Maghanda Para sa Kaluwasan Pasulod sa Bag-ong Kalibutan

“Dumduma ang asawa ni Lot.”​—⁠LUCAS 17:⁠32.

 1. Anong maragtason nga halimbawa sang balaan nga pagluwas ang ginapadaku sang aton leksion karon, kag paano kita makabenepisyo sa sini?

SA TAPOS masugid ang nahanungod sa makatilingala nga pagluwas nga ginhimo ni Jehova kay Noe kag sa iya panimalay, ginsambit ni apostol Pedro ang isa pa ka maragtason nga halimbawa. Ginpatalupangod niya ang pagluwas sa matarong nga si Lot sang ang Sodoma kag Gomorra ginsunog nga mangin abo, subong sang aton mabasa sa 2 Pedro 2:​6-8. Ang mga detalye gintipigan para sa aton kaayuhan. (Roma 15:4) Ang pagdumdom naton sa kon ano ang natabo may kahilabtanan sa sina nga pagluwas makabulig nga mangin yara kita sa linya nga pagaluwason pasulod sa bag-ong kalibutan sang Dios.

Kon Ano ang Aton Reaksion sa Pagkabuhi sang Kalibutan

 2. Ano nga pagginawi sa Sodoma kag Gomorra ang nagdul-ong sa paglaglag sa ila sang Dios?

² Ngaa ginlaglag yadto nga mga siudad kag ang ila mga pumuluyo? Ginsambit ni apostol Pedro ang pagpatuyang sa “maulagon nga pagginawi.” (2 Pedro 2:7) Pasad sa kahulugan sang Griego nga tinaga nga gingamit sa sina nga ekspresyon, ang mga taga-Sodoma kag Gomorra nabuyo sa sala amo kon ngaa nagpakita sila sing daku nga dipagtahod, bisan sing pasipala, sa kasuguan kag awtoridad. Ang Judas 7 nagasiling nga sila ‘naghimo sing pakighilawas kag nagpatuyang sa dinagakaigo nga kailigbon.’ Ang ila sobra kalain nga pagginawi nakita sang ginpalibutan sang mga lalaki sang Sodoma, “tingob ang pamatan-on kag tigulang, ang bug-os nga katawhan,” ang balay ni Lot kag nangabay nga paguwaon niya ang iya mga bisita agod mapaayawan sang mga lalaki sang Sodoma ang ila kailigbon sa unod. Kag ginbuyayaw nila si Lot bangod sang indi niya pagpasugot sa ila malaut nga mga pangabay.​—⁠Genesis 13:​13; 19:​4, 5, 9.

 3. (a) Paano nakaistar si Lot kag ang iya panimalay sa malaut nga palibot subong sang Sodoma? (b) Ano ang reaksion ni Lot sa maulag nga pagginawi sang mga tawo sa Sodoma?

³ Si Lot nagsaylo sadto anay malapit sa Sodoma bangod sang materyal nga kabuganaan sa sina nga lugar. Sang ulihi, nagsulod sia sa siudad kag didto nag-istar. (Genesis 13:​8-12; 14:​12; 19:1) Apang indi sia ugyon sa malaut nga pagginawi sang mga tawo sa siudad, kag ginatamod nila sia nga indi taga-dira, sing maathag bangod kay si Lot kag ang iya pamilya wala nagapakigbahin sa ila sosyal nga hilikuton. Subong sang ginasiling sang 2 Pedro 2:​7, 8: “Si Lot . . . ginsakit sing lakas sang maulagon nga paggawi sang mga malauton​—⁠kay yadtong tawo nga matarong nga nagapuyo sa tunga nila, sa pagtan-aw kag sa pagpamati, ginsakit ang iya matarong nga kalag adlaw-adlaw sang ila mga binuhatan nga malinapason.” Ina nga mga kahimtangan isa gid ka daku nga pagtilaw kay Lot bangod, subong isa ka tawo nga ­matarong, ginakangil-aran niya ina nga pagginawi.

 4. (a) Sa anong mga paagi ang mga kahimtangan karon kaangay sadtong sa dumaan nga Sodoma? (b) Kon kita kaangay ni Lot, ano ang aton reaksion sa karon malaut nga mga kahimtangan?

