Ang Kasangkaron sang Sala Pagapun-on

Paagi sa pagtuon tuhoy sa pagpakig-angot sang Dios sa katawhan sang una, matalupangdan naton nga masami niya ginapunggan ang iya paghukom tubtob nga wala na gid sing paglaum nga magbag-o. Halimbawa, may kaangtanan sa paghukom sang Dios sa mga Canaanhon, madugay na nga ginpatalupangod niya ang ila mga sala kay Abraham. Apang ang tion sang pagpatuman sang iya paghukom wala pa matabo sadtong tion. Ngaa? Ang Biblia nagasiling: “Bangod ang kasaypanan sang mga Amornon [Canaanhon] wala pa mapuno,” ukon suno sa badbad sang Knox nga bersion: “Ang kalautan sang mga Amornon wala pa mabug-os.”—Genesis 15:16.a

Apang, mga 400 ka tuig sang ulihi, nag-abot ang paghukom sang Dios, kag ang mga kaliwat ni Abraham, ang mga Israelinhon, nag-agaw sang duta. Pila lamang ka Canaanhon, subong ni Rahab kag sang mga Gabaonhon, ang naluwas bangod sang ila panimuot kag mga buhat, apang para sa kalabanan, nahimo nila ang tuman gid nga kahigkuan, subong ginapakita sang moderno nga mga kinutkutan sang arkeolohiya. Nagsimba sila sa mga simbulo sang kinatawo sang lalaki, nakighilawas sa templo, kag naghalad sing bata. Ang Halley’s Bible Handbook nagasiling: “Ang mga arkeologo nga nagkutkot sa kagulub-an sang mga siudad sang Canaan nagakatingala kon ngaa wala sila ginlaglag sang Dios sa gilayon sangsa ginhimo niya.” Sang ulihi, ang ‘kasangkaron sang sala [sang mga Canaanhon] napuno’; ang ila kalautan ‘nabug-os.’ Wala sing isa nga makasumbong sing makatarunganon nga ang Dios dimatarong sang gintugutan niya ang duta nga matinluan samtang ginluwas yadtong nagpakita sing nagakaigo nga panimuot.