“Matarong Bala ang Imo Tagipusuon Dampig sa Akon?”

“Upod ka sa akon kag tan-awa ang akon indi pagtugot sing kaagaw kay Jehova.”​—⁠2 HARI 10:⁠16.

1, 2. (a) Paano naglain pa ang relihioso nga kahimtangan sang Israel? (b) Sang 905 B.⁠C.⁠E., anong hinali nga mga pagbag-o ang buot na mahanabo sa Israel?

ANG tuig 905 B.⁠C.⁠E. isa anay ka tion sang daku nga pagbag-o sa Israel. Halos 100 ka tuig antes sini, ginpahanabo ni Jehova nga matunga ang nahiusa nga ginharian sang Israel bangod sang pag-apostasya ni Solomon. (1 Hari 11:​9-13) Ang nabagatnan nga ginharian, ang Juda, gingamhan sadto sang anak ni Solomon nga si Rehoboam samtang ang naaminhan nga ginharian, ang Israel, gingamhan ni Hari Jeroboam, isa ka Efraimnon. Makapasubo nga indi gid maayo ang panugod sang naaminhan nga ginharian. Wala pagtuguti ni Jeroboam ang iya mga sakop nga magkadto sa nabagatnan nga ginharian agod magsimba sa templo, kay nahadlok sia nga basi magbalik sila sa panimalay ni David. Gani gintukod niya ang pagsimba sa tinday nga baka sa Israel kag amo ini ang ginsugdan sang idolatriya nga nagdugay sa pila ka kasangkaron sa maragtas sang naaminhan nga ginharian.​—⁠1 Hari 12:​26-33.

² Naglain pa tapat ang kahimtangan sang maghari si Ahab nga anak ni Omri. Ginsakdag sang iya dumuluong nga asawa, si Jezebel, ang pagsimba kay Baal kag ginpapatay ang mga manalagna ni Jehova. Walay sapayan sang tampad nga mga paandam ni manalagna Elias, wala sing ginhimo si Ahab agod punggan sia. Apang, sang 905 B.⁠C.⁠E., napatay si Ahab, kag ang iya anak nga si Jehoram amo ang naggahom. Tion na karon nga tinluan ang pungsod. Ginpahibalo ni Eliseo nga salili ni Elias ang kumander sang militar nga si Jehu nga sia ang ginhaplas ni Jehova agod mangin masunod nga hari sang Israel. Ang iya komisyon? Pamatyon ang makasasala nga panimalay ni Ahab kag itimalos ang dugo sang mga manalagna nga ginpaagay ni Jezebel!​—⁠2 Hari 9:​1-10.

3, 4. Paano ginpakita ni Jehonadab nga ang iya tagipusuon ‘matarong dampig sa tagipusuon ni Jehu’?

³ Bilang pagtuman sa sugo sang Dios, ginpatay ni Jehu ang malaut nga si Jezebel, kag pagkatapos sadto gintinluan niya ang Israel paagi sa pagpapas sa panimalay ni Ahab. (2 Hari 9:​15⁠–​10:​14, 17) Nian nakakita sia sing sumalakdag. “Nasugata niya si Jehonadab nga anak ni Recab nga nagapakari sa pagsugata sa iya. Sang mapakamaayo sia, nagsiling sia sa iya: ‘Matarong bala ang imo tagipusuon dampig sa akon, subong nga ang akon tagipusuon matarong dampig sa imo tagipusuon?’ Sa sini si Jehonadab nagsiling: ‘Amo gid.’ ‘Kon amo ini, idaho sa akon ang imo kamot.’ Gani gindaho niya sa iya ang iya kamot. Kag ginpasaka niya sia upod sa iya sa kangga. Nian nagsiling sia: ‘Upod ka sa akon, kag tan-awa ang akon indi pagtugot sing kaagaw kay Jehova.’ Kag ginpasakay niya sia sa iya kangga.”​—⁠2 Hari 10:​15, 16.

