Magpabilin sa “Siudad nga Dalangpan” kag Magkabuhi!

“Dapat sia magpabilin sa iya siudad nga dalangpan tubtob nga mapatay ang mataas nga saserdote.”​—⁠NUMEROS 35:⁠28.

 1. Sin-o ang Manugtimalos sang dugo, kag ano ang pagahimuon niya sa dili madugay?

ANG Manugtimalos ni Jehova sang dugo, nga si Jesucristo, manugsalakay na. Kaupod sang iya angheliko nga mga hubon, ining Manugtimalos magapanghikot sa dili madugay batok sa tanan nga dimahinulsulon nga nakasala sa dugo. Huo, si Jesus amo ang Manugpatay sang Dios sa nagahinampot sing madasig nga “dakung kapipit-an.” (Mateo 24:​21, 22; Isaias 26:21) Nian ang katawhan indi makapalagyo sa mga resulta sang ila kasal-anan sa dugo.

 2. Ano ang lamang matuod nga duog nga dalangpan, kag anong mga pamangkot ang nagakinahanglan sing mga sabat?

² Ang dalan padulong sa kaluwasan amo ang paglakat sa dalan padulong sa antitipiko nga siudad nga dalangpan kag ang pagluwas sang imo kabuhi! Kon ginbaton sa siudad, ang isa nga nagdangop dapat magpabilin didto, kay amo lamang ini ang matuod nga duog nga dalangpan. Apang mahimo ka mamangkot, ‘Sanglit ang kalabanan sa aton wala pa gid makapatay sing tawo, kita bala tunay nga nakasala sa dugo? Ngaa si Jesus ang Manugtimalos sang dugo? Ano ang modernong-adlaw nga siudad nga dalangpan? Makabiya bala sa sini sing hilway ang bisan sin-o?

Nakasala Gid Bala Kita sa Dugo?

 3. Anong bahin sang Mosaikong Kasuguan ang magabulig sa aton sa paghangop nga ang binilyon sang duta may kasal-anan sa dugo?

³ Ang isa ka bahin sang Mosaikong Kasuguan magabulig sa aton sa paghangop nga ang binilyon sa duta may kasal-anan sa dugo. Ang Dios nagpasad sa Israelinhon nga sila tanan may salabton sa pagpaagay sa dugo. Kon may isa nga nakita nga pinatay kag wala mahibal-i ang nagpatay sa iya, dapat takson sang mga hukom ang kalayuon sa kaingod nga mga siudad agod mahibaluan ang pinakamalapit nga siudad. Agod masikway ang sala, ang mga gulang sinang mahimo nakasala sa dugo nga siudad magalunggo sang liog sang isa ka tinday kag wala pa mahanas nga baka nga babayi sa wala maarado nga nalupyakan. Ginhimo ini sa atubangan sang Levinhon nga mga saserdote ‘bangod ginpili sila ni Jehova sa paghusay sang mga binais tungod sa masingki nga mga buhat.’ Ang mga gulang sang siudad nagahinaw sang ila mga kamot sa ibabaw sang baka nga babayi kag nagasiling: “Ang amon mga kamot wala magpailig sining dugo, bisan ang amon mga mata wala makakita sini. Patawara, O Jehova, ang imo katawhan nga Israel, nga gintubos mo, kag dili pag-itugot nga ang dugo nga walay sala mangin sa tunga sang imo katawhan nga Israel.” (Deuteronomio 21:​1-9) Indi luyag ni Jehova nga Dios nga ang duta sang Israel madagtaan sing dugo ukon ang katawhan sini magapas-an sing salabton sang tanan nga kasal-anan sa dugo.

 4. Ano ang rekord sa kasal-anan sa dugo sang Babilonia nga Daku?

⁴ Huo, may isa ka butang nga ginatawag nga salabton sang tanan, ukon sang komunidad, nga kasal-anan sa dugo. Binagbinaga ang daku nga kasal-anan sa dugo sang Babilonia nga Daku, ang bug-os kalibutan nga emperyo sang butig nga relihion. Aba, nahubog sia sa dugo sang mga alagad ni Jehova! (Bugna 17:​5, 6; 18:24) Ang mga relihion sang Cristiandad nagapangangkon nga nagasunod sa Prinsipe sang Paghidait, apang ang mga inaway, mga relihiosong inkisisyon, kag makamamatay nga mga krusada naghimo sa iya nga nakasala sa dugo sa atubangan sang Dios. (Isaias 9:6; Jeremias 2:34) Sa katunayan, may daku sia nga kasal-anan sa pagkapatay sang minilyon sa duha ka inaway kalibutanon sining siglo. Busa, ang mga sumulunod sang butig nga relihion subong man ang mga sumalakdag kag mga pumalasakop sa tawhanon nga inaway nakasala sa dugo sa atubangan sang Dios.

