Ano ang Garantiya nga Himuon Gid ni Jehova nga Paraiso ang Duta?

 1. Ano ang mensahe ni manalagna Isaias sa pareho niya nga mga Israelinhon?

GINLARAGWAY ni manalagna Isaias si Jehova bilang “Dios sang kamatuoran.” Ang tinaga nga gin-translate “kamatuoran” literal nga nagakahulugan sing “amen.” (Isa. 65:​16, footnote) Ang “amen” nagakahulugan sing “kabay pa” ukon “pat-od gid.” Sa Biblia, kon may ginsiling si Jehova ukon si Jesus, ginagamit ang tinaga nga “amen” bilang isa ka garantiya nga matuman gid ini. Gani, amo ini ang mensahe ni Isaias sa pareho niya nga mga Israelinhon: Kon may gintagna si Jehova, nagakatuman gid ini pirme. Ginpamatud-an ini ni Jehova paagi sa pagtuman sa tanan niya nga promisa.

 2. Ngaa makasalig kita nga matuman gid ang mga promisa ni Jehova parte sa aton palaabuton, kag ano nga mga pamangkot ang binagbinagon naton?

² Makasalig man bala kita nga matuman gid ang mga promisa ni Jehova parte sa aton palaabuton? Halos 800 ka tuig pagkatapos sang panahon ni Isaias, ginpaathag ni apostol Pablo kon ngaa makasalig kita nga matuman gid ang mga promisa sang Dios. Nagsiling si Pablo: “Imposible nga magbutig ang Dios.” (Heb. 6:18) Binagbinaga ini nga ilustrasyon. Tab-ang lang gid nga tubig ang nagagua sa isa ka tuburan, gani imposible nga maggua sa sini ang tubig halin sa dagat. Sing kaanggid, si Jehova ang ginahalinan sang kamatuoran, gani imposible gid nga magbutig sia. Amo ini ang rason kon ngaa makasalig gid kita sa tanan nga ginsiling ni Jehova, lakip na ang tanan nga ginpromisa niya parte sa aton sa palaabuton. Sa sini nga artikulo, binagbinagon naton ini nga mga pamangkot: Ano ang ginpromisa ni Jehova nga ihatag niya sa aton sa palaabuton? Kag ano ang garantiya nga himuon gid ni Jehova ang iya ginpromisa?

 3. (a) Ano nga promisa sang Dios ang nanamian gid sang iya mga alagad? (Bugna 21:​3, 4) (b) Ano ang reaksion sang iban kon ginasugiran naton sila parte sa sini nga promisa?

³ Nanamian gid ang tanan nga alagad sang Dios sa bilog nga kalibutan sa promisa nga binagbinagon naton. (Basaha ang Bugna 21:​3, 4.) Nagpromisa si Jehova nga magaabot ang tion nga “wala na sing kamatayon, ukon paglalaw ukon paghibi ukon kasakit pa.” Madamo sa aton ang nagagamit sini nga promisa sa Biblia para paumpawan ang aton mga ginabantalaan kag para ipakita sa ila kon ano ang mangin kabuhi sa Paraiso. Ano ang reaksion sang iban kon ginasugiran naton sila parte sa sini nga promisa? Posible magsiling sila, “Kanami gid sina, pero daw imposible ina matabo.”

 4. (a) Sang ginpromisa ni Jehova ang Paraiso, ano ang nabal-an niya nga matabo sa aton tion subong? (b) Magluwas nga nagpromisa si Jehova, ano pa ang iya ginhimo?

⁴ Sang gintuytuyan ni Jehova si apostol Juan nga isulat ang parte sa ginpromisa Niya nga Paraiso, kabalo si Jehova nga ibantala naton ini nga promisa sa aton tion subong. Kabalo man si Jehova nga madamo nga tawo ang mabudlayan sa pagpati nga matabo gid ining “bag-o nga mga butang.” (Isa. 42:9; 60:2; 2 Cor. 4:​3, 4) Gani paano naton makumbinsi ang iban nga matabo gid ang mga pagpakamaayo nga ginlaragway sa Bugna 21:​3, 4? Kag paano naton mapabakod ang aton pagsalig kay Jehova kag sa iya mga promisa? Naghatag si Jehova sang mabakod nga mga rason para magsalig kita nga tumanon gid niya ang iya mga promisa. Ano ini nga mga rason?

