹⁶ Kabay pa nga mangin determinado kita nga tambungan ang Memoryal sa Marso 31, 2018. Kag pangabayon naton si Jehova nga buligan kita nga himuon ang aton bahin para mapalig-on ang paghiusa sang iya katawhan! (Basaha ang Salmo 133:1.) Dumduma, maabot ang tion nga saulugon naton ang katapusan nga Memoryal. Gani samtang ginasaulog pa naton ini, himuon naton ang tanan para makatambong, kag pabaloran naton ang aton dalayawon nga paghiusa sa tion sang Memoryal.