⁴ Si Jehonadab (ukon, Jonadab) indi isa ka Israelinhon. Walay sapayan, nahisanto sa iya ngalan nga (nagakahulugan “Handa si Jehova,” “Dungganon si Jehova,” ukon “Maalwan si Jehova”) isa sia ka sumilimba ni Jehova. (Jeremias 35:6) Sa pagkamatuod, tumalagsahon ang iya interes nga makita ang ‘indi pagtugot [ni Jehu] sing kaagaw kay Jehova.’ Paano naton ini nahibaluan? Ti, ang iya pagsugata sa hinaplas nga hari sang Israel indi aksidente lamang. Si Jehonadab ‘nagpakari sa pagsugata sa iya,’ kag natabo ini sa tion nga napatay na ni Jehu si Jezebel kag ang iban pa sa panimalay ni Ahab. Nahibaluan ni Jehonadab kon ano ang nagakatabo sang ginbaton niya ang pangagda ni Jehu nga magsaka sa iya kangga. Maathag nga dampig sia kay Jehu​—⁠kag kay Jehova​—⁠sa sining pagsumpunganay sang butig kag matuod nga pagsimba.

Ang Modernong-Adlaw nga Jehu kag ang Modernong-Adlaw nga Jehonadab

5. (a) Anong mga pagbag-o ang malapit na mahanabo para sa tanan nga katawhan? (b) Sin-o ang Daku Pa nga Jehu, kag sin-o ang nagarepresentar sa iya sa duta?

⁵ Sa indi madugay, ang kahimtangan karon magabag-o para sa tanan nga katawhan sing subong ka hinali sa pagbag-o nga natabo anay sa Israel sadto sang 905 B.⁠C.⁠E. Malapit na ang tion nga tinluan ni Jehova ang duta gikan sa tanan nga malain nga resulta sang impluwensia ni Satanas, lakip ang butig nga relihion. Sin-o ang modernong-adlaw nga Jehu? Wala liwan kundi si Jesucristo, nga sa iya ginapatuhoy ang matagnaon nga mga pulong: “Itaklus ang imo espada sa imo hita, O gamhanan, upod ang imo pagkadungganon kag imo pagkahari. Kag sa imo pagkahari sakay ka sing madinalag-on; sakay ka para sa kamatuoran kag pagkamapainubuson kag pagkamatarong.” (Salmo 45:​3, 4) Ginarepresentar si Jesus sa duta sang “Israel sang Dios,” ang hinaplas nga mga Cristiano, “nga nagatuman sa mga sugo sang Dios kag may hilikuton sa pagpanaksi tuhoy kay Jesus.” (Galacia 6:​16; Bugna 12:17) Sugod sang 1922 ining hinaplas nga kauturan ni Jesus walay kahadlok nga nagapaandam tuhoy sa nagapakari nga paghukom ni Jehova.​—⁠Isaias 61:​1, 2; Bugna 8:​7⁠–​9:​21; 16:​2-21.

6. Sin-o ang nagguwa gikan sa mga pungsod agod magsakdag sa hinaplas nga mga Cristiano, kag paano sila, kon sa aton pa, nagsakay sa kangga, sang Daku Pa nga Jehu?

⁶ Indi isahanon ang hinaplas nga mga Cristiano. Subong nga si Jehonadab nagguwa agod sugataon si Jehu, madamo gikan sa mga pungsod ang nagguwa agod sakdagon si Jesus, ang Daku Pa nga Jehu, kag ang iya dutan-on nga mga tiglawas sa ila panindugan para sa matuod nga pagsimba. (Zacarias 8:23) Gintawag ni Jesus nga iya “iban nga mga karnero,” sang 1932 ginkilala sila subong amo ang modernong-adlaw nga katumbas ni Jehonadab sang una kag gin-agda nga ‘magsaka sa kangga’ sang modernong-adlaw nga Jehu. (Juan 10:16) Paano? Paagi sa ‘pagtuman sa mga sugo sang Dios’ kag pagpakigbahin upod sa mga hinaplas sa “hilikuton sa pagpanaksi tuhoy kay Jesus.” Sa modernong mga tion, nagalakip ini sang pagbantala sing maayong balita sang natukod na nga Ginharian sang Dios sa idalom ni Jesus subong Hari. (Marcos 13:10) Sang 1935 ining mga “Jonadab” ginpakilala subong amo ang “dakung kadam-an” sang Bugna 7:​9-17.

