Ginhimo Nila ang Kabubut-on ni Jehova

Pagpangita sing Palangasaw-on Para kay Isaac

LAPYO gid ang tigulang nga lalaki nga nagapungko sa tupad sang bubon. Nagpanlakatan sila sang iya mga alagad upod ang ila napulo ka kamelyo halin sa Beer-​sheba padulong sa naaminhan nga bahin sang Mesopotamia​—⁠kapin sa 800 kilometros nga kalayuon.a Karon nga nakalab-ot na sila sa ila kaladtuan, ining kapoy nga manuglakbay nagdulog sa paghunahuna sang iya mabudlay nga buluhaton. Sin-o ining tawo, kag ngaa ginhimo niya ining makalalapyo nga paglakbay?

Ang tawo amo ang alagad ni Abraham, ‘ang labing tigulang sa iya panimalay.’ (Genesis 24:⁠2) Walay sapayan nga wala ginhingalanan sa rekord, maathag nga si Eliezer yadto, nga ginpatuhuyan ni Abraham isa ka bes subong ‘anak nga lalaki sang iya panimalay’ kag ginsiling niya nga iya mangin ‘manunubli.’ (Genesis 15:​2, 3) Sa pagkamatuod, natabo yadto sang wala pa sing anak sanday Abraham kag Sara. Karon 40 anyos na ang ila anak nga si Isaac, kag walay sapayan nga indi na si Eliezer ang pangunang manunubli ni Abraham, alagad pa gihapon sia niya. Gani gintuman niya ang mabudlay nga pangabay ni Abraham. Ano ini?

Mabudlay nga Buluhaton

Sang adlaw ni Abraham ang pag-asawahay nagaapektar indi lamang sa pamilya kundi sa bug-os man nga tribo, ukon komunidad sang patriarka. Busa kinabatasan sadto nga ginapangitaan sang mga ginikanan sing tiayon ang ila mga anak. Apang, naligban si Abraham sa pagpangita sing palangasaw-on para sa iya anak nga si Isaac. Indi gid kalahamut-an nga pangasaw-on ang isa sa lokal nga mga Canaanhon bangod sang ila didiosnon nga mga pagginawi. (Deuteronomio 18:​9-​12) Kag walay sapayan nga kinabatasan sadto para sa isa ka tawo nga magpangasawa sa iya mismo katribo, ang mga himata ni Abraham nagapuyo ginatos ka kilometros ang kalayuon sa naaminhan nga bahin sang Mesopotamia. Indi niya mapaistar didto si Isaac, bangod si Jehova nagsaad kay Abraham: “Sa imo binhi ihatag ko ining duta,” ang duta sang Canaan. (Genesis 24:⁠7) Busa, si Abraham nagsiling kay Eliezer: “Kadto ka sa akon duta kag sa akon kahimataan, kag magkuha sing asawa nga sa akon anak nga si Isaac.”​—⁠Genesis 24:⁠4.

Pagkatapos makalakbay sing malawig, nagpahuway si Eliezer sa tupad sang bubon samtang ginahunahuna niya ang iya buluhaton. Nahibal-an niya nga sa indi madugay maabot ang mga babayi sa bubon agod magsag-ub sing tubig para sa gab-i. Gani nagpangamuyo sia kay Jehova: “Ang dalaga nga sa iya magsiling ako, ‘Ipapanaug ang imo tibod, palihug, agod nga mag-inom ako,’ kag sia magasiling, ‘Inom ka kag paimnon ko man ang imo mga kamelyo,’ mangin amo sia ang ginpat-od mo para sa imo alagad nga si Isaac; kag sa sini makilala ko nga nagpakita ka sing malig-on nga paghigugma sa akon agalon.”​—⁠Genesis 24:⁠14.

Samtang nagapangamuyo pa sia, nag-abot ang isa ka maanyag nga dalagita nga si Rebeca. ‘Palihug, paimna ako sing diutay nga tubig sa imo tibod.’ siling ni Eliezer sa iya. Ginpainom sia ni Rebeca kag nian nagsiling: ‘Magasag-ub man ako para sa imo mga kamelyo tubtob nga makatapos sila sa pag-inom.’ Isa yadto ka maalwan nga tan-ay, sanglit ang isa ka uhaw nga kamelyo sarang makainom sing tubtob 95 ka litro nga tubig sa sulod lamang sang napulo ka minutos! Subong man sadto ka uhaw ang mga kamelyo ni Eliezer ukon indi, nahibaluan ni Rebeca nga mabudlay himuon ang ginatanyag niya nga serbisyo. Sa pagkamatuod, ‘gilayon nga ginbubo [niya] ang iya tibod sa palaimnan kag nagdalagan sing balik-balik sa bubon sa pagsag-ub, kag nagsag-ub para sa tanan niya nga kamelyo.’​—⁠Genesis 24:​15-​20.

Namutikan ang panuytoy ni Jehova, ginhatagan ni Eliezer si Rebeca sing singsing nga bulawan kag duha ka pulseras nga bulawan, nga nagabili karon sing mga $1,400. Sang ginsugiran sia ni Rebeca nga apo sia ni Nahor, nga utod ni Abraham, nagpangamuyo sa pagpasalamat si Eliezer sa Dios. “Gintuytuyan ako ni Jehova sa balay sang mga utod sang akon agalon,” siling niya. (Genesis 24:​22-​27) Gindala si Eliezer sa panimalay ni Rebeca. Sang ulihi, nangin asawa ni Isaac si Rebeca, kag may pribilehiyo nga mangin katigulangan sang Mesias, nga si Jesus.

Leksion Para sa Aton

Ginpakamaayo ni Jehova ang mapangamuyuon nga panikasog ni Eliezer sa pagpangita sing mahinadlukon-sa-Dios nga asawa para kay Isaac. Apang, dumduma nga ang pagpangasawa ni Isaac direkta nga may kaangtanan sa katuyuan sang Dios sa pagpatubas sing binhi paagi kay Abraham. Busa, bangod sining rekord indi kita dapat maghinakop nga ang tagsatagsa nga nagapangamuyo para sa isa ka tiayon milagruso nga pagahatagan. Apang, kon sundon naton ang mga prinsipio ni Jehova, hatagan niya kita sing kusog nga mabatas ang mga hangkat nga magaabot sa bisan diin sining kahimtangan sa kabuhi​—⁠minyo ukon diminyo.​—⁠1 Corinto 7:​8, 9, 28; ipaanggid ang Filipos 4:​11-13.

Ginpanikasugan gid ni Eliezer nga himuon ang mga butang sa paagi ni Jehova. Mahimo man naton masapwan nga ang pagpahisuno sa mga talaksan ni Jehova indi pirme mahapos. Halimbawa, mahimo mabudlay ang pagpangita sing palamugnan nga wala nagasablag sa teokratikong hilikuton, tiayon nga mahinadlukon sa Dios, makapalig-on nga mga kaupdanan, indi malaw-ay nga mga kalingawan. (Mateo 6:​33; 1 Corinto 7:​39; 15:33; Efeso 4:​17-​19) Apang mabuligan ni Jehova yadtong mga nagadumili sa pagkompromiso sang mga prinsipio sang Biblia. Ang Biblia nagasaad: “Magsalig kay Jehova sa bug-os mo nga tagipusuon kag dili magsandig sa imo kaugalingon nga paghangop. Sa tanan mo nga dalanon kilalaha sia, kag sia mismo magatadlong sang imo banas.”​—⁠Hulubaton 3:​5, 6.

[Footnote]