 5. Ano nga mga bersikulo ang nagahatag sa aton sang rason nga magsalig nga tumanon gid sang Dios ang iya ginpromisa nga Paraiso, kag ano ang ginasiling sini nga mga bersikulo?

⁵ Pagkatapos sang bersikulo 4, ari ang ginasiling sang Biblia nga nagahatag sa aton sang rason nga magsalig nga tumanon gid ni Jehova ang iya ginpromisa nga Paraiso: “Ang Isa nga nagapungko sa trono nagsiling: ‘Yari karon! Ginahimo ko nga bag-o ang tanan nga butang.’ Nagsiling man sia: ‘Isulat mo, kay ini nga mga pulong matutom kag matuod.’ Kag nagsiling sia sa akon: ‘Natuman na ini! Ako ang Alpha kag ang Omega, ang ginsuguran kag ang katapusan.’”—Bug. 21:​5, 6a.

 6. Ngaa makapabakod sa aton pagsalig sa Dios ang ginasiling sang Bugna 21:​5, 6?

⁶ Ngaa makapabakod sa aton pagsalig sa Dios ining ginasiling sang Biblia? Amo ini ang ginasiling sang libro nga Bugna parte sa sini nga mga bersikulo: “Daw subong nga si Jehova nagapirma para sa matutom nga katawhan sing isa ka garantiya, ukon titulo sang pagpanag-iya, sa sining palaabuton nga mga pagpakamaayo.”b Mabasa naton sa Bugna 21:​3, 4 ang promisa ni Jehova. Kag sa bersikulo 5 kag 6, makita naton ang iya garantiya, ukon daw ginpirmahan niya ini para pasaligon kita nga matuman gid ang iya promisa. Binagbinagon naton sing maayo ang mga tinaga nga gingamit ni Jehova bilang garantiya sa iya promisa.

 7. Sin-o ang nagahambal sa bersikulo 5, kag ano ang ginapakita sini?

⁷ Bilang umpisa sang garantiya sang Dios, amo ini ang mabasa naton: “Ang Isa nga nagapungko sa trono nagsiling.” (Bug. 21:5a) Ginapakita sini nga mga tinaga nga si Jehova mismo ang nagahambal sa palanan-awon, kag tatlo ka beses lang nga mabasa sa libro sang Bugna nga ginhimo ini ni Jehova. Gani indi si Jesus ukon isa ka anghel ang naghatag sini nga garantiya, kundi si Jehova mismo. Ginapakita sini nga masaligan gid naton ang iya masunod nga mga ginsiling. Ngaa? Bangod “indi makabutig” si Jehova. (Tito 1:2) Gani masaligan gid ang mabasa naton sa Bugna 21:​5, 6.

 8. Ano ang ginsiling ni Jehova nga nagapakita nga tumanon gid niya ang iya promisa? (Isaias 46:10)

⁸ Binagbinagon naman naton ang mga tinaga nga “Yari karon!” (Bug. 21:5) Ang Griego nga tinaga nga gin-translate “yari karon!” sulitsulit nga gingamit sa libro sang Bugna. Ang isa ka libro nagsiling nga gingamit ini nga ekspresyon “para silingan ang nagabasa nga dapat niya hatagan sing atension ang mga tinaga pagkatapos sini.” Ti, ano dayon ang ginsiling sang Dios pagkatapos niya magsiling sing “yari karon”? Nagsiling sia: “Ginahimo ko nga bag-o ang tanan nga butang.” Ngaa nagsiling si Jehova nga ginahimo na niya ini subong? Indi bala nga sa palaabuton pa niya ini himuon? Ginsiling ini ni Jehova bangod tumanon gid niya ang iya promisa.​—Basaha ang Isaias 46:10.

 9. (a) Ano ang duha ka butang nga himuon ni Jehova nga ginapatuhuyan sang ekspresyon nga “ginahimo ko nga bag-o ang tanan nga butang”? (b) Ano ang matabo sa “langit” kag sa “duta”?

