Ano ang Imo Mangin Palaabuton?

KON ang Labing Gamhanan nga Dios nakahibalo sang tanan, sang nagligad, sang karon, kag sang palaabuton, ang tanan bala nga butang napat-od na nga dapat matabo suno sa napanan-aw niya? Kon ang katapusan nga madangatan sang tagsa ka tawo napanan-aw na nga daan kag ginabuot sang Dios, masiling bala sing pat-od nga hilway kita sa pagpili sang aton dalanon sa kabuhi, nga amo ang aton palaabuton?

Ining mga pamangkot ginabaisan sa sulod sang mga siglo. Ang pagbinais nagabahinbahin gihapon sa dalagku nga mga relihion. Ang ikasarang bala sang Dios sa paghibalo nga daan sa palaabuton nahisanto gid sa hilway nga pagbuot sang tawo? Sa diin naton masapwan ang mga sabat?

Minilyon ka tawo sa bug-os nga kalibutan ang nagaugyon nga ang Dios nagpakighambal sa katawhan paagi sa iya nasulat nga Pulong nga ginpaalinton sang iya mga tiglawas, ang mga manalagna. Halimbawa, ang Koran nagapatuhoy sa mga kapahayagan subong naghalin sa Dios: ang Taurāh (Torah, ang Kasuguan, ukon lima ka libro ni Moises), ang Zabūr (ang Mga Salmo), kag ang Injīl (ang Ebanghelyo, Cristianong Griegong Kasulatan, ukon “Bag-ong Testamento”), subong man ang ginpahayag sa mga manalagna sa Israel.

Sa Cristianong Griegong Kasulatan, aton mabasa: “Ang tanan nga Kasulatan ginbugna sang Dios kag mapuslanon sa pagpanudlo, sa pagsabdong, sa pagtadlong sang mga butang.” (2 Timoteo 3:​16) Sing hayag, ano man nga pagtuytoy ukon pagpasanag nga aton ginabaton nagagikan sa Dios mismo. Indi bala maalamon nga usisaon ang mga sinulatan sang mga manalagna sang Dios sang una? Ano ang ila ginapahayag para sa aton palaabuton?

Nasulat sing Abanse nga Palaabuton

Ang bisan sin-o nga nakabasa sang Balaan nga Kasulatan nakahibalo nga nagaunod gid ini sing ginatos ka tagna. Ang maragtason nga mga hitabo kaangay sang pagkapukan sang dumaan nga Babilonia, ang pagpatindog liwat sa Jerusalem (ikan-om tubtob ikalima nga siglo B.C.E.), ang paggahom kag ang pagkapukan sang dumaan nga mga hari sang Medo-Persia kag Gresya gintagna tanan sing detalyado. (Isaias 13:​17-⁠19; 44:​24–​45:1; Daniel 8:​1-7, 20-⁠22) Ang katumanan sinang mga tagna isa sang mabakod nga mga pamatuod nga ang Balaan nga Kasulatan matuod gid nga Pulong sang Dios, kay ang Dios gid lang ang may gahom sa pagpanan-aw kag sa pagpat-od kon ano ang matabo sa palaabuton. Sa sining kahulugan ang Balaan nga Kasulatan nagarekord matuod sang palaabuton nga nasulat sing abanse.

Ang Dios mismo nagpahayag: “Ako ang Balaan nga Isa kag wala sing iban pa nga Dios, kag wala na gid sing kaangay sa akon; ang Isa nga nagasugid sang katapusan kutob sa ginsuguran, kag kutob sa dumaan nga mga tion sang mga butang nga wala pa mahimo; ang Isa nga nagasiling, ‘Ang akon tinutuyo magapadayon, kag himuon ko ang tanan ko nga luyag’ . . . Nagpamulong ako; kag pahanabuon ko man ini. Ginbuko ko, kag himuon ko man ini.” (Isaias 46:​9-⁠11; 55:​10, 11) Ang ngalan nga ginpakilala sang Dios sa iya dumaan nga mga manalagna amo ang Jehova, nga sa literal nagakahulugan sing “Sia nga Nagapahanabo nga Mangin Amo.”a (Genesis 12:​7, 8; Exodo 3:​13-​15; Salmo 83:18) Ang Dios nagapahayag sang iya kaugalingon subong amo ang Isa nga Manugtuman sang iya pulong, ang Isa nga nagatuman pirme sang iya mga katuyuan.

Sa amo, ginagamit sang Dios ang iya gahom nga mahibal-an sing abanse ang matabo agod tumanon ang iya mga katuyuan. Masami niya ini gingamit agod paandaman ang malauton sa paghukom nga magaabot subong man sa paghatag sing paglaum nga kaluwasan para sa iya mga alagad. Apang gingamit bala sang Dios ining gahom sing walay latid? May yara bala pamatuod sa Balaan nga Kasulatan sang mga butang nga ginpili sang Dios nga indi paghibaluon sing una?