⁴ Sa aton man kaadlawan, nagnubo ang nibel sang moralidad sang katilingban sang tawo. Sa madamong kadutaan, madamo pa gid ang nagahuliray bag-o ikasal. Bisan ang madamong pamatan-on sa eskwelahan nadalahig sa amo sini nga pagginawi, kag ginayaguta nila ang wala nagabuylog sa ila. Dayag na nga ginapakilala sang mga homoseksuwal ang ila kaugalingon kag nagaparada sila sa mga kalye sang dalagku nga mga siudad agod makilala sila. Nagbuylog man ang mga klero sa sini nga hublag. Sing opisyal, wala ginaordenan sang madamong simbahan ang kilala na nga mga homoseksuwal kag mga makihilawason. Apang, sa katunayan, subong sang pirme nga ginapakita sang mga balita, indi gid mabudlay makita ang mga homoseksuwal, mga makihilawason, kag mga makihilahion sa tunga sang mga klero. Sa katunayan, ang iban nga mga lider sang relihion ginsaylo sa iban nga mga siudad ukon napilitan nga magresayn bangod sang iskandalo sa sekso. Wala nagaugyon ang mga nagahigugma sa pagkamatarong sa sina nga kalautan; ila ‘ginakangil-aran ang malaut.’ (Roma 12:9) Labi sila nga nagakasubo kon ang pagginawi sang mga tawo nga nagaangkon nga nagaalagad sa Dios ­nagapakahuya sa iya ngalan kag nangin kabangdanan sang pagkangil-ad kag pagtalikod sang madamo sa tanan nga relihion.​—⁠Roma 2:⁠24.

 5. Anong pamangkot ang ginasabat para sa aton sang paglaglag ni Jehova sa Sodoma kag Gomorra?

⁵ Tuigtuig nagalala ang kahimtangan. May katapusan gid bala ini? Huo, may yara! Ang ginhimo ni Jehova sa dumaan nga Sodoma kag Gomorra maathag nga nagapakita nga, sa iya gintalana nga tion, magahatag sia sing ­paghukom. Laglagon niya ang mga malauton, apang luwason niya ang iya matutom nga mga alagad.

Sin-o ukon Ano ang Una sa Kabuhi?

 6. (a) Anong suno sa tion nga leksion ang makuha naton sa kasaysayan nahanungod sa mga lalaki nga palamanhon sang mga anak nga dalaga ni Lot? (b) Paano ang panimuot sang ila mga palamanhon nagtilaw sa mga anak nga dalaga ni Lot?

⁶ Yadto lamang ang nagapakita sing matuod nga diosnon nga debosyon ang maluwas. Nahanungod sini, binagbinaga ang ginsiling sang mga anghel ni Jehova kay Lot sa wala pa ginlaglag ang Sodoma kag Gomorra. “May iban ka pa bala diri? Mga umagad nga lalaki kag mga anak nga lalaki kag mga anak nga babayi kag bisan sin-o nga imo sa siudad, pagguwaa sila gikan sa duog! Kay laglagon na namon ining duog.” Gani ginsugilanon ni Lot ang mga lalaki nga palamanhon sang iya mga anak nga babayi. Liwat kag liwat nga nagsiling sia sa ila: “Tindog kamo! Guwa gikan sining duog, kay laglagon na ni Jehova ang siudad!” Ang ila pagkasuod sa panimalay ni Lot naghatag sa ila sing pinasahi nga kahigayunan para sa kaluwasan, apang kinahanglan nga maghulag anay sila sing personal. Dapat nila ipakita ang kitaon nga pamatuod sang pagkamatinumanon kay Jehova. Sa baylo, sa ila itololok si Lot “daw sa tawo nga nagalahog.” (Genesis 19:​12-14) Hunahunaa lamang kon ano ang ginbatyag sang mga anak nga babayi ni Lot sang mahibaluan nila ang natabo. Isa gid ini ka daku nga pagtilaw sa ila katutom sa Dios.

 7, 8. (a) Sang ginlaygayan sang mga anghel si Lot nga dalhon ang iya pamilya kag magpalagyo, ano ang reaksion niya, kag ngaa indi ini maalamon? (b) Agod maluwas, ano ang kinahanglanon para kay Lot kag sa iya panimalay?

⁷ Sa pamanagbanag pagkaaga, ginpadalidali sang mga anghel si Lot. Sila nagsiling: “Tindog ka! Kuhaa ang imo asawa kag ang imo duha ka anak nga babayi nga yari diri, basi maupus ka sa silot sang siudad!” Apang “nagdulogdulog sia.” (Genesis 19:​15, 16) Ngaa? Ano ang nagapugong sa iya? Ang iya bala materyal nga mga pagkabutang sa Sodoma​—⁠nga amo ang rason kon ngaa nagsaylo sia anay diri? Kon handumon niya ini, malaglag sia kaupod sang Sodoma.

