Ehud—Tawo nga May Pagtuo kag Kaisog

MADAMONG tinuig na ang nakalipas sugod sang ang mga Israelinhon una nga makatapak sa Ginsaad nga Duta. Si Moises kag ang nagbulos sa iya, si Josue, madugay na nga napatay. Bangod wala na ining mga tawo nga may pagtuo, ang apresasyon para sa putli nga pagsimba nag-usmod. Ang mga Israelinhon nagsugod pa gani sa pag-alagad kay Baal kag sa sagrado nga mga haligi.⁠a Subong resulta, ginhatag ni Jehova ang iya katawhan sa mga kamot sang mga Sirianhon sa sulod sang walo ka tuig. Nian nangayo sing bulig sa Dios ang mga Israelinhon. Sing maluluy-on, namati sia. Ginbangon ni Jehova ang isa ka hukom, si Otniel, agod luwason ang Iya katawhan.​—⁠Hukom 3:​7-11.

Ining mga hitabo dapat kuntani nga nagtudlo sa mga Israelinhon sing sadsaran nga kamatuoran​—⁠ang pagkamatinumanon kay Jehova nagadala sing mga pagpakamaayo, samtang ang pagkadimatinumanon nagaresulta sa mga sumpa. (Deuteronomio 11:​26-28) Apang, ang katawhan sang Israel wala makatuon sing leksion. Pagkatapos sang 40-ka-tuig nga paghidait, gintalikdan nila liwat ang putli nga pagsimba.​—⁠Hukom 3:⁠12.

Nadaug sang Moab

Sini nga tion gintugutan ni Jehova ang iya katawhan nga mahulog sa mga kamot ni Hari Eglon sang Moab. Ginalaragway sia sang Biblia subong “tawo nga tama katambok.” Sa bulig nanday Amon kag Amalec, ginsalakay ni Eglon ang Israel kag ginpahamtang ang iya palasyo sa Jerico, “ang siudad sang mga palma.” Daw indi gid nahisuno nga ang nahaunang Canaanhon nga siudad nga nadaug sang Israel amo karon ang ginahamtangan sang ulong-talatapan sang isa nga nagasimba sa butig nga dios nga si Cemos!⁠b​—⁠Hukom 3:​12, 13, 17.

Ginpigos ni Eglon ang mga Israelinhon sa sulod sang 18 ka tuig, ayhan nagabuhis sa ila sing mabug-at. Paagi sa pagpatuman sang pulupanag-on nga pagbuhis, napabakod sang Moab ang palangabuhian sini samtang nagakaubos naman ang manggad sang Israel. Sing halangpunon, ang katawhan sang Dios nangayo sing paumpaw, kag sa liwat si Jehova namati. Nagbangon sia sa ila sing isa pa ka manluluwas​—⁠sini nga tion ang Benjaminhon nga si Ehud. Agod matapos ang kapintas ni Eglon sa Israel, si Ehud nagbuko sa paghulag sa adlaw sang masunod nga pagbayad sing buhis.​—⁠Hukom 3:​14, 15.

Sa paghanda para sa iya maisugon nga hulag, si Ehud naghimo sing duha-sing-sulab nga espada nga isa ka maniko ang kalabaon. Kon ini malip-ot nga maniko, ang hinganiban mga 38 sentimetros kalaba. Ginakabig ini sang iban nga isa ka daga. Maathag nga wala sing nagabangday sa ulot sang sulab kag sang polo. Busa, matago ni Ehud ang iya diutay nga espada sa piniluan sang iya panapton. Dugang pa, bangod walis si Ehud, mataklus niya ang iya espada sa iya tuo​—⁠indi ang kinaandan nga ginabutangan sing hinganiban.​—⁠Hukom 3:​15, 16.

Ang estratehiya ni Ehud makatalagam. Halimbawa, ano abi kon ginrikisa sang mga bantay sang hari si Ehud kon bala may hinganiban sia? Bisan pa nga wala ginrikisa, pat-od gid nga indi nila pagpabay-an nga nagaisahanon lamang ang ila hari upod sa isa ka Israelinhon! Apang kon ginbilin gid man nila si Eglon nga nagaisahanon kag napatay sia, paano makapalagyo si Ehud? Daw ano kalayo ang madalaganan niya antes matukiban sang mga alagad ni Eglon ang natabo?

