Nakasulod Ka Na Bala sa Kapahuwayan sang Dios?

“Ang tawo nga nakasulod sa kapahuwayan sang Dios nagpahuway man mismo sa iya mga hilikuton.”​—⁠HEBREO 4:⁠10.

1. Ngaa halandumon gid ang kapahuwayan?

KAPAHUWAYAN. Kanami gid kag katahom nga tinaga! Nagapuyo sa karon madasig kag masako nga kalibutan, ang kalabanan sa aton magaugyon nga ang diutay nga pahuway halandumon gid. Lamharon man ukon tigulang, minyo man ukon diminyo, mahimo nga ginalapyo kag ginakapoy kita sa matag-adlaw nga pagkabuhi. Sa sadtong may pisikal nga balatian ukon mga kasablagan, ang tagsa ka adlaw isa ka hangkat. Subong sang ginasiling sang Kasulatan, “ang tanan nga tinuga padayon nga nagaugayong sing tingob kag ginasakitan sing tingob tubtob karon.” (Roma 8:22) Ang tawo nga nagapahuway wala nagakahulugan nga matamad. Ang pahuway kinahanglanon sang tawo nga dapat niya matigayon.

2. Kutob san-o nagapahuway si Jehova?

² Bisan si Jehova nga Dios nagapahuway. Sa tulun-an sang Genesis, aton mabasa: “Nahuman ang mga langit kag ang duta kag ang bug-os nga kasuldadusan sini. Kag sa ikapito nga adlaw natapos sang Dios ang buluhaton nga iya ginhimo, kag nagpahuway sia sa ikapito nga adlaw gikan sa tanan nga buluhaton nga iya ginhimo.” Ginpadaku ni Jehova ang “ikapito nga adlaw,” kay ang inspirado nga rekord padayon nga nagasiling: “Ginpakamaayo sang Dios ang ikapito nga adlaw kag ginpakabalaan ini.”​—⁠Genesis 2:​1-3.

Nagpahuway ang Dios sa Iya Hilikuton

3. Nagapahuway ang Dios indi bangod sa anong mga rason?

³ Ngaa nagpahuway ang Dios sa “ikapito nga adlaw”? Sa pagkamatuod, wala sia magpahuway bangod ginlapyo sia. Si Jehova “bugana sing dinamiko nga kusog” kag “wala sia ginapunaw ukon ginalapyo.” (Isaias 40:​26, 28) Wala man magpahuway ang Dios bangod kinahanglan niya magpahunayhunay ukon maghinayhinay, kay ginsilingan kita ni Jesus: “Ang akon amay padayon nga nagapanghikot tubtob karon, kag padayon ako nga nagapanghikot.” (Juan 5:17) Sa tanan nga kahimtangan, “ang Dios Espiritu” kag wala napaidalom sa undanon nga mga siklo kag mga kinahanglanon sang pisikal nga mga tinuga.​—⁠Juan 4:⁠24.

4. Sa anong paagi ang “ikapito nga adlaw” tuhay sangsa nahaunang anom ka ‘adlaw’?

⁴ Paano naton mahibaluan kon ngaa nagpahuway ang Dios sa “ikapito nga adlaw”? Paagi sa pagtalupangod nga walay sapayan nga naluyagan gid niya ang iya nahimuan sa sulod sang malawig nga tion sang anom ka ‘adlaw’ sang pagpanuga, espesipiko nga ginpakamaayo sang Dios “ang ikapito nga adlaw” kag “ginpakabalaan” ini. Ginahatagan kahulugan sang Concise Oxford Dictionary ang “balaan” subong “eksklusibo nga gindedikar ukon gintigana (sa dios ukon sa pila ka relihioso nga katuyuan).” Sa amo, ang pagpakamaayo ni Jehova sa “ikapito nga adlaw” kag ang pagpakabalaan sini nagapakita nga ini kag ang iya “kapahuwayan” naangot sa iya balaan nga kabubut-on kag katuyuan sa baylo sang pila ka kinahanglanon sa iya bahin. Ano ina nga kaangtanan?