⁸ Bangod sang kaluoy, gin-uyatan sang mga anghel ang iya pamilya kag madasig nga gindala sila sa guwa sang siudad. Sang napaguwa na sila, ang anghel ni Jehova nagsiling: “Palagyo tungod sang inyo kalag! Dili magbalikid sa likod ukon magpabilin sa bisan diin sa Kapatagan! Palagyo sa kabakoloran basi maupus kamo!” Nangalag-ag gihapon si Lot. Sang ulihi, pagkatapos mag-ugyunay nga mahimo sia makapalagyo sa indi malayo nga lugar, sia kag ang iya panimalay nagpalagyo. (Genesis 19:​17-22) Indi kinahanglan ang magpalantang pa; ang pagtuman importante.

 9, 10. (a) Ngaa ang mangin kaupod sang iya bana indi bastante nga mapat-od ang kaluwasan para sa asawa ni Lot? (b) Sang napatay ang asawa ni Lot, ano ang dugang nga pagtilaw kay Lot kag sa iya mga anak nga dalaga?

⁹ Apang, wala sila makalampuwas sing bug-os sang nagapalagyo sila halin sa Sodoma. Ang Genesis 19:​23-25 nagasugid sa aton: “Ang adlaw nagsubang sa ibabaw sang duta sang nag-abot si Lot sa Zoar. Nian ginpaulan ni Jehova sa Sodoma kag Gomorra ang asupre kag kalayo gikan kay Jehova sa langit. Kag ginlaglag niya yadtong mga siudad, kag ang bug-os nga Kapatagan kag ang tanan nga pumuluyo sang mga siudad kag ang nagtubo sa duta.” Apang diin ang asawa ni Lot?

¹⁰ Nagpalagyo sia kaupod sang iya bana. Apang, ugyon bala sia sing bug-os sa ginahimo niya? Wala sing ginasiling nga ugyon sia sa imoralidad sa Sodoma. Apang mas makusog bala ang iya gugma sa Dios sang sa gugma niya sa iya puluy-an kag sa iya materyal nga mga pagkabutang didto? (Ipaanggid ang Lucas 17:​31, 32.) Sa idalom sang pag-ipit, nadayag kon ano ang yara sa iya tagipusuon. Mahimo nga malapit na sila sa Zoar, ayhan manugsulod na kuntani sa siudad, sang malinapason sia nga nagbalikid. Kag subong sang ginasiling sang rekord sang Biblia, “nangin haligi sia nga asin.” (Genesis 19:26) Karon si Lot kag ang iya mga anak nag-atubang sang isa pa ka pagtilaw. Ang gugma bala ni Lot sa iya nagtaliwan nga asawa ukon sang iya mga anak sa ila napatay nga iloy mas makusog sang sa gugma nila kay Jehova, nga nagpahanabo sini nga kalamidad? Padayon bala nila nga tumanon ang Dios bisan pa nangin dimatutom sa iya ang isa nga palangga nila? Bangod sang bug-os nga pagsalig kay Jehova, wala sila magbalikid.

11. Ano ang naton-an naton diri nahanungod sa kaluwasan nga ginahatag ni Jehova?

¹¹ Huo, si Jehova nakahibalo magluwas sa mga tawo nga may diosnon nga debosyon sa pagsulay. Nakahibalo sia magluwas sa bilog nga pamilya nga nahiusa sa putli nga pagsimba; nakahibalo man sia magluwas sa mga indibiduwal. Kon tunay nga ginahigugma nila sia, ginapakita niya ang daku nga konsiderasyon sa iya pagpakig-angot sa ila. “Kay nakilala niya ang aton kahimtangan, nagadumdom sia nga kita yab-ok.” (Salmo 103:​13, 14) Apang luwason lamang niya ang mga tawo nga may diosnon nga debosyon, yadtong ang debosyon matuod, yadtong ang pagtuman pagpakita sing katutom.

Mahigugmaon nga mga Paghanda Para sa Mas Daku nga Kaluwasan

12. Anong mahigugmaon nga paghanda ang himuon ni Jehova antes pahanabuon ang kaluwasan nga ginahulat naton sing may kalangkag?