Nahibaluan Bala nga Daan sang Dios ang Tagsa ka Butang?

Ang tanan nga argumento nga nagasakdag sa predestinasyon napasad sa haumhaum nga tungod ang Dios dimapanghiwala nga may gahom sa paghibalo sing abanse sang matabo kag sa pagpat-od sang mga hitabo sa palaabuton, dapat nahibaluan niya sing una ang tagsa ka butang, lakip ang pagahimuon sang kada isa sa palaabuton. Apang, ining haumhaum makatarunganon gid bala? Kabaliskaran ang ginapahayag sang Dios sa iya Balaan nga Kasulatan.

Halimbawa, ang Kasulatan nagasiling nga “gintilawan sang Dios si Abraham” paagi sa pagsugo sa iya nga ihalad ang iya anak nga si Isaac subong halad nga sinunog. Sang palatyon na ni Abraham si Isaac, ginpunggan sia sang Dios kag nagsiling: “Karon ako nakahibalo nga ikaw mahinadlukon sa Dios kay wala mo gindingot ang imo anak, ang imo bugtong nga anak, sa akon.” (Genesis 22:​1-​12) Ihambal bala ina sang Dios kon nahibaluan niya nga daan nga tumanon ni Abraham ang iya sugo? Isa bala yadto ka bunayag nga pagtilaw?

Dugang pa, ang dumaan nga mga manalagna nagasugid nga ang Dios sulitsulit nga naghambal tuhoy sa iya kaugalingon subong ‘nagbatyag sing kalisod’ sa butang nga iya nahimo ukon ginahunahuna nga himuon. Halimbawa, ang Dios nagsiling nga sia “nagkalisod” [gikan sa Hebreo nga na·chamʹ] nga ginhimo niya si Saul nga hari sa ibabaw sang Israel.” (1 Samuel 15:​11, 35; ipaanggid ang Jeremias 18:​7-​10; Jonas 3:​10.) Bangod ang Dios himpit, ining mga bersikulo wala nagapahangop nga ang Dios nagsala sa pagpili kay Saul nga mangin unang hari sang Israel. Sa baylo, ginapakita sini nga ang Dios nagkalisod nga si Saul nangin walay pagtuo kag dimatinumanon. Ang paghambal sang Dios sina tuhoy sa iya kaugalingon mangin kabuangan kon nahibaluan niya nga daan ang pagahimuon ni Saul.

Amo man nga tinaga ang makita sa labing dumaan nga bahin sang Kasulatan diin sa pagpatuhoy sa mga adlaw ni Noe, ini nagasiling: “Si Jehova nagbatyag sing kalisod nga gintuga niya ang tawo sa duta, nagpasakit ini sa iya tagipusuon. Tungod sina si Jehova nagsiling: ‘Laglagon ko gikan sa kadaygan sang duta ang mga tawo nga akon gintuga . . . bangod nagkalisod ako nga ginhimo ko sila.’ ” (Genesis 6:​6, 7) Ginapakita diri liwat, nga wala ginapat-od nga daan sang Dios ang ginahimo sang tawo. Ang Dios nagbatyag sing kalisod, kasubo, kag sing kasakit pa gani, indi bangod kay sayop ang iya ginhimo, kundi bangod nagdamo ang kalautan nga ginahimo sang tawo. Ang Manunuga nagkalisod nga nangin kinahanglanon nga laglagon ang tanan nga katawhan luwas kay Noe kag sa iya pamilya. Ang Dios nagapasalig sa aton: ‘Wala ako nagakalipay sa kamatayon sang malauton.’​—Ezequiel 33:11; ipaanggid ang Deuteronomio 32:​4, 5.

Gani daan na bala nga nahibaluan kag ginabuot pa gani sang Dios ang pagpakasala ni Adan, subong man ang malaglagon nga resulta nga pahanabuon sini sa tawhanon nga pamilya? Ginapakita sang ginbinagbinag naton nga indi ini matuod. Dugang pa, kon nahibaluan nga daan sang Dios ining tanan, sia kuntani ang nangin awtor sang sala sang ginhimo niya ang tawo kag ang Dios amo ang mangin balasulon sang tanan nga kalautan kag pag-antos sang tawo. Maathag nga indi ini mapahisanto sa kon ano ang ginapahayag sang Dios nahanungod sa iya kaugalingon sa Kasulatan. Sia isa ka Dios sang gugma kag hustisya nga nagadumot sa kalautan.​—Salmo 33:5; Hulubaton 15:9; 1 Juan 4:⁠8.

