Malauman ang Paraiso Walay Sapayan sang Paglalis sang Tawo

 1. Sa pagligad sang tion, sa diin makita ang nahauna nga lalaki kag babayi kag sa anong mga palibot?

NAGLIGAD ang tion. Ang nahaunang lalaki kag babayi indi na hubo nga walay hinalung-ong. May panapton na sila​—⁠ang malaba nga mga panapton gikan sa panit sang sapat. Yara sila sa guwa malapit sa alagyan padulong sa himpit nga hardin sang Eden. Nagatalikod sila sa hardin. Nagatulok sila sa palaabuton. Ang makita lamang nila amo ang wala mapanguma nga duta. Maathag nga wala ini ginpakamaayo sang Dios. Makita nila ang mga sapinit kag mga ragiwriw. Indi bala amo ini ang duta nga ginapagamhan sa ila? Huo, apang ang nahaunang lalaki kag babayi wala dira sa guwa agod pasangkaron ang hardin sang Eden sa sinang wala mapanguma nga duta.

 2. Ngaa ang lalaki kag ang babayi wala magtinguha sa pagsulod liwat sa hardin sang Paraiso?

² Sa sinang tuhay gid nga talan-awon, ngaa wala sila magbalikid kag magsulod liwat sa hardin sang Paraiso? Mahapos ini ipanugda, apang tan-awa kon ano ang yara sa likod nila sa alagyan sang hardin. Mga tinuga nga wala nila makit-i anay, bisan sa sulod sang hardin, ang mga querubin, kag ang nagadabdab nga espada nga nagatiyog. Ang lalaki kag babayi indi makaagi sa sini nga buhi padulong sa hardin!​—⁠Genesis 3:⁠24.

 3. Ano ang natabo nga nagbalhin sing hinali sang mga kahimtangan sang nahaunang mag-asawa?

³ Ano ang natabo? Indi ini isa ka misteryo nga tuman kasibod agod magpalibog sa siensya sa sulod sang linibo ka tuig. Simple lamang ang paathag. Matigayon sang nahaunang lalaki kag babayi ang dalayawon nga paglaum nga ginsugo sang Dios sa ila sa adlaw sang ila kasal sa kondisyon nga tumanon nila ang ila langitnon nga Amay sa pinakadiutay nga butang. Ang ila himpit nga pagkamatinumanon pagatilawan paagi sa isa lamang ka pagdumili sa pagkaon: Indi nila dapat pagkaunon ang bunga sang “kahoy sa pagkilala sang maayo kag malain.” (Genesis 2:​16, 17) Kon lalison nila ang sugo sang Dios, mapatay sila nga totoo. Amo sina ang ginsiling ni Adan, subong manalagna sang Dios, sa iya asawa, nga mas hoben sa iya. Apang sing makapakibot, ginpanghiwala sang na·chashʹ, ang man-ug, ang pagkamaminatud-on sang ginsiling sang Dios kay Adan sa Iya paandam batok sa pagkaon gikan sa ginadumilian nga “kahoy sa pagkilala sang maayo kag malain.” Ginlimbungan sang man-ug ang babayi sa pagpati nga kon lalison niya ang sugo sang Dios kag magkaon sang ginadumilian nga bunga mangin kaangay sia sang Dios kag mangin independiente na sia sa Dios sa pagdesisyon kon ano ang maayo kag malain.​—⁠Genesis 3:​1-5.

Indi Mitolohiko nga Rekord

 4, 5. Paano ginapakita ni apostol Pablo nga ang rekord tuhoy sa paglimbong sang man-ug sa nahaunang babayi indi mito?

⁴ Daw indi mapatihan? Daw isa bala ina ka mito, isa ka leyenda nga wala napasad sa mga kamatuoran kag busa indi mabaton sang nasanagan nga mga panghunahuna sang mga adulto sa karon? Indi, indi para sa isa ka ginabasa gihapon sing lapnag nga manunulat, isa ka masaligan nga manunulat, isa ka apostol nga ginpili sing pinasahi, nga nakahibalo sang pagkahusto sang iya ginsulat. Sa kongregasyon sang adulto nga mga Cristiano sa kalibutanon nga siudad sang Corinto, ining si apostol Pablo nagsulat: “Nagakahadlok ako nga subong nga ang man-ug sa iya kadaya naglimbong kay Eva, ang inyo mga hunahuna patalangon gikan sa hanuot kag putli nga katutom kay Cristo.”​—⁠2 Corinto 11:⁠3.