7. Paano ginpakita sang mga Cristiano karon nga ang ila ‘tagipusuon matarong gihapon’ dampig sa tagipusuon ni Jesus?

⁷ Sugod sang katuigan 1930, maisugon nga ginpamatud-an sang dakung kadam-an kag sang ila hinaplas nga kauturan ang ila pagsakdag sa matuod nga pagsimba. Sa pila ka kadutaan sa Nasidlangan kag Nakatundan nga Europa, sa Malayo nga Sidlangan, kag sa Aprika, madamo sa ila ang napatay bangod sa ila pagtuo. (Lucas 9:​23, 24) Sa iban nga kadutaan, ginbilanggo sila, gingubat, ukon ginhingabot. (2 Timoteo 3:12) Daw ano ka dalayawon nga rekord sang pagtuo ang nahimo nila! Kag ginapakita sang 1997 nga Report Sang Tuig Sang Pag-alagad nga determinado gihapon sila sa pag-alagad sa Dios, bisan ano man ang matabo. Ang ila ‘tagipusuon matarong gihapon’ dampig sa tagipusuon ni Jesus. Ginpakita ini sang 1997, sang 5,599,931 ka manugbantala sang Ginharian, halos kalabanan sa ila mga “Jonadab,” ang naghinguyang sing kabug-usan nga 1,179,735,841 ka oras sa hilikuton nga pagpanaksi tuhoy kay Jesus.

Nagabantala Gihapon nga May Kakugi

8. Paano ginapakita sang mga Saksi ni Jehova ang ila kakugi para sa matuod nga pagsimba?

⁸ Kilala si Jehu nga madasig magpadalagan sang iya kangga​—⁠isa ka pamatuod sang iya kakugi sa pagtuman sang iya hilikuton. (2 Hari 9:20) Si Jesus, ang Daku Pa nga Jehu, ginalaragway subong ‘ginlamon’ sang kakugi. (Salmo 69:9) Gani, indi makapakibot nga ang matuod nga mga Cristiano karon kilala sa ila kakugi. Sa sulod sang kongregasyon kag sa publiko, ila ‘ginabantala ang pulong . . . sing maukod sa maayo nga panag-on, sa magamo nga panag-on.’ (2 Timoteo 4:2) Ang ila kakugi labi na nga napamatud-an sang maaga nga bahin sang 1997 sa tapos ang isa ka artikulo sa Ang Aton Ministeryo sa Ginharian nagpalig-on sa madamo nga mahimo, nga mag-auxiliary payunir. Ang tagsa ka pungsod nagpahamtang sing tulumuron sa kadamuon sang mga auxiliary payunir. Ano ang resulta? Talalupangdon gid! Nalampasan sang madamo nga sanga ang tulumuron nga kadamuon. Ang Ecuador nagpahamtang sing tulumuron nga 4,000 apang sang Marso nagreport ini nga 6,936 ang nag-auxiliary payunir. Ang Japan nagreport sing kabug-usan nga 104,215 sa sulod sang tatlo ka bulan. Sa Zambia, diin 6,000 ang nangin tulumuron, 6,414 ka auxiliary payunir ang nagreport sang Marso; 6,532 sang Abril; kag 7,695 sang Mayo. Sa bug-os nga kalibutan, 1,110,251 ang tingob nga kataason sang auxiliary kag regular nga mga payunir, 34.2-porsiento nga pag-uswag sangsa 1996!

9. Dugang sa pamalay-balay nga hilikuton, sa anong mga paagi ginapangita sang mga Saksi ni Jehova ang mga tawo agod sugiran sila sing maayong balita?

