Ang Aton Hamili nga Palanublion—Ano ang Kahulugan Sini sa Imo?
“Kari kamo, mga ginpakamaayo sang akon Amay, panublia ninyo ang ginharian nga gin-aman sa inyo kutob sa pagtukod sang kalibutan.”—MATEO 25:34.
1. Ano nga sahi sang mga butang ang nabaton sang mga tawo subong palanublion?
ANG tanan nga tawo may mga butang nga ila napanubli. Para sa iban ang palanublion mahimo maglakip sang masulhay sa materyal nga pangabuhi. Para sa iban naman ini kapigaduhon. Sa pila ka kaso, ang nagligad nga mga kaliwatan, bangod sang ila naeksperiensiahan ukon nabatian, nagliton sing palanublion nga may daku nga pagdumot sa isa pa ka etniko nga grupo. Apang, kita tanan magkapareho sa isa ka butang. Kita tanan nakapanubli sing sala gikan sa nahaunang tawo, si Adan. Ina nga palanublion nagadul-ong sa ulihi sa kamatayon.—Manugwali 9:2, 10; Roma 5:12.
2, 3. Ano nga palanublion ang ginhimo sang primero ni Jehova nga posible sa mga anak nanday Adan kag Eva, kag ngaa wala nila ini mabaton?
2 Si Jehova, subong mahigugmaon nga langitnon nga Amay, nagtan-ay anay sa katawhan sing tuhay gid nga palanublion—walay katapusan nga himpit nga kabuhi sa Paraiso. Ang aton nahaunang mga ginikanan, sanday Adan kag Eva, ginhatagan sing himpit, walay sala nga panugod. Ginhatag ni Jehova nga Dios sa katawhan ang planeta nga Duta subong dulot. (Salmo 115:16) Ginhatag niya ang katamnan sang Eden subong halimbawa kon mangin ano ang bug-os nga kalibutan kag nagpahamtang sa atubangan sang aton nahaunang mga ginikanan sing isa ka dalayawon, makawiwili nga hilikuton. Magapanganak sila, magaatipan sang duta kag sang tanan nga nanuhaytuhay nga mga tanom kag mga sapat, kag magapasangkad sang mga dulunan sang Paraiso sa bug-os nga kalibutan. (Genesis 1:28; 2:8, 9, 15) Ang ila mga anak magapakigbahin sa sini. Daw ano ka dalayawon nga palanublion nga iliton sa ila!
3 Apang, agod maagom nila ini tanan, sanday Adan kag Eva kag ang ila mga anak dapat nga may maayo nga kaangtanan sa Dios. Utang nila kay Jehova ang gugma kag pagkamatinumanon, apang wala gin-apresyar nanday Adan kag Eva ang ginhatag sa ila sang Dios kag ginlapas ang iya sugo. Nadula nila ang ila Paraiso nga puluy-an kag ang mahimayaon nga mga palaabuton nga ginbutang sang Dios sa atubangan nila. Gani, indi nila ini maliton sa ila mga anak.—Genesis 2:16, 17; 3:1-24.
4. Paano naton matigayon ang palanublion nga nadula ni Adan?
4 Sing maluluy-on, si Jehova naghimo sing aman agod ang mga anak nanday Adan kag Eva may kahigayunan nga makabaton sing palanublion nga nadula ni Adan. Paano? Sa gintalana nga tion sang Dios, ginhatag sang iya kaugalingon nga Anak, si Jesucristo, ang iya himpit nga tawhanon nga kabuhi tungod sa mga anak ni Adan. Paagi sa sini ginbakal sila tanan ni Cristo. Apang, ang palanublion indi awtomatiko nga mangin ila. Kinahanglan nila ang kalahamut-an nga tindog sa Dios, nga matigayon nila paagi sa pagtuo sa nagatumbas-sa-sala nga balor sang halad ni Jesus kag paagi sa pagpakita sina nga pagtuo paagi sa pagkamatinumanon. (Juan 3:16, 36; 1 Timoteo 2:5, 6; Hebreo 2:9; 5:9) Ang imo bala dalanon sang kabuhi nagapakita sing apresasyon sa sina nga aman?
