Ang Sirkito nga Asembleya nga Nagabulig sa Aton nga Amligan ang Aton Espirituwalidad

 1. Ano nga aman gikan kay Jehova ang magabulig sa aton nga matuman ang iya sugo nga ipalapnag ang maayong balita?

¹ Bugana nga nagaaman si Jehova sing impormasyon, paghanas, kag pagpalig-on nga kinahanglan naton agod matuman ang iya sugo nga ipalapnag ang maayong balita. (Mat. 24:14; 2 Tim. 4:17) Ang isa sini nga aman amo ang aton sirkito nga asembleya kada tuig. Ang bag-o nga programa para sa tuig 2010 magapasangkad sang tema, “Amligi ang Inyo Espirituwalidad,” pasad sa Roma 8:5 kag Judas 17-19. Ang bag-o nga serye magasugod sa ikatlo nga semana sang Enero 2010.

 2. (a) Ano nga mga benepisyo ang aton matigayon sa aton sirkito nga asembleya? (b) Paano ang nagligad nga mga sirkito nga asembleya nakabulig sa imo sa ministeryo?

² Kon Paano Kita Makabenepisyo: Ang programa makapaalerto sa aton sa mga katalagman, subong sang mga tublag nga magaubos sang aton tion kag magapahilayo sang aton igtalupangod sa importante gid nga mga butang. Matun-an naton kon paano pakigbatuan ang espiritu sang pagkamatinuguton, kag binagbinagon naton kon paano makilala ang espirituwal nga tawo. Ang simposium sa Domingo magapakita kon paano mapabakod sang indibiduwal kag sang pamilya ang ila espirituwalidad sa pag-atubang sa nagabaskog nga mga pag-ipit kag mga pagtilaw sa pagtuo. Ang programa magabulig man sa aton nga maamligan ang aton tagipusuon, mahuptan ang aton espirituwal nga kapagros, kag mahunahuna pirme ang bugana nga pagpakamaayo nga nagahulat sa mga nagaamlig sang ila espirituwalidad.

 3. San-o ang inyo masunod nga sirkito nga asembleya, kag ano ang dapat mo himuon?

³ Kon mahibaluan mo na kon san-o kag sa diin hiwaton ang inyo sirkito nga asembleya, magplano gilayon agod nga makatambong ka kag makapamati sing maayo sa tanan nga programa. Makasalig ka nga pakamaayuhon gid ni Jehova ang mga panikasog sang mapisan.—Hulu. 21:5.

 4. Ano ang pat-od nga matigayon naton sa aton masunod nga sirkito nga asembleya?

⁴ Si Jehova amo gid ang Manug-aman sining maayong dulot. Ang programa nga ginhanda sang matutom nga ulipon nga klase amo gid ang aton kinahanglan agod makapadayon kita subong Cristianong mga ministro. Nagapasalamat gid kita kay Jehova sa tanan niya nga mahigugmaon nga aman nga nagabulig sa aton nga ‘mahuptan sing malig-on ang dayag nga pagpahayag sang aton paglaum nga wala nagakalingkang.’—Heb. 10:23-25; Sant. 1:17.