⁹ Ginsilingan ni apostol Pablo ang mga gulang nga taga-Efeso: “Wala ako mag-isol sa pagsugid sa inyo sang bisan ano sa mga butang nga mapuslanon ukon sa pagtudlo sa inyo sa publiko kag sa balay-balay.” (Binuhatan 20:20) Ginailog karon sang mga Saksi ni Jehova ang huwaran ni Pablo kag makugi nga ginabantala ang maayong balita sa balay-balay. Apang, mahimo nga indi mahapos maabtan ang mga tawo sa ila puluy-an. Busa, “ang matutom kag mainandamon nga ulipon” nagapalig-on sa mga manugbantala sang Ginharian nga palapitan ang mga tawo sa ila kumbuyahan, sa mga kalye, sa mga higad baybay, sa publiko nga mga parke​—⁠sa bisan diin nga may mga tawo. (Mateo 24:​45-47) Maayo gid ang mga resulta.

10, 11. Paano ang mga manugbantala sa duha ka pungsod nagpakita sing maayong inisyatibo sa pagpangita sa mga interesado nga sa kinaandan indi maabtan sa ila puluy-an?

¹⁰ Sa Copenhagen, Denmark, ang isa ka diutay nga grupo sang mga manugbantala nagabantala sa mga kalye sa guwa sang mga estasyunan sang tren. Kutob sang Enero tubtob Hunyo, nakapahamtang sila sing 4,733 ka magasin, nakapakighambal sa madamo nga tawo, kag nakahimo sing madamo nga pagduaw liwat. Ang pila ka utod sa sadto nga pungsod nakatukod sing mga ruta sa magasin sa mga balaligyaan. Ang isa ka banwa may daku nga tienda kada Biernes, diin linibo ang nagapanindahan. Gani naghimos ang kongregasyon sing regular nga pagpanaksi sa tiendahan. Sa isa ka duog, ang mga eskwelahan ginaduaw agod tanyagan sing isa ka pinutos sang impormasyon nga nagaunod sing mga publikasyon nga nagakabagay gid para sa mga manunudlo.

¹¹ Sa Hawaii naman, ginahimo ang mga panikasog agod malab-ot ang mga indi maabtan sa puluy-an. Ang pinasahi nga mga teritoryo nagalakip sang publiko nga mga duog (mga kalye, mga parke, mga lote nga palarkingan, kag mga dululugan sang bus), mga duog sa downtown, mga shopping center kag mga erport, pagpanaksi paagi sa telepono, publiko nga transportasyon (pagbantala sa mga bus), kag sa sulod sang mga kolehiyo. Nagahalong gid ang kongregasyon nga hustuhan lamang nga kadamuon sang mga Saksi ang ginapakadto sa tagsa ka teritoryo kag dapat nga nahanas sila sing nagakaigo para sa hilikuton. Ang organisado nga mga paninguha kaanggid sa sini ginahimo man sa madamo nga kadutaan. Subong resulta, nasapwan ang interesado nga mga tawo nga kuntani indi gid masapwan sa ministeryo sa balay-balay.

Pagtindog sing Malig-on

12, 13. (a) Anong taktika ang gingamit ni Satanas batok sa mga Saksi ni Jehova sang 1997? (b) Sa anong paagi ang butig nga propaganda nagbalandra sa isa ka pungsod?

¹² Sa pila ka kadutaan sang 1997, nangin biktima ang mga Saksi ni Jehova sang mapintas kag butig nga propaganda nga gintuyo agod makahimo sing legal nga aksion batok sa ila. Apang nagtindog sila sing malig-on! (Salmo 112:​7, 8) Nadumduman nila ang pangamuyo sang salmista: “Ang bugalon nagpahito sing kabutigan batok sa akon. Tuhoy sa akon, sa bug-os ko nga tagipusuon tumanon ko ang imo mga sugo.” (Salmo 119:69) Inang binutig nga publisidad isa lamang ka pamatuod nga ang matuod nga mga Cristiano ginadumtan subong sang gintagna ni Jesus. (Mateo 24:9) Kag kon kaisa nagabalandra ini. Ang isa ka tawo sa Belgium nakabasa sa isa ka bantog nga pamantalaan sa adlaw-adlaw sing isa ka artikulo nga nagapakalain sa mga Saksi ni Jehova. Bangod sa kakibot sa mapasipalahon nga mga komento, nagtambong sia sa miting sa Kingdom Hall pagka-Domingo sadto. Nangabay sia sing pagtuon sa Biblia upod sa mga Saksi kag madasig nga nag-uswag. Katapo anay sang isa ka gang ini nga tawo. Nabuligan sia sang iya pagtuon sa Biblia nga tinluan ang iya kabuhi, butang nga natalupangdan sang mga tawo sa palibot niya. Sa pagkamatuod, wala gid paghunahunaa sadtong tawo nga nagsulat sing mapasipalahon nga artikulo nga mangin amo sini ang resulta!