⁵ Mabudlay matabo nga si Pablo magpatuhoy sa isa ka mito, isa ka himohimo nga sugilanon, kag himuon inang ginahanduraw lamang nga butang sa pagpalig-on sang iya punto sa sadtong mga Cristiano, nga nakahibalo gid sang mga mito sang paganong Griegong relihion. Nagbalikwat gikan sa inspirado nga Hebreong Kasulatan, nga iya gindeklarar subong “ang pulong sang Dios,” ginpamatud-an ni apostol Pablo nga “ang man-ug sa iya kadaya naglimbong kay Eva.” (1 Tesalonica 2:13) Dugang pa, sang nagasulat sa isa ka Cristianong manugtatap nga may katungdanan sa pagtudlo sang “huwaran sang maayong mga pulong,” si apostol Pablo nagsiling: “Si Adan ginhimo sing una, ugaling si Eva. Subong man, si Adan wala malimbungi, apang ang babayi nalimbungan kag nagmalinapason.”​—⁠2 Timoteo 1:​13; 1 Timoteo 2:​13, 14.

 6. (a) Paano ang paglapas ni Adan sa Dios tuhay sa paglapas sang babayi? (b) Ngaa mapat-od naton nga ang babayi wala nagahimohimo sing sugilanon nahanungod sa man-ug?

⁶ Ang paglimbong sang man-ug sa babayi isa ka kamatuoran, indi isa ka mito, subong nga ang mga resulta sang iya malalison nga pagkaon gikan sa ginadumilian nga bunga malig-on nga mga kamatuoran sang maragtas. Sa tapos makasala batok sa Dios, ginhaylo niya ang iya bana nga magkaon upod sa iya, apang ang iya pagkaon indi bangod nalimbungan man sia. (Genesis 3:6) Ang kasaysayan tuhoy sa ila pagpanabat sa Dios sang ulihi nagasiling: “Kag ang lalaki nagsiling: ‘Ang babayi nga ginhatag mo nga mangin kaupod ko, ginhatagan niya ako gikan sa kahoy kag nagkaon ako.’ Nian si Jehova nga Dios nagsiling sa babayi: ‘Ano ining nahimo mo?’ Sa sini ang babayi nagsabat: ‘Ang man-ug​—⁠gindayaan niya ako, kag nagkaon ako.’ ” (Genesis 3:​12, 13) Wala ginhimohimo sang babayi ang sugilanon nahanungod sadtong na·chashʹ, yadtong man-ug, kag wala gintamod ni Jehova nga Dios ang iya paathag nga isa ka ginhimohimo nga sugilanon, isa ka mito. Nagpati sia nga yadtong man-ug nangin isa ka instrumento sa paglimbong sa babayi nga lapason Sia, ang iya Dios kag Manunuga. Makapanubo para sa Dios nga sapakon niya ang isa lamang ka mitolohiko nga man-ug.

 7. (a) Paano ginalaragway sang rekord sang Biblia ang paghukom sang Dios sa man-ug? (b) Paano ang man-ug nga naglimbong sa nahaunang babayi makalimbong man sa aton? (Ilakip ang komento sa footnote.)

