LEKSION 39
Ang Pagtamod sang Dios sa Dugo
Importante gid ang dugo. Kon wala kita sing dugo, indi kita mabuhi. Ang Dios ang nagtuga sa aton, gani sia lang ang makasiling kon paano gamiton ang dugo. Ano ang ginsiling niya parte sa dugo? Puede bala ini kaunon ukon itughong? Kag paano ka makahimo sing husto nga mga desisyon parte sa dugo?
1. Ano ang pagtamod ni Jehova sa dugo?
Ginsilingan ni Jehova ang iya mga sumilimba sang una nga “ang kabuhi sang tanan nga sahi sang unod amo ang dugo sini.” (Levitico 17:14) Para kay Jehova, ang dugo nagarepresentar sang kabuhi. Ang kabuhi sagrado ukon balaan nga regalo sang Dios, gani ang dugo sagrado man.
2. Ano nga paggamit sang dugo ang ginadumilian sang Dios?
Ginsugo ni Jehova ang iya mga sumilimba sang una nga indi magkaon sang dugo. (Basaha ang Genesis 9:4 kag Levitico 17:10.) Ginsulit niya ini nga sugo sang naghatag sing instruksion ang nagadumala nga hubon sa mga Cristiano nga “padayon kamo nga maglikaw . . . sa dugo.”—Basaha ang Binuhatan 15:28, 29.
Ano ang buot silingon nga maglikaw sa dugo? Kon ginhambalan ka sang doktor nga indi mag-inom sing makahulubog nga ilimnon, indi ka mag-inom. Pero makaon ka bala sing mga pagkaon nga ginbutangan sang makahulubog nga ilimnon ukon itughong ini sa imo lawas? Siempre indi. Gani, ang buot silingon sang sugo sang Dios nga maglikaw sa dugo amo nga indi kita dapat mag-inom sang dugo ukon magkaon sang karne sang sapat nga wala napagua ang dugo. Indi man kita dapat magkaon sing bisan ano nga pagkaon nga ginbutangan sang dugo.
Pero puede bala gamiton ang dugo sa pagpabulong? May mga paagi sang pagbulong nga nagalapas sa kasuguan sang Dios. Lakip sa sini ang pagpatughong sang puro nga dugo ukon ang panguna nga mga bahin sini, pareho sang pula nga selula, puti nga selula, platelet, kag plasma. Ang iban nga paagi sang pagbulong mahimo wala man gid nagalapas sa kasuguan sang Dios. Halimbawa, ginagamit sa pila ka pagbulong ang magagmay nga bahin sang isa sa panguna nga bahin sang dugo. May iban nga paagi sang pagbulong nga ginagamit mismo ang kaugalingon nga dugo sang pasyente. Kon parte sa sini nga pagbulong, personal ini nga desisyon sang kada isa.a—Galacia 6:5.
USISAA PA GID
Usisaon naton kon paano ka makahimo sing mga desisyon parte sa pagpabulong nga nagagamit sang dugo.
3. Pilia ang paagi sang pagpabulong nga nagapalipay kay Jehova
Paano ka makapili sing mga paagi sang pagbulong nga nahisanto sa pagtamod sang Dios? Tan-awa ang VIDEO, dayon binagbinaga ang masunod nga dapat mo himuon.
Mangamuyo nga hatagan ka sing kaalam.—Santiago 1:5.
Mag-research sang mga prinsipio sa Biblia kag kon paano ini makabulig sa imo.—Hulubaton 13:16.
Hibalua kon ano nga mga paagi sang pagbulong ang may-ara sa inyo lugar.
Hibalua ang mga paagi sang pagbulong nga indi mo pagbatunon.
Siguraduha nga indi ka pagkonsiensiahon sang imo himuon nga desisyon.—Binuhatan 24:16.b
Dumduma nga wala sing bisan sin-o—bisan ang imo bana ukon asawa, gulang, ukon ang nagatudlo sa imo sa Biblia—ang dapat magdesisyon para sa imo kon ang desisyunan nagadepende sa konsiensia.—Roma 14:12.
