Magpakaisog—Si Jehova Kaupod Mo!

1, 2. (a) Ano nga mga kinaiya ang makabulig sa aton nga maatubang ang mga pagtilaw? (b) Ano ang pagtuo? Iilustrar.

ANG pag-alagad kay Jehova nagahatag sa aton sing kalipay. Apang, nagaatubang kita sing mga kabudlayan nga kinaandan na sa katawhan, kag mahimo kita “mag-antos . . . tungod sa pagkamatarong.” (1 Ped. 3:14; 5:8, 9; 1 Cor. 10:13) Para maatubang naton sing madinalag-on ini nga mga pagtilaw, kinahanglan naton ang pagtuo kag kaisog.

² Ano ang pagtuo? Si apostol Pablo nagsulat: “Ang pagtuo amo ang masaligan nga pagpaabot sa mga butang nga ginalauman, ang maathag nga pagpasundayag sang mga katunayan bisan indi makita.” (Heb. 11:1) Sa isa pa ka translation mabasa: “Ang pagtuo amo ang titulo sang mga butang nga aton ginalauman. Ang pagtuo amo ang kasiguruhan sang mga butang nga indi naton makita.” (The Simple English Bible) Kon may titulo kita sang isa ka propiedad, nagasalig kita nga kita ang tag-iya sini. Bangod may pagtuo kita nga ginatuman pirme sang Dios ang iya ginasiling, daw pareho lang nga nagauyat kita sing masaligan nga titulo. Paagi sa aton pagtuo, makasalig kita nga makita naton ang katumanan sang mga saad sa Biblia nga aton ginalauman, kag mapat-od ang espirituwal nga mga katunayan bisan pa indi naton ini makita.

3, 4. (a) Ano ang kaisog? (b) Ano ang isa ka paagi nga mapabakod naton ang aton pagtuo kag kaisog?

³ Ang kaisog amo ang “espirituwal, emosyonal, kag moral nga kalig-on sa paghambal kag pagbuhat nga wala sing kahadlok bisan pa may mga kabudlayan kag katalagman.” (The New Interpreter’s Dictionary of the Bible) Kon may kaisog kita, mabakod kita, determinado, kag masidla pa gani kon kaisa.—Mar. 6:49, 50; 2 Tim. 1:7.

⁴ Ang pagtuo kag kaisog maayo gid nga mga kinaiya. Pero kon kaisa, mahimo mabatyagan naton nga kulang ang aton pagtuo kag kaisog. Ang linibo ka indibiduwal nga mabasa sa Biblia nangin maayo nga halimbawa sa pagpakita sini nga mga kinaiya. Gani ang isa ka paagi nga mapabakod naton ang aton pagtuo kag kaisog amo ang pagbinagbinag sa pila sa ila.

 5. Para mangin madinalag-on sa iya asaynment, ano ang kinahanglan ni Josue?

⁵ Balikan naton ang natabo mga 35 ka siglo na ang nagligad. Kuarenta ka tuig na ang nagligad sugod sang ginluwas ni Jehova paagi sa iya gahom ang minilyon ka Israelinhon gikan sa pagkaulipon sa Egipto. Ang manalagna nga si Moises ang nagdumala sa ila. Sa edad nga 120, nakita niya sa malayo ang Ginsaad nga Duta kag napatay sia sa putukputukan sang Bukid Nebo. Ang nagbulos sa iya nga si Josue, isa ka tawo nga “puno sang espiritu sang kaalam.” (Deut. 34:1-9) Malapit na lang sadto masakop sang mga Israelinhon ang Canaan. Para mangin madinalag-on nga lider, kinahanglan ni Josue ang kaalam gikan sa Dios. Kinahanglan man sia magtuo kay Jehova, magpakaisog, kag magpabakod.—Deut. 31:22, 23.

 6. (a) Ang Josue 23:6 nagapalig-on sa aton nga mangin maisog sa paghimo sang ano? (b) Ano ang matun-an naton sa Binuhatan 4:18-20 kag 5:29?

