Hinatag-sang-Dios nga Kahilwayan Nagadala sing Kalipay

“Ang kalipay ni Jehova amo ang inyo kusog.”—NEHEMIAS 8:10.

1. Ano ang kalipay, kag ngaa ang mga dedikado sa Dios makaagom sini?

GINAPUNO ni Jehova ang tagipusuon sang iya katawhan sing kalipay. Ining daku nga kalipay ukon kasadya bunga sang pagtigayon ukon pagpaabot sing maayo. Ang mga tawo nga dedikado sa Dios nakabatyag sina nga balatyagon bangod ang kalipay isa ka bunga sang iya balaan nga espiritu, ukon aktibo nga kusog. (Galacia 5:​22, 23) Gani bisan pa ang masubo nga mga pagtilaw nagatublag sa aton, sarang kita magkalipay subong mga alagad ni Jehova, nga ginatuytuyan sang iya espiritu.

2. Ngaa ang mga Judiyo nagkasadya sa isa ka pinasahi nga okasyon sang panahon ni Esdras?

² Sa isa ka pinasahi nga okasyon sang ikalima nga siglo B.C.E., gingamit sang mga Judiyo ang ila hinatag-sang-Dios nga kahilwayan sa paghiwat sing makalilipay nga Piesta sang mga Kayangkayang sa Jerusalem. Pagkatapos ginbasa kag ginpaathag ni Esdras kag sang iban nga mga Levinhon ang Kasuguan sang Dios sa ila, “ang bug-os nga katawhan naglakat sa pagkaon kag sa pag-inom kag sa pagpadala sing mga bahin kag sa paghimo sing dakung kinalipay, bangod nga nahangpan nila ang mga pulong nga ginpahayag sa ila.”—Nehemias 8:5-12.

Ang Kalipay ni Jehova Amo ang Aton Kusog

3. Sa idalom sang anong mga sirkunstansia ang “kalipay ni Jehova” mangin aton kusog?

³ Sa tion sadto nga piesta, nahangpan sang mga Judiyo ang kamatuoran sang mga pulong: “Ang kalipay ni Jehova amo ang inyo kusog.” (Nehemias 8:10) Ining kalipay amo man ang aton kusog kon nagatindog kita sing malig-on para sa hinatag-sang-Dios nga kahilwayan subong dedikado, bawtismado nga mga Saksi ni Jehova. Ang pila sa aton nakaeksperiensia sing paghaplas sang balaan nga espiritu kag pag-adoptar sa pamilya sang Dios subong langitnon nga mga masigkamanunubli kaupod ni Cristo. (Roma 8:​15-23) Ang kalabanan sa aton karon may paglaum nga magkabuhi sa dutan-on nga paraiso. (Lucas 23:43) Dapat gid kita magkalipay!

4. Ngaa ang mga Cristiano makabatas sing mga pag-antos kag paghingabot?

⁴ Bisan pa kita may makalilipay nga mga paglaum, indi mahapos ang magbatas sing mga pag-antos kag paghingabot. Apang, masarangan naton ini bangod ang Dios nagahatag sa aton sang iya balaan nga espiritu. Magakalipay kita sa sini kag magatuo nga wala sing makakuha sa aton sang aton paglaum ukon sang gugma sang Dios. Dugang pa, makasiguro kita nga si Jehova mangin ang kusog naton tubtob ginahigugma naton sia upod sa aton bug-os nga tagipusuon, kalag, kusog, kag hunahuna.—Lucas 10:27.

5. Sa diin kita mahimo makakita sing rason sa pagkalipay?

⁵ Ang katawhan ni Jehova nagaagom sing buganang mga pagpakamaayo kag may madamong rason sa pagkalipay. Ang iban nga mga rason sa pagkalipay ginsambit sa sulat ni Pablo sa mga taga-Galacia. Ang iban ginsambit sa iban pa nga bahin sang Kasulatan. Nagapapagsik sang aton tagipusuon ang pagbinagbinag sa makalilipay nga mga pagpakamaayo.