⁷ Sa paglaragway sang paghukom sang Dios sa sadtong man-ug sa hardin sang Eden, ang rekord nagasiling: “Kag nagsiling si Jehova nga Dios sa man-ug: ‘Bangod nga naghimo ikaw sini, pinakamalaut ka labi sa tanan nga kahayupan kag labi sa tagsa ka sapat sang latagon. Magalakat ka nga nagasaug sa imo tiyan kag magakaon ka sang yab-ok sa tanan nga mga adlaw sang imo kabuhi. Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Sia magadugmok sang imo ulo kag dugmukon mo ang iya tikod.’ ” (Genesis 3:​14, 15) Ang bisan anong maligdong nga korte nagabinagbinag sang mga kamatuoran kag nagakuha sang matuod nga ebidensia, indi sang mga leyenda. Si Jehova nga Dios wala nagahimo sang iya kaugalingon nga buangbuang sa paghatag sing pamatbat sa isa ka mitolohiko nga man-ug kundi naghatag sia sing paghukom sa isa ka matuod, nagaluntad nga tinuga nga may salabton. Mangin, indi kaladlawan, kundi makapasubo kon ina gihapon nga man-ug maglimbong sa aton sa paghunahuna nga wala gid sia nagaluntad, nga sia isa lamang ka mito, nga sia wala sing salabton sa bisan anong sayop sa duta.⁠a

 8. Ano nga paghukom ang ginpamatbat sang Dios sa babayi, kag ano ang resulta sini sa iya mga anak nga babayi kag mga apo nga babayi?

⁸ Nagakabig sang ginsiling sang babayi nga nagdalahig sa man-ug subong kamatuoran, ang rekord tuhoy sa asawa sang lalaki nagasiling: “Sa babayi nagsiling sia: ‘Padamuon ko sing tama ang kasakit sang imo pagdala; sa kasakit magapanganak ka, kag ang imo handum mangin sa imo bana, kag sia magagahom sa imo.’ ” (Genesis 3:16) Wala sing subong sini nga nalakip sa pagpakamaayo sang Dios sa iya pagpakasal kay Adan sang magsiling ang Dios sa ila: “Magmabungahon kag magbuad kag magtugob sang duta.” (Genesis 1:28) Yadtong ginpakamaayo nga komisyon para sa himpit nga tawhanon nga mag-asawa nagpakita nga ang babayi magamabdos sing makapila apang wala sing daku nga kabudlayan kag sobra nga kasakit sa pagpanganak kag indi sia pagpiguson sang iya bana. Ining pamatbat sa naglapas nga babayi magaapektar sa iya mga anak nga babayi kag mga apo nga babayi sa kaliwatan kag kaliwatan.

Ang Kasuguan sang Dios Ginpadaku sang Pamatbat Batok kay Adan

 9, 10. (a) Anong paandam ang direkta nga ginhatag sang Dios kay Adan, kag ano ang mangin mga resulta kon estrikto nga ipatuman sang Dios ina nga silot? (b) Ano ang paghukom sang Dios batok kay Adan?

⁹ Apang, anong nagbalhin nga kahimtangan ang maambitan man sang babayi upod sa lalaki nga iya ginhaylo sa pagbuylog sa iya paglapas? Sa sining lalaki, ang Dios direkta nga nagsiling: “Tuhoy sa kahoy sa pagkilala sang maayo kag malain indi ka dapat magkaon gikan sa sini, kay sa adlaw nga magkaon ka gikan sa sini mapatay ka nga totoo.” (Genesis 2:17) Ipatuman gid bala sang Dios, nga Hukom, yadtong pamatbat bangod lamang sang pagkaon ni Adan sing isa ka bunga? Hunahunaa kon ano ang mangin kahulugan sadto nga silot! Laglagon sini ang makapahulag nga paglaum nga ginbinagbinag ni Adan kag ni Eva sang adlaw sang ila kasal, ang paglaum nga matugob ang bug-os nga duta sang ila mga anak, isa ka himpit nga kaliwat sang tawo nga nagapuyo sing malinong sa paraiso nga duta sing dayon nga nagapabilin nga pamatan-on, kag may mahidaiton nga relasyon sa ila Dios kag langitnon nga Amay! Sa pagkamatuod, indi pagpaslawon sang Dios ang iya dalayawon nga katuyuan para sa katawhan kag para sa dutan-on nga puluy-an sang tawo paagi sa estrikto nga pagpatuman sang silot nga kamatayon sa nahauna nga tawhanon nga mga ginikanan sang tanan nga katawhan! Apang pamatii ang balaan nga mando subong maathag nga narekord sa Biblia:

¹⁰ “Kag sa kay Adan nagsiling sia, ‘Bangod nga nagpamati ka sa tingog sang imo asawa kag nagkaon gikan sa kahoy nga tuhoy sini nagsugo ako sa imo, “Dili ka magkaon gikan sa sini,” pinakamalaut ang duta bangod sa imo. Magakaon ka gikan sa iya nga may pangabudlay sa tanan nga adlaw sang imo kabuhi. Magapatubo ini sa imo sing mga sapinit kag mga ragiwriw, kag magakaon ka sang gamhon sang latagon. Sa balhas sang imo nawong magakaon ka sing kalan-on tubtob nga magbalik ka sa duta, kay ginkuha ka sa iya. Yab-ok ka, kag sa yab-ok magabalik ka.’ ”​—⁠Genesis 3:​17-19.

11. Anong mga kamatuoran tuhoy sa pagkamatinumanon ang nagailustrar sang pagkatakus sang paghukom sang Dios batok kay Adan?

¹¹ Yadto nga paghukom nagkahulugan sang paghikot sing silot nga kamatayon sa tawo walay sapayan sang mangin resulta sini sa katuyuan sang Dios nga ang paraiso nga duta matugob sing himpit nga mga lalaki kag mga babayi nga nagapuyo sing mahigugmaon kag malinong kag nagapanguma kag nagaatipan sang bug-os duta nga Paraiso nga hardin sing dayon. Namati ang lalaki sa tingog sang iya asawa sa baylo sang Dios nga nagsugo sa iya nga indi magkaon gikan sa ginadumilian nga “kahoy sa pagkilala sang maayo kag malain.” Kag kon sia mismo wala magtuman sa tingog sang iya Dios kag Manunuga, tudluan bala niya ang iya mga anak sa paghimo sini? Ang iya bala huwaran mangin isa ka nagahambal nga sadsaran sa pagtudlo sa ila nga tumanon si Jehova nga Dios?​—⁠Ipaanggid ang 1 Samuel 15:⁠22.

12, 13. (a) Paano ang sala ni Adan magaapektar sa iya mga anak? (b) Ngaa indi takus si Adan nga magkabuhi sing dayon sa Paraiso ukon bisan sa duta?

¹² Tumanon ayhan sang mga anak ni Adan ang kasuguan sang Dios sing himpit, subong nahimo na niya anay sang himpit pa sia? Paagi sa pagpanghikot sang kasuguan sang pagpanubli, indi bala niya mapaliton sa iya mga anak ang iya kaluyahon kag ang huyog sa paglalis sa tingog sang Dios kag mamati sa iban nga tingog? Ang matuod nga maragtas nagahatag sing mga sabat sa sining mga pamangkot.​—⁠Roma 5:⁠12.

¹³ Takus bala yadto nga sahi sang tawo nga, bangod lamang sa isa ka tawhanon nga tinuga, nagtalikod gikan sa himpit nga pagtuman sa Dios subong ekspresyon sang himpit nga gugma sa Dios, nga magkabuhi sing dayon sa Paraiso ukon bisan sa duta man lang? Wala bala sing peligro kon tugutan sia nga mabuhi sing dayon sa duta? Ang pagtugot bala sa iya nga magkabuhi sing dayon sa duta walay sapayan sang iya paglapas magapadaku sa kasuguan sang Dios kag magapasundayag sang Iya bug-os nga hustisya, ukon magatudlo bala ini sing indi pagtahod sa kasuguan sang Dios kag magapahangop nga ang pulong sang Dios indi masaligan?

Gintabog Gikan sa Hardin sang Eden

14. Paano ginalaragway sang Biblia ang paghikot sang Dios batok kay Adan kag sa iya asawa?

¹⁴ Ang rekord sang Biblia nagasugid sa aton kon paano gindesisyonan sang Dios ining mga butang: “Kag si Jehova naghimo kay Adan kag sa iya asawa sing malaba nga mga panapton nga panit kag ginpapanaptan sila. Kag si Jehova nga Dios nagsiling: ‘Yari karon, ang tawo nangin subong sang isa sa aton sa pagkilala sang maayo kag malaut, kag karon basi nga idab-ot niya ang iya kamot kag magkuha man sing bunga gikan sa kahoy sang kabuhi kag magkaon kag magkabuhi sing dayon,​—⁠’ Sa amo gintabog sia ni Jehova nga Dios gikan sa hardin sang Eden sa pagpanguma sang duta nga ginkuhaan sa iya. Gani gintabog niya ang tawo kag ginbutang niya sa sidlangan sang hardin sang Eden ang mga querubin kag ang nagaidlab nga espada nga nagabalabad, sa pagbantay sang dalan padulong sa kahoy sang kabuhi.”​—⁠Genesis 3:​21-24.

