Hilikuton nga Ginasakdag sang Dios

¹ Sa mga alagad sang Dios karon, pila lamang ang may pinasahi nga edukasyon, manggad, ukon kabantugan sa sining sistema sang mga butang. Bangod sini, ginapakanubo sang pila ka tawo ang aton ministeryo. (Isa. 53:3) Apang, ang hilikuton nga pagpanudlo sing Biblia nga ginahimo naton nakahatag sing lugpay kag paglaum sa minilyon ka tawo sa bug-os nga kalibutan. Paano natigayon sining ordinaryo nga mga tawo ining talalupangdon nga mga resulta? Paagi lamang sa pagsakdag sang Dios. (Mat. 28:​19, 20; Binu. 1:8) “Ginpili sang Dios ang mga maluya sang kalibutan,” paathag ni apostol Pablo, “agod pakahuy-an ang mga makusog.”​​—⁠1 Cor. 1:​26-​29.

² Ang kalabanan nga mga apostoles kag unang siglo nga mga Cristiano “wala sing tinun-an kag kinaandan lamang.” (Binu. 4:13) Apang, masidla nila nga ginhimo ang ila komisyon nga ibantala ang maayong balita, kag ginpakamaayo ni Jehova ang ila mga panikasog. Walay sapayan sang mga balagbag kag pagpamatok, ‘ang pulong ni Jehova padayon nga nagtubo kag naglandas sa gamhanan nga paagi.’ Wala sing nakapauntat sa hilikuton bangod ginsakdag ini sang Dios. (Binu. 5:​38, 39; 19:20) Amo man ang kahimtangan sa moderno nga mga tion. Bisan ang masupog nga pagpamatok sang gamhanan nga mga gumalahom wala makapugong sa maayong balita nga mangibabaw kag mag-uswag.​​—⁠Isa. 54:17.

³ Ang Tanan nga Kadayawan Iya Sang Dios: Ang aton bala pribilehiyo subong mga ministro sang Dios mangin kabangdanan nga magpabugal kita? Indi gid. Nagapatuhoy sa Cristianong ministeryo, si Pablo nagsulat: “May yari kami sining bahandi sa human-sa-daga nga mga suludlan, agod nga ang gahom nga labaw sa kinaandan mangin iya sang Dios kag indi gikan sa amon kaugalingon.” (2 Cor. 4:7) Nahibaluan ni Pablo nga nahimo lamang niya ang iya ministeryo bangod sang kusog nga ginhatag sang Dios.​​—⁠Efe. 6:​19, 20; Fil. 4:⁠13.

⁴ Nahibaluan man naton nga bangod lamang sang ‘natigayon naton nga bulig gikan sa Dios,’ natuman ang pagbantala nga hilikuton. (Binu. 26:22) Paagi sinang bug-os kalibutan nga pagbantala, ginagamit kita ni Jehova sing tumalagsahon agod uyugon ang mga pungsod​​—⁠isa ka patimaan sang nagapakari nga paghukom. (Hag. 2:7) Pribilehiyo gid naton nga mangin mga “masigkamanugpangabudlay sang Dios” sa daku nga pag-ani sa espirituwal!​​—⁠1 Cor. 3:​6-9.