Isa ka Palanublion nga Ginliton Paagi kay Abraham
5. Paano si Abraham nagpakita sing apresasyon sa iya kaangtanan kay Jehova?
5 Samtang ginatuman niya ang katumanan sang iya katuyuan sa duta, si Jehova nakig-angot kay Abraham sa pinasahi nga paagi. Ginsugo niya yadtong matutom nga tawo sa pagbiya sang iya pungsod kag sa pagsaylo sa isa ka duta nga ipakita mismo sang Dios sa iya. Si Abraham kinabubut-on nga nagtuman. Sang nag-abot na didto si Abraham, si Jehova nagsiling nga ang mga anak ni Abraham, indi si Abraham mismo, makabaton sang duta subong palanublion. (Genesis 12:1, 2, 7) Ano ang reaksion ni Abraham? Handa sia nga mag-alagad kay Jehova bisan diin kag bisan ano ang isugo sang Dios agod ang iya mga anak makabaton sang ila palanublion. Si Abraham nag-alagad kay Jehova sa indi niya pungsod sa 100 ka tuig, tubtob napatay sia. (Genesis 12:4; 25:8-10) Himuon mo bala ina? Si Jehova nagsiling nga si Abraham “abyan” niya.—Isaias 41:8.
6. (a) Ano ang ginpakita ni Abraham bangod sang iya kahanda nga ihalad ang iya anak? (b) Anong hamili nga palanublion ang maliton ni Abraham sa iya mga anak?
6 Si Abraham naghulat sing madamong tuig para sa isa ka anak, si Isaac, nga ginahigugma gid niya. Sang ang bata nangin pamatan-on, ginsugo ni Jehova si Abraham nga dalhon ang bata kag idulot sia subong isa ka halad. Wala makahibalo si Abraham nga ipakita niya kon ano mismo ang himuon sang Dios sa paghatag sa iya Anak subong gawad; apang, nagtuman sia kag idulot na kuntani si Isaac subong halad sang ginpunggan sia sang anghel ni Jehova. (Genesis 22:9-14) Nagsiling na si Jehova nga ang iya mga saad kay Abraham matuman paagi kay Isaac. Gani, maathag gid nga nagtuo si Abraham nga, kon kinahanglanon, banhawon sang Dios si Isaac gikan sa minatay, bisan pa nga ina nga butang wala pa gid anay mahimo. (Genesis 17:15-18; Hebreo 11:17-19) Bangod wala gindingot ni Abraham bisan ang iya anak, si Jehova nagpahayag: “Paagi sa imo binhi ang tanan nga pungsod sang duta pat-od nga magapakamaayo sang ila kaugalingon.” (Genesis 22:15-18) Ginpakita sini nga ang Binhi nga ginsambit sa Genesis 3:15, ang Mesianiko nga manluluwas, magagikan sa kaliwatan ni Abraham. Daw ano ka hamili nga palanublion nga iliton!
7. Paano sanday Abraham, Isaac, kag Jacob nagpakita sing apresasyon sa ila palanublion?
7 Wala makahibalo si Abraham sang kahulugan sang ginhimo sadto ni Jehova; amo man ang iya anak nga si Isaac ukon ang iya apo nga si Jacob, nga nangin “mga masigkamanunubli niya sang amo gid nga saad.” Apang sila tanan nagsalig kay Jehova. Wala sila magbuylog sa bisan anong siudad-ginharian sa pungsod bangod nagahulat sila sa mas maayo pa—“ang siudad nga may matuod nga mga sadsaran, ang manunukod kag manugbuhat sini nga siudad amo ang Dios.” (Hebreo 11:8-10, 13-16) Apang, indi tanan sang mga anak ni Abraham nag-apresyar sang hamili nga palanublion nga natigayon paagi kay Abraham.
Ang Iban nga Nagtamay sa Palanublion
8. Paano ginpakita ni Esau nga wala niya gin-apresyar ang pagkabahandi sang iya palanublion?
8 Si Esau, ang kamagulangan nga anak nga lalaki ni Isaac, napaslawan sa pagpakabahandi sang iya kinamatarong subong panganay. Wala niya gin-apresyar ang sagrado nga mga butang. Gani sang isa ka adlaw nga nagutom si Esau, ginbaligya niya ang iya kinamatarong subong panganay sa iya utod, nga si Jacob. Para sa ano? Bilang baylo sa isa ka kalan-an nga tinapay kag linaga! (Genesis 25:29-34; Hebreo 12:14-17) Ang pungsod nga paagi sini matuman ang mga saad sang Dios kay Abraham naghalin kay Jacob, nga ang ngalan niya gin-islan sang Dios sing Israel. Anong mga kahigayunan ang ginbuksan sinang partikular nga palanublion para sa ila?
