¹² Naakig gid sia! Ang pamatan-on nga ginsambit sa umpisa nagsiling kay Abigail: “Sia nagyaguta sa ila.” Nagreklamo gid si Nabal kay indi niya luyag ihatag ang iya hamili nga tinapay, tubig, kag karne. Ginpakalain niya si David subong wala pulos nga tawo kag ginkomparar sia sa isa ka naglayas nga suluguon. Mahimo nga pareho kay Saul, akig gid si Nabal kay David. Wala nila gintamod si David pareho sang pagtamod ni Jehova sa iya. Ginhigugma sang Dios si David kag ginkabig sia indi subong rebelde nga ulipon kundi subong palaabuton nga hari sang Israel.—1 Sam. 25:10, 11, 14.

14. (a) Sa ano nga paagi naghimo si Abigail sang una nga tikang para masolusyunan ang problema nga ginhimo ni Nabal? (b) Ano nga leksion ang matun-an naton sa kinatuhayan ni Nabal kag ni Abigail? (Tan-awa man ang footnote.)

¹⁴ Nakita na naton ang una nga tikang nga ginhimo ni Abigail para masolusyunan ang problema. Indi pareho sa iya bana nga si Nabal, ginpamatian ni Abigail ang suluguon. Ining suluguon nagsiling parte kay Nabal: “Sia among tawo nga hurushurus, nga wala sing isa nga makahambal sa iya.”c (1 Sam. 25:17) Bangod bugalon si Nabal, wala gid sia namati. Madamo man sing bugalon bisan subong. Pero nakahibalo ining pamatan-on nga indi amo sini si Abigail, gani sia ang ginsugiran niya sini nga problema.