15. (a) Paano ang Dios nagpakita sing konsiderasyon sa kahuya nga ginbatyag ni Adan kag sang iya asawa bangod hubo sila? (b) Paano gintabog ang nahaunang mag-asawa gikan sa hardin sang Eden? (c) Anong nagbalhin nga mga kahimtangan ang nag-atubang kay Adan kag sa iya asawa sa guwa sang hardin sang Eden?

¹⁵ Ang balaan nga Hukom nagpakita sing konsiderasyon sa kahuya nga ginbatyag karon sang nakasala nga si Adan kag ang iya asawa nga hubo sila. Sa pila ka paagi nga wala masambit, gin-amanan niya sila sing malaba nga mga panapton nga panit sa pag-ilis sa ginsugponsugpon nga mga dahon sang higuera sa ila balikawang nga ginhimo nila para sa ila kaugalingon. (Genesis 3:7) Ang panit nga mga panapton mas magadugay kag magahatag sa ila sing kapin nga proteksion batok sa mga ragiwriw kag mga sapinit kag iban pa nga masakit nga mga butang sa guwa sang hardin sang Eden. Bangod sang malain nga konsiensia sa tapos sila makasala, nagtinguha sila sa pagpanago gikan sa panulok sang Dios sa tunga sang mga kahoy sang hardin sang Eden. (Genesis 3:8) Karon, sa tapos sila mapamatbatan, nakaeksperiensia sila sing pila ka porma sang pag-ipit sang Dios bangod gintabog sila paguwa sa hardin sang Dios. Gintabog sila sa sidlangan nayon, kag wala madugay nasapwan nila ang ila kaugalingon sa guwa sang hardin, kag ginadumilian sila sing dayon sa pagsulod sa sini. Indi na sila magpanghikot agod padakuon yadtong hardin kag pasangkaron ang Paraiso nga mga kahimtangan tubtob sa mga ukbong sang duta. Kutob karon, magakaon sila sing tinapay nga ginluto gikan sa mga tanom sang latagon, apang indi ini magasakdag sa ila sing dayon sa pagkabuhi subong tawo. Gin-utod sila gikan sa “kahoy sang kabuhi.” Sa tapos sang pila ka tion​—⁠daw ano kalawig?⁠—​dapat sila mapatay!

Ang Orihinal nga Katuyuan ni Jehova Indi Malutos

16. Ano ang wala gintuyo sang Dios nga himuon, kag ngaa?

¹⁶ Nagapamat-od bala karon ang Dios nga laglagon ang duta, upod ang bulan kag ang adlaw kag ang mga bituon, paagi sa isa ka sunog sa bug-os nga uniberso bangod ining duha ka tinuga gikan sa yab-ok nagpakasala batok sa iya? Kon himuon niya ina, indi bala ini magakahulugan nga nalutos sia sa iya mahimayon nga katuyuan, bangod lamang sang ginsugdan sang na·chashʹ? Mabungkag bala sang isa ka man-ug lamang ang tanan nga katuyuan sang Dios? Ginpabutyag niya ang iya katuyuan kay Adan kag kay Eva sang adlaw nga ginkasal sila sang ginpakamaayo niya sila kag ginsugiran sila kon ano ang kabubut-on niya para sa ila: tugbon ang bug-os nga duta sing himpit nga kaliwatan sang tawo, kag ang bug-os nga duta ginagamhan nga may kahimpitan sang hardin sang Eden, kag ang tanan nga katawhan mahidaiton nga nagagahom sa tanan nga mas manubo nga mga tinuga sa duta kag sa tubig. Ang makadalayaw nga palanan-awon sang katuyuan sang Dios natuman, ang mga paghanda para sa sini nga ginhimo niya sa anom ka adlaw sang pagpanuga sang nagligad nga kapin sa duha ka libo ka tuig! Indi bala karon pagtumanon ining makadalayaw nga katuyuan bangod lamang sang isa ka man-ug kag sang paglapas sang nahaunang tawhanon nga mag-asawa? Indi amo sina!​—⁠Ipaanggid ang Isaias 46:​9-11.