¹² Sa ginhimo niya sadto anay sang kaadlawan ni Noe kag ni Lot, wala gindula ni Jehova ang tanan nga malauton sing dayon. Subong sang ginasiling sang kasulatan, nagpahamtang lamang ini sing sulundan sang mga butang nga magaabot. Sa wala pa mag-abot ina nga mga butang, ginahunahuna ni Jehova ang labi pa nga tuyo niya himuon sa kaayuhan sang mga tawo nga nagahigugma sa iya. Ipadala niya ang iya bugtong nga Anak, si Jesucristo, sa duta. Diri, matinluan ni Jesus ang ngalan sang Dios sa pasipala paagi sa pagpakita sang debosyon nga dapat kag kuntani ginhatag ni Adan subong himpit nga tawo sa Dios; apang himuon ini ni Jesus sa idalom sang mas mabudlay nga kahimtangan. Ihatag ni Jesus ang iya himpit tawhanon nga kabuhi subong halad agod matigayon sang mga anak ni Adan nga nagatuo ang nawasi ni Adan. Nian, ang “diutay nga panong” sang matutom nga mga tawo pagapilion sang Dios nga makig-ambit kay Cristo sa iya langitnon nga Ginharian, kag ang “dakung kadam-an” pagatipunon gikan sa tanan nga kapungsoran agod mangin sadsaran para sa bag-ong katilingban sang tawo. (Lucas 12:​32; Bugna 7:9) Kon matuman ina, himuon sang Dios ang daku nga pagluwas nga ginlandong sang mga hitabo nga may kahilabtanan sa Anaw kag sa kalaglagan sang Sodoma kag Gomorra.

Kon Ngaa ang Pat-od nga Aksion Madagmit Karon

13, 14. Ano ang maton-an naton gikan sa katunayan nga gingamit ni Pedro ang kalaglagan sang didiosnon nga mga tawo sang kaadlawan ni Lot kag ni Noe subong mga halimbawa?

¹³ Nahibaluan sang mga estudyante sang Pulong sang Dios nga sa madamo nga okasyon si Jehova nagaluwas sa iya mga alagad. Apang, sa sining mga hitabo ang Biblia wala nagasiling, ‘Kaangay sadto anay, amo man ang presensia sang Anak sang tawo.’ Ngaa duha lamang ka halimbawa ang ginsambit ni apostol Pedro, nga inspirado sang balaan nga espiritu? Ano ang tuhay sa natabo anay sang kaadlawan ni Lot kag ni Noe?

¹⁴ Ang pat-od nga indikasyon masapwan sa Judas 7, diin aton mabasa nga “ang Sodoma kag Gomorra kag ang mga siudad sa palibot nila . . . ginbutang sila subong nga huwaran paagi sa silot sang kalayong dayon.” Huo, ang kalaglagan sang malaut nga mga makasasala sadto nga mga siudad dayon, kag amo man ang kalaglagan sang mga malauton sa katapusan sang karon nga sistema sang mga butang. (Mateo 25:46) Ang Anaw sang kaadlawan ni Noe ginapatuhuyan man sa mga konteksto nga nagahinun-anon sang dayon nga mga paghukom. (2 Pedro 2:​4, 5, 9-12; 3:​5-7) Gani paagi sa paglaglag sa didiosnon nga mga tawo sang kaadlawan nanday Lot kag Noe, ginpakita ni Jehova nga luwason niya ang iya mga alagad paagi sa paglaglag sing dayon sa mga nagabuhat sing dimatarong.​—⁠2 Tesalonica 1:​6-10.

15. (a) Anong madagmit nga paandam ang ginahatag sa mga nagahimo sing malaut nga mga buhat? (b) Ngaa himuon ang katarungan sa tanan nga nagapabilin sa pagkadimatarong?

¹⁵ Si Jehova, ni ang iya mga alagad, wala nalipay sa kalaglagan sang mga malaut. Paagi sa iya mga Saksi, si Jehova nagalaygay sa mga tawo: “Biya kamo, biya kamo sa inyo malaut nga mga dalanon, kay ngaa bala nga magkalamatay kamo?” (Ezequiel 33:11) Apang, kon ang mga tawo wala nagapakita sing handum nga pamatian ining mahigugmaon nga pangabay kundi nagapadayon sa ila makagod nga dalanon sang kabuhi, ang pagtahod ni Jehova sa iya mismo balaan nga ngalan kag ang iya gugma para sa iya matutom nga mga alagad nga nagaantos sing abuso sa kamot sang mga didiosnon ­nagakinahanglan nga himuon niya ang kataru­ngan.