⁹ Binagbinagon naman naton ang ginsiling sa Bugna 21:5 nga, “Ginahimo ko nga bag-o ang tanan nga butang.” Ano ang buot silingon sini? Sa sini nga kapitulo sa Biblia, nagapatuhoy ini sa duha ka butang nga himuon ni Jehova. Una, laglagon ni Jehova ining daan nga kalibutan. Kag ikaduha, buslan niya ini sang bag-o nga kalibutan. Amo ini ang mabasa naton sa Bugna 21:1: “Ang nahauna nga langit kag ang nahauna nga duta nagtaliwan na.” “Ang nahauna nga langit” nagapatuhoy sa mga gobierno nga naimpluwensiahan ni Satanas kag sang iya mga demonyo. (Mat. 4:​8, 9; 1 Juan 5:19) Sa Biblia, ang “duta” puede man magpatuhoy sa mga pumuluyo sini. (Gen. 11:1; Sal. 96:1) Gani “ang nahauna nga duta” nagapatuhoy sa malain nga mga tawo. Kay-uhon lang bala ni Jehova ini nga “langit” kag ini nga “duta”? Indi. Laglagon niya ini sing bug-os kag buslan niya ini sang ‘isa ka bag-o nga langit kag isa ka bag-o nga duta,’ ukon sang isa ka bag-o nga gobierno nga magagahom sa matarong nga mga tawo.

10. Ano ang bag-uhon ni Jehova?

¹⁰ Mabasa man naton sa Bugna 21:5 ang ginsiling ni Jehova parte sa mga butang nga himuon niya nga bag-o. Talupangda nga wala nagsiling si Jehova: “Bag-o nga mga butang ang tanan ko nga ginahimo.” Sa baylo, nagsiling sia: “Ginahimo ko nga bag-o ang tanan nga butang.” Gani, ayuhon ni Jehova ang duta kag himuon niya nga perpekto ang mga tawo. Suno sa gintagna ni Isaias, himuon ni Jehova ang bilog nga duta nga isa ka matahom nga lugar pareho sa hardin sang Eden. Kag bag-uhon man niya ang kada isa sa aton paagi sa pag-ayo sa aton sing bug-os. Ayuhon niya ang mga piang, ang mga bulag, kag ang mga bungol, kag banhawon pa gani niya ang mga patay.​—Isa. 25:8; 35:​1-7.

11. Ano ang ginsugo ni Jehova kay Juan, kag ngaa?

¹¹ Ano pa ang ginsiling sang Dios bilang garantiya sa iya promisa? Ginsugo ni Jehova si Juan: “Isulat mo, kay ini nga mga pulong matutom kag matuod.” (Bug. 21:5) Wala lang nagsugo si Jehova nga “isulat mo,” kundi naghatag man sia sang rason. Nagsiling sia: “Kay ini nga mga pulong matutom kag matuod.” Buot silingon, masaligan ang mga ginasiling sang Dios. Nagapasalamat gid kita kay gintuman ni Juan ang sugo sa iya nga “isulat mo.” Bangod sini, mabasa naton ang parte sa ginpromisa sang Dios nga Paraiso kag mapamalandungan naton ang dalayawon nga mga pagpakamaayo sa palaabuton.

12. Ngaa nagsiling si Jehova: “Natuman na ini”?

¹² Ano dayon ang ginsiling sang Dios? Nagsiling sia: “Natuman na ini!” (Bug. 21:6) Ngaa nagsiling si Jehova nga natuman na ang iya ginpromisa nga Paraiso? Bangod wala sing may makapugong sa iya sa pagtuman niya sang iya katuyuan. Dayon may ginsiling pa gid si Jehova nga nagagarantiya nga matuman gid ang iya promisa. Ano ang iya ginsiling?