⁶ Ang kaalam, kaisog, kag pagtuo nga ginpakita ni Josue sa tion sang malawig nga pagpangdaug sa Canaan nagpabakod sa mga Israelinhon. Pero luwas sa pagkaisganan sa pagpakig-away, kinahanglan nila ang kaisog sa pagtuman sang ginapahimo ni Josue sa ila. Antes sia mapatay, si Josue nagsiling: “Magpakaisug gid kamo sa pagbantay kag sa paghimo sang tanan nga nasulat sa tolon-an sang kasogoan ni Moises, nga dili kamo maglipas gikan sini sa too ukon sa wala.” (Jos. 23:6) Kinahanglan man naton ang kaisog sa pagtuman kay Jehova sa tanan nga tion. Nalakip sa sini ang mga sitwasyon diin ginapilit kita sang mga tawo nga maghimo sang mga butang nga supak sa kabubut-on sang Dios. (Basaha ang Binuhatan 4:18-20; 5:29.) Kon mangamuyo kita kay Jehova kag magsalig sa iya, buligan niya kita nga mangin maisugon.

 7. Para mangin maisugon kag madinalag-on, ano ang kinahanglan ni Josue?

⁷ Para mangin maisog sa pagtuman sa kabubut-on sang Dios, dapat naton tun-an kag iaplikar ang iya Pulong. Amo ini ang ginpalig-on kay Josue sang ginbuslan niya si Moises: “Magpakabakud kag magpakaisug gid, sa pagbantay sa paghimo sono sa bug-os nga kasogoan nga ginsogo sa imo sang akon alagad nga si Moises; . . . Ining tolon-an sang kasogoan indi magbulag sa imo baba, kondi magpamalandong ka sa iya sa adlaw kag gab-i, agud nga makabantay ka sa paghimo sono sa tanan nga nasulat sa sini; kay niyan mapabugana mo ang imo dalanon, kag niyan may maayo ka nga kauswagan.” (Jos. 1:7, 8) Gintuman ni Josue ini nga laygay, kag nangin ‘bugana ang iya dalanon.’ Kon himuon naton ini, matigayon naton ang daku nga kaisog kag kadalag-an sa pag-alagad sa Dios.

 8. Diin ginkuha ang aton yeartext para sa 2013, kag paano ini nga teksto makabulig sa imo?

⁸ Napabakod pa gid si Josue sang nabatian niya ang dugang pa nga ginsiling ni Jehova: “Magpakaisog ka kag magpakabakod. Indi ka makibang ukon magkahadlok, kay kaupod mo si Jehova nga imo Dios bisan diin ka magkadto.” (Jos. 1:9, NW) Kaupod man naton si Jehova. Gani indi kita dapat “makibang ukon magkahadlok” bisan ano man ang pagtilaw sa aton. Talalupangdon gid ang ginsiling nga, “Magpakaisog ka kag magpakabakod. . . . Kaupod mo si Jehova nga imo Dios.” Ini nga pinamulong nga gikan sa Josue 1:9 amo ang ginpili nga yeartext para sa 2013. Magapabakod gid ini sa aton sa mga binulan nga magasunod, subong man ang mga ginsiling kag ginhimo sang iban pa nga halimbawa sang pagtuo kag kaisog.

 9. Paano ginpakita ni Rahab ang pagtuo kag kaisog?

⁹ Sang nagpadala si Josue sing duha ka espiya sa Canaan, gintago sila sang makihilawason nga si Rahab kag ginpatalang ang ila mga kaaway. Bangod sa iya pagtuo kag kaisog, sia kag ang iya panimalay naluwas sang ginsalakay sang mga Israelinhon ang siudad sang Jerico. (Heb. 11:30, 31; Sant. 2:25) Siempre, ginbiyaan ni Rahab ang iya imoral nga pagkabuhi agod mapahamut-an si Jehova. Ang iban nga nangin Cristiano may ara man sing pagtuo, kaisog, kag moral nga katinlo para makahimo sing amo sini nga mga pagbag-o agod mapahamut-an ang Dios.