¹³ Ang iban sang bunayag sing tagipusuon nga mga tawo sa Belgium naghambal batok sa malimbungon nga propaganda. Lakip sa ila amo ang isa ka anay primer ministro nga nagbaton nga ginadayaw gid niya ang nahimuan sang mga Saksi ni Jehova. Ang isa ka diputado nga tawo nagsulat: “Batok sa mga sugid-sugid nga ginapalapta kon kaisa, para sa akon, [ang mga Saksi ni Jehova] indi gid makatalagam sa Estado. Mga banwahanon sila nga mahigugmaon sa paghidait, masaligan, kag matinahuron sa mga awtoridad.” Maalamon, sa pagkamatuod, ang mga pulong ni apostol Pedro: “Hupti ang inyong maayong pagginawi sa tunga sang mga pungsod, agod paagi sa butang nga ginahambal nila batok sa inyo subong mga malauton, sila subong resulta sang inyo maayong binuhatan nga ila nasaksihan magahimaya sa Dios sa adlaw sang iya pag-usisa.”​—⁠1 Pedro 2:⁠12.

Isa ka Talalupangdon nga Pagsaulog sing Memoryal

14. Ano ang pila sang makakulunyag nga mga report tuhoy sa mga nagtambong sa Memoryal sang 1997?

¹⁴ Nagakaigo nga dapat tamdon sang mga nagapanaksi tuhoy kay Jesus ang Memoryal sang iya kamatayon subong isa ka daku nga butang sa sulod sang tuig. Sang 1997, 14,322,226 ang nagtambong sang Marso 23 agod saulugon ang okasyon. Labaw ina sing 1,400,000 sangsa 1996. (Lucas 22:​14-20) Sa madamong kadutaan ang tumalambong sa Memoryal naglabaw gid sa kadamuon sang mga manugbantala sang Ginharian, nagapakita nga maayo ang posibilidad para sa pag-uswag sa palaabuton. Halimbawa, sa Haiti, sang 1997 10,621 ang nangin kataason sang mga manugbantala, apang 67,259 ang nagtambong sa Memoryal. Mahimo mo usisaon ang tuigan nga report sa pahina 18 tubtob 21 kag tan-awa kon pila pa ka pungsod ang may kaanggid mataas nga mga tumalambong kon ipaanggid sa kadamuon sang mga manugbantala.

15. Sa pila ka kadutaan, paano nalandas sang aton kauturan ang daku nga mga problema agod masaulog ang Memoryal?

¹⁵ Para sa iban, ang pagtambong sa Memoryal indi nangin mahapos. Sa Albania, bangod sang magamo nga kahimtangan may curfew nga ginapatuman sa alas 7:​00 s.g. Sa 115 ka diutay nga grupo sa bug-os nga pungsod, ginsugdan ang Memoryal sang alas 5:​45 s.h. Nagtunod ang adlaw sang alas 6:​08 s.g., tanda nga nagsugod na ang Nisan 14. Ang mga emblema ginlibot sang mga alas 6:​15 s.g. Ang okasyon sa kalabanan nga grupo gintakpan sang hingapusan nga pangamuyo sang alas 6:​30 s.g., kag ang mga nagtambong dalidali nga nagpauli antes sang curfew. Sa gihapon, ang nagtambong sa Memoryal 3,154, kon ipaanggid sa kataason sang mga manugbantala nga 1,090. Sa isa ka pungsod sa Aprika, bangod sang magamo nga kahimtangan indi magamit ang Kingdom Hall, gani namat-od ang duha ka gulang nga magkitaay sa balay sang ikatlo nga gulang agod hambalan nga hiwaton ang selebrasyon sa diutay nga mga grupo. Antes makalab-ot sa amo nga balay, may kanal nga talabukon ang duha ka gulang. Apang, may mga tawo nga nag-inaway sa sadto nga duog, kag ginaluthang ang bisan sin-o nga magtabok sa kanal. Ang isa ka gulang nakatabok nga wala sing natabo. Ang ikaduha nagatabok sang makabati sia sing lupok. Nagdamhag sia sa duta kag nanago nga nagakamang samtang ang mga bala nagatagring sa ibabaw sang iya ulo. Madinalag-on nga nagmiting ang mga gulang, kag naatipan ang mga kinahanglanon sang kongregasyon.