9. Bangod sang ila espirituwal nga palanublion, ano nga kaluwasan ang naeksperiensiahan sang mga anak ni Jacob, ukon Israel?
9 Sa tion sang tiggulutom, si Jacob kag ang iya pamilya nagsaylo sa Egipto. Didto nagmuad sila kag nagdamo kaayo, apang nangin mga ulipon man sila. Apang, wala ginkalimtan ni Jehova ang iya katipan kay Abraham. Sa gintalana nga tion sang Dios, ginluwas niya ang mga anak ni Israel gikan sa pagkabihag kag ginpahibalo sila nga dalhon niya sila sa “duta nga nagailig sing gatas kag dugos,” sa duta nga ginsaad niya kay Abraham.—Exodo 3:7, 8; Genesis 15:18-21.
10. Sa Bukid Sinai, anong dugang pa nga tumalagsahon nga mga hitabo ang natabo may kaangtanan sa palanublion sang mga anak ni Israel?
10 Sang ang mga anak ni Israel nagalakbay padulong sa Ginsaad nga Duta, gintipon sila ni Jehova sa Bukid Sinai. Didto nagsiling sia sa ila: “Kon tumanon ninyo sing maayo ang akon tingog kag sundon gid ang akon katipan, nian pat-od nga kamo mangin akon pinasahi nga pagkabutang gikan sa tanan sang iban pa nga katawhan, bangod ang bug-os nga duta akon. Kag kamo mangin isa ka ginharian sang mga saserdote kag isa ka balaan nga pungsod sa akon.” (Exodo 19:5, 6) Pagkatapos nga ang katawhan boluntaryo kag nahiusa nga nag-ugyon sa sini, ginhatag ni Jehova sa ila ang iya Kasuguan—butang nga wala pa niya mahimo sa bisan anong iban pa nga katawhan.—Salmo 147:19, 20.
11. Ano ang pila sang hamili nga mga butang nga nalakip sa espirituwal nga palanublion sang mga anak sang Israel?
11 Daw ano nga espirituwal nga palanublion ang natigayon sadtong bag-o nga pungsod! Ginsimba nila ang lamang matuod nga Dios. Ginhilway niya sila gikan sa Egipto kag mga saksi sa makahalawhaw nga mga hitabo sang ginhatag ang Kasuguan sa Bukid Sinai. Ang ila palanublion dugang pa nga napauswag sang nakabaton sila paagi sa mga manalagna sang dugang nga “sagrado nga mga pagpahayag sang Dios.” (Roma 3:1, 2) Gintawag sila ni Jehova subong mga saksi niya. (Isaias 43:10-12) Ang Mesianikong Binhi magagikan sa ila pungsod. Ang Kasuguan nagtudlo sa iya, nagpakilala sa iya, kag dapat nagbulig sa ila nga mahangpan ang pagkinahanglan nila sa iya. (Galacia 3:19, 24) Dugang pa, ginhatagan sila sing kahigayunan nga mag-alagad kaupod sinang Mesianikong Binhi subong isa ka ginharian sang mga saserdote kag isa ka balaan nga pungsod.—Roma 9:4, 5.
12. Bisan pa nagsulod sila sa Ginsaad nga Duta, ano ang wala maagom sang mga Israelinhon? Ngaa?
12 Suno gid sa iya saad, gintuytuyan ni Jehova ang mga Israelinhon padulong sa Ginsaad nga Duta. Apang subong sang ginpaathag sang ulihi ni apostol Pablo, bangod sang ila kakulang sing pagtuo, yadto nga duta wala gid mapamatud-an nga isa ka “duog sang kapahuwayan.” Subong katawhan, wala sila magsulod sa “kapahuwayan sang Dios” bangod napaslawan sila sa paghantop kag sa pagpangabudlay nahisuno sa katuyuan sang adlaw mismo sang kapahuwayan sang Dios, nga nagsugod sa tapos sang pagtuga kanday Adan kag Eva.—Hebreo 4:3-10.