16. (a) Ngaa makasalig kita nga ang gintagna nga kaluwasan tuman na kalapit? (b) Mangin gikan sa ano kag pasulod sa ano ang kaluwasan?

¹⁶ Tuman na kalapit ang tion sang pagluwas sang Dios! Ang mga panimuot kag mga hitabo nga gintagna ni Jesus subong tanda sang iya presensia kag sang konklusion sang sistema sang mga butang maathag nga makita. Ang mga bahin sina nga tagna una nga nagsugod nga nakita sang nagligad nga sobra sa 75 ka tuig, kag si Jesus nagsiling nga “ining kaliwatan” indi nga mas-a magtaliwan antes mahanabo ang paghukom sang Dios sa sining didiosnon nga kalibutan. Kon nakita ni Jehova nga ang mensahe sang Ginharian nabantala na sa hustohusto nga kasangkaron sa bug-os napuy-an nga duta subong panaksi sa tanan nga kapungsoran, nian magaabot ang katapusan sining malaut nga kalibutan, kag dungan sa sini ang kaluwasan sang mga tawo nga may diosnon nga debosyon. (Mateo 24:​3-34; Lucas 21:​28-33) Kaluwasan gikan diin? Gikan sa mga pagtilaw nga naagihan nila sa mga kamot sang malauton, kag gikan sa mga sirkunstansia nga sa adlaw-adlaw nangin tuburan sang ila kasubo subong mga nagahigugma sang pagkamatarong. Mangin kaluwasan man ini pasulod sa bag-ong kalibutan diin ang balatian kag kamatayon mangin butang sang nagligad.

Balaan nga Bulig nga Ginatan-aw ang Kaluwasan

17. (a) Anong serioso nga pamangkot ang dapat naton ipamangkot sa aton kaugalingon? (b) Paano kita makahatag sing pamatuod nga, kaangay kay Noe, ginapahulag kita sang “diosnon nga kahadlok”?

¹⁷ Ang pamangkot nga dapat naton binagbinagon sing indibiduwal amo, ‘Handa bala ako sa sinang pagpanghikot sang Dios?’ Kon nagasalig kita sa aton kaugalingon ukon sa aton mismo ideya nahanungod sa pagkamatarong, indi kita handa. Apang kon, kaangay kay Noe, ginapahulag kita sang “diosnon nga kaalam,” nian nagahulag kita nga may pagtuo sa panuytoy nga ginahatag sa aton ni Jehova, kag nagadul-ong ini sa aton kaluwasan.​—⁠Hebreo 11:⁠7.

18. Ngaa ang pagtuon sa matuod nga pagtahod para sa teokratikong awtoridad isa ka importante nga bahin sang aton paghanda para sa kaluwasan pasulod sa bag-ong kalibutan?

¹⁸ Nagalaragway sing matahom sadtong nagaagom sing proteksion nga ginahatag karon ni Jehova, ang Salmo 91:​1, 2 nagasiling: “Ang nagapuyo sa tagong duog sang Labing Mataas nga nagapabilin sa idalom sang landong sang Isa nga Labing Gamhanan. Magasiling ako kay Jehova: ‘Sia akon dalangpan kag akon kuta, akon Dios, nga sa iya nagasalig ako.’ ” Yari ang isa ka grupo sang mga tawo nga ginaamligan sang Dios kaangay sang mga boto sa idalom sang daku nga pakpak sang pispis. Yara kay Jehova ang ila bug-os nga pagsalig. Ginakilala nila nga sia amo ang Labing Mataas, ang Isa nga Labing Gamhanan. Subong resulta, ginarespeto nila ang teokratiko nga awtoridad kag nagapasakop sa sini, ginahimo man ini sang mga ginikanan ukon sang “matutom kag mainandamon nga ulipon.” (Mateo 24:​45-47) Matuod bala ina sa kada isa sa aton? Kaangay ni Noe, nagatuon bala kita sa pagtuman sang ‘tanan nga ginasugo ni Jehova’ sa aton kag ginahimo ini sa iya paagi? (Genesis 6:22) Kon amo, nagahulag kita sa paghanda nga ginahatag ni Jehova sa aton para sa kaluwasan pasulod sa iya matarong nga bag-ong kalibutan.

19. (a) Ano ang aton malaragwayon nga tagipusuon, kag ngaa importante nga hatagan naton ini sing igtalupangod? (Hulubaton 4:23) (b) Paano kita makabenepisyo gikan sa halimbawa ni Lot nahanungod sa aton reaksion sa mga pagsulay sa kalibutan?

