Ang Biblia—Ang Libro Para sa Tanan nga Katawhan

“TOLOKA! ang dakung kadam-an, nga walay tawo nga makaisip, gikan sa tanan nga pungsod kag kabikahan kag katawhan kag hambal, nga nagatindog sa atubangan sang trono.”

Ano nga sahi ina sang kadam-an? Kag ano ang ginahimo nila?

“May mga paklang sa ila kamut,” siling sang kasaysayan. “Kag nagasinggit sila sa mabaskog nga tingog: ‘Ang kaluwasan iya sang aton Dios, nga nagalingkod sa trono, kag sa Kordero.’” Indi, indi ini isa ka masingki nga kadam-an nga nagapangayo sang pila ka butang ukon nagademontrar bangod sang pila ka kausa. Sa baylo, isa ini ka malipayon kag masadya nga kadam-an nga bag-o lang makatigayon sing makalilipay nga eksperiensia. “Ini amo sila ang nagguwa sa dakung kapipit-an . . . Indi na sila paggutumon ukon pag-uhawon pa, . . . kag ang Dios magapahid sang tagsa ka luha gikan sa ila mga mata.”

Mensahe Para sa Tanan nga Katawhan

Ang paglaragway sa sinang pungsodnon nga “dakung kadam-an” masapwan sa katapusan nga tolon-an sang Biblia, sa Bugna, sa kapitulo 7, bersikulo 9 tubtob 17. Sa isa ka malaragwayon nga paagi, ginahatagan kita sini sing abanse nga pagtan-aw sa panahon nga ang katawhan indi na magabinahinbahin bangod sang rasa, hambal, kag nasyonalidad kundi magahiusa sa paghidait kag kahim-ong kag magaagom sing matuod nga kahilwayan gikan sa kahadlok kag kabudlayan. Isa ina ka pinasahi nga mensahe nga ginahatag sang Biblia para sa tanan nga katawhan.

‘Apang,’ basi ‘ipamangkot mo, sa anong paagi nga ina nga mensahe pinasahi? Indi bala nga ang mga tawo sa palibot sang kalibutan nagahambal tuhoy sa paghidait kag paghiusa?’ Sa pagkamatuod, nagahambal sila. Sa sining dag-on sang internasyonal nga tension, nga ginapalala sang mga paghimud-os sa politika, rasa, ekonomiya, kag relihion, sin-o nga tawo nga maayo sing hunahuna ang wala nabalaka sa bug-os kalibutan nga paghidait? Apang antes pa nga may yara internasyonal nga mga paghimud-os kag antes pa nangin hulusayon ang kaluwasan sang tawo, ang Biblia nagahambal tuhoy sa tion nga ang tanan nga katawhan magaagom sing paghidait kag paghiusa sa idalom sang isa ka pangulohan, ang Ginharian sang Dios.

Ang Bug-os Kalibutan nga Pagtamod Kutob sa Ginsugoran

Kutob sa iya ginsugoran, ang Biblia nagahatag sang bug-os kalibutan nga pagtamod kon tuhoy sa palaabuton sang katawhan. “Magmabungahon kag magbuad kag magtugob sang duta” amo ang nahaunang sugo nga ginhatag kanday Adan kag Eva sang ila Manunuga, si Jehova nga Dios. (Genesis 1:28) Sanday Adan kag Eva indi lamang mangin katigulangan sang isa ka partikular nga rasa ukon pungsod. Sa baylo, mangin katigulangan sila sang tawhanon nga rasa. Ginpamatod-an ni apostol Pablo ini nga katunayan sang gindala niya ang mensahe sang Biblia sa mga Griego, sa Atenas. Ginsilingan niya sila nga “ginhimo [sang Dios] ang tagsa ka pungsod sang mga tawo, sa pagpuyo sa bug-os nga nawong sang duta.”—Binuhatan 17:26.

Dapat naton batunon nga ang ideya tuhoy sa pagkamangin mag-ululutod sang bug-os nga tawhanon nga rasa, abanse gid sa panghunahuna sang katawhan. Bisan karon, walay sapayan sang tanan nga paghambalanay tuhoy sa paghidait kag pag-ululutod sa bug-os nga kalibutan, indi bala nga ang pagkamay nadampigan sa rasa kag nasyonalismo nagapadayon nga amo ang nagapabahinbahin nga pwersa sa katawhan? Apang, ang Biblia nagalabaw sa sini kag sa iban pa nga mga kal-ang. Nagahambal ini tuhoy sa katawhan sang tanan nga pungsod subong isa ka daku nga panimalay kag nagahambal tuhoy sa isa ka duta subong isa ka daku nga puluy-an sang bug-os tawhanon nga rasa. Sa sini nga kahulugan, isa gid ini ka libro para sa tanan nga katawhan.