5. Ano ang ginpapanghikot sang Dios sang nahaunang anom ka ‘adlaw’ sang pagpanuga?

⁵ Sadtong anom ka ‘adlaw’ nga pagpanuga, ginhimo kag ginpapanghikot sang Dios ang tanan nga siklo kag kasuguan nga nagakontrol sa pagpanghikot sang duta kag sang tanan nga butang sa palibot sini. Ginatun-an karon sang mga sientipiko kon paano ini gindesinyo sing makatilingala. Sa hingapusan sang “ikan-om nga adlaw,” gintuga sang Dios ang unang tawhanon nga mag-asawa kag ginbutang sila sa “hardin sang Eden, sa sidlangan nayon.” Sang ulihi, ginpahibalo sang Dios ang iya katuyuan tuhoy sa tawhanon nga pamilya kag sa duta sa sining matagnaon nga mga pinamulong: “Magmabungahon kag magbuad kag magtugob sa duta kag magpakaagalon sa sini, kag maggahom sa kaisdaan sang dagat kag sa kapispisan sang kahawaan kag sa tagsa ka buhi nga tinuga nga nagagiho sa duta.”​—⁠Genesis 1:​28, 31; 2:⁠8.

6. (a) Sa katapusan sang “ikan-um nga adlaw,” ano ang nabatyagan sang Dios tuhoy sa tanan niya nga gintuga? (b) Sa anong kahulugan “ang ikapito nga adlaw” balaan?

⁶ Sang nagahingapos na ang “ikan-um nga adlaw” sang pagpanuga, ang rekord nagasugid sa aton: “Nakit-an sang Dios ang tanan nga butang nga iya ginhimo kag, yari karon! tuman gid kaayo.” (Genesis 1:31) Kontento ang Dios sa tanan nga butang nga iya ginhimo. Busa nagpahuway sia, ukon nagdulog, sa dugang pa nga pagpanuga para sa duta. Apang, bisan himpit kag tuman katahom sadto anay ang paraiso nga hardin, magamay lamang ini nga duog, kag duha lamang ka tawo ang nagapuyo sa duta. Kinahanglan ang tion agod ang duta kag ang tawhanon nga pamilya makalab-ot sa kahimtangan nga gintuyo sang Dios. Sa sining kabangdanan, nagtalana sia sing “ikapito nga adlaw” nga magatugot sa tanan niya nga gintuga sa nagligad nga anom ka ‘adlaw’ nga mag-uswag suno sa iya balaan nga kabubut-on. (Ipaanggid ang Efeso 1:11.) Sa hingapusan sang “ikapito nga adlaw,” ang duta mangin bug-os globo nga paraiso nga ginapuy-an sing dayon sang pamilya sang himpit nga mga tawo. (Isaias 45:18) “Ang ikapito nga adlaw” gintigana para, ukon gindedikar sa, katumanan sang katuyuan sang Dios tuhoy sa duta kag sa katawhan. Sa sini nga kahulugan ini “balaan.”

7. (a) Sa anong kahulugan ang Dios nagpahuway sa “ikapito nga adlaw”? (b) Ano ang mahanabo sa tion nga matapos “ang ikapito nga adlaw”?

⁷ Sa amo nagpahuway ang Dios sa pagpanuga sa “ikapito nga adlaw.” Subong nga daw nagdulog sia kag gintugutan nga matapos ang iya ginsugdan. Nagasalig gid sia nga sa katapusan sang “ikapito nga adlaw,” ang tanan mahanabo suno gid sa iya gintuyo. Bisan kon may mga balagbag man, malandas ini. Ang tanan matinumanon nga katawhan makabenepisyo kon matuman na sing bug-os ang kabubut-on sang Dios. Wala sing makapugong sini bangod ginpakamaayo sang Dios “ang ikapito nga adlaw,” kag “ginpakabalaan” niya ini. Daw ano katahom nga palaabuton para sa matinumanon nga katawhan!

