“Amo Ini ang Paagi nga ang Dios Naghigugma sa Aton”

“Kon amo ini ang paagi nga ang Dios naghigugma sa aton, nian kita mismo obligado nga maghigugmaanay.”​—⁠1 JUAN 4:⁠11.

1. Sa Marso 23 pagtunod sang adlaw, ngaa minilyon ka tawo ang magatipon sa mga Kingdom Hall kag sa iban pa nga mga tilipunan sa bilog nga globo?

SA Domingo, Marso 23, 1997, pagtunod sang adlaw, walay duhaduha nga kapin sa 13,000,000 ka tawo sa bug-os nga kalibutan ang magatipon sa mga Kingdom Hall kag sa iban pa nga mga tilipunan nga ginagamit sang mga Saksi ni Jehova. Ngaa? Bangod natandog ang ila tagipusuon sang labing daku nga kapahayagan sang gugma sang Dios sa katawhan. Ginpatalupangod ni Jesucristo ining dungganon nga ebidensia sang gugma sang Dios, nga nagasiling: “Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.”​—⁠Juan 3:⁠16.

2. Anong mga pamangkot ang mapuslanon nga mapamangkot naton tanan sa aton kaugalingon may kaangtanan sa aton reaksion sa gugma sang Dios?

² Samtang ginabinagbinag naton ang gugma nga ginpakita sang Dios, maayo nga pamangkuton naton ang aton kaugalingon, ‘Ginaapresyar ko gid bala ang ginhimo sang Dios? Ang akon bala paggamit sa akon kabuhi nagahatag sing ebidensia sa sina nga apresasyon?’

“Ang Dios Gugma”

3. (a) Ngaa indi tumalagsahon para sa Dios ang pagpakita sing gugma? (b) Paano ginapadayag ang gugma kag kaalam sa iya mga buhat sang pagpanuga?

³ Ang pagpakita sing gugma indi tumalagsahon sa bahin sang Dios bangod “ang Dios gugma.” (1 Juan 4:⁠8) Ang gugma amo ang iya nagapangibabaw nga kinaiya. Sang ginahanda niya ang duta agod mangin puluy-an sang tawo, ang iya pagtib-ong sa kabukiran kag pagtipon sing tubig pasulod sa mga linaw kag kadagatan isa gid ka makapulunaw nga pasundayag sing gahom. (Genesis 1:​9, 10) Sang ginpahikot sang Dios ang siklo sang tubig kag ang siklo sang oksiheno, sang gindesinyo niya ang dimaisip diutay nga mga organismo kag nanuhaytuhay nga mga talamnunon sa paghimo sing kemikal nga mga elemento sang duta nga mangin isa ka porma nga makaon sang mga tawo agod mabuhi sila, sang gintakda niya ang aton biolohiko nga mga relo nga magsigo sa kalawigon sang mga adlaw kag sang binulan sa planeta Duta, nagpakita ini sing dakung kaalam. (Salmo 104:24; Jeremias 10:12) Apang, ang labi pa nga talalupangdon sangsa pisikal nga pagpanuga amo ang ebidensia sang gugma sang Dios.

4. Sa pisikal nga pagpanuga, anong pamatuod sang gugma sang Dios ang dapat naton makita kag apresyahon?

⁴ Ang aton panabor nagasugid sa aton sang gugma sang Dios kon magkaon kita sing maduga, luto nga prutas nga maathag nga ginhimo indi lamang sa pagbuhi sa aton kundi sa paghatag man sa aton sing kalipay. Ang aton mga mata makakita sing maathag nga ebidensia sini sa makapulunaw nga mga kasisidmon, sa mabituon nga kalangitan sa isa ka matin-aw nga kagab-ihon, sa nanuhaytuhay nga porma kag sa masili nga mga duag sang kabulakan, sa makahalam-ot nga mga giho sang magagmay nga mga sapat, kag sa matahom nga mga yuhum sang mga abyan. Ang aton ilong nagapahibalo sa aton kon makahaklo kita sing mayuyom nga amyon sang mga bulak sa tigpamulak. Ang aton dulunggan makadungog samtang nagapamati kita sa tunog sang busay, sa huni sang mga pispis, kag sa tingog sang aton mga pinalangga. Mabatyagan naton ang mainit nga hakos sang isa nga hinigugma. Ang pila ka sapat ginsangkapan sing mga ikasarang nga makakita, makabati, ukon makapanimaho sing mga butang nga wala sa tawo. Apang ang katawhan, nga ginhimo suno sa dagway sang Dios, may ikasarang sa pagbatyag sa gugma sang Dios sa isa ka paagi nga indi mahimo sang sapat.​—⁠Genesis 1:⁠27.