13. Ngaa nagsiling si Jehova: “Ako ang Alpha kag ang Omega”?

¹³ Ginsambit kaina nga tatlo ka beses nga si Jehova mismo ang nag-istorya kay Juan sa palanan-awon. (Bug. 1:8; 21:​5, 6; 22:13) Sa sining tatlo ka tion, nagsiling si Jehova: “Ako ang Alpha kag ang Omega.” Ang alpha amo ang una nga letra sa Griego nga alpabeto, kag ang omega amo ang katapusan nga letra. Paagi sa pagsiling ni Jehova nga sia “ang Alpha kag ang Omega,” ginapahangop niya nga kon may gin-umpisahan sia nga himuon, tapuson gid niya ini.

14. (a) San-o ang tion nga daw pareho lang nga nagsiling si Jehova sing “Alpha,” kag san-o ang tion nga daw pareho lang nga magasiling sia sing “Omega”? (b) Ano nga garantiya ang mabasa sa Genesis 2:​1-3?

¹⁴ Pagkatapos gintuga ni Jehova si Adan kag si Eva, ginsiling niya sa ila kon ano ang iya katuyuan para sa mga tawo kag sa duta. Ang Biblia nagasiling: “Ginpakamaayo sila sang Dios, kag nagsiling ang Dios sa ila: ‘Magpanganak kamo kag magdamo, pun-a ninyo ang duta kag dumalahan ini.’” (Gen. 1:28) Sadto nga tion, daw pareho lang nga nagsiling si Jehova sing “Alpha.” Kon mapuno na ang duta sang perpekto kag matinumanon nga mga kaliwat nanday Adan kag Eva kag mangin Paraiso na ini, matuman na ang katuyuan ni Jehova. Sa sina nga tion, daw pareho lang nga magasiling si Jehova sing “Omega.” Sang matapos ni Jehova ang pagtuga ‘sa langit kag sa duta kag sa tanan nga yara sa sini,’ may ginsiling sia nga nagahatag sang garantiya nga matuman gid ang iya katuyuan. Mabasa ini sa Genesis 2:​1-3. (Basaha.) Ginhimo ni Jehova nga sagrado ang ikapito nga adlaw. Ano ang buot silingon sini? Buot silingon, ginpain niya ang ikapito nga adlaw para sa pagtuman sang iya katuyuan. Gani isa ini ka garantiya nga tumanon gid ni Jehova ang iya katuyuan para sa mga tawo kag sa duta, kag matuman ini sing bug-os sa katapusan sang ikapito nga adlaw.

15. Ngaa daw napunggan ni Satanas ang katuyuan sang Dios para sa mga tawo?

¹⁵ Pagkatapos magrebelde sanday Adan kag Eva, nangin makasasala sila kag napanubli sang ila mga kaanakan ang sala kag kamatayon. (Roma 5:12) Bangod sini, daw napunggan ni Satanas ang katuyuan sang Dios nga pun-on ang duta sang perpekto kag matinumanon nga mga tawo. Posible nahunahuna ni Satanas nga indi na matuman ni Jehova ang Iya promisa kay daw imposible na ini matabo. Posible nahunahuna niya nga patyon sang Dios sanday Adan kag Eva kag magatuga Sia liwat sang perpekto nga mag-asawa nga amo ang magatuman sang Iya katuyuan para sa mga tawo. Pero kon amo sini ang ginhimo sang Dios, may rason kuntani ang Yawa nga silingan ang Dios nga butigon Sia. Ngaa? Bangod suno sa Genesis 1:​28, ginsilingan ni Jehova sanday Adan kag Eva nga ila mga kaliwat ang magapuno sang duta.

16. Ngaa posible nahunahuna ni Satanas nga may rason sia nga silingan si Jehova nga wala Niya natuman ang Iya katuyuan?

¹⁶ Ano pa ang posible nga nahunahuna ni Satanas nga himuon sang Dios? Posible nahunahuna niya nga tugutan ni Jehova nga magpanganak sanday Adan kag Eva, pero indi gid mangin perpekto ang ila mga anak. (Man. 7:20; Roma 3:23) Kon amo sini ang natabo, may rason kuntani ang Yawa nga silingan si Jehova nga wala Niya natuman ang Iya katuyuan. Ngaa? Bangod indi perpekto nga mga tawo ang magapuno sang duta.

17. Ano ang solusyon ni Jehova sa pagrebelde ni Satanas kag nanday Adan kag Eva, kag ano ang ginpaposible sini nga matabo sa ulihi? (Tan-awa man ang piktyur.)