Ang paglaum nga ang bug-os nga tawhanon nga rasa magkabuhi subong isa ka malipayon nga panimalay sa bug-os nga duta natuman kuntani kon sanday Adan kag Eva nagpabilin nga matinumanon kay Jehova nga Dios. Apang indi amo sina ang natabo. “Paagi sa isa ka tawo [si Adan] nagsulod sa kalibutan ang sala kag ang kamatayon paagi sa sala kag sa amo ang kamatayon naglapnag sa tanan nga katawhan bangod sila tanan nagpakasala,” siling sang Biblia sa aton.—Roma 5:12.

Bangod sini, wala sing rasa ukon pungsod ang mataas ukon manubo sa bisan ano iban pa nga rasa ukon pungsod. Sa liwat, ang Biblia nagahambal diri tuhoy sa tanan nga katawhan nga wala sing ginadampigan ukon ginapaboran. Nagasiling ini nga “ang tanan nagpakasala kag nawad-an sang himaya sang Dios.” (Roma 3:23) Bisan pa nga ang mga tawo sa iban nga lugar mas manggaranon sa materyal, mas edukado, kag iban pa, indi bala nga bisan diin kita magtan-aw, makita naton ang katawhan nga ginaatubang sang amo gihapon nga problema—balatian, katigulangon, pagkadihimpit, kag kamatayon?

Saad nga Magabenepisyo sa Tanan nga Katawhan

Bisan pa nga ang kahimtangan sang katawhan nangin makasulubo, ang tawo indi nga wala sing paglaum. Sa hilingagawon nga tion, si Jehova nga Dios naghulag nga may saad. Kay Abraham, ang Dios nagsiling: “Paagi sa imo mga kaliwatan pakamaayuhon ang tanan nga pungsod sang duta.” (Genesis 22:18) Ini nga saad ginbaton sang tatlo ka dalagku nga relihion sang kalibutan—Judaismo, Cristianismo, kag Islam—subong bahin sang ila pagtuluohan. Ginapakita sang Biblia ang katumanan sini nga saad paagi sa pagrekord sang pagpakig-angot ni Jehova nga Dios kay Abraham kag sa iya mga kaliwatan, lakip ang dumaan nga pungsod sang Israel.

Apang madamo nga tawo ang wala nagapalakip sa sini. Sa banta nila isa ini ka tipiko nga kaso sang nasyonalistiko nga paboristimo ukon pagkamay nadampigan. Bangod sini gintamod nila ang Biblia, ukon sa dimagkubos ang Hebreong Kasulatan, nga isa lamang ka panudlo sang tribo. Apang, makatarunganon bala ini? Ngaa nagpakita si Jehova sing pagsalig kay Abraham kag nagpanaad sa iya?

Ang Biblia nagapaathag: “‘Si Jehova nagtuo kay Jehova, kag ginkabig ini sa iya nga sa pagkamatarong,’ kag gintawag sia nga abyan ni Jehova.’” (Santiago 2:23) Sing makawiwili, ang Islamikong balaan nga tolon-an, ang Koran, nagatudlo man tuhoy sa pagtuo subong ang rason nga si Abraham ginbaton sang Dios subong isa ka abyan. “Sin-o ang may mas maayo nga relihion sang sa iya nga nagpasakop sang iya kaugalingon sing bug-os kay Allah? Kag sia amo ang nagahimo sing maayo (sa iban) kag nagasunod sang pagtuo ni Ibrahim [Abraham], ang isa nga matarong, kag ginkabig ni Allah si Ibrahim nga isa ka abyan.”—SURAH IV, bersikulo 125, Holy Qur’an, ginbadbad ni M. H. Shakir.

Kamusta ang mga Israelinhon? Kapin sa 400 ka tuig sa tapos magpanaad ang Dios kay Abraham, ginsilingan sila ni Moises: “Si Jehova wala maghigugma sa inyo ukon magpili sa inyo bangod labi pa kamo kadamo sa bisan anong katawhan, kay kamo labi pa gid ka diutay sa tanan nga katawhan. Kundi bangod nga si Jehova nagahigugma sa inyo, kag bangod buot niya tumanon ang sumpa niya sa inyo ginikanan.”—Deuteronomio 7:7, 8.