5. Paano si Jehova nagpakita sing bugana nga gugma kay Adan kag kay Eva?

⁵ Sang gintuga ni Jehova nga Dios ang unang mga tawo, si Adan kag si Eva, ginlibutan niya sila sing pamatuod sang iya gugma. Naghimo sia sing isa ka hardin, isa ka paraiso, kag ginpatubo didto ang tanan nga sahi sang kakahuyan. Nag-aman sia sing suba agod magbunyag sa sini kag ginpuno ini sing makawiwili nga mga kapispisan kag kasapatan. Ginhatag niya ini tanan kay Adan kag kay Eva subong ila puluy-an. (Genesis 2:​8-10, 19) Nakig-angot si Jehova sa ila subong iya mga anak, bahin sang iya bug-os uniberso nga pamilya. (Lucas 3:38) Sa tapos mahatag ang Eden subong isa ka sulundan, ginbutang sang langitnon nga amay sa atubangan sining unang mag-asawa ang makaalayaw nga tulumanon nga pasangkaron ang Paraiso sa bug-os nga globo. Ang bug-os nga duta pagapuy-an sang ila mga anak.​—⁠Genesis 1:⁠28.

6. (a) Paano mo ginatamod ang rebelyuso nga dalanon nga ginpili ni Adan kag ni Eva? (b) Ano ang mahimo magapakita nga nakatuon kita gikan sa natabo sa Eden kag nga nakabenepisyo kita gikan sa sadtong ihibalo?

⁶ Apang, wala madugay pagkatapos sadto, gintilawan ang pagkamatinumanon ni Adan kag ni Eva, isa ka pagtilaw sa ila katutom. Napaslawan, una si Eva, kag dayon si Adan sa pagpakita sing apresasyon sa gugma nga ginpakita sa ila. Malain gid ang ila ginhimo. Wala yadto sing kapatawaran! Subong resulta, nadula nila ang ila kaangtanan sa Dios, gintabog gikan sa iya pamilya, kag ginpaguwa gikan sa Eden. Mabatyagan naton gihapon karon ang mga epekto sang ila sala. (Genesis 2:​16, 17; 3:​1-6; 16-19, 24; Roma 5:12) Apang nakatuon bala kita gikan sa natabo? Ano ang reaksion naton sa gugma sang Dios? Nagapakita bala ang mga desisyon nga ginahimo naton sa adlaw-adlaw nga ginaapresyar naton ang iya gugma?​—⁠1 Juan 5:⁠3.

7. Walay sapayan sang ginhimo ni Adan kag ni Eva, paano si Jehova nagpakita sing gugma para sa ila mga anak?

⁷ Bisan gani ang daku nga kakulang sing apresasyon sang aton unang mga ginikanan sa tanan nga ginhimo sang Dios para sa ila wala magpugong sa gugma mismo sang Dios. Subong kaluoy sa mga tawo nga wala pa sadto matawo​—⁠lakip kita nga buhi karon​—⁠gintugutan sang Dios si Adan kag si Eva nga makatukod anay sing pamilya antes sila mapatay. (Genesis 5:​1-5; Mateo 5:​44, 45) Kon wala niya paghimua yadto, wala kuntani sing isa sa aton ang nabun-ag. Paagi sa progresibo nga pagpahayag sang iya kabubut-on, naghatag man si Jehova sing sadsaran sang paglaum para sa tanan nga anak ni Adan nga magapakita sing pagtuo. (Genesis 3:15; 22:18; Isaias 9:6, 7) Ang iya kahimusan naglakip sang paagi nga ang katawhan sang tanan nga kapungsuran makatigayon liwat sang nadula anay ni Adan, nga amo, ang himpit nga kabuhi subong nahamut-an nga mga katapo sang bug-os uniberso nga pamilya sang Dios. Ginhimo niya ini paagi sa pag-aman sing isa ka gawad.