Wala duhaduha nga ginbinagbinag ni Ehud ina nga mga detalye, ayhan ginhunahuna ang madamong makapahamak nga resulta. Apang, gindayon niya ang iya plano, nagpakita sing kaisog kag pagtuo kay Jehova.

Pagkitaay ni Ehud kag ni Eglon

Ang adlaw sa paghatag sing masunod nga buhis nag-abot na. Si Ehud kag ang iya mga tinawo nagsulod sa palasyo sang hari. Wala madugay, nagatindog na sila sa atubangan mismo ni Hari Eglon. Apang indi pa tion agod magsalakay si Ehud. Pagkatapos nga mahatag ang buhis, ginpalakat ni Ehud ang mga nagdala sing buhis.​—⁠Hukom 3:​17, 18.

Ngaa ginpalantang ni Ehud ang pagsalakay kay Eglon? Hinadlukan bala sia? Wala gid! Agod matuman ang iya plano, kinahanglan nga masugilanon sing pribado ni Ehud ang hari​—⁠butang nga wala ginhatag sa iya sa sining nahauna nga pagkitaay. Dugang pa, kinahanglan nga makapalagyo sing maabtik si Ehud. Mas mahapos nga makapalagyo ang isa ka tawo sangsa bug-os nga alagad sang mga nagdala sing buhis. Gani, naghulat si Ehud sing isa ka nagakaigo nga tion. Ang malip-ot nga pagduaw kay Eglon nakabulig sa iya agod mangin pamilyar sa kahimtangan sang palasyo kag sa pagpat-od kon tubtob diin ang seguridad sang hari.

Sang nakalab-ot na sa “mga batong tinigban sa luyo sang Gilgal,” ginbayaan ni Ehud ang iya mga tinawo kag nagbalik sa palasyo ni Eglon. Ang paglakat sing halos duha ka milya naghatag kay Ehud sing diutay nga tion agod mabinagbinag ang iya misyon kag makapangamuyo sing pagpakamaayo ni Jehova.​—⁠Hukom 3:⁠19.

Si Ehud Nagbalik

Si Ehud liwat nga gin-abiabi sa palasyo. Ayhan nalipay si Eglon sa daku nga buhis nga ginhatag niya. Bisan pa nga ang nahauna nga pagduaw makadali lamang, naghatag ini kay Ehud sing nagakaigo nga kahigayunan agod mangin maayo ang kaangtanan sa hari. Ano man ang natabo, si Ehud didto liwat sa atubangan ni Eglon.

“May sekreto ako nga balita para sa imo, O hari,” siling ni Ehud. Ang katunayan nga nakapalapit sia sing subong sini nagapakita nga ginatuytuyan sia ni Jehova. Apang, may problema. Ang “sekreto nga balita” ni Ehud indi mahimo hambalon sa atubangan sang mga alagad sang hari. Kon si Jehova magapasilabot, kinahanglan gilayon ni Ehud ina nga bulig. “Hipos!” sugo sang hari. Bangod indi luyag ni Eglon nga mabatian ining “sekreto nga balita,” ginpalakat niya ang iya mga alagad. Handurawa lamang ang kalipay ni Ehud!​—⁠Hukom 3:⁠19.

Nagalingkod si Eglon sa iya hulot nga naibabaw sang nagpalapit kag nagsiling sa iya si Ehud: “May balita ako gikan sa Dios para sa imo.” Sa paghinambit sa “Dios,” ginpatuhuyan bala ni Ehud si Cemos? Ayhan amo sina ang hunahuna ni Eglon. Bangod interesado sia, nagtindog sia sa iya trono kag nagtindog sing malaumon. Nagpalapit si Ehud, ayhan sing mahalungon agod indi magsuspetsa ang hari nga salakayon sia. Nian, sing maabtik, “ginkuot ni Ehud ang iya kamot nga wala kag gingabot ang espada gikan sa iya paa nga tuo kag ginbuno ini sa tiyan ni [Eglon]. Kag ang polo man nagsalop upod sa sulab, kay wala niya paggabuta ang espada sa iya tiyan, kag naglapos ini sa likod.”​—⁠Hukom 3:​20-22.