 5. Paano ang pila ka tawo nangin kaangay sang dihungod nga nakapatay sing tawo sang Israel?

⁵ Ang iban nga mga tawo nakapatay sing ­tawo sing dihungod ukon bangod sang pagpatumbaya. Ang iban nakigbahin sa guban nga pagpamatay, ayhan ginhaylo sang relihiosong mga lider nga kabubut-on ini sang Dios. Ang iban pa naghingabot kag nagpatay sa mga ­alagad sang Dios. Apang, bisan pa nga wala ­kita makahimo sina nga mga butang, may ­salabton kita tanan sa pagkawasi sang tawhanon nga kabuhi bangod wala naton mahibaluan ang ­kasuguan kag kabubut-on sang Dios. Kaangay kita sang dihungod nga nakapatay ­sing tawo ­nga ‘nakapatay sang iya isigkatawo sing dihungod kag wala magdumot sa iya sang nagligad nga tion.’ (Deuteronomio 19:⁠4) Inang mga indibi­duwal dapat makitluoy sa Dios kag dapat magdalagan pakadto sa ­antitipiko nga siudad nga dalangpan. Kon indi mahimo nila masugata kag mapatay sila sang Manugtimalos sang dugo.

Ang Importante nga mga Katungdanan ni Jesus

 6. Ngaa masiling naton nga si Jesus amo ang pinakasuod nga himata sang tawo?

⁶ Sa Israel ang manugtimalos sang dugo amo ang pinakamalapit nga himata sang biktima. Agod itimalos yadtong tanan nga nagkalamatay sa duta kag ilabi na ang pinatay nga mga alagad ni Jehova, ang karon nga Manugtimalos sang dugo dapat nga mangin himata sang tanan nga katawhan. Ina nga katungdanan ginpun-an ni Jesucristo. Nabun-ag sia nga isa ka himpit nga tawo. Ginhatag ni Jesus ang iya wala sing sala nga kabuhi sa kamatayon subong halad nga gawad, kag pagkatapos sang iya pagkabanhaw sa langit, ginhatag niya ang balor sini sa Dios para sa makasasala kag nagatagumatayon nga mga kaliwat ni Adan. Busa si Cristo nangin ang Manunubos sang katawhan, ang aton pinakasuod nga himata​—⁠ang nagakaigo nga Manugtimalos sang dugo. (Roma 5:12; 6:23; Hebreo 10:12) Si Jesus ginapakilala subong utod sang iya hinaplas nga mga sumulunod sang iya tikang. (Mateo 25:​40, 45; Hebreo 2:​11-17) Subong langitnon nga Hari nangin “Dayon nga Amay” sia sa sadtong magapanginpulos gikan sa iya halad subong ang iya dutan-on nga mga sakop. Magakabuhi sila sing dayon. (Isaias 9:​6, 7) Gani nagakaigo nga gintangdo ni Jehova ining Himata sang katawhan subong ang Manugtimalos sang dugo.

 7. Subong ang dakung Mataas nga Saserdote, ano ang ginahimo ni Jesus para sa katawhan?

⁷ Si Jesus isa man ka wala sing sala, natilawan, kag mahinuklugon nga Mataas nga Saserdote. (Hebreo 4:15) Sa sinang ikasarang ginapadapat niya ang balor sang iya nagatumbas sang sala nga halad sa katawhan. Ang mga siudad nga dalangpan gintukod “para sa katawhan sang Israel kag para sa dumuluong nga pumuluyo kag para sa manlulugayaw sa tunga nila.” (Numeros 35:15) Gani ginpadapat una sang dakung Mataas nga Saserdote ang balor sang iya halad sa iya hinaplas nga mga sumulunod, “sa katawhan sang Israel.” Karon ginapadapat ini sa ‘mga dumuluong nga pumuluyo’ kag sa ‘mga manlulugayaw’ sang antitipiko nga siudad nga dalangpan. Ining “iban nga mga karnero” ni Ginuong Jesucristo nagalaum nga magkabuhi sing dayon sa duta.​—⁠Juan 10:16; Salmo 37:​29, 34.

