Amo ini ang ginsiling ni David sa hari parte kay Goliat: “Wala sing isa nga dapat madulaan sing kaisog bangod sa iya.” Nadulaan na gid man sing kaisog si Saul kag ang iya mga tinawo bangod kay Goliat. Mahimo nga ginpaanggid nila ang ila kaugalingon sa sina nga higante, kag ginapanan-aw nga tagadughan lang sila sina nga tawo. Ginapamensar nila nga wala gid sila sing padaug sa higante. Pero indi amo sina ang ginapensar ni David. Subong sang makita naton, lain ang iya pagtan-aw sa problema. Gani nagpresentar sia nga makig-away kay Goliat.—1 Samuel 17:32.

Nakita ni David ang kadakuon ni Goliat ukon ang iya mga armas. Pero wala sia mahadlok sa sini. Lain ang iya pagtan-aw sangsa pagtan-aw ni Saul kag sang mga soldado sini. Wala ginpaanggid ni David ang iya kaugalingon kay Goliat. Kundi ginpaanggid niya si Goliat kay Jehova. Nagataas si Goliat sing siam ka pie kag anom ka pulgada, gani nagalabaw gid sia sa iban nga soldado, pero mas daku pa bala sia sangsa Soberano sang uniberso? Ang matuod, pareho sa tanan nga tawo, daw insekto lamang sia nga malapit na lang tapakon ni Jehova!

Samtang nagadalagan si David pakadto sa iya kontra, nagkuot sia sing bato sa iya suludlan. Ginbutang niya ini sa iya labyog, kag ginlibotlibot ang labyog sa ibabaw sang iya ulo asta nga naghagunos ini. Si Goliat, nga mahimo ara sa likod sang iya manugdala sing taming, nagpalapit kay David. Nangin disbentaha gid ang kataason ni Goliat. Bangod kinaandan lang ang kataason sang manugdala sang iya taming, indi sini maproteksionan ang iya ulo. Kag amo gid ina ang ginpuntariya ni David.—1 Samuel 17:41.

Ang Biblia nagsiling nga ang kataason ni Goliat “anom ka maniko kag isa ka dangaw.” (1 Samuel 17:4) Ang isa ka maniko nagalaba sing 17.5 ka pulgada kag ang isa ka dangaw sing 8.75 ka pulgada. Buot silingon, siam ka pie kag anom ka pulgada ang iya kataason. Ginasiling sang iban nga imposible nga amo sini kataas si Goliat, pero hunahunaa: Sa aton panahon, ang pinakamataas nga tawo nga narekord nagataas sing 8 ka pie kag 11 ka pulgada. Gani imposible bala nga si Goliat mas mataas sa iya sing mga anom ka pulgada ukon mas mataas pa? Halin sia sa tribo sang Refaim, nga kilala sa indi kinaandan nga kataason. Ang isa ka sinulatan sa Egipto sang ika-13 nga siglo B.C.E. nagsambit parte sa pila ka ginakahadlukan nga mga soldado sa Canaan nga nagataas sing sobra sa walo ka pie. Gani bisan pa indi kinaandan ang kataason ni Goliat, posible ini.