Gani indi ini bangod kay si Abraham ukon ang mga Israelinhon superyor nga rasa ukon pungsod, ukon bangod mas maayo sila sang sa iban nga tawo. Sa baylo, bangod ini sang paghigugma kag dibagay nga kaluoy sang Dios nga ginpakita tungod sang pagtuo kag maayong mga buhat. Amo sini ang punto ni apostol Pedro sang magsiling sia: “Ang Dios walay ginapasulabi sa mga tawo, apang sa tagsa ka pungsod nga nagakahadlok sa iya kag nagahimo sang katarungan kalahamut-an sa iya.”—Binuhatan 10:34, 35.

Gani, bisan pa si Jehova nga Dios nagpakig-angot sing eksklusibo sa Israel sadto anay, ang kaayohan sang tanan nga katawhan ang iya gid ginatan-aw. Ang iya pagpakig-angot sa Israel wala ginrekord sang Biblia agod ipadaku ang espiritu sang nasyonalismo ukon pakataason ang isa ka pungsod sang sa iban. Sa baylo, “ang bisan ano nga nasulat sadto anay ginsulat sa pagtudlo sa aton, agod paagi sa pagkalig-on kag pagpabakud sang Kasulatan may paglaum kita.” (Roma 15:4) Huo, ginapatalupangod sini nga mga hitabo ang paghigugma kag pagpailob sang Dios sa pagpahanabo sang paglaum nga ang tanan nga katawhan mahiusa liwat sa paghidait kag kahim-ong. Paano ini nga paglaum matuman?

Isa ka Administrasyon Para sa Paghidait

“Suno sa katuyoan [sang Dios] nga ginbuko niya ang administrasyon sa kabug-osan sang mga panag-on, nga amo, sa pagtingob sang tanan nga butang kay Cristo, ang mga butang sa langit kag ang mga butang sa duta,” paathag ni Pablo. (Efeso 1:9, 10) Ano ining administrasyon?

Ang termino ginbadbad gikan sa Griegong tinaga nga oi·ko·no·miʹa, nga nagakahulugan sing “pagdumala sa isa ka panimalay.” Sa amo, bisan pa ang katawhan nabahinbahin sa politika, sa rasa, sa ekonomiya, kag sa relihion, gintuyo sang Dios nga dulaon ining tanan nga butang nga nagapabahinbahin kag tingubon liwat ang tanan nga matinumanon nga katawhan subong isa ka malipayon nga katawhan sa bug-os nga duta. Paano niya ini himuon? Himuon niya ini paagi sa Mesianiko nga Ginharian sa mga kamut sang iya Anak, si Jesucristo.—Tan-awa ang Daniel 2:44; Isaias 9:6, 7.

Karon, sa tunga sang tugob-globo nga mga tension kag mga problema, minilyon ka katawhan sa palibot sang kalibutan ang nagsabat sa mensahe sang Biblia nahanungod sa paghidait kag paghiusa. Nagkari sila subong sang dimaisip nga “dakung kadam-an” nga ginlaragway sa tolon-an sang Bugna. Sing simbuliko, nagauyat na sila sang mga paklang sa atubangan sang trono sang Dios, nga nagahatag sang ila pagdayaw kag pagpasakop sa isa “nga nagalingkod sa trono,” si Jehova nga Dios, “kag sa Kordero,” si Jesucristo.—Bugna 7:9, 10.

Ina bala nga mensahe makagalanyat sa imo? Bisan ano man ang imo rasa, nasyonalidad, ukon hambal, paagi sa pag-usisa kag pagbaton sa mensahe sang Biblia karon, sarang ikaw makabuylog sa sinang internasyonal nga “dakung kadam-an.” Upod sa ila, makasiling ikaw sing masinaligon: “Nagahulat kita sing bag-ong mga langit kag bag-ong duta suno sa saad [sang Dios], kag sa sini nagapuyo ang pagkamatarong.”—2 Pedro 3:13.

Sa pagkamatuod, ang Biblia amo ang Libro para sa imo!

[Laragway sa pahina 5]

Sanday Adan kag Eva amo ang katigulangan sang tawhanon nga rasa

[Laragway sa pahina 7]

Si Abraham, nga nagbiya sang iya dutang natawhan, nakatigayon sang kahamuot sang Dios bangod sang pagtuo kag matarong nga buhat