Ang Siudad nga Dalangpan Karon

 8. Ano ang antitipiko nga siudad nga dalangpan?

⁸ Ano ang antitipiko nga siudad nga dalangpan? Indi ini pila ka geograpiko nga lugar kaangay sang Hebron, ang isa sang anom ka Levinhon nga mga siudad nga dalangpan kag puluy-an sang mataas nga saserdote sang Israel. Ang siudad nga dalangpan karon amo ang aman sang Dios para sa pag-amlig sa aton gikan sa kamatayon bangod sang paglapas sang iya sugo tuhoy sa pagkabalaan sang dugo. (Genesis 9:⁠6) Sing hungod ukon indi, ang tanan nga naglapas sina nga sugo dapat mangayo sing kapatawaran sang Dios kag sing pagpanas sang iya sala paagi sa pagtuo sa dugo sang Mataas nga Saserdote, si Jesucristo. Ang hinaplas nga mga Cristiano nga may langitnon nga paglaum kag ang “dakung kadam-an” nga may dutan-on nga paglaum naghimulos sa mga balor sang nagatumbas sang sala nga halad ni Jesus kag yara sa antitipiko nga siudad nga dalangpan.​—⁠Bugna 7:​9, 14; 1 Juan 1:7; 2:​1, 2.

 9. Paano ginlapas ni Saulo sang Tarsus ang sugo sang Dios tuhoy sa dugo, apang paano niya ginpakita ang isa ka pagbalhin sing panimuot?

⁹ Antes sia nangin Cristiano, ginlapas ni apostol Pablo ang sugo tuhoy sa dugo. Subong si Saulo sang Tarsus, ginhingabot niya ang mga sumulunod ni Jesus kag nag-ugyon pa gani sa pagpatay sa ila. “Walay sapayan,” siling ni Pablo, “ginpakitaan ako sing kaluoy, bangod wala ako sing hinalung-ong kag nagpanghikot nga kulang sing pagtuo.” (1 Timoteo 1:13; Binuhatan 9:​1-19) Si Saulo may mahinulsulon nga panimuot, nga ginpamatud-an sang ulihi sang madamong buhat sang pagtuo. Apang indi lamang pagtuo sa gawad ang ginakinahanglan agod makasulod sa karon nga antitipiko nga siudad nga dalangpan.

 10. Paano mahimo matigayon ang maayong konsiensia, kag ano ang dapat himuon agod mahuptan ini?

¹⁰ Ang dihungod nga nakapatay sing tawo mahimo lamang makapabilin sa isa sang mga siudad nga dalangpan sang Israel kon mapamatud-an niya nga may maayong konsiensia sia sa Dios may kaangtanan sa pagpaagay sang dugo. Agod matigayon ang maayong konsiensia, dapat kita magpakita sing pagtuo sa halad ni Jesus, maghinulsol sa aton mga sala, kag magbalhin sang aton dalanon. Dapat kita mangabay sing maayong konsiensia sa isa ka mapangamuyuon nga dedikasyon sa Dios paagi kay Cristo, nagasimbulo sini paagi sa bawtismo sa tubig. (1 Pedro 3:​20, 21) Ining maayong konsiensia nagatugot sa aton sa pagtigayon sing maayong kaangtanan kay Jehova. Ang lamang nga paagi sa paghupot sing maayong konsiensia amo ang pagsunod sa mga sugo sang Dios kag ang paghimo sang hilikuton nga gintangdo sa aton sa antitipiko nga siudad nga dalangpan, kon paano nga ang mga nagdangop sa dumaan nga mga siudad nga dalangpan dapat magtuman sang Kasuguan kag maghimo sang ila mga hilikuton. Ang pangunang hilikuton para sa katawhan ni Jehova sa karon amo ang pagbantala sang mensahe sang Ginharian. (Mateo 24:14; 28:​19, 20) Ang paghimo sa sina nga hilikuton magabulig sa aton nga mangin mapuslanon nga mga pumuluyo sang siudad nga dalangpan.

