Itanyag ang mga Magasin nga Nagapanaksi Sang Kamatuoran

 1. Ano ang papel sang Ang Lalantawan kag Magmata!?

¹ Ang panguna nga galamiton sa pagbantala sang Ginharian kag paghimo sing disipulo amo gihapon Ang Lalantawan Nagabantala Sang Ginharian ni Jehova kag ang kaupod sini nga magasin nga Magmata! (Mat. 24:14; 28:19, 20) Nalipay kita sa aton regular nga pagtanyag sining suno sa tion nga mga magasin samtang nagapakigbahin kita sa nanuhaytuhay nga bahin sang pag-alagad sa Ginharian.

 2. Ano ang mga pagbag-o sa Ang Lalantawan kag Magmata!, kag sa ano nga katuyuan?

² Sa sulod sang nagligad nga mga tuig nakita naton ang mga pagbag-o sa kadakuon kag kaundan sang mga magasin subong man ang mga pamaagi sa pagtanyag sini. Ginhimo ini nga mga pagbag-o agod mangin mas makagalanyat kag epektibo ang mga magasin, sa amo malab-ot sang mensahe sang Ginharian ang tagipusuon ‘sang tanan nga sahi sang mga tawo kag maluwas sila kag makadangat sa sibu nga ihibalo tuhoy sa kamatuoran.’—1 Tim. 2:4, NW.

 3. Paano naton itanyag ang aton mga magasin sa ministeryo?

³ Sugod sang Enero 2006, nangin lantip kita sa paggamit sang nanuhaytuhay nga presentasyon para sa isa lang ka gua sang Magmata! Karon, amo man sini ang himuon naton sa pagtanyag sang isa sa duha ka bulanan nga gua sang Ang Lalantawan Nagabantala Sang Ginharian ni Jehova sa aton pagbantala. Ang sampol nga mga presentasyon sa tagsa ka magasin masapwan sa likod nga pahina sang Ang Aton Ministeryo sa Ginharian. Masami ini nga nagapadaku sang isa sa nagabukas nga mga artikulo sang magasin apang kon kaisa mahimo nga ipresentar man ang pila ka artikulo nga naluyagan sang madamo. Ang sampol nga mga presentasyon mahimo nga mangin mas epektibo kon pamilyar kita sa artikulo nga ginapresentar kag nagagamit sang aton kaugalingon nga tinaga sa pagpresentar sini sa aton teritoryo.

 4. Ngaa mahimo nga mapuslanon ang paggamit sing iban nga presentasyon luwas sa panugda nga yara sa Ang Aton Ministeryo sa Ginharian?

⁴ Bisan pa ginlakip ang duha ka presentasyon sa tagsa ka magasin sa Ang Aton Ministeryo sa Ginharian, makagamit ka man sing iban nga presentasyon. Ang isa ka rason sa sini amo nga mahimo nga ang isa ka artikulo mas makagalanyat sa inyo teritoryo. Ukon kon sa banta mo makahimo ka sing mas epektibo nga presentasyon paagi sa paggamit sing isa ka artikulo nga naluyagan mo gid.

 5. Antes maghanda sing presentasyon para sa inugtanyag nga magasin, ano anay ang dapat mo himuon?

⁵ Kon Paano Maghanda sang Imo Presentasyon: Una sa tanan, dapat nga pamilyar ka gid sa artikulo nga imo ipresentar. Mahimo nga indi mo mapamilyar ang tanan nga artikulo sa magasin antes mo ini gamiton sa ministeryo. Apang, dapat ka magpakita sing kapagsik kag pagkasinsero sa artikulo nga ginapresentar mo. Mahimo mo lang ini kon pamilyar ka sa impormasyon nga imo ginapresentar.

 6. Paano kita makahanda sang aton kaugalingon nga mga presentasyon?

⁶ Nian, dapat ka mangin mapasibusibuon kon nagahanda sang imo introduksion. Mahimo ka maggamit sing isa ka makawiwili nga pamangkot may kaangtanan sa artikulo sa imo pagsugod sang pagsugilanon. Magsalig pirme sa gahom sang Pulong sang Dios nga amo ang magapahulag sa tagipusuon. (Heb. 4:12) Magpili sing nagakaigo nga teksto nga may kaangtanan sa topiko nga imo ginapresentar, mas maayo kon ang teksto yara sa artikulo nga imo ginapresentar. Binagbinaga kon ano ang kaangtanan sang teksto sa artikulo.

 7. Paano pa gid naton mapanami ang aton mga presentasyon?

⁷ Sa Tagsa ka Kahigayunan: Agod nga mangin epektibo gid ang presentasyon, dapat ini gamiton. Makig-upod sa kongregasyon sa pagpanagtag sing mga magasin kon Sabado. Itanyag ang mga magasin sa mga tawo nga nagbaton na sang una sang mga literatura. Pirme tanyagi sing mga magasin ang imo mga estudyante sa Biblia kag ang iban pa nga tawo nga presente sa tion sang imo pagduaw liwat. Mahimo mo mapahamtang ang mga magasin sa imo mga maistorya kon nagapamalaklon, nagabiyahe, ukon samtang nagapadoktor. Panami-a ang imo mga presentasyon samtang ginagamit mo ini sa bug-os nga bulan.

 8. Ngaa pinasahi gid ang Lalantawan kag Magmata!?

⁸ Ang Lalantawan kag Magmata! nga mga magasin pinasahi gid. Nagadayaw ini kay Jehova subong Soberano sa bug-os nga uniberso. (Binu. 4:24) Ginalugpayan sini ang mga tawo sa maayong balita sang Ginharian sang Dios kag ginapalig-on ang ila pagtuo kay Jesucristo. (Mat. 24:14; Binu. 10:43) Dugang pa, nagapadayon ini sa pagbantay sa mga nagakatabo sa kalibutan nga amo ang katumanan sang mga tagna sa Biblia. (Mat. 25:13) Buligi ang mga tawo sa inyo teritoryo nga makabenepisyo sa sini nga mga magasin paagi sa pagtanyag sini sa ila sa tagsa ka kahigayunan!

 9. Paano kita makapahamtang sing sadsaran para sa pagduaw liwat?

⁹ Kon mangin madinalag-on ka sa pagpahamtang sang isa ka magasin, ukon kon nakapakigsugilanon ka sing mainabyanon tuhoy sa espirituwal nga butang sa iban, maghanda sing pamangkot ukon makapahunahuna nga topiko nga mahimo magbukas sing kahigayunan para sa pagduaw liwat kag sa masunod nga pagsugilanon tuhoy sa espirituwal nga mga butang. Kon makugi kita sa pagsab-ug sang binhi sang kamatuoran, mapat-od naton nga buksan ni Jehova ang tagipusuon sang mga sinsero nga nagahandum nga makakilala kag makaalagad sa Iya.—1 Cor. 3:6.