“Gikan sa Tanan nga mga Pungsod kag mga Tribo . . . kag mga Hambal”

16. Ano ang ginhimo sang matutom kag mainandamon nga ulipon nga klase agod mawali ang maayong balita sa diutay nga mga grupo sang mga lenguahe?

¹⁶ Nagsiling si apostol Juan nga ang dakung kadam-an magagikan sa “tanan nga mga pungsod kag mga tribo kag katawhan kag mga hambal.” (Bugna 7:9) Busa, ginatinguhaan sang Nagadumala nga Hubon nga mabadbad ang mga literatura sa dugang pa nga mga lenguahe​—⁠lakip ang mga ginahambal sa nabaw-ing nga mga tribo kag diutay nga mga grupo sang katawhan. Sa Mozambique, halimbawa, ang tract nga Kabuhi sa Mahidaiton nga Bag-ong Kalibutan ginbalhag sa lima pa ka lenguahe. Sa Nicaragua, ang brosyur nga Agoma ang Kabuhi sa Duta sing Dayon! ginbadbad sa Miskito nga lenguahe​—⁠ang una nga publikasyon sang Watch Tower Society sa amo nga hambal. Nalipay gid ang madamo nga Miskito Indian sang makita nila ang brosyur sa ila kaugalingon nga lenguahe. Sang 1997 gin-aprobahan sang Sosiedad ang literatura sa 25 ka dugang pa nga lenguahe kag nag-imprinta sing kapin sa isa ka bilyon ka magasin.

17. Ano nga grupo sang lenguahe ang nabuligan sa Korea, kag paano ang mga videotape nakabulig sing daku sa sini nga bahin sang populasyon?

¹⁷ Sa Korea, isa pa ka grupo ang nabuligan. Sang tuig 1997, nahiwat ang una-una gid nga kombension sa Koreano nga sign language. Napulog-lima ang sign language nga kongregasyon sa Korea nga may 543 ka manugbantala, apang 1,174 ang nagtambong sa kombension, kag 21 ang nabawtismuhan. Agod mabuligan ang mga bungol nga indi madali makahangop sang ginahambal ukon nasulat nga pulong, ginpatubas ang mga publikasyon sa videotape sa 13 ka nanuhaytuhay nga sign language. Sa amo, ginabuligan ang mga bungol sa “pagbasa” kag sa pagtuon pa gani sing maayong balita, nga may maayong mga resulta. Sa Estados Unidos, sang una lima ka tuig gid ang ginahinguyang antes ang isa ka bungol nga tawo mag-uswag tubtob makapabawtismo. Karon, bangod sang pila ka video nga matigayon sa Amerikano nga Sign Language, para sa iban nga mga bungol, napanubo ina sa mga isa ka tuig lang.

‘Pagpabilin sa Kangga’

18. Sa tapos masugata si Jehonadab, ano ang ginhimo ni Jehu?

¹⁸ Sadto sang 905 B.⁠C.⁠E., sang mag-upod si Jehonadab, naghikot si Jehu agod laglagon ang butig nga pagsimba. Gin-agda niya ang tanan nga sumilimba ni Baal: “Pakabalaan kamo sing isa ka pagtilipon kay Baal.” Nian ginpahibalo niya ang bug-os nga pungsod agod mapat-od nga wala sing isa ka sumilimba ni Baal ang malaktawan. Samtang nagadugok ang kadam-an pasulod sa dakung templo sang butig nga dios, ginbantayan sing maayo nga wala sing isa ka sumilimba ni Jehova ang makasulod. Pagkatapos, ginpamatay ni Jehu kag sang iya hangaway ang mga sumilimba ni Baal. “Sa amo ginlaglag ni Jehu si Baal gikan sa Israel.”​—⁠2 Hari 10:​20-28.