 11. Ano ang dapat likawan agod magpabilin kita nga luwas sa sulod sang siudad nga dalangpan karon?

¹¹ Kon magbiya kita sa karon nga siudad nga dalangpan, ginabutang naton ang aton kaugalingon sa katalagman sang kalaglagan, kay ang Manugtimalos sang dugo magapanghikot sa dili madugay batok sa tanan nga nakasala sa dugo. Indi ini ang tion nga maabtan sa guwa sining maamligon nga siudad ukon sa makatalagam nga duog malapit sa dulunan sang mga halalban sini. Mahimo kita magadangat sa guwa sang antitipiko nga siudad nga dalangpan kon madulaan kita sing pagtuo sa nagatumbas sa sala nga halad sang Mataas nga Saserdote. (Hebreo 2:1; 6:​4-6) Yara man kita sa katalagman kon ginasunod naton ang kalibutanon nga mga paagi, wala nadalahig sing bug-os sa organisasyon ni Jehova, ukon nagalisa gikan sa matarong nga mga talaksan sang aton langitnon nga Amay.​—⁠1 Corinto 4:⁠4.

Ginhilway Gikan sa Siudad nga Dalangpan

 12. Daw ano kadugay dapat magpabilin ang anay mga nakasala sa dugo sa antitipiko nga siudad nga dalangpan?

¹² Ang dihungod nga nakapatay sing tawo sa Israel dapat magpabilin sa siudad nga dalangpan “tubtob mapatay ang mataas nga saserdote.” (Numeros 35:28) Gani daw ano kadugay dapat magpabilin ang anay mga nakasala sa dugo sa antitipiko nga siudad nga dalangpan? Tubtob indi na nila kinahanglan ang mga pag-alagad sang Mataas nga Saserdote, si Jesucristo. “Sarang niya maluwas sing bug-os yadtong nagapalapit sa Dios paagi sa iya,” siling ni Pablo. (Hebreo 7:25) Tubtob nagapadayon ang bisan anong mantsa sang sala kag ang anay kasal-anan sa dugo, ang mga pag-alagad sang Mataas nga Saserdote ginakinahanglan agod ang dihimpit nga mga tawo may matarong nga tindog upod sa Dios.

 13. Sin-o ang karon nga “katawhan sang Israel,” kag daw ano kadugay sila dapat magpabilin sa “siudad nga dalangpan”?

¹³ Dumduma nga ang dumaan nga mga siudad nga dalangpan gintukod para sa “katawhan sang Israel,” sa dumuluong nga mga pumuluyo, kag sa mga manlulugayaw. Ang “katawhan sang Israel” amo ang espirituwal nga mga Israelinhon. (Galacia 6:16) Dapat sila magpabilin sa antitipiko nga siudad nga dalangpan tubtob nagakabuhi sila sa duta. Ngaa? Bangod yara gihapon sila sa dihimpit nga unod kag busa nagakinahanglan sing nagatumbas nga pag-alagad sang ila langitnon nga Mataas nga Saserdote. Apang kon ining hinaplas nga mga Cristiano mapatay kag ginbanhaw sa espirituhanon nga kabuhi sa langit, indi na nila kinahanglan ang nagatumbas nga mga pag-alagad sang Mataas nga Saserdote; ginbiyaan na nila sing dayon ang unod kag ang kasal-anan sa dugo nga naangot sa sini. Para sa ginbanhaw nga mga hinaplas, ang Mataas nga Saserdote mapatay sa nagatumbas kag nagaamlig nga ikasarang.

 14. Ano pa ang nagakinahanglan nga yadtong may langitnon nga paglaum magapabilin sa siudad nga dalangpan karon?

¹⁴ Ang mismo nga pagpanag-iya sang tawhanon nga kinaugali nagakinahanglan nga yadtong “mga masigkamanunubli ni Cristo” magapabilin sa antitipiko nga siudad nga dalangpan tubtob matapos nila sing matutom ang ila dutan-on nga pagkabuhi sa duta. Kon sila mapatay, igahalad nila ang tawhanon nga lawas sing dayon. (Roma 8:17; Bugna 2:10) Ang halad ni Jesus nagaaplikar lamang sa sadtong may tawhanon nga lawas. Hanti, ang Mataas nga Saserdote napatay ayon sadtong sa espirituwal nga Israel kon ginabanhaw sila subong espirituhanon nga mga tinuga nga magapuyo sing dayon sa langit subong “mga umalambit sang diosnon nga kinaugali.”​—⁠2 Pedro 1:⁠4.

 15. Sin-o ang modernong-adlaw nga ‘dumuluong nga mga pumuluyo’ kag ‘mga manlulugayaw’ kag ano ang ginhimo sang dakung Mataas nga Saserdote para sa ila?