¹⁷ Posible nga wala gid nahunahuna ni Satanas kon ano ang himuon ni Jehova. Bisan pa nagrebelde si Satanas kag sanday Adan kag Eva, kabalo si Jehova sang pinakamaayo nga solusyon para matuman ang Iya katuyuan. (Sal. 92:5) Gintugutan ni Jehova nga magpanganak sanday Adan kag Eva, gani natuman ang Iya ginsiling. Paagi sa sini, ginpamatud-an ni Jehova nga indi sia butigon. Kag ginpakita ni Jehova nga kon may ginsiling sia nga himuon niya, wala gid sing may makapugong sa iya. Ginsigurado niya nga matuman ang iya katuyuan. Paano? Nag-aman sia sang “kaliwat” nga magaluwas sa matinumanon nga kaanakan nanday Adan kag Eva. (Gen. 3:15; 22:18) Ihatag sini nga kaliwat ang iya kabuhi bilang gawad para luwason ang katawhan. Wala gid nahunahuna ni Satanas ang solusyon ni Jehova. Ngaa? Bangod nabase ini sa gugma nga handa magsakripisyo. (Mat. 20:28; Juan 3:16) Wala sing amo sini nga kinaiya si Satanas bangod ginauna niya ang iya kaugalingon. Ti, ano ang ginpaposible sang halad-gawad nga matabo sa ulihi? Sa katapusan sang 1,000 ka tuig nga paggahom sang Cristo, magaistar sa paraiso sa duta ang perpekto kag matinumanon nga mga kaliwat nanday Adan kag Eva, nga amo ang orihinal nga katuyuan ni Jehova. Sa sina nga tion, daw pareho lang nga magasiling si Jehova sing “Omega.”

18. Ano ang tatlo ka garantiya nga ginhatag sang Dios? (Tan-awa man ang kahon nga “Tatlo ka Rason nga Nagapasalig sa Aton nga Tumanon Gid ni Jehova ang Iya Promisa.”)

¹⁸ Ginbinagbinag naton ang mga rason kon ngaa makasalig kita nga matuman gid ang ginpromisa sang Dios nga Paraiso. Ti, ano ang puede naton isiling sa iban para magpati sila nga matuman gid ini? Una, si Jehova mismo ang nagpromisa sini. Ang libro sang Bugna nagasiling: “Ang Isa nga nagapungko sa trono nagsiling: ‘Yari karon! Ginahimo ko nga bag-o ang tanan nga butang.’” Gusto gid niya nga tumanon ang iya promisa, kag may kaalam sia kag gahom para himuon ini. Ikaduha, para kay Jehova, natuman na ang iya promisa kay sigurado sia nga matabo gid ini. Gani nagsiling sia: “Ini nga mga pulong matutom kag matuod. . . . Natuman na ini!” Ikatlo, kon may gin-umpisahan si Jehova nga himuon, tapuson gid niya ini. Amo ini ang rason kon ngaa nagsiling sia: “Ako ang Alpha kag ang Omega.” Pamatud-an ni Jehova nga butigon si Satanas kag indi niya mapunggan si Jehova sa pagtuman sang Iya katuyuan.

19. Kon daw indi magpati ang imo ginabantalaan parte sa ginpromisa sang Dios nga Paraiso, ano ang puede mo himuon?

¹⁹ Tandai nga sa kada tion nga ginasugid mo sa iban ang mga ginsiling ni Jehova bilang garantiya sa iya mga promisa, ginapabakod mo ang imo pagsalig sa iya. Gani kanami gid nga isugid sa iban ang makalilipay nga promisa parte sa Paraiso nga makita sa Bugna 21:4. Pero ano ang puede mo himuon kon silingan ka sang imo ginabantalaan nga, “Kanami gid sina, pero daw imposible ina matabo”? Puede mo basahon kag ipaathag ang bersikulo 5 kag 6. Ipakita sa iya nga gingarantiyahan ni Jehova ini nga promisa kay daw pareho lang nga ginpirmahan niya ini.​—Isa. 65:16.