Kabilihanan sang Hinatag-sang-Dios nga Kahilwayan

6. Ngaa ginlaygayan ni Pablo ang taga-Galacia nga mga Cristiano nga magtindog sing malig-on?

⁶ Subong mga Cristiano, may yara kita makalilipay nga pagpakamaayo sang isa ka kalahamut-an nga tindog upod sa Dios. Sanglit ginhilway ni Cristo ang iya mga sumulunod gikan sa Mosaikong Kasuguan, ang mga taga-Galacia ginlaygayan sa pagtindog sing malig-on kag dili “magpagota [liwat] sa kahiolipnan.” Kamusta kita? Kon tinguhaan naton nga mapahayag nga matarong paagi sa pagsunod sa Kasuguan, mapahilayo kita kay Cristo. Apang, ginabuligan sang espiritu sang Dios, ginahulat naton ang ginalauman nga pagkamatarong nga resulta sang pagtuo nga nagapanghikot paagi sa gugma, indi sa pisikal nga sirkunsisyon ukon iban nga mga buhat sang Kasuguan.—Galacia 5:1-6.

7. Paano naton dapat tamdon ang balaan nga pag-alagad kay Jehova?

⁷ Isa ka pagpakamaayo nga gamiton ang aton hinatag-sang-Dios nga kahilwayan sa ‘pag-alagad kay Jehova nga may kasadya.’ (Salmo 100:2) Sa pagkamatuod, isa ka dimabanta nga pribilehiyo ang paghimo sing balaan nga pag-alagad kay “Jehova nga Dios, nga Labing Gamhanan,” ang “Hari sang katuigan”! (Bugna 15:3) Kon ang balatyagon sang manubo nga pagtamod sa kaugalingon nagadaug sa imo, mahimo makabulig ang paghangop nga ang Dios nagpasuod sa imo sa iya paagi kay Jesucristo kag naghatag sa imo sing bahin sa “balaan nga hilikuton sang maayong balita sang Dios.” (Roma 15:16; Juan 6:44; 14:6) Daw ano nga rason para magkalipay kag magpasalamat sa Dios!

8. Tuhoy sa Babilonia nga Daku, ano ang kabangdanan sang pagkalipay sang katawhan sang Dios?

⁸ Ang isa pa ka kabangdanan sa pagkalipay amo ang aton hinatag-sang-Dios nga kahilwayan gikan sa Babilonia nga Daku, ang bug-os kalibutan nga emperyo sang butig nga relihion. (Bugna 18:2, 4, 5) Bisan nga ining relihioso nga makihilawason malaragwayon nga “nagalingkod sa ibabaw sang madamong tubig,” nga nagakahulugan sa “mga katawhan kag mga kadam-an kag mga pungsod kag mga hambal,” wala sia nagalingkod, ukon relihioso nga nagaimpluwensia kag nagakontrol, sa mga alagad ni Jehova. (Bugna 17:1, 15) Nagakasadya kita sa makatilingala nga kapawa sang Dios, samtang ang mga sumalakdag sang Babilonia nga Daku yara sa espirituwal nga kadadalman. (1 Pedro 2:9) Huo, mabudlay hangpon ang iban nga “mga kadadalman sang Dios.” (1 Corinto 2:10) Apang ang pagpangamuyo para sa kaalam kag bulig sang balaan nga espiritu nagatabang sa aton sa paghangop sa Makasulatanhon nga kamatuoran nga nagahilway sa espirituwal sang mga nagapanag-iya sini.—Juan 8:31, 32; Santiago 1:5-8.

9. Agod maagom naton ang pagpakamaayo sang dalayon nga kahilwayan gikan sa relihioso nga sayop, ano ang dapat naton himuon?

⁹ Ginaagom naton ang pagpakamaayo sang dalayon nga kahilwayan gikan sa relihioso nga sayop, apang agod huptan ina nga kahilwayan, dapat naton isikway ang apostasya. Ang mga taga-Galacia nagdalagan sang Cristianong palumba sing maayo, apang ang iban nag-upang sa ila gikan sa pagtuman sa kamatuoran. Inang malaut nga paghaylo wala naghalin sa Dios kag dapat batuan. Subong nga ang diutay nga tapay nagalatum sang bug-os nga linamas, ang butig nga mga manunudlo ukon huyog sa apostasya nagapalain sang bug-os nga kongregasyon. Luyag ni Pablo nga ang mga sumalakdag sang sirkunsisyon nga nagapanikasog nga pakalainon ang pagtuo sang mga taga-Galacia indi lamang sirkunsidahon kundi kapunon. Matigdas gid nga hambal! Apang dapat kita mangin subong kalig-on sa pagsikway sa apostasya agod mahuptan naton ang aton hinatag-sang-Dios nga kahilwayan gikan sa relihioso nga sayop.—Galacia 5:7-12.