Wala Makasulod ang Israel sa Kapahuwayan sang Dios

8. San-o kag paano ginsunod sang mga Israelinhon ang Adlaw nga Inugpahuway?

⁸ Ang pungsod sang Israel nakabenepisyo sa kahimusan ni Jehova sa pagtrabaho kag pagpahuway. Bisan antes niya ginhatag ang Kasuguan sa mga Israelinhon sa Bukid sang Sinai, ginhambalan sila sang Dios paagi kay Moises: “Tandai ang kamatuoran nga si Jehova naghatag sa inyo sang Adlaw nga Inugpahuway. Amo kon ngaa nagahatag sia sa inyo sa ikan-um nga adlaw sing tinapay sa duha ka adlaw. Magpabilin ang tagsa ka tawo sa iya duog. Indi maghalin ang bisan sin-o sa ikapito nga adlaw.” Ang resulta amo nga “ang katawhan nagpahuway sa ikapito nga adlaw.”​—⁠Exodo 16:​22-30.

9. Ngaa ang kasuguan sa Adlaw nga Inugpahuway walay duhaduha nga isa ka maayo nga pagbag-o para sa mga Israelinhon?

⁹ Ini nga kahimusan bag-o para sa mga Israelinhon, nga bag-o lang ginpaguwa gikan sa kahiulipnan sa Egipto. Bisan kon gin-isip sang mga Egiptohanon kag sang iban nga pungsod ang tion sa tiglima tubtob tignapulo ka adlaw, pat-od gid nga wala gintugutan ang naulipon nga mga Israelinhon sang isa ka adlaw nga pahuway. (Ipaanggid ang Exodo 5:​1-9.) Sa amo makatarunganon ang maghinakop nga ginbaton sang katawhan sang Israel ini nga pagbag-o. Sa baylo nga tamdon ang ginapatuman nga Adlaw nga Inugpahuway subong kabug-atan ukon pagdumili, ginsunod nila ini sing malipayon. Sa kamatuoran, sang ulihi ginsilingan sila sang Dios nga ang adlaw nga inugpahuway mangin isa ka pahanumdom sang ila pagkaulipon sa Egipto kag sang pagluwas niya sa ila.​—⁠Deuteronomio 5:⁠15.

10, 11. (a) Paagi sa pagkamatinumanon, ano ang ginpaabot sang mga Israelinhon nga matigayon? (b) Ngaa wala makasulod sa kapahuwayan sang Dios ang mga Israelinhon?

¹⁰ Kon nagmasinulundon lamang ang mga Israelinhon nga nagguwa sa Egipto upod kay Moises, nakasulod sila kuntani sa ginsaad nga “duta nga nagailig sing gatas kag dugos.” (Exodo 3:8) Natigayon nila kuntani didto ang matuod nga kapahuwayan, indi lamang sa Adlaw nga Inugpahuway kundi sa bug-os nila nga kabuhi. (Deuteronomio 12:​9, 10) Apang, indi amo sina ang natabo. Tuhoy sa ila si apostol Pablo nagsulat: “Sin-o bala ang nakabati kag walay sapayan nagpukaw sing mapait nga kaakig? Sa pagkamatuod, indi bala ang tanan nga nagbiya sa Egipto sa idalom ni Moises? Dugang pa, kay sin-o bala naakig ang Dios sa sulod sing kap-atan ka tuig? Indi bala sa mga nagpakasala, nga ang ila mga lawas napukan sa kahanayakan? Apang kay sin-o bala nagsumpa sia nga indi sila makasulod sa iya kapahuwayan luwas sa mga dimasinulundon? Gani nakita naton nga wala sila makasulod bangod sang pagkawalay pagtuo.”​—⁠Hebreo 3:​16-19.

¹¹ Daku gid nga leksion para sa aton! Bangod sang pagkawalay pagtuo kay Jehova, wala matigayon sadtong kaliwatan ang kapahuwayan nga iya ginsaad sa ila. Sa baylo, nalaglag sila sa kahanayakan. Wala nila mahangpi nga subong mga kaliwatan ni Abraham, naangot sila sing suod sa kabubut-on sang Dios sa pag-aman sing mga pagpakamaayo sa tanan nga kapungsuran sang duta. (Genesis 17:​7, 8; 22:18) Sa baylo nga magpanghikot nahisuno sa kabubut-on sang Dios, natublag gid sila sang ila tawhanon kag undanon nga mga handum. Kabay nga indi ina matabo sa aton!​—⁠1 Corinto 10:​6, 10.

