Ginaaman Bala sang Relihion ang Inyo mga Kinahanglanon?

HANGIN, tubig, kalan-on, puluy-an​—⁠ginakilala ini sa kalibutan subong mga kinahanglanon sang tawo. Kon wala sini, wala ikaw sing magamit kag mahimo ikaw mapatay. Apang, ginpatalupangod sang una sang Israelinhon nga lider nga si Moises ang isa pa ka kinahanglanon sang tawo, isa nga mas importante pa sa kalan-on ukon tubig. Si Moises nagsiling: “Indi paagi sa kalan-on nagakabuhi ang tawo kundi paagi sa tagsa ka pulong nga nagaguwa sa baba ni Jehova.”​—⁠Deuteronomio 8:⁠3.

Paagi sa sining madalom nga mga pinamulong, ginpakita ni Moises ang pagkaimportante sang pag-aman sing aton relihioso ukon espirituwal nga mga kinahanglanon. Ginpakita niya nga ang aton gid kabuhi nasandig sa pag-aman sining mga kinahanglanon! Sa tion sang ila 40-ka tuig nga paglakbay sa kahanayakan, ang mga Israelinhon literal nga nagkabuhi paagi sa ‘mga pulong nga nagaguwa sa baba ni Jehova.’ Naluwasan nila ang kuntani isa ka makamamatay nga eksperiensia. Sa sugo sang Dios, ang kalan-on nga gintawag nga mana milagruso nga nahulog gikan sa kalangitan. Ang tubig nagbuswak gikan sa mga bato agod mabulong ang ila kauhaw. Apang kapin pa sa pag-atipan sa ila pisikal nga mga kinahanglanon ang ginhimo sang Dios. Si Moises nagsiling: “Subong nga ang tawo nagatadlong sa iya anak, sa amo si Jehova nga imo Dios nagatadlong sa imo.”​—⁠Deuteronomio 8:​4, 5; Exodo 16:​31, 32; 17:​5, 6.

Ang mga Israelinhon wala ginpabay-an sa paghibalo kon ano ang husto ukon sayop, sa moral ukon sa relihion. Nakabaton sila sing pagtuytoy gikan sa Dios mismo. Ginhatagan niya sila sing Kasuguan Mosaiko, isa ka talalupangdon nga kodigo sang kasuguan nga nagbalay sing makapapagros nga kalan-on, isa ka estrikto nga kodigo para sa katinluan, kag maayo nga mga prinsipio sa moral kag sa relihion. Busa, ginsakdag sang Dios ang ikaayo sang Israel sa panglawas kag espirituwalidad. Nagkabuhi sila sa ‘mga pulong nga nagaguwa sa baba ni Jehova.’

Sa amo, nangin tuhay gid ang Israel sa iban nga mga pungsod. Sang adlaw ni Moises, ang Egipto amo ang labing gamhanan sa kalibutan. Isa yadto ka relihioso gid nga pungsod. Ang World Book Encyclopedia nagasiling: “Ang dumaan nga mga Egiptohanon nagpati nga ang nanuhaytuhay nga mga silimbahon (mga dios kag mga diosa) may impluwensia sa tanan nga sahi sang kinaugali kag sa tagsa ka hilikuton sang tawo. Busa, ginsimba nila ang madamo nga dios. . . . Sa tagsa ka siudad kag banwa sang Egipto, ginsimba sang katawhan ang ila kaugalingon pinasahi nga dios dugang pa sa dalagku nga mga dios.”

Gin-aman bala sining pagsimba sa madamo nga dios ang espirituwal nga mga kinahanglanon sang mga Egiptohanon? Wala. Ang Egipto nangin isa ka pungsod nga madamo sing disparatis kag malaw-ay nga mga buhat sa sekso. Sa baylo nga sakdagon ang kabuhi kag panglawas, ang dalanon sang pagkabuhi sang mga Egiptohanon nagdul-ong sa “malaut nga mga masakit.” (Deuteronomio 7:15) Indi katingalahan, nian, nga ang Biblia nagpamulong tuhoy sa mga dios sang Egipto sing may pagtamay, gintawag sila nga “kangil-aran nga mga diosdios.”​—⁠Ezequiel 20:​7, 8.

Kaanggid man nga kahimtangan ang nagaluntad karon. Ang kalabanan nga katawhan sa dimagkubos may isa ka sahi sang relihioso nga pagtuo; ang pila nagatawag sang ila kaugalingon nga walay dios. Apang, maathag nga sa kabilugan napaslawan ang relihion sa pag-aman sing espirituwal nga mga kinahanglanon sang katawhan. Magaluntad bala karon ang mga problema tuhoy sa inaway, pagdampigdampig sa rasa, pagkagutom, kag walay katapusan nga kaimulon kon ang katawhan matuod gid nga nagakabuhi “paagi sa tagsa ka pulong nga nagaguwa sa baba ni Jehova”? Sa pagkamatuod indi! Walay sapayan, pila lamang ka tawo ang magabinagbinag nga islan ang ila relihion. Ti, ang iban indi pa gani luyag nga hambalan ang relihion ukon pamatian ang bag-o nga relihioso nga mga ideya!

Halimbawa, ang isa ka tawo nga taga-Ghana, Katundan nga Aprika, nagsiling sa isa ka Cristianong ministro: “Nagapati ako nga ginpahayag sang Dios ang iya kaugalingon sa amon nga mga Aprikano paagi sa amon gamhanan nga mga pari nga lalaki kag babayi, subong nga ginpahayag niya ang iya kaugalingon sa mga Judiyo paagi sa ila mga manalagna. Makaluluoy nga ang pila sa amon nga mga Aprikano wala nagakilala sa amon kaugalingon nga mga pari kundi nagahambal sa baylo tuhoy kay Jesus, Muhammad, kag sa iban pa.”

Sa madamo nga tradisyunal nga katilingban sang Aprika, ang Cristianismo ginatamod subong relihion sang mga puti​—⁠isa ka sistema halin sa iban nga pungsod nga naghimo sing kapin nga halit sangsa kaayuhan. Apang ang sirado nga panghunahuna magabulig bala ukon magaupang sa imo mga panikasog nga maaman ang imo espirituwal nga mga kinahanglanon? Ang isa ka Aprikano nga hulubaton nagasiling: “Indi pag-isawsaw ang imo duha ka kamot sa yahong sang kalan-on bangod lamang gutom ikaw.” Ina nga batasan sa pagkaon indi matinahuron kag makatalagam​—⁠ilabi na kon wala ka makahibalo kon ano ang yara sa sulod sang yahong! Apang, madamo ang nagapili sing ila relihion, indi pasad sa mahunahunaon nga pag-usisa, kundi pasad sa emosyon ukon tradisyon sang pamilya.

Ang pagsimba nga nagaaman sang imo espirituwal nga mga kinahanglanon dapat mangin “isa ka balaan nga pag-alagad upod sa imo ikasarang sa pagpangatarungan.” (Roma 12:⁠1) Dapat isa ini ka maalamon nga pagpili nga ginbinagbinag sing maayo. Busa, usisaon naton ang hulusayon tuhoy sa pagpili sang imo relihion gikan sa Aprikanhon nga pagtamod. Apang, ang masunod mangin interesante man sa mga bumalasa bisan diin.

[Piktyur sa pahina 3]

Ginpakita ni Moises ang pagkaimportante sang pag-aman sing aton espirituwal nga mga kinahanglanon

[Piktyur sa pahina 4]

Ang naeksperiensiahan sang Aprika sa mga misyonero sang Cristiandad nagsira sa hunahuna sang iban sa Biblia