¹⁵ San-o “mapatay” ang Mataas nga Saserdote kon tuhoy sa modernong-adlaw nga ‘dumuluong nga mga pumuluyo’ kag ‘mga manlulugayaw,’ nagatugot sa ila sa pagbiya sa antitipiko nga siudad nga dalangpan? Ining mga katapo sang dakung kadam-an indi gilayon makaguwa sa sining siudad nga dalangpan pagkatapos sang dakung kapipit-an. Ngaa indi? Bangod yara gihapon sila sa ila dihimpit kag makasasala nga unod kag ginakinahanglan nga magpabilin sa idalom sang pangamlig sang Mataas nga Saserdote. Paagi sa paghimulos nila sa iya nagatumbas nga mga pag-alagad sa iya isa ka libo ka tuig nga paghari kag pagkasaserdote, matigayon nila ang tawhanon nga kahimpitan. Sa talipuspusan sang isa ka libo ka tuig, itugyan sila ni Jesus sa Dios para sa katapusan, nagapamat-od sing dayon nga pagtilaw sa ila integridad paagi sa paghilway kay Satanas kag sa iya mga demonyo sa makadali. Bangod nakapasar sila sa sining pagtilaw nga may kahamuot sang Dios, si Jehova magapahayag sa ila nga matarong. Sa amo malab-ot nila ang kabug-usan gid sang tawhanon nga pagkahimpit.​—⁠1 Corinto 15:28; Bugna 20:​7-10.a

 16. San-o ang mga makalampuwas sa dakung kapipit-an wala na nagakinahanglan sang nagatumbas nga pag-alagad sang Mataas nga Saserdote?

¹⁶ Gani, nian, dapat huptan sang mga makalampuwas sa dakung kapipit-an ang maayong konsiensia paagi sa pagpabilin sa antitipiko nga siudad nga dalangpan tubtob matapos ang Isa ka Libo ka Tuig nga Paghari ni Cristo. Subong himpit nga mga tawo, indi na nila kinahanglan pa ang nagatumbas nga mga pag-alagad sang Mataas nga Saserdote kag magaguwa gikan sa iya pangamlig. Nian si Jesus mapatay sa ila subong Mataas nga Saserdote, kay indi na sia kinahanglan nga magpanghikot para sa ila paagi sa nagatinlo nga dugo sang iya halad. Sa sina nga tion biyaan nila ang antitipiko nga siudad nga dalangpan.

 17. Ngaa indi kinahanglanon para sa sadtong ginbanhaw sa Isa ka Libo ka Tuig nga Paggahom ni Cristo nga magsulod sa antitipiko nga siudad nga dalangpan kag magpabilin didto?

¹⁷ Yadtong ginbanhaw sa Isa ka Libo ka Tuig nga Paggahom ni Jesus magasulod bala sa antitipiko nga siudad nga dalangpan kag magapabilin didto tubtob mapatay ang mataas nga saserdote? Indi, bangod paagi sa kamatayon ginbayaran nila ang silot sang ila pagkamakasasala. (Roma 6:7; Hebreo 9:27) Walay sapayan, ang Mataas nga Saserdote magabulig sa ila nga makalab-ot sa pagkahimpit. Kon madinalag-on sila nga makapasar sa katapusan nga pagtilaw pagkatapos sang Milenio, ang Dios magapahayag man sa ila nga matarong upod ang garantiya nga kabuhi nga dayon sa duta. Sa pagkamatuod, ang indi pagsunod sa mga sugo sang Dios magadul-ong sa nagatagudili nga paghukom kag paglaglag kay bisan sin-o nga tawo nga wala makapasar sa katapusan nga pagtilaw subong mga manughupot sing integridad.

 18. Nahanungod sa paghari kag pagkasaserdote ni Jesus, ano ang magapabilin sa katawhan sing dayon?

¹⁸ Ang Israelinhon nga mataas nga mga saserdote napatay sang ulihi. Apang si Jesus “nangin mataas nga saserdote suno sa paagi ni Melquisedec sing dayon.” (Hebreo 6:​19, 20; 7:⁠3) Gani ang pagtapos sang katungdanan ni Jesus subong nagapatunga nga Mataas nga Saserdote ayon sa katawhan wala nagatapos sang iya kabuhi. Ang maayong mga epekto sang iya pag-alagad subong Hari kag Mataas nga Saserdote magapabilin sa katawhan sing dayon, kag ang katawhan may utang sing dayon sa iya bangod sang iya pag-alagad sa sining mga ikasarang. Dugang pa, si Jesus magapanguna sa putli nga pagsimba kay Jehova sing dayon.​—⁠Filipos 2:​5-11.

