Mga Pamatan-on​—⁠Ano ang Inyo Espirituwal nga mga Tulumuron?

¹ Nakahibalo si Jehova kon daw ano ka importante ang mapuslanon nga buluhaton kag ang mahimo matigayon nga mga tulumuron sa paghatag sing kalipay. (Tan-awa ang Genesis 1:​28; 2:​15, 19.) Karon, ginhatagan ni Jehova ang iya katawhan sing hilikuton nga magbantala kag magtudlo. Tulumuron man naton nga maagom ang kabuhi nga walay katapusan sa Paraiso. Samtang, dapat kita magtalana sing progresibo nga espirituwal nga mga tulumuron agod indi naton mapatuhoy sa tuhay nga direksion ang aton mga kusog kag mga pagkabutang.​—⁠1 Cor. 9:⁠26.

² Realistiko nga mga Tulumuron Para sa mga Pamatan-on: Ang mga pamatan-on dapat nga may teokratikong mga tulumuron nga sarang nila malab-ot suno sa ila indibiduwal nga mga ikasarang. (1 Tim. 4:15) Natigayon sang iban nga bata pa kaayo ang tulumuron nga masaulo ang mga libro sa Biblia bisan antes pa sila makatuon sa pagbasa. Paagi sa pagtuon sang pamilya, ang kabataan nakatuon sa paghanda para sa mga miting agod malab-ot nila ang tulumuron nga makahatag sing maayo nga mga komento kag makapalista sa Teokratikong Eskwelahan sa Pagministro. Samtang nagaupod ang kabataan sa ila mga ginikanan sa pag-alagad sa latagon, natun-an nila ang makigbahin sa pagpanaksi kag nag-uswag padulong sa tulumuron nga mangin di-bawtismado nga mga manugbantala. Dapat ipatudok sang mga ginikanan sa ila lamharon nga kabataan ang tulumuron nga makadedikar kag makapabawtismo.

³ Kon ikaw isa ka tin-edyer, ano ang nalakip sa imo espirituwal nga mga tulumuron? “Dumduma, karon, ang Imo Dakung Manunuga” paagi sa pagkonsentrar sa importante gid nga mga tulumuron sa kabuhi. (Manugw. 12:​1; Sal. 71:17) Ngaa indi mag-auxiliary payunir sa tion sang bakasyon sa eskwelahan ukon sa iban nga mga tion? Nahunahuna mo na bala ang magsulod sa bug-os tion nga ministeryo subong isa ka regular payunir? Ngaa indi magtuon sing bag-ong hambal agod sa ulihi mabuligan mo ang mga indibiduwal ukon mga kongregasyon nga nagagamit sina nga hambal? Madamo sang nagaalagad karon sa Bethel ukon subong nagalakbay nga mga manugtatap ukon mga misyonero ang naghimo sang bug-os tion sang espesyal nga pag-alagad subong ila tulumuron samtang nagaeskwela pa sila. Ngaa indi mo man ini himuon?

⁴ Samtang bata pa, panikasugi nga ilugon ang halimbawa ni Jesus. Bisan sa lamharon nga edad nga 12, naghambal sia sing hilway tuhoy sa espirituwal nga mga butang. (Luc. 2:​42-49, 52) Ang imo pagtalana sing mapuslanon nga mga tulumuron para sa pagtuon sing personal, sa pagbasa sang Biblia adlaw-adlaw, kag sa pagpakig-upod sing tayuyon sa hamtong nga mga Cristiano sa mga miting kag sa pag-alagad magabulig sa imo nga matigayon ang kalantip sa pagtudlo sa iban tuhoy sa Ginharian sang Dios kaangay sa ginhimo ni Jesus.