Magpaulipon sa Isa kag Isa sa Gugma

10. Ano ang aton salabton subong bahin sang Cristianong paghiliutod?

¹⁰ Ang hinatag-sang-Dios nga kahilwayan nagdala sa aton sa pagpakig-upod sa isa ka mahigugmaon nga paghiliutod, apang dapat kita maghimo sang aton bahin sa pagpakita sing gugma. Indi dapat paggamiton sang mga taga-Galacia ang ila kahilwayan subong “kahigayunan sa unod” ukon balibad para sa dimahigugmaon nga kakagud. Dapat sila magpaulipon sa isa kag isa sa gugma subong pangpahulag. (Levitico 19:18; Juan 13:35) Dapat man naton likawan ang paglibak kag pagdumot nga sarang magresulta sa paglaglag sa aton sang isa kag isa. Sa pagkamatuod, indi ini matabo kon ginapakita naton ang utudnon nga gugma.—Galacia 5:13-15.

11. Paano kita mangin pagpakamaayo sa iban, kag paano sila magapakamaayo sa aton?

¹¹ Paagi sa paggamit sang aton hinatag-sang-Dios nga kahilwayan nahisanto sa pagtuytoy sang espiritu sang Dios, ipakita naton ang gugma kag mangin pagpakamaayo sa iban. Dapat mangin isa ka batasan ang tugutan ang aton kaugalingon nga kontrolon kag tuytuyan sang balaan nga espiritu. Nian indi kita mahuyog sa dimahigugmaon nga pagpaayaw sang aton makasasala nga unod nga “ang handum batok sa espiritu.” Kon ginatuytuyan kita sang espiritu sang Dios, himuon naton kon ano ang mahigugmaon apang indi bangod ang kasuguan nagakinahanglan sing pagsunod kag nagapatuman sing silot sa mga nakasala. Halimbawa, ang gugma—indi lamang ang kasuguan—ang nagapugong sa aton nga pasipalahan ang iban. (Levitico 19:16) Ang gugma magapahulag sa aton sa pagpamulong kag sa pagpanghikot sa malulo nga paagi. Bangod ginapakita naton ang bunga sang espiritu nga gugma, ang iban magapakamaayo sa aton, ukon magapamulong sing maayo tuhoy sa aton. (Hulubaton 10:6) Dugang pa, ang pagpakig-upod sa aton mangin pagpakamaayo sa ila.—Galacia 5:16-18.

Baliskad nga Bunga

12. Ano ang pila ka pagpakamaayo nga naangot sa paglikaw sa makasasala nga “mga buhat sang unod”?

¹² Ang madamong pagpakamaayo nga nagaupod sa aton hinatag-sang-Dios nga kahilwayan resulta sang paglikaw sa makasasala nga “mga buhat sang unod.” Subong katawhan sang Dios, kita, sa kabilugan, nagalikaw sang daku nga kasisit-an bangod wala kita nagabuhat sing pakighilawas, kahigkuan, kag lugak nga paggawi. Paagi sa paglikaw sa idolatriya, may kalipay kita nga resulta sang pagpahamuot kay Jehova sa sina nga bahin. (1 Juan 5:21) Bangod wala kita nagabuhat sing espiritismo, hilway kita sa paggahom sang mga demonyo. Ang aton Cristianong paghiliutod wala ginaguba sang kaawayon, binangig, kaimon, kaakig, pag-inaway, pagbinahinbahin, mga sekta, kag mga kahisa. Kag ang aton kalipay wala nadula sa paghinubog kag pagginansal. Si Pablo nagpaandam nga ang nagahimo sang mga buhat sang unod indi magapanubli sang Ginharian sang Dios. Apang, bangod ginatuman naton ang iya mga pulong, makapanguyapot kita sa makalilipay nga paglaum sa Ginharian.—Galacia 5:19-21.

13. Anong bunga ang ginapatubas sang balaan nga espiritu ni Jehova?

¹³ Ang hinatag-sang-Dios nga kahilwayan nagadala sa aton sing kalipay bangod ang mga Cristiano nagapakita sang bunga sang espiritu ni Jehova. Gikan sa pinamulong ni Pablo sa mga taga-Galacia, mahapos makita nga ang mga buhat sang makasasala nga unod kaangay sang tunok kabaliskaran sa matahom nga bunga sang gugma, kalipay, paghidait, pagbatas, kalulo, kaayo, pagtuo, kalum-ok, kag pagpugong sa kaugalingon nga gintanum sa diosnon nga mga tagipusuon. Determinado sa pagkabuhi kabaliskaran sa mga handum sang makasasala nga unod, luyag naton nga tuytuyan sang espiritu sang Dios kag magkabuhi sa sini. Ang espiritu nagahimo sa aton nga mapainubuson kag mahidaiton, wala “nagapadayawdayaw, nga nagahangkatanay, nga nagahinisaay.” Indi katingalahan nga isa ka kalipay ang makig-upod sa mga nagapakita sang bunga sang espiritu!—Galacia 5:22-26.