Isulat ang imo desisyon.
4. Gusto sang mga Saksi ni Jehova ang pinakamaayo nga pagbulong
Posible gid makabaton sang pinakamaayo nga pagbulong nga wala nagagamit sang dugo kag wala nagalapas sa kasuguan sang Dios. Tan-awa ang VIDEO.
Basaha ang Tito 3:2, dayon binagbinaga ini nga pamangkot:
Ngaa dapat kita magkooperar kag mangin kalmado kon nagaistorya sa mga doktor?
Wala ginabaton nga bahin sang dugo |
Personal nga desisyon sang kada Cristiano |
|---|---|
A. Plasma |
Magagmay nga bahin sang plasma |
B. Puti nga selula |
Magagmay nga bahin sang puti nga selula |
C. Platelet |
Magagmay nga bahin sang platelet |
D. Pula nga selula |
Magagmay nga bahin sang pula nga selula |
5. Kon gamiton ang magagmay nga bahin sang dugo
Ang dugo may apat ka panguna nga bahin—ang pula nga selula, puti nga selula, platelet, kag plasma. Ining apat may magagmay pa gid nga bahin, nga ginatawag mga blood fraction.c Ang pila sining magagmay nga bahin ginagamit sa pagbulong sa mga sakit ukon pagpauntat sang pagdugo.
Kon parte sa magagmay nga bahin sang dugo, ang kada Cristiano dapat magdesisyon base sa iya konsiensia nga natudluan sang Biblia. Ang iban mahimo magdesisyon nga indi magbaton sang bulong ukon mga paagi sang pagbulong nga nagagamit sang magagmay nga bahin sang dugo. Pero mahimo batunon ini sang iban kay ginatugot sang ila konsiensia.
Kon nagadesisyon, binagbinaga ini nga pamangkot:
Paano ko ipaathag sa doktor kon ngaa batunon ko ukon indi ang magagmay nga bahin sang dugo?
KON PAMANGKUTON KA: “Ano ang malain sa pagpatughong sang dugo?”
Ano ang isabat mo?
SUMARYO
Gusto ni Jehova nga tamdon naton nga sagrado ang dugo.
Rebyu
Ngaa sagrado ang pagtamod ni Jehova sa dugo?
Ngaa masiling naton nga ang pagpatughong sang dugo nalakip sa sugo sang Dios nga maglikaw sa dugo?
Paano ka makahimo sang husto nga desisyon parte sa pagpabulong nga nagagamit sang dugo?
DUGANG NGA IMPORMASYON
Ano dapat ang binagbinagon mo kon nagadesisyon ka parte sa pagpabulong nga nagagamit sang imo dugo?
“Mga Pamangkot Gikan sa mga Bumalasa” (Ang Lalantawan, Oktubre 15, 2000)
Ano dapat ang binagbinagon mo kon nagadesisyon kon bala batunon mo ang magagmay nga bahin sang dugo?
“Mga Pamangkot Gikan sa mga Bumalasa” (Ang Lalantawan, Hunyo 15, 2004)
Ngaa ginbaton sang isa ka doktor nga husto ang pagtamod ni Jehova sa dugo?
“Ginbaton Ko ang Pagtamod sang Dios sa Dugo” (Magmata!, Disiembre 8, 2003)
Hibalua kon paano ginabuligan sang mga gulang sa Hospital Liaison Committee ang mga kauturan.
a Tan-awa ang Leksion 35 nga “Paano Kita Makahimo sing Maayo nga Desisyon.”
b Tan-awa ang ikalima nga punto nga “Kon Gamiton ang Magagmay nga Bahin sang Dugo,” kag Endnote 3 nga, “Mga Paagi sang Pagbulong nga Nagagamit sang Dugo.”
c Para sa pila ka doktor, ang apat ka panguna nga bahin sang dugo mga blood fraction. Gani, dapat mo ipaathag ang imo desisyon nga indi ka magpatughong sang puro nga dugo ukon pula nga selula, puti nga selula, platelet, ukon plasma.