Mga Pamangkot Gikan sa mga Bumalasa

Ginpakaslan gid bala ni Paraon si Sara, nga asawa ni Abraham, subong daw amo ang ginapahangop sang pagbadbad sang Genesis 12:19 sa pila ka bersion sang Biblia?

Wala, si Paraon napunggan sa pagkuha kay Sara (Sarai) subong iya asawa. Busa, ang dungog kag dignidad ni Sara wala madagtai.

Mabuligan kita sa paghangop sini paagi sa pag-usisa sang kahimtangan pasad sa konteksto sini. Napilitan si Abraham (Abram) sa pagdangop sa Egipto sa pila ka tion bangod sang tiggulutom. Hinadlukan sia nga basi mabutang sa katalagman ang iya kabuhi didto bangod sang iya matahom nga asawa, nga si Sara. Wala pa sing anak si Abraham kay Sara, gani kon mapatay sia sa Egipto, ang linya sang Binhi mautod, ang Binhi nga paagi sa iya ang tanan nga pamilya sang duta pakamaayuhon. (Genesis 12:​1-3) Gani ginpangabay ni Abraham si Sara nga ipakilala ang iya kaugalingon subong utod niya, kay sa kamatuoran utod niya sia sa amay.—Genesis 12:10-13; 20:12.

Ang iya kahadlok may kabangdanan gid. Ang eskolar nga si August Knobel nagpaathag: “Ginpangabay ni Abram si Sarai nga ipresentar ang iya kaugalingon subong utod niya sa Egipto agod nga indi sia pagpatyon. Kon sia gintamod subong minyo nga babayi, makuha lamang sia sang Egiptohanon paagi sa pagpatay sang iya bana kag tag-iya; kon sia gintamod subong isa ka utod nga babayi, may posibilidad nga daugon sia gikan sa iya utod nga lalaki paagi sa mahidaiton nga paagi.”

Apang, ang Egiptohanon nga mga prinsipe wala makigsugot kay Abraham nahanungod sa pagpangasawa ni Paraon kay Sara. Gindala lamang nila ang matahom nga si Sara sa balay ni Paraon, kag ginhatagan sang manuggahom sang Egipto ang iya ginapatihan nga utod, nga si Abraham, sing mga regalo. Apang pagkatapos sini, gintandog ni Jehova ang panimalay ni Paraon paagi sa mga kalalat-an. Sang ginpahayag ang matuod nga kahimtangan kay Paraon sa wala masambit nga paagi, nagsiling sia kay Abraham: “Ngaa bala nagsiling ka, ‘Utod ko sia,’ sa bagay nga kuhaon ko na sia kuntani nga mangin akon asawa? Kag karon yari ang imo asawa. Kuhaa sia kag lakat!”—Genesis 12:14-19.

Ang The New English Bible kag ang iban nga badbad sang Biblia nagabadbad sang nagahilay nga bahin sang bersikulo sa ibabaw nga “sa bagay nga ginkuha ko sia nga mangin akon asawa” ukon kaanggid sa sini. Bisan pa indi gid man sayop nga pagbadbad, ina nga mga tinaga makahatag sing impresyon nga ginpakaslan gid ni Paraon si Sara, nga ang pag-asawahay isa ka nahimo nga kamatuoran. Mahimo talupangdon nga sa Genesis 12:19 ang Hebreong berbo nga ginbadbad “sa pagkuha” yara sa indi kompleto nga kahimtangan, nga nagapakita nga ang aksion wala pa mahimo. Ang New World Translation nagabadbad sining Hebreong berbo nahisanto sa konteksto kag sa isa ka paagi nga maathag nga nagapakita sang kahimtangan sang berbo​—“sa bagay nga kuhaon ko na sia kuntani nga mangin akon asawa.”a Bisan pa “kuhaon na kuntani” ni Paraon si Sara nga mangin iya asawa, wala pa sia makahimo sing bisan anong paagi ukon seremonya nga nadalahig.

Masami ginamulay si Abraham sa iya ginhimo sa sini, apang naghikot sia para sa kaayuhan sang ginsaad nga Binhi kag sa amo sang tanan nga katawhan.—Genesis 3:15; 22:17-18; Galacia 3:16.

Sa isa ka kaanggid nga okasyon nga makatalagam man, ginpangabay ni Isaac sa iya asawa nga si Rebecca nga ilikom nga sia may bana. Sadto nga tion ang ila anak nga si Jacob, nga paagi sa iya ang Binhi magaabot, natawo na kag maathag nga isa na ka lamharon nga lalaki. (Genesis 25:20-27; 26:1-11) Walay sapayan, ang motibo sa likod sining matarong nga taktika mahimo nga pareho man sang kay Abraham. Sa tion sang tiggulutom si Isaac kag ang iya pamilya nagapuyo sa teritoryo sang Filistinhon nga hari nga nagahingalan kay Abimelec. Kon nahibal-an niya nga si Rebecca kasal kay Isaac, mahimo nga naghimo si Abimelec sing malaglagon nga dalanon batok sa nabilin nga bahin sang pamilya ni Isaac, nga mahimo nagkahulugan sang kamatayon ni Jacob. Sa sini man nga kaso, si Jehova nagpahilabot agod amligan ang iya mga alagad kag ang linya sang Binhi.

[Footnote]