Ang Iban nga mga Rason sa Pagkalipay

14. Anong hinganib ang kinahanglan naton sa aton pagpakig-away batok sa malauton espirituhanon nga mga kusog?

¹⁴ Kaupod sa aton hinatag-sang-Dios nga espirituwal nga kahilwayan amo ang pagpakamaayo nga naamligan gikan kay Satanas kag sa mga demonyo. Agod magmadinalag-on sa aton pagpakig-away batok sa malauton espirituhanon nga mga kusog, dapat naton isuksok ang “bug-os nga hinganib sang Dios.” Kinahanglan naton ang wagkus sang kamatuoran sa aton hawak kag ang limbutong sang pagkamatarong. Ang aton mga tiil dapat nasukluban sang pangaman sang maayong balita sang paghidait. Kinahanglanon man amo ang taming sang pagtuo, nga makasarang sa pagpalong sang nagadabadaba nga baslay sang malauton. Dapat naton isuksok ang pandong sang kaluwasan kag gamiton ang “espada sang espiritu,” ang Pulong sang Dios. Dapat man kita “magpangamuyo sa tanan nga tion sa espiritu.” (Efeso 6:11-18) Kon ginasuksok naton ang espirituwal nga hinganib kag ginasikway ang demonismo, mangin di-mahinadlukon kita kag malipayon.—Ipaanggid ang Binuhatan 19:18-20.

15. Anong makalilipay nga pagpakamaayo ang aton bangod nagagawi kita nahisuno sa Pulong sang Dios?

¹⁵ May kalipay kita bangod ang aton paggawi nagahisanto sa Pulong sang Dios, kag hilway kita sa sala nga nagatublag sa madamong makasasala. ‘Nagapanikasog [kita] sa paghupot gihapon sing kaisipan nga dimalinapason sa Dios kag sa mga tawo.’ (Binuhatan 24:16) Gani, indi kita dapat magkahadlok sa balaan nga pagbalos nga mahanabo gid sa hungod kag dimahinulsulon nga mga makasasala. (Mateo 12:22-32; Hebreo 10:26-31) Paagi sa pag-aplikar sang laygay sa Hulubaton 3:21-26, nakita naton ang katumanan sinang mga pulong: “Bantayi ang maayo nga kaalam kag pagbinagbinag, gani mangin kabuhi sila sa imo kalag kag bugay sa imo liog. Nian magalakat ka sing malig-on sa imo dalanon, kag ang imo tiil indi makasandad. Kon maghigda ka indi ka magkahadlok; kag kon maghigda ka, ang imo katulugon mangin hamuok. Dili magkahadlok sang hinali nga kakulba, ukon sang kalaglagan sang malauton, kon mag-abot ini. Kay si Jehova mangin imo saligan, kag magabantay sia sang imo tiil nga indi makuha.”

16. Paano ang pangamuyo kabangdanan sa pagkalipay, kag ano ang bahin sang espiritu ni Jehova nahanungod sini?

¹⁶ Ang isa pa ka kabangdanan sang kalipay amo ang aton hinatag-sang-Dios nga kahilwayan sa pagpalapit kay Jehova sa pangamuyo upod ang pasalig nga pamatian kita. Huo, ang aton mga pangamuyo ginasabat bangod may yara kita matinahuron nga “kahadlok kay Jehova.” (Hulubaton 1:7) Dugang pa, ginabuligan kita nga huptan ang aton kaugalingon sa gugma sang Dios paagi sa ‘pagpangamuyo sa balaan nga espiritu.’ (Judas 20, 21) Ginahimo naton ini paagi sa pagpadayag sing kahimtangan sang tagipusuon nga kalahamut-an kay Jehova kag paagi sa pagpangamuyo sa idalom sang impluwensia sang espiritu para sa mga butang nga nahisuno sa iya kabubut-on kag sa iya Pulong, nga nagapakita sa aton kon paano mangamuyo kag kon ano ang ipangabay sa pangamuyo. (1 Juan 5:13-15) Kon ginatilawan kita sing masakit kag wala nakahibalo kon ano ang ipangamuyo, ‘ang espiritu gid nagapatunga tungod sa aton, nga nagapakiluoy nga may mga pag-ugayong nga dimamitlang.’ Ginasabat sang Dios ina nga mga pangamuyo. (Roma 8:26, 27) Ipangamuyo naton ang balaan nga espiritu kag tugutan ini sa pagpatubas sa aton sang mga bunga sini nga kinahanglanon labi na sa pag-atubang sa isa ka pagtilaw. (Lucas 11:13) Magadugang man ang aton kalipay kon mapangamuyuon kag makugi naton nga tun-an ang inspirado sang espiritu nga Pulong sang Dios kag Cristianong mga publikasyon nga ginhanda sa idalom sang pagtuytoy sang espiritu.

