Palambua ang Inyo mga Ikasarang sa Paghantop

¹ Ang makapasubo nga katapusan nga mga adlaw, diin nagakabuhi kita karon, naghatag sing dugang nga pag-ipit kag madamo nga sahi sang mabug-at nga mga pagtilaw sa katawhan sang Dios bisan diin. (2 Tim. 3:1-5) Kita tanan nagakinahanglan sing pagpalig-on agod makatindog sing malig-on sa pagtuo. (1 Cor. 16:13) Mahimo naton ini sa bulig ni Jehova samtang padayon kita nga nagakaon sing regular sa iya Pulong, nagasalig sa iya espiritu, kag nagapabilin nga suod sa iya organisasyon.—Sal. 37:28; Roma 8:​38, 39; Bug. 2:​10.

² Nagakaigo gid nga ang tema nga “Mangin Hamtong sa mga Ikasarang sa Paghangop” ginbinagbinag sa programa sang pinasahi nga adlaw nga asambleya sang nagligad nga tuig. Pasad ini sa 1 Corinto 14:20, diin mabasa naton ang mga pulong ni apostol Pablo: “Mga kauturan, indi kamo mangin bata sa mga ikasarang sa paghangop, kundi mangin mga lapsag kamo sa kalainan; apang magpakahamtong kamo sa mga ikasarang sa paghangop.” Ano ang masiling ninyo sa programa?

³ “Daw ano ka makapalig-on!” “Amo gid ini ang kinahanglan naton!” Duha lamang ini sa mga reaksion. Bisan ang isa ka di-Saksi nga nagtambong sa pinasahi nga adlaw nga asambleya agod makita ang pagpabawtismo sang iya 12-anyos nga anak nga babayi nagsiling nga nagdayaw gid sia sa programa kag nakita niya kon daw ano gid ini ka mapuslanon sa iya pamilya. Amo bala sina ang imo ginbatyag? Hinumdumon naton ang pila sa talalupangdon nga mga punto sang programa.

⁴ Kinahanglan ang Sibu nga Ihibalo Agod Mapalambo ang mga Ikasarang sa Paghantop: Sa una nga pamulongpulong, “Palambua Karon ang Inyo mga Ikasarang sa Paghangop,” ano ang ginpadaku sang humalambal nga kinahanglanon agod maatubang ang mga hangkat karon? Indi lamang ang ikasarang sa pagpainuino. Dapat naton palambuon kag padalumon ang aton mga ikasarang sa paghangop sa Biblia, agod indi kita madaug sang tanan nga kalainan nga sa sini nadayag kita. Ini nga paghangop nagakinahanglan sing panuytoy sang Dios. Kaangay sa salmista, dapat kita mapangamuyuon nga mangabay kay Jehova nga mahangpan naton ang iya mga kasuguan kag mga pahanumdom agod maalagad naton sia sing bug-os tagipusuon.—Sal. 119:1, 2, 34.

⁵ Sa masunod nga bahin, ginpakita sang manugtatap sa sirkito nga si Jehova, paagi sa iya Pulong kag organisasyon, nagaaman sa aton sing “Mga Bulig Agod Mangin Hamtong sa Paghangop sa Biblia.” Ang paghangop nagakahulugan sing “ikasarang sa pagtan-aw sa isa ka butang kag sa paghantop sa kaundan sini paagi sa pagsayasat sa kaangtanan sa ulot sang mga bahin sini kag sang kabug-usan, sa amo nahangpan ang kahulugan sini.” Sin-o ang makabulig sa aton sa pagpalambo sining kinaiya? Si Jehova nag-aman sing mga dulot nga mga tawo agod buligan kita nga mag-uswag sa espirituwal. (Efe. 4:11, 12) Ang iya dutan-on nga organisasyon nagapalig-on sa aton nga basahon ang Pulong sang Dios kada adlaw kag tambungan sing regular ang tanan nga miting sang kongregasyon. (Sal. 1:2) Ginatudluan kita kon paano gamiton ang Biblia kag ang aton Cristianong mga publikasyon sa personal kag pamilya nga pagtuon subong man sa paghanda para sa mga miting kag sa pag-alagad sa latagon. Ginahimuslan mo bala ining tanan nga kahimusan? Ginahuptan mo bala ang isa ka programa sang regular kag personal nga pagbasa sa Biblia? Kinahanglanon ini agod maamligan kita nga indi mabiktima sang kalibutanon nga mga huyog, mga uso, mga pilosopiya, kag malimbungon nga mga impluwensia.—Col. 2:6-8.