13. Bangod sang indi pag-apresyar sa ila espirituwal nga palanublion, ano ang nadula sang Israel subong isa ka pungsod?
13 Mahimo kuntani nga napun-an sang kinaugali nga Israel ang kabilugan nga kadamuon sadtong makig-ambit sa Mesias sa iya langitnon nga Ginharian subong ginharian sang mga saserdote kag isa ka balaan nga pungsod. Apang wala nila gin-apresyar ang ila hamili nga palanublion. Isa ka nagkalabilin lamang sang kinaugali nga mga Israelinhon ang nagbaton sang Mesias sang nagkari sia. Subong resulta, diutay lamang nga kadamuon ang ginlakip sa gintagna nga ginharian sang mga saserdote. Ang Ginharian ginkuha gikan sa kinaugali nga Israel kag ‘ginhatag sa pungsod nga nagpatubas sang mga bunga sini.’ (Mateo 21:43) Ano ina nga pungsod?
Isa ka Palanublion sa mga Langit
14, 15. (a) Pagkatapos sang kamatayon ni Jesus, paano ginsugdan nga pakamaayuhon sang mga pungsod ang ila kaugalingon paagi sa “binhi” ni Abraham? (b) Ano ang nabaton sang mga katapo sang “Israel sang Dios” subong palanublion?
14 Ang pungsod nga ginhatagan sing Ginharian amo ang “Israel sang Dios,” ang espirituwal nga Israel, nga ginahuman sang 144,000 ka ginpanganak-sang-espiritu nga sumulunod ni Jesucristo. (Galacia 6:16; Bugna 5:9, 10; 14:1-3) Ang pila sadtong 144,000 amo ang kinaugali nga mga Judiyo, apang ang kalabanan naghalin sa Gentil nga mga pungsod. Sa sina nga paagi ang saad ni Jehova kay Abraham, nga paagi sa iya “binhi” ang tanan nga pungsod pakamaayuhon, nagsugod nga matuman. (Binuhatan 3:25, 26; Galacia 3:8, 9) Sa sadtong nahauna nga katumanan, ang katawhan sang mga pungsod ginhaplasan sang balaan nga espiritu kag ginbaton ni Jehova nga Dios subong espirituwal nga mga anak, mga utod ni Jesucristo. Sa amo, nangin segundaryo nga bahin man sila sina nga “binhi.”—Galacia 3:28, 29.
15 Antes sang iya kamatayon, ginpakilala ni Jesus sa palaabuton nga Judiyong mga katapo sadtong bag-ong pungsod ang bag-ong katipan, nga palig-unon paagi sa iya mismo dugo. Pasad sa ila pagtuo sa sinang nagapalig-on nga halad, yadtong ginkuha pasulod sa sinang katipan himuon nga ‘himpit sing walay katapusan.’ (Hebreo 10:14-18) Mahimo sila ‘ipahayag nga matarong’ kag ang ila mga sala patawaron. (1 Corinto 6:11) Busa, sa sina nga kahulugan subong sila kay Adan antes sia nagpakasala. Apang, indi sila magakabuhi sa dutan-on nga paraiso. Si Jesus nagsiling nga naglakat sia sa paghanda sing duog para sa ila sa langit. (Juan 14:2, 3) Ginbayaan nila ang ila dutan-on nga mga paglaum agod matigayon ang ‘palanublion nga gintigana para sa ila sa mga langit.’ (1 Pedro 1:4) Ano ang himuon nila didto? Si Jesus nagpaathag: “Nagapakigkatipan ako sa inyo . . . para sa isa ka ginharian.”—Lucas 22:29.
16. Anong dalayawon nga hilikuton sang pag-alagad ang yara sa unahan para sa hinaplas nga mga Cristiano?
16 Halin sa mga langit, yadtong magagahom kaupod ni Cristo, lakip sa iban nga mga butang, magabulig sa pagdula sa duta sang tanan nga agi sang pagrebelde batok sa pagkasoberano ni Jehova. (Bugna 2:26, 27) Subong segundaryo nga bahin sang espirituwal nga binhi ni Abraham, magapakigbahin sila sa paghatag sing pagpakamaayo nga himpit nga kabuhi sa mga tawo sang tanan nga kapungsuran. (Roma 8:17-21) Daw ano gid ka hamili ang ila palanublion!—Efeso 1:16-18.