¹⁹ Ina nga paghanda nagadalahig man sang paghatag sing igtalupangod sa aton malaragwayon nga tagipusuon. “Si Jehova nagausisa sang mga tagipusuon.” (Hulubaton 17:3) Ginabuligan niya kita sa paghangop nga indi kon ano kita sa guwa ang importante kundi, sa baylo, ang nasulod nga persona, ang tagipusuon. Bisan pa wala kita nagapatuyang sa kasingki ukon imoralidad kaangay sang kalibutan sa aton palibot, dapat kita mag-andam nga indi masulay ukon malingaw sa sining mga butang. Kaangay ni Lot, dapat kita magkasubo bangod sang pagluntad sinang malaut nga mga buhat. Ang mga nagadumot sa malain indi magapangita sing mga paagi nga magpaduyog sa sini; apang, ang mga tawo nga wala nagadumot sa sini mahimo nga magapahilayo sa sini sing pisikal samtang sa hunahuna nagahandum nga kuntani makapakigbahin sila. “O kamo nga nagahigugma kay Jehova, dumti ang malain.”​—⁠Salmo 97:⁠10.

20. (a) Sa anong mga paagi ang Biblia nagapaandam sa aton batok sa materyalistiko nga dalanon sang kabuhi? (b) Paano naton mahibaluan kon bala ang importante nga leksion sang Biblia sa materyalismo nagtudok sa aton tagipusuon?

²⁰ Si Jehova mahigugmaon nga nagatudlo sa aton nga likawan indi lamang ang imoral nga paggawi kundi ang materyalistiko man nga dalanon sang kabuhi. ‘Mangin kontento sa kalan-on kag panapton,’ laygay sang iya Pulong. (1 Timoteo 6:8) Dapat bayaan ni Noe kag sang iya mga anak ang ila mga puluy-an sang nagsulod sila sa arka. Dapat man bayaan ni Lot kag sang iya pamilya ang puluy-an kag mga pagkabutang agod maluwas ang ila kabuhi. Diin naton ginahugod ang aton gugma? “Dumduma ang asawa ni Lot.” (Lucas 17:32) Si Jesus naglaygay: “Padayon, nian, nga pangitaa anay ang ginharian kag ang iya pagkamatarong.” (Mateo 6:33) Ginahimo bala naton ina? Kon ang matarong nga mga talaksan ni Jehova nagatuytoy sa aton kag kon ang pagbantala sang maayong balita sang iya Ginharian amo ang una nga kabalaka sa aton kabuhi, nian kita, sa pagkamatuod, nagahulag sa iya paghanda sa mga tawo nga luwason pasulod sa iya bag-ong kalibutan.

21. Ngaa makatarunganon naton nga mapaabot nga ang saad ni Jehova nahanungod sa kaluwasan matuman sa ulihi?

²¹ Sa mga tawo nga may diosnon nga debosyon nga makakita nga matuman ang tanda sang iya presensia sa kagamhanan sa Ginharian, si Jesus nagsiling: “Maghangad kamo kag bayawa ang inyo mga ulo, kay ang pagtubos sa inyo nagapalapit.” (Lucas 21:28) Nakita mo bala ang tanda nga nagakatuman sing detalyado gid? Nian makasalig ka nga ang katumanan sang saad ni Jehova nga kaluwasan tuman na gid kalapit! Mangin kombinsido gid nga “si Jehova makahibalo magluwas sang mga tawo nga may diosnon nga debosyon sa mga pagsulay.”​—⁠2 Pedro 2:⁠9.

Ano ang Imo Naton-an?

◻ Kaangay ni Lot, ano dapat ang aton reaksion sa dalanon sang pagkabuhi sang kalibutan?

◻ Anong mga pagtilaw ang gin-atubang ni Lot kag sang iya panimalay bisan samtang nagapalagyo sa Sodoma?

◻ Paano ang mga halimbawa nga gingamit ni Pedro nagapadaku sang kadagmit sang pagtindog nga malig-on dampig kay Jehova karon?

◻ Sa paghanda sang iya katawhan para sa kaluwasan, anong importante nga mga leksion ang panudlo ni Jehova?

[Piktyur sa pahina 18]

Ang katawhan sang Dios ginaamligan niya kaangay sang mga buto sang pispis sa idalom sang daku nga mga pakpak sang ila ginikanan