Ginpakamaayo sang Pirme Yara nga Bulig

17. Paano ang mga eksperiensia ni Moises kag ang mga pulong ni David nagapakita nga si Jehova nagaupod sang Iya katawhan?

¹⁷ Paagi sa paggamit sang aton hinatag-sang-Dios nga kahilwayan sing husto, may kalipay kita sa pagkahibalo nga si Jehova kaupod naton. Sang ang dimaayo nga mga sirkunstansia nagtiklod kay Moises sa pagbiya sang Egipto, bangod sa pagtuo “nagbatas sia subong nga nagatan-aw sa Iya nga dimakita.” (Hebreo 11:27) Si Moises wala naglakat sing isahanon; nakahibalo sia nga si Jehova kaupod niya. Sa kaanggid, ang mga anak nga lalaki ni Core nag-amba: “Ang Dios aton dalangpan kag kusog, handa gid nga kabulig sa kalisud. Busa dili kita mahadlok bisan magbaliskad ang duta kag bisan ang kabukiran uyugon pakadto sa alibutod sang kadagatan; bisan ang mga tubig niya magdaguhob kag malabugay, bisan ang kabukiran magkurog bangod sang iya paghabok.” (Salmo 46:1-3) Kon ikaw may amo sina nga pagtuo sa Dios, indi gid niya ikaw pagbayaan. Siling ni David: “Kon magbiya sa akon ang akon amay kag akon iloy, nian si Jehova magasapopo sa akon.” (Salmo 27:10) Daw ano nga kalipay ang makahibalo nga si Jehova nagaulikid gid sa iya mga alagad!—1 Pedro 5:6, 7.

18. Ngaa ang may kalipay ni Jehova nagapanag-iya sang hinatag-sang-Dios nga kahilwayan gikan sa daku nga kabalaka?

¹⁸ Bangod may kalipay ni Jehova, nagapanag-iya kita sang hinatag-sang-Dios nga kahilwayan gikan sa daku nga paghimud-os. “Dili kamo maghimud-os sa bisan ano,” siling ni Pablo, “kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga paghangop magatipig sang inyo mga tagipusuon kag inyo mga painoino kay Cristo Jesus.” (Filipos 4:6,7) Ang paghidait sang Dios isa ka dimapaanggiran nga kakalma bisan sa pinakamabudlay nga mga sirkunstansia. Paagi sini ang aton tagipusuon nagapabilin nga kalma​—butang nga maayo para sa aton sa espirituwal, sa emosyonal, kag sa pisikal. (Hulubaton 14:30) Nagabulig man ini sa aton sa paghupot sing pagkatimbang sa hunahuna, kay nakahibalo kita nga wala sing butang nga ginatugot sang Dios ang makahimo sa aton sing dayon nga halit. (Mateo 10:28) Ining paghidait nga bunga sang suod nga kaangtanan sa Dios paagi kay Cristo mangin aton bangod dedikado kita kay Jehova kag nagapasakop sa pagtuytoy sang iya espiritu, nga nagapatubas sang mga bunga subong sang kalipay kag paghidait.