17. Ano nga mga bahin sang ila palanublion ang naagom sang hinaplas nga mga Cristiano samtang yari sa duta?
17 Apang ang palanublion sang hinaplas nga mga sumulunod ni Jesus indi tanan sa palaabuton. Sa paagi nga wala sing iban pa ang makasarang, ginbuligan sila ni Jesus nga makilala si Jehova, ang lamang matuod nga Dios. (Mateo 11:27; Juan 17:3, 26) Paagi sa pulong kag halimbawa, gintudluan niya sila kon ano ang buot silingon sang ‘pagsalig kay Jehova’ kag kon ano ang nadalahig sa pagtuman kay Jehova. (Hebreo 2:13; 5:7-9) Gintugyanan sila ni Jesus sing ihibalo sang kamatuoran may kaangtanan sa katuyuan sang Dios kag ginpasalig sila nga ang balaan nga espiritu magatuytoy sa ila sa maayo pa nga paghangop sa sini. (Juan 14:24-26) Ginpatudok niya sa ila hunahuna kag tagipusuon ang pagkaimportante sang Ginharian sang Dios. (Mateo 6:10, 33) Gintugyanan man sila ni Jesus sing hilikuton nga magpanaksi kag maghimo sing mga disipulo sang katawhan sa Jerusalem, Judea, Samaria, kag sa pinakaukbong nga mga bahin sang duta.—Mateo 24:14; 28:19, 20; Binuhatan 1:8.
Isa ka Hamili nga Palanublion Para sa Dakung Kadam-an
18. Sa anong paagi ang saad ni Jehova nga pakamaayuhon sang tanan nga pungsod ang ila kaugalingon paagi sa “binhi” ni Abraham natuman sa karon?
18 Mahimo nga ang kabug-usan nga kadamuon sang espirituwal nga Israel, yadtong “diutay nga panong” sang mga manunubli sang Ginharian, ginpili na. (Lucas 12:32) Sa mga dekada na karon, ginpatuhoy ni Jehova ang igtalupangod sa pagtipon sa dakung kadam-an sang iban pa gikan sa tanan nga pungsod. Sa amo, ang saad ni Jehova kay Abraham nga paagi sa iya “binhi” ang tanan nga pungsod magapakamaayo sang ila kaugalingon ginatuman sa daku nga paagi. Sing makalilipay, ining mga ginpakamaayo nagahimo man sing sagrado nga pag-alagad kay Jehova kag nagakilala nga ang ila kaluwasan nasandig sa pagtuo sa Kordero sang Dios, si Jesucristo. (Bugna 7:9, 10) Ginbaton mo na bala ang maluluy-on nga imbitasyon ni Jehova nga mangin bahin sinang malipayon nga grupo?
19. Sa anong palanublion nagahulat yadtong sa mga pungsod nga ginapakamaayo karon?
19 Anong hamili nga palanublion ang ginatan-ay ni Jehova sa mga wala malakip sa diutay nga panong? Indi, indi ini palanublion sa mga langit. Palanublion ini nga ginliton kuntani ni Adan sa iya mga anak—ang paglaum nga mabuhi sing dayon nga may kahimpitan sa paraiso nga amat-amat nga magatugob sang kalibutan. Isa ini ka kalibutan diin “wala na sing kamatayon, ukon kalisod ukon paghibi ukon kasakit pa.” (Bugna 21:4) Sa imo, kon amo, nga ang inspirado nga Pulong sang Dios nagasiling: “Magsalig ka kay Jehova kag maghimo ka sing maayo; magpuyo ka sa duta, kag makig-angot ka nga may katutom. Subong man magkalipay ka sing daku kay Jehova, kag ihatag niya sa imo ang mga ginapangabay sang imo tagipusuon. Kag sa diutay pa nga tion, kag ang malauton wala na . . . Apang ang mga mahagop magapanubli sang duta, kag magakalipay sila sa kabuganaan sang paghidait. Ang mga matarong magapanag-iya sang duta, kag magapuyo sila sing dayon sa sini.”—Salmo 37:3, 4, 10, 11, 29.