10. Sa ano nga sitwasyon nanindugan si Rut para sa matuod nga pagsimba, kag ano nga mga pagpakamaayo ang iya nabaton?

¹⁰ Sang napatay na si Josue, ang Moabnon nga si Rut nagpakita sing kaisog para sa matuod nga pagsimba. Subong balo sang isa ka Israelinhon, mahimo nga may nahibaluan na sia parte kay Jehova. Ang iya balo nga ugangan nga si Noemi nag-istar sa Moab pero nagdesisyon nga magpauli sa banwa sang Betlehem sa Israel. Sang yara sila sa dalan, ginpilit ni Noemi si Rut nga magbalik sa iya katawhan, pero si Rut nagsabat: “Dili ako pagpilita sa pagbiya sa imo ukon sa pagbalik gikan sa pagsonod sa imo; . . . ang imo katawohan mangin-akon katawohan, kag ang imo Dios akon Dios.” (Rut 1:16) Gintuman gid ni Rut ang iya ginsiling. Sang ulihi, ginpangasawa si Rut sang paryente ni Noemi nga si Boaz, nakaangkon sia sing anak, kag nangin katigulangan ni David kag ni Jesus. Huo, ginapakamaayo ni Jehova ang mga buhat sang pagtuo kag kaisog.—Rut 2:12; 4:17-22; Mat. 1:1-6.

11. Paano sanday Jehoiada kag Josaba nagpakita sing kaisog, kag ano ang resulta sini?

¹¹ Nagabakod ang aton pagtuo kag kaisog kon makita naton nga ang Dios kaupod sang mga tawo nga nagauna sang Iya mga intereses kag sa kaayuhan sang ila mga masigkatumuluo. Halimbawa, binagbinaga ang Mataas nga Saserdote nga si Jehoiada kag ang iya asawa nga si Josaba. Sang napatay si Hari Ahazias, ginpatay ni Atalia nga iya iloy ang mga kabataan sang hari, luwas kay Jehoas, kag gin-agaw ang trono. Ginrisgo nanday Jehoiada kag Josaba ang ila kabuhi para luwason ang anak ni Ahazias nga si Jehoas kag taguon ini sa sulod sang anom ka tuig. Sang ikapito nga tuig, ginproklamar ni Jehoiada si Jehoas subong hari kag ginpapatay si Atalia. (2 Hari 11:1-16) Sang ulihi, ginsuportahan ni Jehoiada si Jehoas sa pagpakay-o sang templo. Kag sang napatay si Jehoiada sa edad nga 130, ginlubong sia upod sa mga hari “bangud nga naghimo sia sing maayo sa Israel, kag sa Dios kag sa iya balay.” (2 Cron. 24:15, 16) Bangod man sa kaisog ni Jehoiada kag sang iya asawa nahuptan ang kaliwatan sang mga hari halin kay David pakadto sa Mesias.

12. Paano ginpakita ni Ebed-melec ang kaisog?

¹² Si Ebed-melec nga isa ka eunuco sa panimalay ni Hari Sedequias, nagrisgo sang iya kabuhi para kay Jeremias. Gintugyan sang hari si Jeremias sa mga prinsipe sang Juda, nga nag-akusar sa iya sing pagrebelde kag ginhulog sia sa lunangon nga bubon para mapatay. (Jer. 38:4-6) Bisan pa nabutang sia sa katalagman bangod sang mga nagakaakig kay Jeremias, nag-apelar si Ebed-melec kay Sedequias tungod sa manalagna. Nagpasugot si Sedequias kag ginpaupdan pa si Ebed-melec sing 30 ka tawo para luwason si Jeremias. Paagi sa manalagna, ginpasalig sang Dios si Ebed-melec nga indi sia mapatay kon salakayon sang mga Babilonianhon ang Jerusalem. (Jer. 39:15-18) Ginapadyaan gid ang diosnon nga kaisog.