19. Ang paghupot sang aton tagipusuon nga natuon sa ano nagabulig sa aton nga magmalipayon?

¹⁹ Ang paghupot sang aton tagipusuon nga nahugod sa aton hinatag-sang-Dios nga kahilwayan kag paglaum sang Ginharian magabulig sa aton nga magmalipayon. Halimbawa, kon kaisa diutay lamang ang mahimo tuhoy sa mapigaw nga panglawas, apang makapangamuyo kita sing kaalam kag kabakod nga madaug ini kag makasapo sing paumpaw sa paghunahuna nahanungod sa espirituwal nga kapagros nga ginaagom naton karon kag sa pisikal nga pagbulong nga mahanabo sa idalom sang paggahom sang Ginharian. (Salmo 41:​1-3; Isaias 33:24) Bisan pa mahimo kita karon mag-antos sing kapigaduhon, wala na sing kakulang sing mga kinahanglanon sa kabuhi sa Paraiso nga duta nga tuman na kalapit. (Salmo 72:14, 16; Isaias 65:21-23) Huo, ang aton langitnon nga Amay magasakdag sa aton sa karon kag sa ulihi magahimo sang aton kalipay nga bug-os.—Salmo 145:14-21.

Pakabahandia ang Inyo Hinatag-sang-Dios nga Kahilwayan

20. Suno sa Salmo 100:​1-5, paano naton dapat ipresentar ang aton kaugalingon sa atubangan ni Jehova?

²⁰ Subong katawhan ni Jehova, pat-od gid nga dapat naton pakabahandion ang hinatag-sang-Dios nga kahilwayan nga naghatag sa aton sing kalipay kag tuman kadamo nga pagpakamaayo. Indi katingalahan nga ang Salmo 100:1-5 nagalaygay sa aton sa pagkari sa presensia sang Dios nga “may pag-amba.” Si Jehova nagapanag-iya sa aton kag nagaulikid sa aton subong isa ka mahigugmaon nga Manugbantay. Huo, “kita iya katawhan kag mga karnero sang iya halalban.” Ang iya pagka-Manunuga kag dakung mga kinaiya nagahatag sa aton sing pangpapagsik sa pagsulod sa luwang sang iya santuaryo nga may pagdayaw kag pagpasalamat. Ginapahulag kita nga “pakamaayuhon ang iya ngalan,” nga magpamulong sing maayo kay Jehova nga Dios. Dugang pa, makasalig kita pirme sa iya mahigugmaon nga kaluoy, ukon sa iya maluluy-on nga balatyagon, para sa aton. “Sa tanan nga kaliwatan” si Jehova matutom, dimationg sa pagpakita sing gugma sa mga nagahimo sang iya kabubut-on.

21. Anong pagpalig-on ang ginhatag sa unang guwa sining magasin, kag ano ang dapat naton himuon nahanungod sa hinatag-sang-Dios nga kahilwayan?

²¹ Subong dihimpit nga mga tawo, indi kita karon makalikaw sa tanan nga mga pagtilaw. Apang, paagi sa bulig sang Dios, sarang kita mangin maisog kag malipayon nga mga Saksi ni Jehova. Talalupangdon sa sini nga bahin amo ining mga pulong nga mabasa sa unang guwa sining balasahon (Hulyo 1879): “Magpakaisog . . . akon Cristianong utod nga lalaki ukon utod nga babayi, nga nagatinguha nga may kapoy nga tikang sa pagdalagan sa makitid nga dalan. Indi magkabalaka sa batsihon nga dalan; tanan ini ginhalad kag ginpakabalaan sang ginpakamaayo nga mga tiil sang Agalon. Kabiga ang tagsa ka tunok nga isa ka bulak; ang tagsa ka matalom na bato nga isa ka milyahe, nga nagapadasig sa imo padulong sa tulumuron. . . . Hupti ang imo mata nga natuon sa padya.” Ang minilyon nga nagaalagad karon kay Jehova nagatuon sang ila mga mata sa padya kag may madamong rason sa pagkaisog kag pagkalipay. Kaupod nila, magtindog sing malig-on para sa hinatag-sang-Dios nga kalipay. Indi pagwasiha ang katuyuan sini, kag kabay nga ang kalipay ni Jehova pirme mangin imo kusog.

Paano Mo Sabton?

◻ Paano ang “kalipay ni Jehova” mangin aton kusog?

◻ Nagapamulong sing relihioso, anong mga pagpakamaayo ang gindala sang hinatag-sang-Dios nga kahilwayan sa katawhan ni Jehova?

◻ Ngaa magpaulipon sa isa kag isa sa gugma?

◻ Ano ang iban nga mga pagpakamaayo nga ginabuylog sa hinatag-sang-Dios nga kahilwayan?

◻ Paano ang katawhan sang Dios makapabilin nga malipayon?

[Laragway sa pahina 23]

“Kabiga ang tagsa ka tunok nga isa ka bulak; ang tagsa ka matalom nga bato nga isa ka milyahe, nga nagapadasig sa imo padulong sa tulumuron”