May Nabilin Pa nga Kapahuwayan

12. Anong paglaum ang nagahulat gihapon sa nahaunang siglo nga mga Cristiano, kag paano nila matigayon ini?

¹² Sa tapos mapakita ang kapaslawan sang Israel sa pagsulod sa kapahuwayan sang Dios bangod sang pagkawalay pagtuo, ginliso ni Pablo ang iya igtalupangod sa iya mga masigkatumuluo. Subong sang ginsiling sa Hebreo 4:​1-5, ginpasalig niya sila nga may “isa ka saad nga nabilin sa pagsulod sa kapahuwayan sang [Dios].” Ginpalig-on sila ni Pablo nga magtuo sa “maayong balita,” kay “kita nga nagatuo nagasulod gid sa kapahuwayan.” Sanglit ginkuha na ang Kasuguan paagi sa halad gawad ni Jesus, wala ginapatuhuyan ni Pablo ang pisikal nga kapahuwayan nga ginaaman sang Adlaw nga Inugpahuway. (Colosas 2:​13, 14) Paagi sa pagkutlo sa Genesis 2:2 kag sa Salmo 95:​11, ginpalig-on ni Pablo ang Hebreong mga Cristiano nga magsulod sa kapahuwayan sang Dios.

13. Sa pagkutlo sa Salmo 95, ngaa ginpatalupangod ni Pablo ang tinaga nga “karon”?

¹³ Ang posibilidad sa pagsulod sa kapahuwayan sang Dios nangin isa kuntani ka “maayong balita” para sa Hebreong mga Cristiano, subong nga ang Adlaw nga Inugpahuway nangin isa kuntani ka “maayong balita” sa mga Israelinhon sadto anay. Sa amo, ginpalig-on ni Pablo ang iya mga masigkatumuluo nga indi pagsuliton ang sayop nga ginhimo sang mga Israelinhon sa kahanayakan. Ginakutlo ang Salmo 95:​7, 8, ginpatalupangod niya ang tinaga nga “karon,” walay sapayan nga madugay na nagpahuway ang Dios gikan sa iya pagpanuga. (Hebreo 4:​6, 7) Ano ang ginapahangop ni Pablo? Amo nga “ang ikapito nga adlaw,” nga gintigana sang Dios agod tumanon sing bug-os ang iya katuyuan tuhoy sa duta kag sa katawhan, nagapadayon pa. Busa, hilingagawon para sa iya mga masigka-Cristiano nga magpanghikot nahisuno sa sinang katuyuan sa baylo nga masablagan sang makagod nga mga paghimud-os. Sa liwat nagpaandam sia: “Indi pagpatig-aha ang inyo tagipusuon.”

14. Paano ginpakita ni Pablo nga ang “kapahuwayan“ sang Dios nagapadayon?

¹⁴ Dugang pa, ginpakita ni Pablo nga ang ginsaad nga “kapahuwayan” indi lamang pagpuyo sa Ginsaad nga Duta sa idalom sang pagpanguna ni Josue. (Josue 21:44) “Kay kon gindala sila ni Josue sa isa ka duog sang kapahuwayan,” siling ni Pablo, “wala na kuntani maghambal sang ulihi ang Dios tuhoy sa isa pa ka adlaw.” Tuhoy sina, si Pablo nagdugang: “May nabilin pa nga adlaw nga inugpahuway para sa katawhan sang Dios.” (Hebreo 4:​8, 9) Ano ina nga “adlaw nga inugpahuway”?

Magsulod sa Kapahuwayan sang Dios

15, 16. Ano ang importansia sang tinaga nga “adlaw nga inugpahuway”? (b) Ano ang buot silingon sang “pagpahuway gikan sa mga hilikuton sang isa’?

¹⁵ Ang tinaga nga “adlaw nga inugpahuway” ginbadbad gikan sa Griegong tinaga nga nagakahulugan sing “pagpahuway.” (Kingdom Interlinear) Si Propesor William Lane nagsiling: “Ang tinaga may diutay nga kinatuhayan sa ginpatuman nga Adlaw nga Inugpahuway sa Judaismo suno sa Exodo 20:​8-10, diin ginpadaku nga ang pagpahuway kag ang pagdayaw magkaupod . . . Ginapadaku [sini] ang pinasahi nga bahin sang kapiestahan kag kalipay, nga ginapabutyag sa kadungganan kag kadayawan sang Dios.” Sa amo, ang ginsaad nga kapahuwayan indi lamang pag-untat sa pagtrabaho. Isa ini ka pagbag-o gikan sa makalalapyo, wala sing katuyuan nga pagpangabudlay padulong sa makalilipay nga pag-alagad nga nagapadungog sa Dios.