20. Paano naagom sang “iban nga mga karnero” ang kalabanan sang espirituwal nga palanublion sang hinaplas nga mga Cristiano?
20 Ang “iban nga mga karnero” ni Jesus may palanublion sa dutan-on nga sakop sang langitnon nga Ginharian. (Juan 10:16a) Bisan pa nga indi sila magakadto sa mga langit, ang kalabanan sang espirituwal nga palanublion nga gin-agom sang mga hinaplas ginliton sa ila. Paagi sa grupo nga hubon sang hinaplas, “ang matutom kag mainandamon nga ulipon,” nga ginbuksan sa iban nga mga karnero ang paghangop sa hamili nga mga saad nga makita sa Pulong sang Dios. (Mateo 24:45-47; 25:34) Sing tingob, nakilala kag ginasimba sang mga hinaplas kag sang iban nga mga karnero ang lamang matuod nga Dios, si Jehova. (Juan 17:20, 21) Sing tingob, nagapasalamat sila sa Dios tungod sa nagatumbas-sa-sala nga balor sang halad ni Jesus. Nagaalagad sila sing tingob subong isa ka panong sa idalom sang isa ka Manugbantay, si Jesucristo. (Juan 10:16b) Sila tanan bahin sang isa ka mahigugmaon, bug-os kalibutan nga paghiliutod. Nagaambitay sila sa pribilehiyo nga mangin mga Saksi ni Jehova kag sang iya Ginharian. Huo, kon ikaw isa ka dedikado kag bawtismado nga alagad ni Jehova, ini tanan nalakip sa imo espirituwal nga palanublion.
21, 22. Paano naton tanan mapakita nga ginapakabahandi naton ang aton espirituwal nga palanublion?
21 Daw ano ka hamili ining espirituwal nga palanublion sa imo? Ginapakabahandi mo gid bala ini agod ang paghimo sang kabubut-on sang Dios amo ang labing importante nga butang sa imo kabuhi? Subong pamatuod sa sina, ginapamatian mo bala ang laygay sang iya Pulong kag sang iya organisasyon nga mangin tayuyon sa pagtambong sa tanan nga miting sang Cristianong kongregasyon? (Hebreo 10:24, 25) Ina bala nga palanublion hamili gid sa imo amo nga padayon ka nga nagaalagad sa Dios walay sapayan sang kabudlayan? Ang imo bala apresasyon sa sini mabakod gid agod magpalig-on sa imo nga batuan ang bisan ano nga pagsulay nga maglakat sa dalanon nga mahimo magresulta sa pagkadula sini?
22 Kabay nga pakabahandion naton tanan ang espirituwal nga palanublion nga ginhatag sang Dios sa aton. Samtang ginahuptan naton ang aton mga mata nga natuon sing malig-on sa Paraiso sa unhan, makigbahin kita sing bug-os sa espirituwal nga mga pribilehiyo nga ginahatag karon ni Jehova sa aton. Paagi sa pagtukod gid sang aton kabuhi nga nakasentro sa aton kaangtanan kay Jehova, nagahatag kita sing makakumbinsi nga pamatuod kon daw ano gid ka hamili sa aton ang aton hatag-Dios nga palanublion. Kabay nga malakip kita sa mga nagapahayag: “Bayawon ko ikaw, O Dios nakon nga Hari, kag pakamaayuhon ko ang imo ngalan tubtob sa tion nga walay pat-od, bisan sa walay katubtuban.”—Salmo 145:1.
Paano Mo Ipaathag?
• Kon si Adan nagmatutom sa Dios, ano nga palanublion ang ginliton niya kuntani sa aton?
• Paano gintamod sang mga anak ni Abraham ang ila palanublion?
• Ano ang nalakip sa palanublion sang hinaplas nga mga sumulunod ni Cristo?
• Ano ang palanublion sang dakung kadam-an, kag paano nila mapakita nga ginaapresyar gid nila ini?
[Mga retrato sa pahina 20]
Ang mga anak ni Abraham nakabaton sang saad sang hamili nga palanublion
[Mga retrato sa pahina 23]
Ginaapresyar mo bala ang imo espirituwal nga palanublion?