⁶ Ang Aton mga Ikasarang sa Paghantop Dapat Hanason: Sa iya nahauna nga pamulongpulong, nga natig-uluhan “Amligi ang Espirituwalidad Paagi sa Paghanas Sang Inyo mga Ikasarang sa Paghantop,” ginpaathag sang dinapit nga humalambal nga ang mga tawo sa kalibutan wala makakilala sang husto kag sayop. (Isa. 5:20, 21) Ini bangod wala nila ginakilala kag ginasunod ang matarong nga mga talaksan sang Dios. Sa kinatuhayan, kita nga nakabaton sing espirituwal nga paghanas sa organisasyon ni Jehova nagakilala sang mga talaksan sang Dios, nga amo ang nagatuytoy sa aton mga hilikuton kag paggawi. Sa amo, mapamatud-an naton sa aton kaugalingon kon ano ang maayo kag kalahamut-an sa mga mata ni Jehova kag kon ano ang nahisanto sa iya himpit nga kabubut-on.—Roma 12:2.

⁷ Agod malikawan ang makalilibog nga panghunahuna sang kalibutan kag ang malain nga bunga sini, dapat naton pirme hanason ang aton mga ikasarang sa paghantop. Paano ini mahimo? Subong narekord sa Hebreo 5:12-14, ginpadaku ni apostol Pablo ang kinahanglanon nga indi lamang “gatas” sang pulong ang kaunon. Kinahanglan naton ang matig-a nga espirituwal nga pagkaon, kaangay sa ginabaton naton sa pagtuon sa tagna ni Isaias sa Pagtinuon Sang Kongregasyon sa Libro. Nian dapat handa kita nga iaplikar sa aton kabuhi ang aton natun-an. Kon ginahimo naton ini, kumbinsido kita nga husto ang mga prinsipio kag mga talaksan ni Jehova. Nagahanas ini sang aton mga ikasarang sa paghantop agod makilala sing maathag ang husto kag sayop.

⁸ Sing makapasubo, ang iban nagluya sa espirituwal. Ngaa? Wala nila gintuon ang ila igtalupangod sa kon ano ang maayo kag matadlong sa mga mata ni Jehova. Subong resulta, nangin biktima sila sang mga talk show sa radyo kag telebisyon nga may mga kaundan nga supak sa Kasulatan, sang malaw-ay nga musika, ukon sang malain nga mga impluwensia sang mga chat room sa kompyuter. Paagi sa pagpanghikot sing maalamon, malikawan naton nga maimpluwensiahan sang imoral, buang-buang, ukon malauton nga mga tawo.—Hulu. 13:20; Gal. 5:7; 1 Tim. 6:​20, 21.

⁹ Ang mga Pamatan-on Dapat ‘Mangin mga Lapsag sa Kalainan’: Ang programa may duha ka bahin nga nagapalig-on ilabi na sa mga pamatan-on nga palambuon ang ila mga ikasarang sa paghantop. Ginpakita sang mga humalambal nga ang mangin ‘mga lapsag sa kalainan’ nagakahulugan sing pagpabilin nga wala sing eksperiensia, kon sayuron, inosente subong sa mga lapsag, may kaangtanan sa mga butang nga di-matinlo sa itululok ni Jehova. (1 Cor. 14:20) Kita tanan ginpalig-on nga bantayan sing maayo kon paano naton ginagamit ang aton tion agod indi madayag sa tanan nga sahi sang kalainan kag indi maimpluwensiahan sini. (Efe. 5:15-17) Ginpalig-on kita nga banabanaon kon daw ano ka damo nga tion ang ginahinguyang naton sa pagbasa sa materyal nga wala gid nagabulig sa pagpauswag sang aton paghangop sa espirituwal nga mga butang. Ginhimo mo bala ina? Ano ang ginapakita sang mga resulta? Magluwas sa pagbasa sa Biblia adlaw-adlaw, mangin determinado nga makigdungan sa pagbasa sa materyal nga ginaaman sang organisasyon. Ang paghimo sini magabulig sa aton tanan, pati na sa mga pamatan-on, nga ‘makakuha sing paghangop.’—Hulu. 4:7-9.

¹⁰ “Magbenepisyo Gikan sa Pag-aplikar sa mga Prinsipio sang Biblia nga May Paghangop”: Amo ini ang tema sang katapusan nga pamulongpulong sa programa sang pinasahi nga adlaw nga asambleya. Ginpaathag sang dinapit nga humalambal nga si Jehova amo ang Tuburan sang nagahatag-kabuhi nga paghangop, nga labaw gid sa iya sang tanan nga katawhan. Handurawa lamang ang kahigayunan nga makakuha sing paghangop ni Jehova! Maalwan nga ginahatag niya ini sa mga sinsero nga nagapangita sini kag nagapangabay sini nga may pagtuo. (Hulu. 2:​3-5, 9; 28:5) Ginahimuslan mo bala sing bug-os ang iya ginatanyag?