Ngaa Kinahanglan ang Gawad?

8. Ngaa indi mahimo nga ang Dios nagsugo na lang nga bisan pa si Adan kag si Eva dapat mapatay, wala sing bisan sin-o sa ila matinumanon nga mga anak ang dapat mapatay?

⁸ Kinahanglan gid bala nga magbayad sing isa ka gawad sa porma sang tawhanon nga kabuhi? Ngaa wala na lang kuntani magsugo ang Dios nga bisan pa si Adan kag si Eva dapat mapatay bangod sang ila pagrebelde, ang tanan sa ila mga anak nga magatuman sa Dios mahimo mabuhi sing dayon? Gikan sa malip-ot sing panan-aw nga pagtamod sang tawo, mahimo nga daw rasonable ina. Apang, si Jehova “mahigugmaon sa pagkamatarong kag katarungan.” (Salmo 33:⁠5) Nanganak lamang si Adan kag si Eva sa tapos na sila makasala; gani wala sing bisan sin-o sa mga anak nila ang natawo nga himpit. (Salmo 51:⁠5) Nakapanubli sila tanan sing sala, kag ang silot sa sala amo ang kamatayon. Kon wala yadto pagsapaka ni Jehova, ano nga sahi sang halimbawa ang ginpahamtang sadto para sa mga katapo sang iya bug-os uniberso nga pamilya? Indi niya mahimo nga indi pagsapakon ang iya kaugalingon matarong nga mga talaksan. Gintahod niya ang mga butang nga ginapangayo sang hustisya. Wala sing bisan sin-o ang may makatarunganon nga rason nga mulayon ang paagi sang paghusay sang Dios sa mga hulusayon nga nadalahig.​—⁠Roma 3:​21-23.

9. Suno sa balaan nga talaksan sang hustisya, ano nga sahi sang gawad ang kinahanglanon?

⁹ Paano, nian, maaman ang nagakaigo nga sadsaran sa pagluwas sa mga anak ni Adan nga magapakita sing mahigugmaon nga pagtuman kay Jehova? Kon himpit nga tawo ang maghalad sing kabuhi sa kamatayon, makatarunganon nga ang balor sinang himpit nga kabuhi magatabon sa mga sala sang mga tawo nga magabaton sa gawad. Sanglit ang sala sang isa ka tawo, nga si Adan, amo ang ginbangdan nga nangin makasasala ang bug-os nga pamilya sang tawo, ang ginpatulo nga dugo sang isa pa ka himpit nga tawo, bangod katumbas sing balor, amo ang kinahanglan sa timbangan sang hustisya. (1 Timoteo 2:​5, 6) Apang sa diin makita ang subong sini nga tawo?

Daw Ano Kadaku ang Bili?

10. Ngaa indi makahatag ang mga anak ni Adan sing kinahanglanon nga gawad?

¹⁰ Sa mga anak sang makasasala nga si Adan, wala sing bisan isa ang makahatag sang kinahanglanon agod magawad ang paglaum sa kabuhi nga gindula ni Adan. “Wala sa ila sing sarang nga mas-a makatubos sang iya utod, ukon makahatag sa Dios sing gawad sa iya; (kag ang gawad nga bili sang ila kalag tuman ka mahal amo kon ngaa nadula na ini tubtob sa tion nga walay latid) agod nga magkabuhi sia sa gihapon sing dayon kag indi sia makakita sing kutkot.” (Salmo 49:⁠7-9) Sa baylo nga pabay-an ang katawhan nga wala sing bisan anong paglaum, maluluy-on nga naghatag si Jehova sing isa ka aman.