Ang Duha ka Madangatan sang Tawo

Wala ginapahayag sang Balaan nga Kasulatan nga ang aton palaabuton daan na nga nahibaluan, ukon ginpat-od, sang Dios. Sa baylo, ginapahayag sini nga ang Dios nagtagna sing duha lamang ka posible nga madangatan sang tawo. Ang Dios naghatag sa tagsa ka tawo sing hilway nga pagbuot sa pagpili kon ano ang iya madangatan. Ang manalagna nga si Moises sang una nagpahayag sa mga Israelinhon: “Nabutang ko sa atubangan mo ang kabuhi kag kamatayon, . . . kag pilia ang kabuhi agod nga mabuhi ka, ikaw kag ang imo mga kaliwatan, sa paghigugma kay Jehova nga imo Dios, sa pagpamati sang iya tingog kag sa pagpabilin sa iya; kay sia imo kabuhi kag kalawigon sang imo mga adlaw.” (Deuteronomio 30:​19, 20) Ang manalagna sang Dios nga si Jesus nagpaandam: “Sulod kamo sa gawang nga makitid kay masangkad ang gawang kag malapad ang dalan nga nagapadulong sa kalaglagan, kag madamo ang nagasulod sa sini; kay makitid ang gawang kag masipot ang dalan nga nagapadulong sa kabuhi, kag pila lamang ang nakatultol sa sini.” (Mateo 7:​13, 14) Duha ang dalan, gani duha ang madangatan. Ang aton palaabuton nagadepende sa aton ginahimo. Ang pagtuman sa Dios nagakahulugan sing kabuhi, ang pagkadimatinumanon sa iya nagakahulugan sing kamatayon.​—Roma 6:​23.

Ang Dios “nagasiling sa katawhan nga sila tanan bisan diin dapat maghinulsol. Bangod nga nagtangdo sia sing isa ka adlaw nga katuyuan niya nga hukman ang ginapuy-an nga duta sa pagkamatarong.” (Binuhatan 17:​30, 31) Subong nga ang kalabanan nga katawhan sang adlaw ni Noe wala magtuman sa Dios kag nalaglag, amo man sa karon ang kalabanan wala nagatuman sa mga kasuguan sang Dios. Apang, ang Dios wala pa gid nagpat-od kon sin-o ang pagalaglagon kag kon sin-o ang pagaluwason. Sa katunayan, ang Pulong sang Dios nagasiling nga “wala [sia] nagahandum nga malaglag ang bisan sin-o kundi nagahandum nga ang tanan makadangat sa paghinulsol.” (2 Pedro 3:⁠9) Bisan ang tuman kalaut nga tawo mahimo maghinulsol, magmatinumanon, kag maghimo sing kinahanglanon nga mga pagbag-o agod kahamut-an sang Dios.​—Isaias 1:​18-​20; 55:​6, 7; Ezequiel 33:​14-​16; Roma 2:​4-8.

Sa mga matinumanon, ang Dios nagasaad sing kabuhi nga walay katapusan sa mahidaiton nga paraiso, isa ka duta nga wala na gid sing kalautan, kasingki, kag inaway, isa ka kalibutan nga wala na sing gutom, pag-antos, balatian, kag kamatayon. (Salmo 37:​9-​11; 46:9; Isaias 2:4; 11:​6-9; 25:​6-8; 35:​5, 6; Bugna 21:⁠4) Bisan ang mga patay pagabanhawon kag hatagan sing kahigayunan nga mag-alagad sa Dios.​—Daniel 12:2; Juan 5:​28, 29.

“Bantayi ang isa nga wala sing kasawayan kag tan-awa ang isa nga matadlong,” siling sang salmista, “kay ang palaabuton sina nga tawo mangin mahidaiton. Apang ang malinapason pat-od gid nga laglagon sing tingob; ang palaabuton sang malauton nga katawhan utdon gid.” (Salmo 37:​37, 38) Ano ang imo mangin palaabuton? Yara ina sa imo. Ang manugbalhag sining magasin malipay sa paghatag sa imo sing dugang nga impormasyon nga makabulig sa imo sa pagtigayon sing isa ka malipayon, mahidaiton nga palaabuton.

[Footnote]

[Blurb sa pahina 6]

Ginagamit sang Dios ang iya gahom nga mahibal-an sing abanse ang matabo agod tumanon ang iya mga katuyuan

[Blurb sa pahina 8]

Ang Dios “wala nagahandum nga malaglag ang bisan sin-o kundi nagahandum nga ang tanan makadangat sa paghinulsol.” 2 Pedro 3:9

[Retrato sa pahina 7]

Kon nahibaluan na nga daan sang Dios nga si Abraham kinabubut-on nga maghalad sang iya anak, isa bala yadto ka bunayag nga pagtilaw?