¹⁶ Ginapakita ini sang masunod nga pinamulong ni Pablo: “Bangod ang tawo nga nagsulod sa kapahuwayan sang Dios nagpahuway man mismo sa iya kaugalingon nga mga hilikuton, subong sang ginhimo sang Dios sa iya kaugalingon nga mga hilikuton.” (Hebreo 4:10) Ang Dios wala magpahuway sa ikapito nga adlaw sang pagpanuga bangod sang kakapoy. Sa baylo, nag-untat sia sa hilikuton nga pagpanuga sa duta agod tugutan ang iya binuhatan nga mag-uswag kag makadangat sa kabug-usan nga himaya, sa iya kadayawan kag kadungganan. Subong bahin sang pagpanuga sang Dios, dapat man kita magpasakop sa sina nga kahimusan. Dapat kita ‘magpahuway sa aton kaugalingon nga mga hilikuton,’ buot silingon, dapat kita mag-untat sa pagtinguha nga pakamatarungon ang kaugalingon sa Dios sa tuyo nga matigayon ang kaluwasan. Sa baylo, dapat kita magtuo nga ang aton kaluwasan nasandig sa halad gawad ni Jesucristo, nga paagi sa sini ang tanan nga butang liwat nga mapahisuno sa katuyuan sang Dios.​—⁠Efeso 1:​8-14; Colosas 1:​19, 20.

Ang Pulong sang Dios Gamhanan

17. Anong dalanon sang undanon nga Israel ang dapat naton likawan?

¹⁷ Ang mga Israelinhon wala makasulod sa ginsaad nga kapahuwayan sang Dios bangod sang ila pagkamalinapason kag pagkawalay pagtuo. Subong resulta, ginpalig-on ni Pablo ang Hebreong mga Cristiano: “Busa himuon naton ang aton bug-os nga masarangan nga magsulod sa sina nga kapahuwayan, basi nga may isa nga mahulog sa sina nga sahi sang paglapas.” (Hebreo 4:11) Ang kalabanan nga mga Judiyo sang unang siglo wala magtuo kay Jesus, kag madamo sa ila ang nag-antos sing daku sang natapos ang Judiyong sistema sang mga butang sang 70 C.⁠E. Importante gid nga magtuo kita sa saad sang Dios karon!

18. (a) Anong mga rason ang ginhatag ni Pablo sa pagtuo sa pulong sang Dios? (b) Paano ang pulong sang Dios “matalom pa sa bisan ano nga espada nga duha sing sulab”?

¹⁸ May mabakod kita nga mga rason nga magtuo sa pulong ni Jehova. Si Pablo nagsulat: “Ang pulong sang Dios buhi kag gamhanan kag matalom pa sa bisan ano nga espada nga duha sing sulab kag nagalapos tubtob sa nautlan sang kalag kag espiritu, kag sang mga lutalutahan kag ila utok, kag may ikasarang sa paghantop sang mga hunahuna kag mga tinutuyo sang tagipusuon.” (Hebreo 4:12) Huo, ang pulong sang Dios, ukon mensahe, “matalom pa sa bisan ano nga espada nga duha sing sulab.” Dapat dumdumon sang Hebreong mga Cristiano ang natabo sa ila mga katigulangan. Wala ginsapak ang paghukom ni Jehova nga mapapas sila sa kahanayakan, namilit pa gid sila nga magsulod sa Ginsaad nga Duta. Apang ginpaandaman sila ni Moises: “Ang mga Amaleknon kag ang mga Canaanhon yara sa atubangan ninyo; kag pat-od nga mapukan kamo sa espada.” Sang namilit ang mga Israelinhon, “nagdulhog ang mga Amaleknon kag ang mga Canaanhon nga nagapuyo sa sadto nga bukid kag ginlaglag sila kag ginlagas tubtob sa Horma.” (Numeros 14:​39-45) Ang pulong ni Jehova matalom pa sa bisan ano nga espada nga duha sing sulab, kag ang bisan sin-o nga hungod nga nagasikway sini pat-od nga mapahamak.​—⁠Galacia 6:​7-9.

