Mangin Suod sa Dios

Kon “ang Boong kag Mahinulsulon nga Tagiposoon” Mangayo sing Kapatawaran

2 SAMUEL 12:1-14, APD

KITA tanan pirme makasala. Bisan gani grabe na ang aton paghinulsol, mahimo mamangkot pa kita: ‘Batunon bala sang Dios ang akon sinsero nga pangamuyo sang paghinulsol? Patawaron bala niya ako?’ Ang Biblia nagapasalig sa aton: Bisan wala ginatolerar ni Jehova ang sala, nagapatawad sia sa isa nga mahinulsulon. Amo gid sini ang ginhimo ni Jehova kay Hari David sang dumaan nga Israel. Mabasa ini sa 2 Samuel kapitulo 12.

Handurawa ang natabo. Nakahimo si David sing grabe nga sala. Nagpakighilawas sia kay Batseba. Gusto niya tabunan ang iya ginhimo. Pero, sang wala ini matigayon, ginpangitaan niya sing paagi nga mapatay ang bana ni Batseba. Gintago ini ni David sa sulod sang pila ka bulan nga daw sa wala lang sing natabo. Pero nakita ini tanan ni Jehova. Grabe ang sala nga ginhimo ni David pero nakita man ni Jehova nga puede pa sia maghinulsol. (Hulubaton 17:3) Ano ang himuon ni Jehova?

Ginpadala ni Jehova si propeta Natan kay David. (Bersikulo 1) Sa bulig sang balaan nga espiritu, gin-istorya ni Natan ang hari. Ginpili gid niya sing maayo ang iya mga tinaga. Paano niya mapakita nga ginadaya lang ni David ang iya kaugalingon? Kag paano niya mabuligan si David nga marealisar kon daw ano kaserioso ang iya sala?

Wala gindiretso ni Natan si David. Ginsugiran anay niya si David sing isa ka istorya nga sigurado gid nga magatandog sa tagipusuon sang hari nga isa man anay ka manugbantay sing karnero. Parte ini sa manggaranon kag imol nga lalaki. ‘Madamo gid ang mga karnero kag mga baka sang manggaranon, pero ang imol may isa lang gid nga karnero nga babayi.’ Isa ka adlaw, may bisita ang manggaranon. Gusto niya ini handaan sing pagkaon pero nahilak sia nga ihawon ang isa sa iya mga karnero. Gani, ginkuha niya ang isa lang gid nga karnero sang imol nga tawo. Abi ni David tuodtuod ang istorya, gani naakig gid sia kag nagsiling: “Dapat patyon ang tawo nga naghimo sini.” Ngaa? Kay “wala sia sing kaluoy,” siling ni David.a—Bersikulo 2-6.

Natandog gid ang tagipusuon ni David sa gin-istorya ni Natan. Sa ginhambal ni David, daw pareho lang nga ginhukman niya ang iya kaugalingon. Ginsilingan sia ni Natan: “Ikaw ato nga tawo!” (Bersikulo 7) Bangod ginsugo lang ni Jehova si Natan, maathag nga kay Jehova gid nakasala si David. Sa iya ginhimo, ginpakita ni David nga wala sia sing respeto sa Dios nga naghatag sang sugo. “Ginsupak mo ako,” siling sang Dios. (Bersikulo 10) Daw ginbuno ang tagipusuon ni David. Sia nagsiling: “Nakasala ako” kay Jehova. Ginpasalig ni Natan si David nga patawaron sia ni Jehova pero, atubangon niya ang malain nga mga resulta sang iya ginhimo.—Bersikulo 13, 14.

Sang narealisar ni David nga grabe ang iya sala, ginsulat niya ang Salmo 51. Diri, ginpabutyag ni David ang iya grabe nga paghinulsol. Bangod sa iya ginhimo, ginpakahuy-an ni David si Jehova. Pero sang naghinulsol ang hari, ginpatawad sia ni Jehova amo nga nakasiling si David: “Ang boong kag mahinulsulon nga tagiposoon, O Dios, dili mo pagtamayon.” (Salmo 51:17) Ini nga mga tinaga makapaumpaw gid sa isa ka mahinulsulon nga makasasala nga nagapangayo sing kapatawaran kay Jehova.

[Nota]