Nagaangan-angan lang sa malapit, ang mga alagad sang hari wala magkinagula. Apang yara gihapon sa katalagman si Ehud. Sa bisan ano nga tion ang mga alagad ni Eglon mahimo nga magasulod kag makita ang bangkay sang ila natumba nga hari. Dapat gid makapalagyo sa gilayon si Ehud! Ginkandado ang mga ganhaan, nag-agi sia sa balkon sang hulot nga naibabaw.​—⁠Hukom 3:​23, 24a.

Pagkatukib kag Pagkalutos

Sang ulihi natingala na ang mga alagad ni Eglon. Apang, wala sila mangahas nga paakigon ang hari paagi sa pagtublag sang iya pribado nga pagpakigsapol. Nian nakita nila nga ang mga ganhaan sang hulot nga naibabaw nakandaduhan. “Nagapahuway lamang sia sa matugnaw nga hulot,” pangatarungan nila. Apang, sa pagligad sang tion ang ila katingala nangin kabalaka. Indi na makahulat pa ang mga alagad ni Eglon. “Sa sini ginkuha nila ang yabi kag ginbuksan [ang mga ganhaan sang hulot nga naibabaw], kag, tan-awa! ang ila ginuo napukan nga patay sa salog!”​—⁠Hukom 3:​24b, 25.

Samtang, si Ehud nakapalagyo. Nag-agi sia sa mga batong tinigban sa Gilgal kag nakalab-ot sang ulihi sa Seira, isa ka duog sa kabakuluran sang Efraim. Gintipon ni Ehud ang katawhan sang Israel kag ginpangunahan sila sa isa ka nahiusa nga pagsalakay sa mga Moabinhon. Ang kasaysayan nagasugid nga “ginpatay nila sa Moab ang napulo ka libo ka lalaki, ang tagsa ka mabakod kag isganan nga lalaki; wala sing bisan isa ka lalaki ang nakapalagyo.” Sa pagkalutos sang Moab, ang duta sang Israel wala na gintublag sa sulod sang 80 ka tuig.​—⁠Hukom 3:​26-30.

Pagtuon Gikan sa Halimbawa ni Ehud

Ginpahulag si Ehud bangod sang pagtuo sa Dios. Ang Hebreo kapitulo 11 wala nagahinambit sing espesipiko sa iya subong ang isa nga “paagi sa pagtuo nakadaug sing mga ginharian, . . . naggamhanan sa inaway, nakapapalagyo sang mga hangaway sang mga dumuluong.” (Hebreo 11:​33, 34) Apang, ginsuportahan ni Jehova si Ehud samtang nagapanghikot sia sa pagtuo kag ginluwas ang Israel gikan sa mapintas nga paggahom ni Hari Eglon.

Ang kaisog amo ang isa sang mga kinaiya ni Ehud. Kinahanglan gid niya nga mangin maisog agod magamit sing epektibo ang isa ka literal nga espada. Subong mga alagad sang Dios karon nga mga adlaw, wala kita nagagamit sing subong sina nga espada. (Isaias 2:​4; Mateo 26:52) Apang, nagagamit kita sing “espada sang espiritu,” ang Pulong sang Dios. (Efeso 6:17) Si Ehud sampaton sa paggamit sang iya hinganiban. Dapat man kita mangin sampaton sa paggamit sang Pulong sang Dios samtang ginabantala naton ang maayong balita sang Ginharian. (Mateo 24:14) Ang personal nga pagtuon sa Biblia, regular nga pagtambong sa Cristianong mga miting, makugi nga pagpakigbahin sa ministeryo, kag ang mapangamuyuon nga pagsalig sa aton langitnon nga Amay magabulig sa aton nga mailog ang mga kinaiya nga ginpakita ni Ehud, isa gid ka tawo nga may pagtuo kag kaisog.

[Mga footnote]

[Kapsion sa pahina 31]

Si Ehud kag ang iya mga tinawo naghatag sing buhis kay Hari Eglon

[Kapsion sa pahina 31]

Ginkopya gikan sa Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s