11. Sa anong paagi nag-aman si Jehova sing himpit tawhanon nga kabuhi nga kinahanglanon para sa isa ka nagakaigo nga gawad?

¹¹ Wala magpadala si Jehova sing isa ka anghel sa duta agod magpakunokuno nga napatay paagi sa paghalad sing nagpakatawo nga lawas samtang nagakabuhi sia subong isa ka espiritu. Sa baylo, paagi sa paghimo sing milagro nga Dios lamang nga Manunuga ang makahimo, ginsaylo niya ang puwersa sang kabuhi kag personalidad sang isa ka langitnon nga anak sa taguangkan sang isa ka babayi, si Maria nga anak ni Heli, sa tribo ni Juda. Gin-amligan sang aktibo nga kusog sang Dios, iya balaan nga espiritu, ang pagtubo sang bata sa taguangkan sang iya iloy, kag nabun-ag ini nga isa ka himpit nga tawo. (Lucas 1:35; 1 Pedro 2:22) Naangkon sining isa ang bili nga kinahanglanon sa pag-aman sing gawad nga magasibu gid sa ginapangayo sang balaan nga hustisya.​—⁠Hebreo 10:⁠5.

12. (a) Sa anong kahulugan si Jesus “bugtong nga Anak” sang Dios? (b) Paano ang pagpadala sang Dios sa sining isa agod mag-aman sing gawad nagpadaku sang Iya gugma para sa aton?

¹² Sin-o sa linaksa sang langitnon nga mga anak ni Jehova ang ginpahimo niya sini? Amo ang isa nga ginlaragway sa Kasulatan subong iya “bugtong nga Anak.” (1 Juan 4:9) Ginagamit ining ekspresyon sa paglaragway, indi sang kon nangin ano sia sang matawo sia, kundi sang kon ano sia anay antes sina sa mga langit. Sia lamang ang direkta nga gintuga ni Jehova nga wala sing bulig ni bisan sin-o. Sia ang Panganay sang tanan nga tinuga. Sia ang gingamit sang Dios sa pagtuga sa tanan nga iban pa nga tinuga. Ang mga anghel mga anak sang Dios, subong nga si Adan man isa anay ka anak sang Dios. Apang ginalaragway si Jesus subong may “himaya nga iya sang bugtong nga anak sang amay.” Ginasiling nga sia “yara sa sabak sang Amay.” (Juan 1:​14, 18) Ang iya kaangtanan sa Amay suod gid, may pagsalig kag gugma. Subong sang iya Amay may gugma man sia sa katawhan. Ang Hulubaton 8:​30, 31 nagalaragway kon ano ang ginabatyag sang iya Amay nahanungod sa sining Anak kag kon ano ang ginabatyag sang Anak nahanungod sa katawhan: “Ako ang kalipay niya [Jehova] adlaw-adlaw, nga nagakasadya sing dayon sa atubangan niya, . . . kag ang akon [Jesus, Sampaton nga Manugpangabudlay ni Jehova, ang personipikasyon sang kaalam] kalipay yara sa mga anak sang mga tawo.” Ining labing hamili nga Anak amo ang ginpadala sang Dios sa duta agod mag-aman sing gawad. Busa, puno gid sing kahulugan ang ginsiling ni Jesus: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak”!​—⁠Juan 3:⁠16.

13, 14. Ang rekord sang Biblia tuhoy sa pagtinguha ni Abraham nga ihalad si Isaac dapat makabulig sa aton nga ano ang apresyahon nahanungod sa ginhimo ni Jehova? (1 Juan 4:⁠10)

¹³ Agod buligan kita nga mahangpan kon ano ang kahulugan sina, madugay pa antes nagkari si Jesus sa duta, ang Dios nagsugo kay Abraham, mga 3,890 ka tuig ang nagligad: “Kuhaa, palihug, ang imo bugtong nga anak si Isaac, nga ginahigugma mo gid, kag kadto ka sa duta sang Moria kag ihalad mo sia didto subong nga halad-nga-sinunog sa isa sang mga bukid nga akon isiling sa mo.” (Genesis 22:​1, 2) Upod ang pagtuo, nagtuman si Abraham. Ibutang ang imo kaugalingon sa lugar ni Abraham. Ano kon anak mo yadto, ang imo bugtong nga anak nga ginahigugma mo gid? Ano ayhan ang batyagon mo sa pagbis-ak sing mga kahoy para sa halad-nga-sinunog, paglakbay sing pila ka adlaw padulong sa duta sang Moria, kag ibutang ang imo anak sa halaran?