Hamili nga Leksion Para sa Aton

 19. Anong leksion nahanungod sa dumot kag gugma ang matun-an gikan sa pag-aman sang mga siudad nga dalangpan?

¹⁹ Madamo kita sing matun-an gikan sa pag-aman sang mga siudad nga dalangpan. Pananglitan, wala sing manugpatay sing tawo nga may makapatay nga dumot sa iya biktima ang gintugutan sa pagpuyo sa siudad nga dalangpan. (Numeros 35:​20, 21) Gani paano mapahanugutan sang bisan sin-o sa antitipiko nga siudad nga dalangpan nga maglambo sa iya tagipusuon ang pagdumot para sa isa ka utod? “Ang bisan sin-o nga nagadumot sang iya utod manugpatay,” sulat ni apostol Juan, “kag nakahibalo kamo nga walay manugpatay nga may kabuhi nga walay katapusan nga nagapabilin sa iya.” Busa “padayon kita nga maghigugmaanay sa isa kag isa, kay ang gugma gikan sa Dios.”​—⁠1 Juan 3:15; 4:⁠7.

 20. Para pangamlig gikan sa Manugtimalos sang dugo, ano ang dapat himuon sadtong yara sa antitipiko nga siudad nga dalangpan?

²⁰ Para pangamlig gikan sa manugtimalos sang dugo, ang dihungod nga mga nakapatay sing tawo dapat magpabilin sa siudad nga dalangpan kag indi maglampas sa mga halalban sini. Ano naman yadtong yara sa antitipiko nga siudad nga dalangpan? Agod makalikaw sa dakung Manugtimalos sang dugo, indi sila dapat magbiya sa siudad. Sa pagkamatuod, dapat sila magbantay batok sa mga pagsulay nga magkadto sa dulunan sang mga halalban, kon hambalon pa. Dapat sila maghalong nga indi pagtugutan nga magtubo sa ila tagipusuon ang gugma para sa kalibutan ni Satanas. Mahimo ini magakinahanglan sing pangamuyo kag panikasog, apang ang ila kabuhi nagasandig sa sini.​—⁠1 Juan 2:​15-17; 5:⁠19.

 21. Anong makapaladya nga hilikuton ang ginahimo sadtong yara sa siudad nga dalangpan karon?

²¹ Ang dihungod nga mga nakapatay sing tawo sa dumaan nga mga siudad nga dalangpan dapat mangin mapatubason nga mga manugpangabudlay. Sa kaanggid, ang hinaplas nga “katawhan sang Israel” nagpahamtang sing maayong halimbawa subong mga mangangani kag mga manugwali sang Ginharian. (Mateo 9:​37, 38; Marcos 13:10) Subong ‘dumuluong nga mga pumuluyo’ kag ‘mga manlulugayaw’ sa ­siudad nga dalangpan sa karon, ang mga Cristiano nga may dutan-on nga paglaum may pribilehiyo sa paghimo sining nagaluwas sing kabuhi nga hilikuton kaupod sang mga hinaplas nga yari pa sa duta. Kag daw ano ka makapaladya nga hilikuton ini! Yadtong nagapangabudlay sing matutom sa antitipiko nga siudad nga dalangpan makalikaw sa dayon nga kamatayon sa kamot sang Manugtimalos sang dugo. Sa baylo, maka­tigayon sila sing dayon nga mga benepisyo gikan sa iya pag-alagad subong ang dakung Mataas nga Saserdote sang Dios. Magapabilin ka bala sa siudad nga dalangpan kag magkabuhi sing dayon?

[Footnote]

Paano Mo Sabton?

◻ Ngaa masiling naton nga ang binilyon sa duta nakasala sa dugo?

◻ Anong mga katungdanan ang ginapun-an ni Jesucristo kon tuhoy sa katawhan?

◻ Ano ang antitipiko nga siudad nga dalangpan, kag paano ang isa makasulod sa sini?

◻ San-o ang tawo mahilway gikan sa antitipiko nga siudad nga dalangpan?

◻ Anong hamili nga mga leksion ang matun-an naton gikan sa pag-aman sang mga siudad nga dalangpan?

[Retrato sa pahina 16]

Nahibaluan mo bala kon anong importante nga mga katungdanan ang ginapun-an ni Jesucristo?