17. Determinado ang Dios nga himuon ang ano tuhoy sa ikapito nga adlaw, kag paano matapos ining adlaw?

¹⁷ Adlaw pa sadto sang pahuway ni Jehova nga Dios, ang ikapito nga adlaw. Ginpat-od niya nga pakamaayuhon yadto nga adlaw kag ginhimo niya ini nga balaan. Indi niya pagtugutan ang bisan ano nga himuon ini nga isa ka ginpakamalaut nga adlaw, kag pamatukan niya ang bisan anong kalautan nga planuhon sang bisan sin-o batok sa sina nga adlaw sang iya pahuway kag baliskaron ini, agod ang adlaw matapos nga isa ka pagpakamaayo. Biyaan sini ang bug-os nga adlaw subong isa ka balaan nga duog, kag ang kabubut-on sang Dios ginahimo diri sa duta subong sang sa langit sang isa ka kaliwatan sang himpit nga mga tawo.​—⁠Ipaanggid ang Mateo 6:⁠10.

18, 19. (a) Ngaa makakalipay ang nagaantos nga mga kaliwat sang makasasala nga nahaunang mag-asawa? (b) Ano ang ipaathag sang dugang pa nga mga kolumna sang Ang Lalantawan?

¹⁸ Ang Dios wala mapaslawi. Wala niya pagbiyai ang iya katuyuan. Determinado sia nga ibindikar ang iya kaugalingon subong bug-os nga masaligan nga Isa nga nagatuyo kag nagatuman sing bug-os sang iya ginatuyo, kag ang tanan nga kadungganan para sa iya. (Isaias 45:18) Ang dihimpit kag nagaantos nga mga kaliwat sang makasasala nga nahaunang mag-asawa makakalipay kag makapaabot sang matutom nga pagtuman sang Dios sang iya orihinal nga katuyuan nga may walay katapusan nga kaayuhan para sa ila. Mga milenyo na sang iya adlaw sang pagpahuway ang nagligad, kag mahimo gid nga malapit na ang katapusan nga bahin sang adlaw nga makaagom sang iya pinasahi nga pagpakamaayo. Ang “gab-i” sang iya adlaw sang pagpahuway nagaligad, kag subong sang sa tanan nga nagligad nga anom ka adlaw sang pagpanuga, ang “aga” dapat mag-abot. Kon ining “aga” makalab-ot sa iya kahimpitan kag maathag nga makita sang tanan ang mahimayaon nga katumanan sang wala nagabalhin nga katuyuan sang Dios, mangin posible nga isulat ini sa rekord: ‘Kag may kagab-ihon kag may kaagahon, ikapito nga adlaw.’ Isa sa pagkamatuod ka makadalayaw nga paglaum!

¹⁹ Ini tanan makakulunyag hunahunaon! Kag sa dugang pa nga mga kolumna sang Ang Lalantawan, dugang pa ang ihambal nahanungod sa makalilipay nga mga paglaum sa Paraiso para sa matinumanon nga mga tawo, mga mahigugmaon sa kasuguan sang Dios.

[Footnote]

Ano ang Isiling Mo?

◻ Ngaa nadula sang nahaunang mag-asawa ang ila Paraiso nga puluy-an?

◻ Ngaa nahibaluan naton nga ang paglimbong sang man-ug kay Eva indi isa ka mito?

◻ Ano ang ginpamatbat sang Dios sa babayi?

◻ Ano ang ginpamatbat sang Dios kay Adan, kag ngaa ginpadaku sini ang kasuguan sang Dios?

◻ Ngaa wala mapaslawi ang Dios tuhoy sa iya katuyuan nga tugbon ang duta sing himpit nga mga tawo sa Paraiso?