¹⁴ Ngaa subong sina ang ginabatyag sang isa ka mainawaon nga ginikanan? Ang Genesis 1:27 nagasiling nga gintuga sang Dios ang tawo suno sa Iya kaugalingon nga dagway. Ang aton pagbatyag sing gugma kag kaawa nagapabanaag sa limitado gid nga paagi sang kaugalingon nga gugma kag kaawa ni Jehova. Sa bahin ni Abraham, nagpahilabot ang Dios, amo kon ngaa wala madayon ang paghalad kay Isaac. (Genesis 22:​12, 13; Hebreo 11:​17-19) Apang, sa iya mismo bahin, wala ginbalabagan ni Jehova ang pag-aman sing gawad, bisan pa ginhimo ini nga may daku nga bili sa iya mismo kag sa iya Anak. Ginhimo yadto, indi bangod obligado ang Dios, kundi, sa baylo, subong ekspresyon sang tumalagsahon nga dibagay nga kaluoy. Nahangpan gid bala naton ini?​—⁠Hebreo 2:⁠9.

Kon Ano ang Mahimo Sini

15. Paano ang gawad nag-apektar sa kabuhi sang mga tawo bisan sa karon nga sistema sang mga butang?

¹⁵ Ang mahigugmaon nga aman nga ginhimo sang Dios may daku gid nga epekto sa kabuhi sang mga tawo nga nagabaton sini bangod sang pagtuo. Sila anay nahamulag sa Dios bangod sang sala. Sila, suno sa ginasiling sang iya Pulong, ‘mga kaaway bangod ang ila mga panghunahuna yara sa mga buhat nga malaut.’ (Colosas 1:​21-23) Apang “ginpasag-uli [sila] sa Dios paagi sa kamatayon sang iya Anak.” (Roma 5:​8-10) Bangod ginbag-o na nila ang ila pagkabuhi kag nabaton ang kapatawaran sang Dios paagi sa pagpakita sing pagtuo sa halad ni Cristo, ginhatagan sila sing isa ka matinlo nga konsiensia.​—⁠Hebreo 9:14; 1 Pedro 3:⁠21.

16. Anong mga pagpakamaayo ang ginhatag sa diutay nga panong bangod sang ila pagtuo sa gawad?

¹⁶ Nagpakita si Jehova sa isa ka limitado nga kadamuon, isa ka “diutay nga panong,” sing dibagay nga pabor nga makaupod sang iya Anak sa langitnon nga Ginharian, sa tuyo nga tumanon ang orihinal nga katuyuan sang Dios para sa duta. (Lucas 12:32) Ginkuha ini sila “gikan sa tagsa ka tribo kag hambal kag katawhan kag pungsod . . . isa ka ginharian kag mga saserdote sa aton Dios, kag magagahom sila subong mga hari sa ibabaw sang duta.” (Bugna 5:​9, 10) Sa ila, si apostol Pablo nagsulat: “Nakabaton kamo sing espiritu sang pag-adoptar subong mga anak, nga paagi sa sining espiritu nagasinggit kita: “Abba, Amay!” Ang espiritu gid nagapanaksi upod sa aton espiritu nga mga anak kita sang Dios. Gani, kon mga anak kita, mga manunubli man kita: mga manunubli sa pagkamatuod sang Dios, apang kaupod nga mga manunubli ni Cristo.” (Roma 8:15-17) Bangod gin-adoptar sang Dios subong mga anak niya, nabaton nila ang bilidhon nga kaangtanan nga nadula ni Adan; apang ihatag sa sining mga anak ang dugang pa nga mga pribilehiyo sang pag-alagad sa langit​—⁠butang nga wala gid matilawan ni Adan. Indi katingalahan nga si apostol Juan nagsiling: “Tan-awa ninyo kon daw ano nga gugma ang ginhatag sang Amay sa aton, nga pagtawgon kita nga mga anak sang Dios”! (1 Juan 3:⁠1) Indi lamang may prinsipio nga gugma (a·gaʹpe) ang ginapakita sang Dios sa ila kundi mapinalanggaon nga gugma (phi·liʹa) man, nga amo ang kinaiya sang higot nga nagahugpong sa matuod nga mga mag-abyan.​—⁠Juan 16:⁠27.