19. Daw ano kabaskog ‘nagalapos’ ang pulong sang Dios, kag ngaa dapat naton kilalahon ang aton salabton sa Dios?

¹⁹ Ang pulong sang Dios mabaskog gid nga “nagalapos tubtob sa nautlan sang kalag kag espiritu, kag sang mga lutalutahan kag ila utok”! Nagapanalupsop ini sa panghunahuna kag mga motibo sang mga indibiduwal, sing malaragwayon nagalapos sa mga utok sang tul-an sa nasulod gid nga bahin sang mga tul-an! Walay sapayan nga nag-ugyon ang mga Israelinhon nga ginhilway sa kahiulipnan sa Egipto nga sundon ang Kasuguan, nahibaluan ni Jehova nga sa ila tagipusuon wala nila ginaapresyar ang iya mga aman kag mga ginapatuman. (Salmo 95:​7-11) Sa baylo nga himuon ang iya kabubut-on, luyag nila paayawan ang ila undanon nga mga handum. Sa amo, wala sila makasulod sa ginsaad nga kapahuwayan sang Dios, kundi nalaglag sa kahanayakan. Dapat naton pamatian ina nga leksion, kay “wala sing tinuga nga wala nadayag sa panulok sang [Dios], kundi ang tanan nga butang hublas kag napadayag sa iya mga mata nga sa iya manabat kita.” (Hebreo 4:13) Busa kabay nga tumanon naton ang aton dedikasyon kay Jehova kag indi “mag-isol padulong sa kalaglagan.”​—⁠Hebreo 10:39.

20. Ano ang yara sa unahan, kag ano ang dapat naton himuon karon agod makasulod sa kapahuwayan sang Dios?

²⁰ Walay sapayan nga “ang ikapito nga adlaw”​—⁠ang adlaw sang kapahuwayan sang Dios​—⁠nagapadayon pa, alisto nga ginapatuman niya ang iya katuyuan para sa duta kag sa katawhan. Sa indi madugay, ang Mesianiko nga Hari, si Jesucristo, magahulag agod dulaon sa duta ang tanan nga nagapamatok sa kabubut-on sang Dios, lakip kay Satanas nga Yawa. Sa sulod sang Isa ka Libo ka Tuig nga Paggahom ni Cristo, dalhon ni Jesus kag sang iya 144,000 ka masigkamanuggahom ang duta kag ang katawhan padulong sa kahimtangan nga gintuyo sang Dios. (Bugna 14:​1; 20:​1-6) Tion na agod pamatud-an naton nga ang aton kabuhi nasentro sa paghimo sang kabubut-on ni Jehova nga Dios. Sa baylo nga pakamatarungon ang aton kaugalingon sa Dios kag palabihon ang aton mga interes, tion na agod ‘magpahuway kita sa aton mga hilikuton’ kag bug-os tagipusuon nga mag-alagad sa intereses sang Ginharian. Paagi sa paghimo sina kag pagpabilin nga matutom sa aton langitnon nga Amay, si Jehova, matigayon naton ang mga benepisyo sang kapahuwayan sang Dios karon kag sa walay katubtuban.

Mapaathag Mo Bala?

◻ Ngaa nagpahuway ang Dios sa “ikapito nga adlaw”?

◻ Anong kapahuwayan ang natigayon kuntani sang mga Israelinhon, apang ngaa wala sila makasulod sa sini?

◻ Ano ang aton himuon agod makasulod sa kapahuwayan sang Dios?

◻ Paano nga ang pulong sang Dios buhi, gamhanan, kag matalom pa sa bisan ano nga espada nga duha sing sulab?

[Retrato sa pahina 16]

Ginsunod sang mga Israelinhon ang Adlaw nga Inugpahuway, apang wala sila makasulod sa kapahuwayan sang Dios. Nahibaluan mo bala kon ngaa?