13. Paano ginpakita sang tatlo ka Hebreo ang kaisog, kag paano kita makabenepisyo sa ila naagyan?

¹³ Sang ikapito nga siglo B.C.E., nangin maathag sa tatlo ka Hebreo nga alagad ni Jehova nga ginapadyaan sang Dios ang pagpakita sing pagtuo kag kaisog. Gintipon ni Hari Nabocodonosor ang mga opisyal sang Babilonia kag ginsugo nga magsimba sa mataas nga larawan nga bulawan. Ang bisan sin-o nga indi magtuman mapatay sa nagadabdab nga hurno. Ang tatlo ka Hebreo matinahuron nga nagsiling kay Nabocodonosor: “Ang amon Dios nga ginaalagad namon makasarang magluwas sa amon sa nagadabdab nga horno sang kalayo; kag sia magaluwas sa amon sa imo kamut, O hari. Apang kon indi, makilala mo, O hari, nga indi kami mag-alagad sa imo dios ukon magsimba sang larawan nga bulawan nga imo napatindug.” (Dan. 3:16-18) Ang makatilingala nga pagluwas sa tatlo ka Hebreo maathag nga ginlaragway sa Daniel 3:19-30. Mahimo nga indi kita pagpahugon nga ihaboy sa nagadabdab nga hurno, pero makaatubang man kita sang mga pagtilaw sang aton integridad kag mapat-od naton nga pakamaayuhon kita sang Dios bangod sang aton pagtuo kag kaisog.

14. Suno sa Daniel kapitulo 6, paano si Daniel nagpakita sing kaisog, kag ano ang resulta sini?

¹⁴ Si Daniel nagpakita sing pagtuo kag kaisog sang nakumbinsi sang iya mga kaaway si Hari Dario sa pagpagua sang sugo nga ang “bisan sin-o nga magpangayo sing pangabay sa bisan ano nga dios ukon tawo sa sulud sang katloan ka adlaw, luwas sa . . . hari itagbong . . . sa lungib sang mga leon.” Sang nahibaluan ni Daniel nga napirmahan na ang dokumento, “nagsulud sia sa iya balay diin nabuksan ang mga talambuan sa iya hulut nayon sa Jerusalem; kag nagluhud sia sing makatlo sa isa ka adlaw, kag nagpangamuyo kag nagpasalamat sa atubangan sang iya Dios, subong sang ginhimo niya sang una.” (Dan. 6:6-10) Gani, ang maisugon nga si Daniel gintagbong sa lungib sang mga leon, pero ginluwas sia ni Jehova.—Dan. 6:16-23.

15. (a) Ngaa maayo nga halimbawa sang pagtuo kag kaisog sanday Aquila kag Priscila? (b) Ano ang buot silingon sang ginsiling ni Jesus sa Juan 13:34, kag paano ini ginpakita sang madamo nga Cristiano?

¹⁵ Bisan wala ginsugid sang Biblia ang rason, sanday Aquila kag Priscila, ‘nagtaya sang ila kabuhi tungod kay Pablo.’ (Binu. 18:2; Roma 16:3, 4) Maisugon nila nga gintuman ang ginsiling ni Jesus: “Nagahatag ako sa inyo sang isa ka bag-o nga sugo, nga maghigugmaanay kamo; subong nga ako nagahigugma sa inyo, maghigugmaanay man kamo.” (Juan 13:34) Ginpatuman sang Mosaikong Kasuguan nga higugmaon sang isa ang iya isigkatawo pareho sa iya kaugalingon. (Lev. 19:18) Pero ang sugo ni Jesus “bag-o” bangod ginapakita sini nga dapat naton higugmaon ang iban bisan pa nagakahulugan ini nga ihatag naton ang aton kabuhi tungod sa ila, pareho sang ginhimo ni Jesus. Madamo nga Cristiano ang nagpakita sing gugma paagi sa maisugon nga ‘pagtaya sang ila kabuhi’ agod indi mabutang sa katalagman ukon mapatay ang ila mga masigkatumuluo sa kamot sang mga kaaway.—Basaha ang 1 Juan 3:16.

16, 17. Ano nga mga pagtilaw sang pagtuo ang naeksperiensiahan sang mga sumulunod ni Jesus sang una, kag paano ini naagyan sang pila ka Cristiano karon?

