Ang mga Hebreo nga gin-abiabi sa Egipto sang panahon ni Jose ginpakamaayo sang Dios sing bugana, nga nagpahadlok sa mga Egiptohanon. Aton mabasa: “Busa ginbutangan nila [ang mga Hebreo] sing mga agalon sa pangabudlay sa pagsakit sa ila sa mga lulan nila; kag nagpatindog sila sang mga siudad . . . Gin-ulipon sang mga Egiptohanon nga may kapintas ang katawhan sang Israel. Kag ginpapait ang ila kabuhi sa malip-ot nga pagpangabudlay sa galagala kag tisa.”—Exodo 1:7-14.

Sa tuo, makita mo nga ang mga tisa ginahimo gihapon sa Egipto, ang iban ginaluto sa dalagku nga hurnuhan subong sang makita diri. (Ipaanggid ang Genesis 11:1-3; 19:28.) Apang, maathag nga ang kalabanan nga dumaan nga Egiptohanon nga tisa ginbulad sa adlaw. Ang nagapadayon amo ang paggamit sang dagami sa paghimo sing mga tisa. Yara ang mga dagami sa mga tisa nga makita sa ginkutkut nga mga kagulub-an sang dumaan nga Beer-sheba (ginsal-ot nga laragway).

Ang pagdugang sing dagami nagapabakud sa tisa. Agod himuon ini, ang lunang (ukon daga), tubig, kag dagami hinayhinay nga ginatapaktapak, nian ginaipit sa hurmahan, kag ginakuha agod ibulad. Handurawa ang pagpangabudlay sa sina nga buluhaton sa isa ka malawig nga adlaw sa adlaw-adlaw. Sa pagkamatuod, mahangpan mo kon ngaa ang mga Israelinhon ‘nagpanghayhay bangod sang kahiolipnan kag nagtuaw sila kag naglambut sa matuod nga Dios.’—Exodo 2:23.

Nabatian sila ni Jehova kag ginpakadto niya si Moises kay Faraon agod tigayunon ang kahilwayan sang Israelinhon. Sa baylo, gindugangan sang matinaastaason nga Faraon ang ila lulan. Karon sila na ang magatipon sang ila kaugalingon nga dagami, kag lab-uton gihapon ang ila lalab-uton nga tisa subong sang una. Ti, kasubong ini sang pamatbat nga kamatayon! Ang Dios nagsiling: “Karon makita mo ang akon himuon kay Faraon, kay sa makusog nga kamot magatugot sia sa pagpalakat sa ila.”—Exodo 5:1–6:1.

[Bug-os pahina nga retrato sa pahina 31]

[Ginkuhaan sang Laragway sa pahina 2]

Photos, pages 30, 31: Pictorial Archive (Near Eastern History) Est.