17. (a) Sa tanan nga nagapakita sing pagtuo sa gawad, anong kahigayunan ang ginahatag? (b) Ano ang mangin kahulugan para sa ila sang “mahimayaon nga kahilwayan sang mga anak sang Dios”?

¹⁷ Sa iban man​—⁠ang tanan nga nagapakita sing pagtuo sa maalwan nga aman sang Dios para sa kabuhi paagi kay Jesucristo​—⁠ginabuksan ni Jehova ang kahigayunan agod matigayon ang hamili nga kaangtanan nga nadula ni Adan. Si apostol Pablo nagpaathag: “Kay ang nagakalangkag nga pagpaabot sang tinuga [ang tawhanon nga tinuga nga naghalin kay Adan] nagahulat sang pagpahayag sang mga anak sang Dios [kon sayuron, ginahulat nila ang tion nga mangin maathag gid nga ang mga anak sang Dios nga mga manunubli kaupod ni Cristo sa langitnon nga Ginharian positibo nga magahulag para sa katawhan]. Kay ang tinuga ginpasakop sa pagkawalay pulos [nabun-ag sila sa sala kag nagapaabot nga mapatay, kag wala sing paagi nga mahilway nila ang ila kaugalingon], indi sa iya kaugalingon nga kabubut-on kundi paagi sa iya nga nagpasakop sini, pasad sa paglaum [nga ginhatag sang Dios] nga ang tinuga man mismo hilwayon gikan sa pagkaulipon sa pagkamadinulunton kag magaagom sing mahimayaon nga kahilwayan sang mga anak sang Dios.” (Roma 8:​19-21) Ano ang mangin kahulugan sina nga kahilwayan? Nga sila ginhilway na gikan sa pagkaulipon sa sala kag kamatayon. Makatigayon sila sing himpit nga hunahuna kag lawas, sing Paraiso subong ila puluy-an, kag sing dayon nga kabuhi agod malipay sa ila kahimpitan kag ipabutyag ang ila apresasyon kay Jehova, ang lamang matuod nga Dios. Kag paano ini tanan nahimo? Paagi sa halad nga gawad sang bugtong nga Anak sang Dios.

18. Sa Marso 23 pagtunod sang adlaw, ano ang aton himuon, kag ngaa?

¹⁸ Sang Nisan 14, 33 C.E., sa isa ka hulot sa ibabaw sa Jerusalem, ginpatok ni Jesus ang Memoryal sang iya kamatayon. Ang tuigan nga pagsaulog sang iya kamatayon nangin isa ka importante nga okasyon sa kabuhi sang tanan matuod nga Cristiano. Si Jesus mismo nagsugo: “Padayon nga himua ninyo ini sa handumanan nakon.” (Lucas 22:19) Sa 1997 ang Memoryal pagahiwaton pagtunod sang adlaw sa Marso 23 (nga amo ang pagsugod sang Nisan 14). Sa amo nga adlaw, wala sing mas importante pa sa pagtambong sa sining okasyon sang Memoryal.

Paano Mo Sabton?

◻ Sa anong mga paagi nagpakita ang Dios sing bugana nga gugma para sa katawhan?

◻ Ngaa himpit tawhanon nga kabuhi ang kinahanglanon agod magawad ang mga anak ni Adan?

◻ Sa anong daku nga bili nag-aman si Jehova sing gawad?

◻ Ano ang mahimo sang gawad?

[Kapsion sa pahina 10]

Ginhatag sang Dios ang iya bugtong nga Anak