¹⁶ Pareho kay Jesus, ang mga Cristiano sang una nagsimba lamang kay Jehova. (Mat. 4:8-10) Nangindi sila sa pagsunog sang incienso bilang pagpadungog sa emperador sang Roma. (Tan-awa ang piktyur.) “Pila lang gid ka Cristiano ang nagtalikod,” sulat ni Daniel P. Mannix, “bisan pa may nagadabdab nga halaran sa arena agod mangin mahapos para sa ila. Ang himuon lamang sang isa ka bilanggo amo ang pagbutang sing isa ka pudyot nga incienso sa kalayo kag hatagan sia sing Sertipiko sang Paghalad kag dayon hilwayon sia. Ginapaathag man sing maayo sa iya nga wala sia nagasimba sa emperador; kilalahon lamang niya ang pagkadios sang emperador subong ulo sang estado sang Roma. Sa gihapon, halos tanan nga Cristiano wala nagbaton sini nga tanyag para lang mahilway.”—Those About to Die.

¹⁷ Ang mga Cristiano sa mga kampo konsentrasyon sang mga Nazi nga nag-atubang sang kamatayon sulitsulit nga ginhatagan sing kahigayunan nga mahilway paagi sa pagpirma sang isa ka deklarasyon nga nagapanghiwala kay Jehova. Pero pila lamang ang nagpirma. Sa tion sang pagpapas sa rasa sa Rwanda sining karon lang, ginrisgo sang Tutsi kag Hutu nga mga Saksi ang ila kabuhi para proteksionan ang isa kag isa. Ini nga mga pagtilaw nagakinahanglan sing pagtuo kag kaisog.

18, 19. Ano nga mga halimbawa sa Biblia parte sa pagtuo kag kaisog ang makabulig sa aton nga matuman ang pagbantala?

¹⁸ Sa karon, may pribilehiyo kita nga makigbahin sa pinakadungganon nga hilikuton nga ginhatag sa mga alagad sang Dios—ang pagbantala sang mensahe sang Ginharian kag paghimo sing disipulo. (Mat. 24:14; 28:19, 20) Nagapasalamat gid kita sa indi matupungan nga halimbawa ni Jesus! “Naglibot sia sa mga siudad kag mga minuro, nga nagabantala kag nagapahayag sang maayong balita sang ginharian sang Dios.” (Luc. 8:1) Pareho sa iya, kinahanglan naton ang pagtuo kag kaisog para mabantala ang mensahe sang Ginharian. Paagi sa bulig sang Dios, mailog naton si Noe, nga isa ka maisugon nga “manugbantala sang pagkamatarong” sa “kalibutan sang di-diosnon nga mga tawo” nga ginlaglag sa bug-os kalibutan nga Anaw.—2 Ped. 2:4, 5.

¹⁹ Ang pangamuyo makabulig sa aton nga matuman ang pagbantala. Sang ang pila ka ginhingabot nga sumulunod ni Cristo nangamuyo agod ‘makahambal sang pulong sang Dios nga may kaisog,’ ang ila pangabay ginsabat. (Basaha ang Binuhatan 4:29-31.) Kon daw nakulbaan ka sa pagbantala sa mga balay, si Jehova magasabat sang imo pangamuyo para sa dugang nga pagtuo kag kaisog.—Basaha ang Salmo 66:19, 20.a

20. Ano nga bulig ang matigayon naton subong mga alagad ni Jehova?

²⁰ Indi mahapos ang paghimo sang kabubut-on sang Dios kon nagaatubang sing mga pagtilaw sa sining malaut kag magamo nga kalibutan. Pero wala kita nagaisahanon. Kaupod naton ang Dios. Amo man ang iya Anak, ang Ulo sang kongregasyon kag ang sobra 7,000,000 ka Saksi ni Jehova sa bilog nga kalibutan. Kaupod nila, padayon kita nga magpakita sing pagtuo kag magbantala sing maayong balita samtang ginadumdom naton ang yeartext sa sini nga tuig 2013: “Magpakaisog ka kag magpakabakod. . . . Kaupod mo si Jehova nga imo Dios.”—Jos. 1:9, NW.