¹¹ Ginpalig-on kita nga tun-an nga mahangpan ang mga prinsipio samtang ginabasa naton ang Biblia. (2 Tim. 3:16, 17) Tun-i ini sing maayo agod mahangpan sing sibu kon ano ang ginasiling ni Jehova. Maghinguyang sing tion nga pamalandungan ining mga prinsipio kag hupti ini sa imo hunahuna kag tagipusuon. Magahanas ini sang imo mga ikasarang sa paghantop agod mangin madinalag-on ka kon nagahimo sing mga desisyon sa kabuhi. (Jos. 1:8) Binagbinagon naton ang pila ka kahimtangan nga ginaatubang sang madamo kag tan-awon kon paano ang pag-aplikar sa mga prinsipio sang Biblia makabulig sa aton nga magmadinalag-on.

¹² ‘Sundon ko bala ang isa ka sahi sang pamayo kag pamustura?’ Ang mga uso sang kalibutan sa pamayo kag pamustura masunson nagapabanaag sang espiritu sang pagrebelde. Ini nga espiritu nagaimpluwensia sa mga tawo sa pagpanapot sing indi pormal kag indi mahipid ukon sa pagpabugal sang ila matahom nga lawas. Anong nagakaigo nga mga prinsipio sa Biblia ang makabulig sa aton nga pamatukan ining mga huyog? Bangod nahanas ang aton mga ikasarang sa paghantop, binagbinagon naton ang prinsipio nga masapwan sa 1 Timoteo 2:9, 10, nga magpanapot “nga may kaugdang kag kaligdong . . . , sa paagi nga nagakaigo [sa mga tawo] nga nagapangangkon nga nagatahod sa Dios.” Ang iban pa nga mga prinsipio nga naaplikar nagalakip sang mga ginsambit sa 2 Corinto 6:3 kag Colosas 3:18, 20.

¹³ ‘Ano ang mahimo ko agod huptan nga mabakod ang kaangtanan sang akon pamilya?’ Ang maayo nga komunikasyon sa tunga sang mga katapo sang pamilya importante. Ang Santiago 1:19 nagasugid sa aton: “Ang tagsa ka tawo dapat magmadagmit sa pagpamati, magmahinay sa paghambal, magmakuli sa pagpangakig.” Ang mga katapo sang pamilya dapat magpamati kag makighambal man sa isa kag isa bangod ang komunikasyon sa pamilya isa ka butang nga dapat paambitan sang tanan nga katapo. Bisan pa ang ginasiling naton matuod, kon ginasiling ini sa mapintas, bugalon, ukon wala pasunaid nga paagi, indi ini makabulig kundi makahalit lamang. Gani kita man isa ka bana ukon asawa, isa ka ginikanan ukon anak, ang aton ginahambal dapat “pirme nga may kaayo, nga natimplahan sing asin.”—Col. 4:6.

¹⁴ ‘Apektado bala ako sang materyalismo?’ Ang materyalismo isa ka pag-ipit sa kalibutan nga nagapabudlay sang kabuhi sang isa ka tawo. Wala ini nagabulig sa isa ka tawo nga makatigayon sing matuod nga kalipay. (Manugw. 5:​10; Luc. 12:15; 1 Tim. 6:​9, 10) Agod buligan kita nga malikawan ang siod sang materyalismo, gintudluan kita ni Jesus sining importante nga prinsipio: Hupti nga simple ang mata. Agod magkabuhi sing timbang kag simple, dapat naton ituon ang aton mata sa mga intereses sang Ginharian, ginahimo ang iban pa nga mga butang nga segundaryo lamang.—Mat. 6:22, 23, 33.

¹⁵ Kon Ano Dapat ang Mangin Tulumuron Naton: Ang Pulong sang Dios isa ka masaligan nga ginahalinan sang matarong nga mga prinsipio nga nagatuytoy sa aton sa paghimo sing mga desisyon. Dapat naton hibaluon ining mga prinsipio, pamalandungan ini, kag hangpon kon paano ini iaplikar sa aton kabuhi. Sa amo, paagi sa ‘paghanas sa aton mga ikasarang sa paghangop nga makilala ang husto kag sayop,’ magabenepisyo kita kag mapadunggan si Jehova.—Heb. 5:14.