19. Bangod sang malapit na matabo sa katawhan, ano ang dapat naton ipakita, kag dapat kita magmaukod sa anong hilikuton?

¹⁹ Sa karon, ang hingapusan nga paghukom sa tanan butig nga relihion malapit na. Sa idalom sang pagtuytoy sang mga anghel ginawali sang mga Cristiano ang maayong balita sa tanan nga katawhan, ginapalig-on sila nga magkahadlok sa Dios kag magguwa gikan sa butig nga relihion. (Bugna 14:​6-8; 18:​2, 4) Ang mga mahagop ginapalig-on nga magpasakop sa Ginharian sang Dios sa idalom sang nakalingkod sa trono nga Hari ni Jehova, si Jesucristo. (Bugna 12:10) Sa sining makahalawathawat nga tion, indi naton dapat pagtugutan nga magluya ang aton kakugi samtang nagatindog kita sing malig-on para sa matuod nga pagsimba.

20. Ano ang imo determinado nga himuon sa tion sang 1998 nga tuig sang pag-alagad?

²⁰ Isa ka bes, sang si Hari David ginapiutan sing daku, nangamuyo sia: “Malig-on ang akon tagipusuon, O Dios, malig-on ang akon tagipusuon. Magaamba ako kag magatulalay. Dayawon ko ikaw sa tunga sang katawhan, O Jehova.” (Salmo 57:​7, 9) Kabay nga magmalig-on man kita. Sa tion sang 1997 nga tuig sang pag-alagad, walay sapayan sang madamo nga kabudlayan, isa ka mabaskog nga singgit sang pagdayaw ang ginbungat para sa himaya ni Jehova nga Dios. Kabay nga kaanggid man, ukon daku pa, nga singgit ang mabatian sa karon nga tuig sang pag-alagad. Kag kabay nga magmatuod ini bisan ano man ang himuon ni Satanas sa pagpaluya ukon sa pagpamatok sa aton. Sa amo, mapakita naton nga ang aton tagipusuon nagapabilin nga matarong dampig sa tagipusuon sang Daku Pa nga Jehu, si Jesucristo, kag magasabat kita sing bug-os kalag sa inspirado nga pagpalig-on: “Magkalipay kay Jehova kag magkasadya, kamo nga mga matarong; kag magsinggit sa kalipay, tanan kamo nga matadlong sa tagipusuon.”​—⁠Salmo 32:⁠11.

Mapaathag Mo Bala?

◻ Anong mga pagbag-o ang natabo sa Israel sang 905 B.⁠C.⁠E.?

◻ Sin-o ang modernong-adlaw nga Jehu, kag paano ginpakita sang “dakung kadam-an” nga ang ila ‘tagipusuon matarong’ dampig sa iya tagipusuon?

◻ Ano nga estadistika gikan sa tuigan nga report ang nagailustrar sang kakugi sang mga Saksi ni Jehova sa tion sang 1997 nga tuig sang pag-alagad?

◻ Bisan ano man ang himuon ni Satanas batok sa aton, anong espiritu ang ipakita naton sa tion sang 1998 nga tuig sang pag-alagad?

[Tsart sa pahina 18-21]

1997 NGA REPORT SANG PAG-ALAGAD SANG MGA SAKSI NI JEHOVA SA BUG-OS KALIBUTAN

(Tan-awa ang bound volume)

[Retrato sa pahina 15]

Ang talalupangdon nga tumalambong sa Memoryal nagapakita sing maayong posibilidad para sa pag-uswag sa palaabuton

[Retrato sa pahina 16]

Subong nga ginsakdag ni Jehonadab si Jehu, ginasakdag man sang “dakung kadam-an” karon ang Daku Pa nga Jehu, si Jesucristo, kag ang iya hinaplas nga mga kauturan